INTRO: UMongameli Donald Trump uthi ufuna kuhlolisiswe amavoti kwezinye indawo esabelweni seGeorgia okwanqoba khona uMnu. Joseph Biden, owebandla lama Demcorats, kukhetho olwenziwe ngoLwezi.

UTrump ufisa ukuthi kuhlolisiswe amavoti endaweni ezitshiyeneyo eGeorgia loba abavotela umongameli ababizwa ngokuthi yiElectoral College sebevotela uBiden esabelweni lesi.

UTrump uthi kumele kudingwe abantu abavotayo kuhlolwe ukuthi yibo ngempela abaphatheke kukhetho lukamongameli.

Kodwa abaphathintambo bezokhetho eGeorgia bathi uTrump uchitha isikhathi ekhuluma ngento engasoze yenzakale ngoba uBiden kaqilanga kukhetho lolu.

UBiden ulama Electoral Votes edlula amakhulu amathathu kuthi uTrump ulangamakhulu amabili lamatshumi amathathu lambili -232.

Imithethwandaba eminengi ithi akulabufakazi bokuthi ukhetho lolu lwebizwa libandla lama Democrats.

Banengi abathi uTrump kumele aphume esikhundleni. Omunye wabo nguMnu. Gabriel Ndebele.

UMnu. Jabulani Nkatha, ohlala Esiphezini esabelweni seMatabeleland South, laye uyakulandela okwenzakala eMelika.

UNkosazana Khethiwe Moyo uyakusekela lokhu.

Abalandeli baka Trump abanengi bathi ukhetho lwebiwa libandla lama Democrats. Abanye babo balungiselela ukutshengisela eWashington DC mhlaka 6 Zibandlela bekhonona ngempumela yokhetho lolu. Idale leHouse of Representatives lele Senate akhangelelwe ukuthi azabala amavoti awenziwe yiElectoral College ngosuku lolu.

Embed share

UTrump Lokhu Ezama Ukuguqula Impumela Yokhetho

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:41 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

UMongameli Donald Trump uqhubekela phambili esithi ukhetho olenziwe ngoLwezi lwebiwa libandla lama Democrats ngakho-ke kumele kudingwe igqwetha elibizwa ngokuthi yiSpecial Counsel elizahlolisisa impumela yokhetho ezabelweni ezimbalwa.

UTrump kukhanya efuna ukufaka esikhundleni lesi uSidney Powell, owaziwa ngokusekela imicabango engaqedakaliyo kwezombangazwe lezokhetho.

UPowell lamanye amagqwetha sebezame behluleka ukuguqula impumela yokhetho eWisconsin, Pennyslavania, Michigan leGeorgia, okwanqoba uMnu. Joseph Biden webandla lama Democrats.

UTrump wethule umbiko enkundleni yokuxhumana eyeTwitter ngoLwesithathu kusihlwa esithi kumele kudingwe ngendlela zonke umuntu ozahlolisisa impumela yokhetho.

Wenza lokhu loba kungelabufakazi bokuthi ukhetho lwebiwa libandla eliphikisayo eMelika. Osanda kuphuma esikhundleni segqwetha elikhulu lelizwe eMelika, uMnu. William Barr, uthi akulasizatho sokuthi kudingwe umuntu ozahlolisisa impumela yokhetho.

Abadabuka eZimbabwe abalandela okwenzakala kwele Melika bathi uTrump kukhanya engani kafuni ukutshiya isikhundla sikamongameli loba enqotshwe nguBiden.

UMnu. Innocent Ndibali, owebandla leEconomic Freedom Fighters Zimbabwe, uthi uTrump kumele avume ukuthi uqotshwe nguBiden.

Odabuka eZimbabwe ohlala eMelika, uMnu. Busani Mbuso Ntini, uthi sokuseduze ukuthi uTrump asuke esikhundleni.

Okwamanje uTrump ulwisana labakubandla lakhe leliphikisayo ngokubalwa kwamavoti enziwe yiElectoral College okumele abalwe mhlaka 6 Zibandlela.

