Coronavirus
Kunengi Osokubangela Ukuqonga Kwentengo Yemphahla eZimbabwe Kutsho Ingcwethi Ezicubungula Ezomnotho
Abenhlangothi ezitshiyeneyo kwezomnotho bathi kunengi okubangela ukuqonga kwentengo yempahla edingakalayo yansuku zonke okugoqela ukuthi ilizwe kalisalungisi into ezinengi kanye lokuvalwa kwemisebenzi ngaphansi kweCOVID-19 Lockdown.
Lokhu kuza ngesikhathi uzulu eqhubeka ekhala ngentengo yemphahla esithi akasanelisi ukuthenga okudingakalayo empilweni, selokhu kwabekwayo iziqondiso zeCOVID-19 Lockdown.
Unkosikazi Shelly Sibanda wakoBulawayo ophila ngokuthengisa, uthi umumo oseZimbabwe okwamanje ubathwalise amagabha avuzayo.
“Sokusiphatha nzima kakhulu ukuthi siphile elizweni lethu leli, sithola wonke amaBasic Commodities. Ngoba kumele vele umuntu at least, isitshwala sibe khona, sibe affordable, impuphu wonke umuntu enelise ukuthenga. Nxa uzathenga i10Kg, inyanga vele kayisafiki, lokhu sekusithwalisa nzima. Okunye futhi abantwana abayi esikolo batshona bekhona endlini, ekuseni, emini, ntambama bafuna ukudla. Sizapheka isitshwala ekuseni, sipheke isitshwala emini, ntambama, impuphu yakhona kayihlali, khonapha idula. So, hayi, akusiphathi kuhle lokho shuwa. ”
Unkosikazi Rosemary Shumirai Chikarakara Mpofu owenhlanganiso ebona ngelungelo labathengi eye Consumer Council of Zimbabwe, ulandisa ngokuthi sibi okungakanani isimo kubathengi.
“Singakhangela lonyaka, sikhangela from january to June sibona ukuthi ngoJanuary kwakufunakala iZW$25, 998 - 97, ngoFebruary kwakufunakala iZW$35, 543-30, ngoMarch kwakuyiZW$35, 703-41. Kuthi ke ngoApril kwakuyiZW$35, 879-92, ngoMay yayiyi ZW$39, 141- 98, ngoJune kwaba yi ZW$40, 237-92. So singakhangela imali leyi, kutshengisela ukuthi khona imuli elabantu six, siqalisa ngoJanuary kwakuyi ZW$25, 000-00 sesiyafika kujune kwasekungama fourty. Ngakho ke intengo yezinto zonke ibilokhe ikhwela. ”
Umnumzana Lubani Nondo, ingcwethi ecubungula ezenotho leozmbusazwe uthi kunengi okubangela ukuqonga kwentengo yempahla nalesi sikhathi.
“Okumqoka kulakho konke singathi ngezombangazwe zelizwe, yizo ezizatshona ziyenza ukuthi intengo yethu iye phezulu, impilo yamaZimbabweans ibe nzima. Izimbabwe ngeke uyikhangele iyiyo yodwa, asikhangele amanye amazwe, aku condition efana leZimbabwe. Ungakhangela iVenezuela, ukhangele i-Argentina, ukhangele iSudan le Lebanon, intengo yempahla kulawo maCountries iya phezulu ngendlela emangalisayo. Kodwa kulento eyodwa eyenza ama-countries lawa afanane, kwezombangazwe akumanga kuhle. So ngokunjalo ngeke sithi iZimbabwe izakuba right nxa ezombangazwe ingazilungisanga. ”
Umpathintambo wezokuthengiselana unkosikazi Sekayi Nzenza yena uthi uhulumende uzimisele ukunakekela abathengi sikhathi sonke.
“Njalo sibone ukuthi umthengi uyanelisa ukuyifinyelela leyo mpahla edingakalayo ngentengo elungileyo. Udaba lokuqonga kwentengo yempahla, luyasikhathaza lathi njengogatsha lwezokuthenga lokulungiswa kwempahla. ”
Intengo yokudingakalayo okugoqela impuphu, amafutha okupheka, itshukela, iFlour, iGas yokuphekisa lokunye iqhubeka iqansa kokuphela osekusenza abantu behluleke ukukuthenga.
Uhulumende Usecela Ukuncediswa Kuhlelo Lokuhlaba Abantu Ijekiseni yeCovid 19 Vaccine
Abogatsha lwezempilakahle sebecela abenhlanganiso ezizimeleyo ukuba zisebenzisane labo kuhlelo lokuhlaba abantu ijekiseni lokuzivikela kubhubhane lweCovid-19 njengoba bona sebekhulelwa ngumsebenzi ngenxa yokwanda kwabaza ezibhedlela ukuzahlatshwa ijekiseni leVaccine.
