Ukhetho LweMelika 2020
- Gibbs Dube
Kulabancoma Okwenziwa NguTrump Labasola Kakhulu Izenzo Zakhe
Kulabanye abantu abathi kunengi okwenziwa nguMongameli Donald Trump okuncomekayo kubelokunye njalo okubi okwazondisa ikakhulu abantu abansundu labanye emhlabeni wonke jikelele.
Abancoma okwenziwa nguTrump kusukela ngomnyaka ka2016 bathi ngumuntu okhuluma intando yakhe hatshi lokhu okwenziwa ngeyinye inkokheli yamazwe.
Imbongi elodumo, uObert Dube, uthi uTrump ngumuntu okhuluma santando.
Kodwa uDube uthi uTrump uzehlise kakhulu ngokudlelana labantu abangaqondakaliyo.
UMnu. Sikhumbuzo Mlalazi laye uthi uTrump uvule abantu ingqondo lobanje ubecaphula abanye.
Banengi njalo abathi uTrump uthethisa abantu sonke isikhathi. Omunye wabo nguNkosazana Khethiwe Moyo othi akwenzayo khonamanje kuveza ukuba kadlelani kahle lozulu.
UMnu. Paul Ndlovu uthi akukho okuncomekayo okwenziwa nguTrump.
UTrump wangena esikhundleni wavimba abantu bokuza lokunye okutshiyeneyo. Bakhona abathakazelela akwenzayo kwele Melika kube labanye abasola kakhulu izenzo zakhe.
Okwamanje kavumi ukuthi unqotshwe nguMnu. Joseph Biden kukhetho olusanda kwenziwa. Igqwetha elikhulu lelizwe leMelika, uMnu. William Barr, uthi akulabufakazi obuveza ukuba ukhetho lukamongameli olusanda kwenziwa lwebiwa nguBiden labanye bakhe abakubandla lama Democrats.
- Gibbs Dube
ISupreme Court ePennyslvania Ilahla Icala Eliphanyekwe NguTrump Labanye Bakhe Abathi Baqilwa Kukhetho
Idale leSupreme Court esabelweni sePennyslyvania lithi uMongameli Donald Trump labanye bakhe behlulekile ukuveza ubuqili elithi benziwe libandla lama Democrats kukhetho olusanda kwenziwa endaweni le lapho uMnu. Joseph Biden anqobe khona uTrump ngamavoti afika phose inkulungwane ezilikhulu – 80,000.
Abahluli badale leli bavumelene izolo ukuthi akulalutho kudaba oluphanyekwe nguTrump lebandla lama Republicans elokuthi kulahlwe amavoti afika izigidi ezimbili – 2 million abantu abavota ngeposo, ikakhulu abakubandla lama Democrats.
Ibandla lama Republicans beselimise okwesikhatshana ukuba kuqhubekele phambili ukulungiselela ukukhetha abantu ababizwa ngokuthi ngama Electors abazakuya eWashington DC ukuyakhetha umongameli okusemthethweni.
UTrump usezame ukuguqula impumela yokhetho lolu ezabelweni ezitshiyeneyo esithi amaDemocrats aqila kukhetho lolu. Kodwa imithethwandaba endaweni ezinengi ithi akulakhetho olwaphekwaphekwa libandla leli.
Ababukele okwenzekalayo, bathi uTrump ubecabanga ukuthi uzathola elinye ithuba lokuba abuse kwele Melika kodwa ukhe phansi ngoba abantu basola indlela abuse ngayo kusukela ngomnyaka ka2016.
UMnu. Busani Mbuso Ntini uthi uBiden uselungiselela ukungena esikhundleni lobanje uTrump edonsela muva.
Uthi kusobala ukuba uBiden uthole amavoti amanengi elizweni lonke jikelele njalo lama Electoral Votes adlula okumele umuntu awazuze nxa engena esikhundleni sikamongameli.
UMnu. Peter Ngwenya uthi okwenzakala eMelika kuveza ukuba imithetho isebenza ngemfanelo.
UMnu. Belive Gaule, okubandla leZanu PF uthi okwehlele uTrump akufani lalokho okwehlela owayengumongameli uRobert Mugabe ngokhetho olwenziwa ngomnyaka ka2008 lapho anqotshwa nguMorgan Tsvangirai, owayekhokhela ibandla leMDC-T.
Okwamanje uTrump ukhangelelwe ukuba uzakhankasa eGeorgia lapho okulabantu abancintisana kukhetho lokudinga amalunga edale leSenate.
