Sokusele insuku ezintathu ukuthi kwenziwe ukhetho lukamongameli, olwamanye amalunga edale leSenate lawe House of Representatives lezigaba ezitshiyeneyo emadolobheni.

Okwamanye amabandla amakhulu kwele Melika akhankasa emisakazweni, kumabonakude, emadolobheni, emaphendleni lenkundleni zokuxhumana esenzela ukukhunga abantu ukuthi babavotele.

Ibandla lama Republicans limelwe nguMongameli Donald Trump lomsekeli wakhe uMnu. Mike Pence, kuthi-ke elama Democrats limelwe nguMnu. Joe Biden loNkosikazi Kamala Harris. Okwamanje sokulabantu abedlula izigidi ezingamatshumi ayisificaminwemibili – 81 million - asebevote kukhetho lolu.

Abadabuka eZimbabwe abahlala kwele Melika asebeyingxenye yelizwe leli bayavota kukhetho lolu.

UNkosazana Musawenkosi Ndlovu, ohlala duzane leWashington DC, uthi kuqakathekile ukuvota kukhetho lolu.

Lokhu kusekelwa nguMnu. Phithizela Ngcobo, ozavota kukhetho lolu. UNgcobo uthi banengi abantu abazavotelwa kukhetho lwalonyaka

UNgcobo uthi abancintisane kukhethwa abazamela amabandla abanjengo Biden loNkosikazi Harris badonsa ndawonye okwamanje.

Banengi abantu abalandela ukhetho lweMelika lonyaka. Abanye bathi zindala zombili kube labanye njalo abathi uBiden engaboni engani senqobile ngoba uNkosikazi Hillary Clinton, owancintisana loTrump ngomnyaka ka2016, wezwa ngokuwa ethembile.

UMnu. Bongani Mkhwananzi, odabuka eZimbabwe ohlala kwele South Africa, uthi akwaziwa ozanqoba kukhetho lolu.

Kukhetho lukamongameli, kumele onqobayo athole okuthiwa ngama electoral votes angamakhulu amabili lamatshumi ayisikhombisa – 270.

Ngomnyaka ka2016, uNkosikazi Clinton wathola amavoti amanengi elizweni leli kodwa wanqotshwa nguTrump owathola ama electoral votes amanengi kulaye.

Kulabanye abantu abadabuka kuzwekazi leAfrica abazancintisa kukhetho lweMelika oluzakwenziwa ngeviki ezayo, endaweni ezitshiyeneyo ezigoqela isigodlo selizwe leli iWashington, DC.

Bancintisa kuzigaba ezitshiyeneyo ezabelweni labanye abafisa ukungena kudale leSenate lele House of Representatives.

Akulamuntu odabuka eZimbabwe okwamanje okhangelelwe ukuthi uzancintisa kukhetho lolu.

Abanengi badabuka kwele Nigeria, eGhana, Kenya lamanye amazwe.

UMnu. Busani Mbuso Ntini, odabuka kwele Zimbabwe ohlala eMelika, uthi abancintisa kukhetho lolu ngabantu abathakazelela ezombangazwe njalo abanye babo sebahlala okwesikhathi eside eMelika.

Lokhu kusekelwa nguNkosikazi Priscilla Ndlovu, omunye odabuka kwele Zimbabwe, ohlala eSeattle, esabelweni seWashington, othi kazange angene kukhetho lolu ngoba kathakazeleli ezombusazwe elizweni leli.

UNkosikazi Ndlovu uthi banengi abantu abalakho ukunqoba kukhetho bengancintisa kwele Melika.