Lokhu kuvezwe ngunobhala wogatsha lwezempilakahle, uDr Jasper Chimedza esethulela abekomidi ebona ngezempilakahle yedale lephalamende lapho echasisa ngokusetshenziswa kwemali ye Covid-19 selokhu lolubhubhane lwaqhamukayo.
UDr Chimedza uveze ukuba abezibhedlela lemakilinika lapho okuhlatshwa khona abantu amajekiseni la, abesenelisi ukuziqeda indwendwe zabantu ngoba abasebenza kulezi ndawo kumele benze njalo umsebenzi wokwelapha abantu.
“Silethemba lokuba lapho siqhubeka sithola usizo lwemali, sizanelisa ukuqhatsha ezinye izisebenzi zezempilakahle. Sesicabanga ukubiza emsebenzini labo asebahamba kusikhathi sabo sokuphumula, babuye ukuzahlaba abantu ngoba sisenkingeni. Akusijabulisi ukube lokhe sibona indwendwe zabantu. ”
Umnumzana Victor Dube isakhamuzi sase Harare, uthi osekusenzakala yisibonelo sokungazilungiseleli kwakhe uhulumende.
“Kungaba kulungile kodwa kasikhangele ukuthi kwabangwa yini khonokho ukuthi behambe ebantwini besithi bafuna uncedo. Lokho kubangwa yikuthi, bona yikuthi, esingathi ngeSilungu, i-planning engaqedakaliyo. Ngoba nxa nxa sikhangela imbali yezisebenzi zikahulumende, zasukela khatshana zifuna iholo elingcono, kwaqala ngaNurse, wona amaNurse ngokwawo etshengisela ukuthi khona, khona afuna iholo elingcono, kwaya kumaDoctors, kwaya kuzibani, bonke absebenza kuhulumende."
UDube uthi kwakumele athathe leli nyathelo kudala uhulumende isikhathi sisasekhona.
“Bona ngokwabo abakahulumende babexotsha izisebenzi besithi abalamsebenzi lazo. Ezinye zathatha khonokho, zaphuma sibili zaya emazweni, bathathwa bebanengi sibili besiya emazweni. Njalo lokhu ukuthi kabala bantu, ngumzenzi kuthiwa umzenzi kakhalelwa ngoba bazenzela ngokwabo. Singathi khathesi njengoba sesilenkinga eyeCorona leyi, kungcono ukuthi abantu bencedwe, kasikhangele ukuthi udaba lweCorona lwaqala nini. Lwaqala kudala, khatshana le, luqala khonapho babembuuzela izisebenzi. ”
Umnumzana Effie Dlela Ncube ophatheke kumikhankaso yokulwela amalungelo abathengi enhlanganiswweni ye National Consumer Rights Association - NACORA uthi kunengi uhulumende angakwenza ngaphandle kokusebenzisa indlela yama-Lockdown.
“Kulengozi enkulu ukuthi isifo seCoronavirus, igciwane leCoronavirus selingagcwala indawo yonke libulale abantu abanengi kakhulu ukwedlula labo eselibabulele ngalesi sikhathi nxa ngabe iGovernment ingathathanga amanyathelo azavikela abantu ngendlela enkulu kulama Lockdown la abahlala bewenza. Kudingeka indlela ezihlakaniphileyo zokuvikela lokho, indlela ezizafundisa abantu zicebisane labantu ingozi ekhona kwandiswe ukuhlatshwa kwabantu. ”
Uhulumende uthi bonke abafisa ukuzabambisana laye kulomsebenzi wokuhlaba abantu ijekiseni le Covid-19 Vaccine kuzamele bezosebenza ngokuqondiswa kogatsha lwezempilakahle.
Kunje abantu asebenelise ukuhlatshwa ijekiseni yakuqala eyeCovid 19 Vaccine, eZimbabwe jikelele, sebephose bafike kusigidi esisodwa lengxenye-1,491,493 njalo sebezinkulungwane ezingamakhulu phose eyisikhombisa-687,216, asebehlatshwe eyesibili.
Uhulumende Uthi Uzasebenzelana Labosomabhizimusi Ukuthenga Amajekiseni AweCovid 19 Vaccine
Ngesikhathi inani labantu ababulawa ngu mkhuhlane we Covid-19 linqansa, uhulumende uthi useqoqa ukucela usizo lwamankampani azimeleyo ukuze asebenzelane lawo, athole imali yokuthenga amanye amajekiseni awe Covid-19. Lokhu uthi kuzanceda ukuba ilizwe liphange lithole amajekiseni amanengi ngesikhathi eleZimbabwe njengawo wonke amazwe womhlaba lilwisana le Covid-19.