Ucele ukuba kubalwa kutsha amavote esabelweni lesi anqotshwa khona nguBiden. Indawo le ibisileminyaka eminengi ibanjwe libandla lama Republicans.
- Gibbs Dube
UTrump Uthi Uzaphuma Esikhundleni uBiden Engavotelwa Kahle yiElectoral College
UMongameli Donald Trump uthi uzasuka esikhundleni nxa abakhetha umongameli kwele Melika, besebenzisa lokhu okuthiwa yiElectoral College, bengakhetha uMnu. Joseph Biden, okhanya emqobe kukhetho olusanda kwenziwa.
UTrump wethule lokhu ngoLwesine kusihlwa eWashington DC ekhuluma lentathelizindaba ngesikhathi sekhefu leThanksgiving. Uthe uzasuka esikhundleni nxa iElectoral College ingabuya esigodlweni seMelika kumaviki ambalwa azayo bavotele uBiden.
Kaphumelanga egcekeni ebuzwa ukuba ulakho yini ukuyabona uBiden engena esikhundleni sikamongameli ngoZibandlela. Uthe okwamanje osalwisana lalokhu athi yikwebiwa kokhetho libandla lama Democrats.
UTrump usekhulume kakhulu ngalokhu loba kungelabufakazi ukuba waqilwa kukhetho lolu. Usezame ukuguqula impumela yokhetho lolu eveza ukuthi uBiden ulama Electoral Votes edlula amakhulu amathathu – 306 kuthi uTrump ulangamakhulu amabili lamatshumi amathathu lambili – 232.
Okhethwa ukuba ngumongameli kumele athola amaElectoral Votes angamakhulu amabili lamatshumi ayisikhombisa – 270. Kumavoti elizwe lonke jikelele, UBiden ulamavoti adlula izigidi ezingamatshumi ayisitshiyangalombili – 80 million kuthi uTrump ulayizigidi ezingamatshumi ayisikhombisa lane – 74 million.
Olandela ukhetho lolu, uMnu. Okay Ndlovu, odabuka kwele Zimbabwe, uthi ukhetho lolu lwenziwe kahle.
UMnu. Isaac Mpofu laye uyalulandela ukhetho lolu.
Omunye njalo nguMnu. Aleck Nyathi kunengi okukhangelelwe ukuthi kuzakwenziwa nguBiden.
Lokhu kusekelwa nguMnu. Mongameli Moyo, obona engani ukhetho lulakho ukungaqhutshwa kahle.
Umongameli wakwele Melika ugcotshwa ngoZibandlela njengalokhu okubekwe kusisekelo sombuso welizwe. Kwenziwa loba obengumongameli engavumanga ukuba unqotshiwe kukhetho lukamongameli.
- Gibbs Dube
'Ukhetho lweMelika Lusikhumbuza uMugabe Owala Ukuphuma Esikhundleni'
Abantu kwele Zimbabwe bathi okwenzakala eMelika kubakhumbuza ukhetho lukamongameli ngomnyaka ka2008 okwahlala isikhathi eside kungaziwa ukuba kuzakwenzakalani njengobe owayengumongameli uRobert Mugabe wayenqotshwe nguMorgan Tsvangirai webandla eliphikisanyo eleMovement for Democratic Change.
Kulabanye abantu eZimbabwe abathi ukuxokozela phakathi kuka Mongameli Donald Trump loMnu. Joseph Biden, okukhanya enqobe kukhetho lukamongameli, kubakhumbuza okwenziwa yiZimbabwe Electoral Commission eyathula okwesikhathi eside ngempumela yokhetho lukamongameli ngomnyaka ka2008.
UTsvangirai wanqoba uMugabe kodwa kazange enelise ukubumba uhulumende ngenxa yokusilela kwamavoti afunakalayo. Bathi ukukhonona kuka Trump othi waqilwa nguBiden labanye bakhe kuveza ukuba abantu banamathela ezikhundleni loba uzulu esekhethe amfunayo kwezombusazwe.
UTrump lokhu etshaya phansi ngenduku esithi uzaguqula impumela yokhetho lolu athi lwatshontshwa libandla lama Democrats, elilabantu abanengi abavota ngeposo njengenhlalayenza. AmaDemocrats athi selidume ledlula. Banengi abantu kwele Zimbabwe abathi lokhu kubakhumbuza umnyaka ka2008.
Omunye wabo nguMnu. Adrian Phiri, ohlala eHwange esabelweni seMatabeleland North, othi uTrump kumele avume ukuba unqotshwe nguBiden.