Uzama ukukhuthaza abanye bakhe ukuthi balahle amavoti awezabelo acabangela ukuthi ukhetho lwebiwa nguBiden labanye bakhe. Ababona ngokwenzakalayo bathi selidumela emansumpeni ukuba uTrump asuke esikhundleni.

Sokusele inyanga ukuba uMnu. Joseph Biden, owanqoba uMongameli Donald Trump kukhetho olusanda kwenziwa, angene esikhundleni sika mongameli wakwele Melika.

UTrump lokhu esithi waqilwa kukhetho libandla lama Democrats.

Kodwa imithethwandaba etshiyeneyo ithi akulabufakazi obuveza lokhu. Okwamanje uBiden usedinga abantu abazangena kuhulumende wakhe.

Bamangele abantu kwele Melika lakwamanye amazwe ngokweziwa nguTrump. Kodwa inengi labo bathi kusobala ukuba wanqotshwa nguBiden owathola ama electoral votes edlula amakhulu amathathu – 306.UTrump wathola angamakhulu amabilo lamatshumi amathathu lambili – 232.

Kulabanye abakubandla lama Republicans abafuna ukuvimba impumela yokhetho lolu kudale leCongress loba abazi ngokwenzakalayo besithi lokhu akusoze kuncede uTrump, okhanya elokhu efuna ukubusa ilizwe leMelika.

Omunye wabalandela ukhetho lolu, uMnu. Raphael Mthombeni, ohlala eDallas Texas, uthi uTrump uphuma esikhundleni ngoZibandlela.

Lokhu kusekelwa nguNkosikazi Priscilla Ndlovu, ohlala eSeattle eWashington.

Isisekelo sombuso welizwe leMelika sikubeka sobala ukuthi kumele umongameli omutsha angene esikhundleni mhlaka 20 ngoZibandlela.

Embed share

UBiden Uselungiselela Ukungena Esikhundleni uTrump Ezonde Kakhulu

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:05 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

Kweziphathelane lokhetho lweMelika: Kambe ukungemukeli kuka mongameli Donald Trump impumela yokhetho lokudinga umongameli ekhomba ukuthi wanqotshwa nguMnu. Joe Biden, okhangelelwe ukuba ngumongameli ekuqaleni komnyaka oozayo, kungabe kubuyisela emuva inhlelo eziqhutshwayo; ezigoqela ezeCOVID 19 lokuholiswa kwabantu imali ye stimulus eyovuselela umnotho?

Sihlaziya loludaba loMnu. Raphael Mthombeni, isizalwane seZimbabwe esihlala khonapha eMelika.

Embed share

Ingxoxo loMnu. Raphael Mthombeni

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:02:17 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

UMongameli Donald Trump labalandeli bakhe lokhu bezama ukuguqula impumela yokhetho olwenziwe ngoLwezi abanye besithi kumele kuvinjwe amavoti awenziwe yiElectoral College, aveza ukuba uMnu. Joseph Biden webandla lama Democrats wanqoba uTrump.

Abalandeli baka Trump abambalwa ngoLwesithathu bathethisane labakubandla lama Democrats edale leSenate kuhlolisiswa impumela yokhetho.

Abasekela uTrump bethule amazwi aqatha emhlanganweni obuhlolisisa impumela yokhetho besithi bazavimba ama-electoral votes aveza ukuthi uBiden wanqoba kukhetho lolu. Kodwa abasekela ibandla lama Democrats bathi kubi okwenziwa libandla lama Republicans abafuna ukuthi uTrump ahlale esikhundleni sikamongameli loba enqotshwe nguBiden olama electoral votes edlula amakhulu amathathu – 306.

UTrump ulama electoral votes angamakhulu amabili lamatshumi amathathu lambili – 232. Lokhu kutsho ukuthi unqotshwe nguBiden ngendlela anqoba ngayo uNkosikazi Hillary Clinton ngomnyaka ka2016.