UMnu. Clifford Ndlovu, ohlala eZimdabule eNyamandlovu, uthi kuyamangalisa okwenzakala eMelika.
Lokhu kusekelwa nguMnu. Tindo Ndlovu, ohlala eNgwaladi, esabelweni seMatabeleland North.
UMnu. Gabriel Moyo uthi kusobala ukuba ukhetho lweMelika lwenziwa ngemfanelo.
UBiden uselungiselela ukungena esikhundleni lona uTrump efunga esithi lokhu kungeke kwenzakale esaphila.
Usecele ukuba kubalwe kutsha amavoti esabelweni seGeorgia njalo izolo kusihlwa uxoxisane labanye abalandeli bebandla lama Republicans abahlala ePennyslvania lapho azama ukuguqula impumela yokhetho. Uzama ukwenza njalo eArizona leMichigan. Ababona ngokwenzakalayo bathi usephelelwe ngumphako.
'Kuyabukeka Okwenziwa NguBiden'
UMnu. Raphael Mthombeni uthi kuyabukeka okwenziwa nguMnu. Joseph Biden, olungiselela ukungena esikhundleni sikamongameli. Unqobe uMongameli Donald Trump kukhetho lukamongameli olusanda kwenziwa. UMthombeni uthumezele uGibbs Dube weStudio 7 ivideo le.
- Gibbs Dube
UBiden Ulungiselela Ukungena Esikhundleni Sikamongameli Loba uTrump Etshila Izikeyi
UMnu. Joseph Biden, omelele ukugcotshwa ukuba ngumongameli kulandela ukhetho lukamongameli njalo osekhethe abanye abantu abazangena kudale leCabinet yakhe, uthi uzavuselela ilizwe leMelika okumele likhokhele kwezombusazwe, inotho lokunye.
Wenza lokhu uMongameli Donald Trump esithi uqiliwe kukhetho olusanda kwenziwa.
UBiden ukhethe abantu izolo abambalwa ukuba balungiselele ukungena kudale leCabinet abagoqela uMnu. Antony Blinken, ozaphatha uhlangothi lokudlelana lamanya amazwe olweDepartment of State, uMnu. John Kerry ozakuba ngumcebise obona ngokukhudumala komkhathi lokunye, uNkosikazi Janet Yellen ozangena esikhundleni sikasibalukhulu webhanga elikhulu lelizwe loMnu. Alejandro Mayorkas odabuka kwele Cuba ozakuba kuhlangothi olubona ngezabantu bokuza.
Abanye nguNkosikazi Linda Thomas Greenfield okhangelelwe ukuba uzangena esikhundleni sommeli welizwe leMelika kunhlanganiso yeUnited Nations loMnu. Jack Sullivan, ozakuba ngumcebisi wakhe wezomvikela kwele Melika.
Abakhethiweyo bazahlolisiswa lidale leSenate bengakangeni ezikhundleni lezi. UBiden uthi ukhethe abantu laba asebasebenza okwesikhathi esithi kuhulumende ukwenzela ukuthi ilizwe libuyele lapho elalikhona uTrump engakangeni esikhundleni.
UNkosikazi Thomas-Greenfield, osanda kuxoxa lomsakazo weVoice of America ngokukhethwa kwakhe, uthi kunengi okumele kukhangelwe ngokudlelana kwelizwe leMelika lamanye amazwe, okulenkokheli engafuni ukuphuma esikhundleni sombuso.
Konke lokhu kwenzakala uTrump elokhu esithi waqilwa lobandla lama Democrats kukhetho lukamongameli. Akulabufakazi obuveza ukuba uBiden labanye bakhe bamqila.
UBiden ulama Electoral Votes efana lalawo uTrump anqoba ngawo uNkosikazi Hillary Clinton ngomnyaka ka2016. Kodwa lokhu engavumi ukuthi unqotshiwe.
UMnu. Dan Moyo uthi kuyancomeka okwenziwa nguBiden, okhethe umuntu wokuza ukuba angene kuhlangothi olubona ngendaba zekhaya
Uthi kuyajabulisa njalo ukuthi iukhethe uNkosikazi Linda Greenfield loMnu. John Kerry ukuba bangena ezikhundleni eziqakathekileyo.
Lokhu kusekelwa nguMnu. Busani Mbuso Ntini othi uBiden wenze lokhu ukwenzela ukubisela ilizwe leMelika phezu kwamanye amazwe njalo eleZimbabwe lilakho ukuthwala nzima.
UBiden ukhangelelwe ukuthi uzakhululumisa leziphathamandla zikahulumende okumele zimlungisele indlela yokungena esikhundleni ngoZibandlela ngomnyaka ozayo.
Busani Mbuso Ntini: Kuyabukeka Okwenziwa NguBiden
UMnu. Busani Mbuso Ntini, odabuka eZimbabwe ohlala kwele Melika, uthi kuyabukeka okwenziwa nguMnu. Joe Biden, oselungiselela ukungena esikhundleni sikamongameli. UBiden unqobe uTrump kukhetho lukamongameli. UNtini uthumezele uGibbs Dube weStudio 7 umlayezelo lo.
- Gibbs Dube
UBiden Usekhetha Amalunga Edale leCabinet uTrump Elokhu Esithi Waqilwa Kukhetho Lukamongameli
Owayengumsekeli kamongameli, uMnu. Joseph Biden, okukhanya ukuthi wanqoba kukhetho lukamongameli olusanda kwenziwa, ukhangelelwe ukukhetha amalunga edale leCabinet yakhe kusasa loba uMongameli Donald Trump esithi ukhetho aluqhutshwanga ngemfanelo.
UBiden ukhangelelwe ukuthi uzakhetha uMnu. Tony Blinken ukuba ngumphathintambo wohlangothi lukahulumende olubona ngokudlelalana lamanye amazwe. Kubikwa ukuthi uzakhetha njalo uNkosikazi Linda Thomas Greenfield ukuba amele ilizwe leMelika kunhlanganiso yeUnited Nations.
Laba ngabanye abantu abasebenza okwesikhathi eside kuhulumende weMelika kodwa basuka sokubusa uTrump, ophikisa impumela yokhetho ezabelweni ezigoqela iGeorgia, Michigan, Pennyslvania leArizona okwanqoba khona uBiden. UTrump usecele ukuthi kubalwe kutsha amavoti eGeorgia.
Abalandeli bebandla lama Republicans kukhanya befuna ukuthi kulahlwe amavoti abantu abavota ngeposo endaweni lezi besithi akuvotwanga ngemfanelo. Kodwa imithethwandaba eminengi isilahle amacala angamatshumi amathathu aphanyekwe libandla leli lisithi ukhetho alwenziwanga ngemfanelo.
Kubikwa ukuthi uTrump ufuna ukuthi abantu abakhokhela izabelo badinge abazahambisa amaElectoral Votes eWashington DC kusiyavotelwa umongameli ukuze bavotele yena.
Kodwa amagqetha amanengi athi lokhu akusoze kuguqule impumela yokhetho eveza ukuba uBiden wanqoba kukhetho lukamongameli.
UBiden uthi kuyamangalisa okwenziwa nguTrump.
UTrump uqhubekela phambili esithi waqilwa libandla lama Democrats.
Okwenzakala eMelika sokutshiye abantu bakwele Zimbabwe bebambe owangaphansi. UMnu. Mvundla Khupe uthi loba kulokuxokozela kukhetho lolu kukhanya engani ukhetho lolu lwenziwa ngemfanelo. Uyafisa ukuba eZimbabwe kuqhutshwe ukhetho olufanayo.
UMnu. Sikhumbuzo Moyo ngomunye olandela ukhetho lolu.
Okwamanje uBiden usevotelwe ngabantu abafika phose izigidi ezingamatshumi ayisitshiyangalombili – 79,8 million kuthi uTrump ulamavoti edlula izigidi ezingamatshumi ayisikhombisa – 74 million.
Amavoti la kawenzi umuntu angene esikhundleni sikamongameli njengoba kusetshenziswa okuthiwa ngama Electoral Votes. UBiden usethola amaElectoral Votes edlula amakhulu amathathu – 306 kuthi uTrump ulangamakhulu amabili lamatshumi amathathu lambili – 233. Ovotelwa ukuba ngumongameli kumele athole amavoti angamakhulu amabili lamatshumi ayisikhombisa – 270.
- Gibbs Dube
UTrump Usefuna Ukuguqula Impumelo Yokhetho Esebenzisa Izabelo Eziphethwe Libandla Lama Republicans
UMongameli Donald Trump uthi kumele kubalwe kutsha amavoti eGeorgia lapho abasanda kucela ukuthi kwenziwe okufanayo.