Olandela okwenzakala eMelika, uMnu. Busani Mbuso Ntini, uthi uTrump uzasuka esikhundleni.

UNtini uthi okwamanje uTrump ubhekane lokuxolela abantu abanengi adlelana labo engakasuki esikhundleni ukwenzela ukuthi bengabotshwa.

Kulabanye abantu asebekhangelele umbuso kaBiden, osekhetha abantu abazasebenza kuhulumende wakhe. Abanengi kababoni ukuthi kuzakuba lenguquko eZimbabwe uBiden engangena esikhundleni ngoZibandlela. UMnu. Moven Ngwenya uthi eMelika kumele ilizwe leli liqhubekele phambili lidlelana lele Zimbabwe.

UMnu. Rabson Mwale ukhangelele ukuthi uBiden uzazama ukukhuthaza ingqubekela phambili eZimbabwe.

Idale leHouse of Representatives lele Senate akhangelelwe ukuthi azahlangana mhlaka 6 Zibandlela ahlolisise amavoti awenziwe yiElectoral College. Kukhangelelwe ukuthi uBiden uzangena esikhundleni sikamongameli mhlaka 20 Zibandlela.

Umongameli Vladimir Putin weRussia usetshayele uMnu. Joe Biden ihlombe ngokunqoba kukhetho lokudinga umongameli weMelika, kulandela ukugcizelelwa kokukhethwa kwakhe lidale leElectoral College izolo ntambamba.

Embikweni owethulwe lidale leRussia eleKremlin ngoLwesibili, umongameli Putin uthe ukhangelele ukusebenza kuhle loMnu. Biden belwisana lengxaki ezibhekane lomhlaba.

Umongameli Putin wayethe uzaqala amelele ukuthi ukunqoba kukaMnu. Biden, owebandla lama Democrats kugcizelelwe ngokusemthethweni engakamtshayeli ihlombe.

Ekhuluma izolo ngemva kokugcizelelwa kokunqoba kwakhe umongameli Donald Trump webandla lama Republicans, uMnu. Biden uthe intando kazulu eye democracy ivele sobala ngokukhethwa kwakhe, wasola uTrump esithi uzama ukubuyisela impumela yokhetho emuva.

Uthe ukhetho lweMelika luzahlala lungoluthenjwa ngabantu emhlabeni wonke njalo luyisibonelo ngoba lukhululekile.

UMnu. Biden ukhangelelwe ukugcotshwa mhlaka 20 ngenyanga elandelayo ekaZibandlela ngomnyaka ozayo ukuthi abe ngumongameli.

Umongameli Trump ubezama ukuphikisa impumela yokhetho emthethwandaba kodwa idale le Supreme Court lisanda ukulahlela khatshana isicelo sakhe.

Ngakwelinye icele, ukuvota kwabantu kukhetho lwesibili olwe run-off olokudinga amalunga amabili awedale le senate azamela idolobhe leGeorgia kuqale ngoMvulo njalo indwendwe zibikwa bezingazinde njengalezo ezazikhona kukhetho lwakuqala. UMnu. Biden uthi uzakhankasela amalunga ebandla lakhe kulolukhetho ngoLwesibli.

Impumela yokhetho lolu izaveza sobala ukuthi yiliphi ibandla eliziphethe ngesiduku phakathi kwelamaRepublicans lelamaDemocrats.

Embed share

Lalela Loludaba Ngokugcweleyo

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:02:07 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

Kukhangelelwe ukuthi abakhetha umongameli wakwele Melika ababizwa ngokuthi yiElectoral College bazavota kusasa kulandela ukhetho olwenziwa ngoLwezi impumela yakhona elokhu ithandabuzwa nguMongameli Donald Trump othi lwebiwa nguMnu. Joseph Biden lebandla lama Democrats.

UTrump, osanda kuvinjwa lidale leSupreme Court ukuba aguqule impumela yokhetho lolu ezabeweni ezimbalwa, lokhu esithi nguye owanqobayo hatshi uBiden okukhangelelwe ukuthi uzakhethwa ngemfanelo ngama electors ezabelo anqoba khona.