Wenza lokhu ezinye izabelo zikhangelelwe ukuba zizavumelana ukuthi ukhetho lwenziwa ngemfanelo ngakho-ke kumele amaElectoral Votes anikwe owanqoba kukhetho lukamongameli, uMnu. Joseph Biden, owebandla lama Democrats.
UTrump uvimba okumangalisayo ukuba uBiden angene esikhundleni sikamongameli. Imithethwandaba isiphosele khatshana amacala angamatshumi amathathu abefakwe yizithunywa zikaTrump emithethwandaba kwezinye izabelo obekuthiwa ukhetho alwenziwanga ngemfanelo.
Kukhanya engani uTrump usevimba ukuthi izabelo zethulele abakuqula leElectoral College amavoti okukhetha okumele abengumongameli njengalokhu okumunyethwe yisisekelo sombuso welizwe.
Onqoba kukhetho lolu kumele avotelwe ngabantu laba engakagcotshwa ngoZibandlela. Kodwa uTrump uqhubekela phambili esithi sokumele kubalwe kutsha amavoti eGeorgia njalo bame kancane kwezinye izabelo okumele bethule amaElectoral Votes. UTrump uthi wanqoba kukhetho lolu.
Kodwa unobhala jikelele wesabelo seGeorgia, uMnu. Brad Raffenspeger, uthi uTrump wanqotshwa kukhetho lolu esabelweni sakhe esisanda kubala kutsha amavoti njalo esizabala okwesibili.
UBiden uthi kuyayangisa okwenziwa nguTrump.
Banengi abantu kwele Zimbabwe abalandela ukhetho lolu. Omunye wabo nguMnu. Aleck Nyathi.
UMnu. Raphael Mavela uthi ukhetho lweMelika lwenziwa ngemfanelo ngakho-ke uTrump kumele aveze ubufakazi bokuthi ukhetho alwenziwanga ngemfanelo.
UTrump kukhanya efisa ukuba izabelo eziphethwe libandla lama Republicans zidinge abazavotela umongameli besebenzisa amaElectoral Votes abantu abadlelana laye. Abakubandla lama Democrats bathi lokhu kufana lokuhluthuna umbuso.
Abezemithetho bathi kababoni uTrump ephumelela kulokhu akwenzayo. UBiden, osedinga amalunga edale leCabinet, uselungiselela ukungena esikhundleni lobanje evinjwa nguTrump.
- Gibbs Dube
UTrump Ulwisa Ngamandla Ukuba Aguqule Impumela Yokhetho
Kuyaxokozela kwele Melika kulandela ukhetho lukamongameli olusanda kwenziwa okukhanya ukuba owayengumsekeli kamongameli uMnu. Joseph Biden unqobe uMongameli Donald Trump okuthiwa ufuna ukuguqula impumela yalo okungekho emthethweni.
Okwamanje uBiden ulama Electoral Votes edlula amakhulu amathathu – 306 kuthi uTrump ulangamakhulu amabili lamatshumi amathathu lambili – 232. Lokhu kutsho ukuthi uBiden usethole amavoti afunakalayo ukuze umuntu angene esikhundleni sikamongameli.
Onqoba kukhetho lolu kumele athole amaElectoral Votes angamakhulu amabili lasikhombisa – 270. UTrump lokhu elwisa ngamandla ezabelweni ezitshiyeneyo ezama ukuguqula impumela yokhetho lolu kodwa kukhanya engani imithethwandaba yonke ithi ukhetho lwenziwa ngemfanelo.
Usehambise emthethwandaba amacala afika amathumi amathathu kodwa kukho konke lokhu ukhe phansi. Okwamanje usezama ukukhuluma lababusa izabelo abakubandla lama Republicans ukwenzela ukuthi kudingwe abanye abantu abangavotela umongameli bakuqula leElectoral College.
Ingcwethi kwezombusazwe zithi lokhu akusoze kuguqule impumela yokhetho.
UMnu. Mike Popeo, ophethe uhlangothi olubona ngokudlelana lamanye amazwe, uthi kumele kucace ukuba abantu bavote njani.
UBiden uthi kuyamkhathaza kakhulu ukuthi uTrump labanye bakhe bamvimbela ukuba aqale ukulungiselela ukungena esikhundleni sikamongameli. UTrump uthi asikafiji isikhathi sokuthi uBiden enze lokhu loba kusobala ukuba umqobile kukhetho.
Abalandela okwenzakalayo abagoqela uMnu. Hloniphani Nkomo, isizalwane seZimbabwe, bathi luqhutshwe kahle ukhetho lweMelika.