Konke lokhu kwenzakala ngesikhathi abalandeli baka Trump, abagoqela abaziwa ngokubandlulula abansundu, okuthiwa yiProud Boys, betshengisele labanye babo izolo eWashington DC lezabelweni okwanqoba uBiden besithi uTrump kumele ahlale ngenkani esikhundleni. Imithethwandaba eminengi siyethule izinqumo ezithi akulabufakazi obuveza ukuba ukhetho lolu lwebiwa libandla lama Democrats.

Kukhanya engani uTrump uzondele ukuthi unqotshwe nguBiden olama electoral votes edlula amakhulu amathathu – 306 yena elangamakhulu amabili lamatshumi amathathu lambili 232. Bayakulandela lokhu abantu abanengi kwele Zimbabwe.

Omunye wabo nguMnu. Malaki Nkomo webandla leZANU PF othi akulanguquko ezakuba khona eZimbabwe loba kungangena uBiden esikhundleni sikamongameli.

UMnu. Busani Ndlovu, odabuka koMazambani eNkayi, laye uthi akulalutho oluzaguqulwa nguBiden kwele Zimbabwe.

Ingcwethi kwezemithetho zithi kukhanya engani uTrump usezame wehluleka ukuthi asekelwe yimithethwandaba ngakho-ke usefuna ukusebenzisa abalandeli bakhe ezabelweni ezinjenge Georgia, Michigan, Pennyslvania, Arizona leWisconsin ukwethusela abakhetha umongameli. Abadala bathi ubukhosi ngamazolo.

Embed share

Sebelungiselela Ukukhetha Umongameli Wakwele Melika

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:19 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

Umongameli Donald Trump weMelika uthi udanile ngokuthi idale eliphezulu eleSupreme court alinqumanga ngendlela abayikhangelele ngokuthi kwakulokuqilibezela kukhetho lokudinga umongameli ngenyanga edluleyo, njengalokho abekukhangelele labasekeli bakhe kanye lamalunga ebandla lakhe elama Republicans.

Abamxhasayo bagoqela igqwetha le Texas uMnu. Ken Paxton, abanye abameli, kanye lamalunga edale le House of Representatives awebandla lakhe alikhulu lamatshumi amabili lasithupha-126. Bebehlose ukuthi idale lesupreme court limise okwesikhatshana ukuvota kweElectoral College kanye lalokho okuzaqhutshwa ngoMvulo ozayo.

Eloba enkundleni yakhe ye twitter ngoLwesihlanu ntambama ngemva kwalesi isinqumo, umongameli Trump uthe idale leli alilasibindi kumbe ulwazi.

Idale leSurpme Court lilahlele khatshana ngoLwesihlanu isicelo ebesivela edolobheni le Texas, esokuthi livume ukuthi impumela yokhetho emadolobheni amane lapho umongameli Trump anqotshwa ngowayencintisana laye uMnu. Joe Biden owebandla lama Democrats ayiqondanga ngoba aluqhutshwanga ngemfanelo.

Idale le Supreme Court lithe idolobho leTexas alilalungelo lokumangalela awe Georgia, Michigan, Pennsylavania, le Wisconsin lapho umongameli Trump athi ukhetho aluqhutshwanga ngemfanelo njalo indawo lezi azitshengisanga ukuba lendaba laloludaba.

Abasekeli bakamongameli Trump abenhlanganiso ye Million Maga March babikwa besithi baqoqa ukutshengisela edolobheni le Washington DC ngoMgqibelo.

Abakhetha umongameli kwele Melika ababizwa ngokuthi yiElectoral College bakhangelelwe ukuthi bazavotela uMnu. Joseph Biden ngeviki ezayo ngesikhathi uMongameli Donald Trump esephanyeke udaba lokuguqula impumela yokhetho eSupreme Court.

UTrump uncediswa ngezinye izabelo eziphethwe libandla lama Republicans lazo ezithi ukhetho lwebiwa nguBiden lebandla lakhe lama Democrats.