Esinye njalo isizalwane sakwele Zimbabwe, uMnu. Banda Moyo uthi kumele onqotshiweyo avume.
Lokhu kusekelwa nguMnu. Nkululeko Mandla Moyo, othi uyakulandela okwenzakala kwele Melika.
Odabuka eZimbabwe ohlala kwele Melika, uMnu. Busani Mbuso Ntini, uthi loba uTrump evimba kangaka, uBiden uzangena esikhundleni sikamongameli ngoZibandlela.
Kumavoti kazulu, uBiden usethole afika phose izigidi ezingamatshumi ayisitshiyangalombili 79,7 million kuthi uTrump ulamavoti adlula izigidi ezingamatshumi ayisikhombisa – 74 million. Amavoti kazulu kawasetshenziswa ukukhetha umongameli njengoba kusetshenziswa ama Electoral Votes ezabelo.
- Gibbs Dube
Abalandeli Baka Trump Bathi Ukhetho Lwaqanjulwa Ngama Democrats Loba Kungela Bufakazi Balokhu
Uphenyo olusanda kwenziwa eMelika luveza ukuba abantu abanengi abakubandla lama Republicans bathi uMongameli Donald Trump nguye owanqoba kukhetho lukamongameli olusanda kwenziwa. Kodwa inengi labantu lithi uMnu. Joseph Biden webandla lama Democrats nguye owanqoba kukhetho lolu.
Uphenyo olusanda kwenziwa yinkampani yezindaba eyeReuters leIpsos luveza ukuba abakubandla lama Republicans basekela okukhulunywa nguTrump othi wanqoba uBiden kukhetho lukamongameli. Bethula lokhu loba kungelabufakazi obuveza ukuthi ibandla lama Democrats laqilibezela kukhetho lukamongameli.
UTrump usezame ngamandla wonke ukukuveza lokhu emthethwandaba kodwa akuphumi lutho. Abakubandla lama Democrats, labanye abantu kwele Melika abangalandeli amabandla la, bathi uBiden wanqoba uTrump. Onqoba kukhetho lweMelika kumele athole amaElectoral Votes angamakhulu amabili lamatshumi ayisikhombisa – 270.
UBiden uyakhokhela ngama Electoral Votes afika phose amakhulu amathathu. Okwamanje uTrump uvimba uBiden ukuba angene esikhundleni. UBiden uthi lokhu kuzakwenza kube nzima ukuba alwisane lomkhuhlane weCOVID-19 osubulele abantu abedlula amakhulu amabili lamatshumi amahlanu eMelika.
UTrump watshela abalandeli bakhe ngesikhathi kuqala ukubalwa amavoti abantu abasebenzisa iposo ukuba ukhetho lukamongameli alwenziwanga ngemfanelo.
Abanye abantu kwele Zimbabwe bathi bayalulandela kakhulu ukhetho lolu ngoba kukhanya engani uTrump ufuna ukuthi kube labantu abatsha abazavotela umongameli abavela ezabelweni ezitshiyeneyo okubizwa ngeSilungu ngokuthi yiElectoral College.
Ababona ngezemithetho bathi kuzakuba nzima ukuthi izabelo zikhethe abanye abantu hatshi labo abakhethwa kudala. Omunye wabalandela ukhetho lolu, uMnu. Okay Ndlovu, ohlala Enqameni eGwanda North, uthi loba kulenkinga ezithize, kukhona eleZimbabwe elingakufunda kukhetho lweMelika.
Kodwa uMnu. Malaki Nkomo, owebandla leZanu PF, uthi akulalutho oluqakathekileyo ngokhetho lweMelika.
UMnu. Busani Mbuso Ntini, odabuka eZimbabwe ovote kukhetho lolu, uthi lobanje kulokuxokozela kukhetho lolu, kuzalungiswa ngemfanelo.
UBiden ulakho ukugcotshwa ukuba ngumongameli ngoZibandlela nxa uTrump engenelisanga ukuguqula impumela yokhetho lolu endaweni ezitshiyeneyo.
Diaspora Forum, November 18, 2020
Sokuleminyaka phose emithathu umuyi uRobert Mugabe wasuswa libutho esikhundleni lisithi lifisa ukubopha amahlongandlebe ayedlelana lawo. Bakhona abathi sokwaba lenguquko elizweni kubelabanye njalo abathi akulalutho olwaguqukayo. Sihlaziya njalo ukhetho lukamongameli olusanda kwenziwa kwele Melika.