Udaba lolu oluphanyekwe nguTrump lufana xathu loluphanyekwe emithethwandaba ePennyslvania, Wisconsin, Michigan lezinye okwethulwe izinqumo eziveza ukuba ukhetho lwenziwa ngemfanelo.

Akwaziwa ukuthi iSupreme Court izakuthini ngodaba lolu. UBiden ulama electoral votes edlula amakhulu amathathu – 306 kuthi uTrump ulangamakhulu amabili lamatshumi amathathu lambili – 232.

Embed share

UTrump Uzama Ukuvimba Impumela Yokhetho

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:03 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

Sokulemibiko ephumayo engabe ikhomba ukuba akusoze kwaba lombuthano omkhulu womkhosi wokugcotshwa ukuthatha intambo zombuso kweleMelika, kukaMnu. Joe Biden onqobe kukhetho lokudinga umongameli waleli lizwe oluqhutshwe ekuqaliseni kwenyanga edluleyo kaLwezi.

Lumkhosi omele wenzelwe eWashington Mall, mhlaka 20 Zibandlela ubikwa ulakho ukwenziwa ngenxa yokumemetheka komkhuhlane weCovid 19 okwethusayo elizweni leli, liyilo njalo elikhokhelayo okwamanje emhlabeni jikelele ngokuba lenani eliphezulu labantu abatholakala belegcikwane leli kanye lababulawa yilo.

Lumkhosi ubikwa usuhlelwa ukuba wenziwe ebulenjini okubizwa ngokuthi yiVirtual Inauguration, lapho uBiden azafungiswa ukuba nguMongameli wesimatshumi mane lasithupha, phambi kwabahlonitshwa abaluntshwane emasango awe dale lephalamende yeMelika eleCongress.

Eqeda ukufungiswa ubikwa ekhangelelwe ukuhamba ngenyawo ngomgqawo uPennsylvania Avenue eqonde esigodlweni sikamongameli eseWhite House.

Amalungiselelo alumkhosi lanxa uzaba ngomcane aseqalile edolobheni le Washington DC.

UMongameli Donald Trump okhona embusweni okwamanje lokhe engekemukeli ukuthi unqotshiwe kukhetho olwenziwe ngenyanga edluleyo kaLwezi, esithi wantshontshelwa amavoti njalo waqilwa ngabebandla lamaDemocrats ukuze uBiden anqobe, ngakhoke usehle watsho ukuba akasoze abe khona emkhosini wokugcotshwa kukaBiden, okungumkhuba waseMelika wokudedelana kulesi sikhundla.

U-Trump ubikwa ezakuba lowakhe umhlangano omkhulu ngalanga linye, uBiden egcotshwa, ngenhloso yokulungiselela ukusungula umkhankaso wakhe wokuncintisa kukhetho lomnyaka ka2024.

Kunjalo nje, uBiden ukhangelelwe ukukhetha uRetired General Lloyd Austin ukuthi abe ngonsundu wakuqala ukuthatha isikhundla sokuba ngumpathintambo obona ngezomvikela welizwe.

Sokusele inyanga lensuku ezimbalwa ukuba uMnu. Joseph Biden agcotshwe ukuba ngumongameli wakwele Melika lobanje kungacaci ukuba uMongameli Donald Trump uzavuma ukuthi wanqotshwa kukhetho olwenziwe ngoLwezi.

UBiden ukhangelelwe ukuthi uzagcotshwa mhlaka 20 ngoZibandlela loba uTrump elokhu etshaya phansi ngenduku esithi waqilwa kukhetho olusanda kwenziwa. Kodwa akulabufakazi obuveza ukuba ukhetho lwebiwa libandla lama Democrats.

Okwamanje uTrump katsho ukuba uzakuwa emkhosini wokugcotshwa kuka Biden njengoba engavumi ukuba wanqotshwa.

Abacubungula ezombangazwe bathi kungcono UTrump ahambe emkhosini lo ukwenzela ukuthi kube lokutshiyelana isikhundla sikamongameli ngendlela ebalulekileyo. UTrump kukhanya engani ufuna ukuncintisa ukhetho lukamongameli ngomnyaka ka2024.

Bakhona abakusekela lokhu labanye abangafuni lakumbona uTrump duzane leWhite House besithi ufake ilizwe leMelika edakeni.

Omunye wabafisa ukuthi ancintise kukhetho luka mongameli nguMnu. Sikhumbuzo Mlalazi, odabuka eZimbabwe olandela kakhulu okwenzakala eMelika.

Kodwa uMnu. Hloniphani Pindi Moyo, ohlala eGwanda, uthi uTrump kumele asuke esikhundleni engakacabangi ngokungena kukhetho ngomnyaka ka2024.

Lokhu kusekelwa nguMnu. Isaac Mpofu othi ukwala kwakhe ukuvuma ukuthi unqotshwe kukhetho nguBiden kuyangisa ilizwe leMelika.

UMnu. Khaliphani Khupe uthi usuphelile umbuso kaTrump.

Embed share

UBiden Ulungiselela Ukungena Esikhundleni uTrump Ephika Ukuba Wanqotshwa

by VOA

Embed share

The code has been copied to your clipboard.

The URL has been copied to your clipboard

---

No media source currently available

0:00 0:04:23 0:00

Lapho esitholakala khona

• 16 kbps | MP3
• 32 kbps | MP3
• 48 kbps | MP3

Ukudlala

UMongameli Donald Trump kukhanya engani ufuna ukuthi abantwana bakhe baxolelwe wonke amacala abawenzayo ngesikhathi esesikhundleni sikamongameli. Wenza lokhu loba kungaziwa amacala abalakho ukuwetheswa ungasuka esikhundleni ngoZibandlela.

UTrump, osanda kwesula wonke amacala etheswa owayengumcebisi wakhe wezomvikela, uMnu. Michael Flynn, kukhanya efisa ukwesula wonke amacala angetheswa uDonald Trump Junior, uEric Trump, uIvanka Trump lomkakhe uJared Kushnar, obengumcebisi wakhe eWhite House.

UFlynn ucatshangelwa ukuthi waqamba amanga ngesikhathi iFBI labanye abasebenzela uhlangothi lwezemithetho behlolisiswa okwenziwa nguTrump leRussia ngokhetho olwenziwa ngomnyaka ka2016. IRussia icatshangelwa ukuba yancedisa uTrump ukuba angene esikhundleni ngomnyaka lowo.

Kodwa uTrump uyakuphika lokhu esithi ngamanga aluhlaza tshoko. Okwamanje kukhanya efisa ukuvikela umdeni wakhe. Kulabanye abakubandla lama Republicans abathi kumele azixoxele laye ngokwesula wonke amacala angabhekana lawo engasuka esikhundleni.

Kuthiwa wayengahlawuli kahle umthelo weTax njalo esephula imithetho kahulumende esenzela ukuhlala isikhathi eside ewofisini kamongameli.

Okwamanje uphikisa ukuba unqotshwe nguMnu. Joseph Biden, owebandla lama Democrats, kukhetho olwenziwe ngoLwezi. Abalandela udaba lolu bathi kuyethusa okwenziwa nguTrump. Omunye wabalombono lo nguMnu. Paul Ndlovu, odabuka koGodlwayo.

Uthi ukwenza kwakhe kuveza ukuba inkantolo iqakathekile kakhulu kwele Melika ekuphatheni ezomthetho.

UMnu. Jabulani Mabheka uyakuncoma okwenziwa nguTrump.

Kodwa uMnu. Nkosilath Ndlovu uyazisola kakhulu izenzo zika Trump.

UMnu. Mkhula Ncube uthi kuyamangalisa okwenziwa nguTrump.

Owayengumsekeli kamongameli, uBiden uselungiselela ukungena esikhundleni loba uTrump elokhu engavumi ukuba unqotshiwe kukhetho olusanda kwenziwa.