Uhulumende uthi njalo uzavumela amankampani lawa ukuba athenge amajekiseni lokunye okudingakalayo kokulwisana le Covid-19 kodwa uthi lokhu kuzakwenzakala ekhangelisise ngelihlo lo khozi ukuze uzulu engaqilwa loba ukuncindezelwa.
Umphathintambo wezemali uMnu Mthuli Ncube uthi uhulumende usezame ngazo zonke indlela yokubuthanisa imali yokuthenga amajekiseni okuzivikela kulu mkhuhlane, aweCovid 19 Vaccine.
Uqhubeke ethi uhulumende ulemali asele layo ngomnyaka odluleyo ngakhoke uzakwengezelela leyalonyaka kundleko yakhe eye budget encedisana losizo azaluthola kwamabhimizimusi azimeleyo.
“Silemali esilayo esasiyigcinile kusukela ngo mnyaka ka 2020 efika i50 million amadola eMelika. Ngalimali esasilayo kusukela ngomnyaka ka 2020 sizayisebenza lonyaka. Eyinye yakhona isuka kumali esasivele siyigcinele umnyaka ka 2021”
Uqhubeke esithi ezinye imali okwakumele zisebenze ukuthenga impahla yokuvikela abongi labodokotela izasetshenziswa ukuze kuthengwe amajekiseni awe Covid-19.
“Ezinye imali esasivele silazo, ngezokuthenga ama PPEs, leyo mali ezakuya kuma jekiseni. Singahlanganisa leyo mali lesizayiphiwa ngosomabhizimusi siyabe silemali enelayo”
Ingcitshi kweze mpilakahle uDokotela Garry Shava uthi kumele uhulumende aqhubeke edinga imali yokuba izibhedlela zibe lemali yokuvikela kulu mkhuhlane ngoba usasekhona.
“Okokuqala kuzamele sinanzelele ukuba abasebenza ezibhedlela balezemnbatho ezeneleyo. Kumele kulungiswe indlela zokufinyelela ezibhedlela zonke zelizweni. Kudingeka indlela ezilobuciko zokuba abantu abafana lama village health workers baba lendlela zokukhulumisana lo zulu”
Uhulumende uthi uqoqa ukuthi lusiyaphela loluhlelo lokuhlatshwa kwabantu amajekiseni okuzivikela emkhuhlaneni, aweVaccine, abe esenelise ukuhlaba abantu abangaba yizigidi ezilitshumi-10million, loba isilinganiso sokungamatshumi ayisikhombisa ekhulwini sabantu- 70%, ukuze lolubhubhane lungaqhubeki ludala umonakalo elizweni.
UMongameli Mnangagwa Ukhuthaza Uzulu Ukuqakathekisa Ukuhlatshwa iJekiseni yeCovid-19 Vaccine
UMongameli Emmerson Mnangagwa ukhuthaze uzulu we Zimbabwe ukuba aphatheke kuhlelo lokuhlatshwa ijekiseni ye Covid-19 Vaccine, esithi umkhakha omutsha waleli gcikwane usuhlasela ngolaka ngalezi nsuku ngakhoke lilakho ukudala umonakalo omkhulu.
Lokhu ukutsho emngcwabeni wamaqhawe esizwe, uMajor General Edzai Chimonyo lo Michael Chakabva endaweni enbekwa amaqhawe eye National Heroes Acre.
UMongameli Mnangagwa uthe kumele abantu bonke baqakathekise ukuzinakekela impilakahle yabo ngoba wonke umuntu usengozini yokubulawa yiCovid-19 esithi kusazokuba nzima ngamandla kunyanga ezilandelayo.
Ukhuthaze abantu bonke asebele minyaka edlula amatshumi amahlanu-50 ukuba bahlatshwe ijekiseni yokuzivikela kuCovid 19.
“Lumkhuhlane lokhe usasekhona. Siqhubeka siboona inani labantu ababulawa ngu mkhuhlane lo. Ngikhuthaza abantu ukuba balandele iziqondiso ze WHO leze lockdown. Ngifuna ukukhuthaza abantu ukuba bayehlatshwa.”
UMongameli Mnangagwa uthe lokhu kumele abantu bakwenzele ukuvikela imuli zabo lendawo abahlala kizo, esithi abantu baqhubeke beqhoka ama mask, lokugeza izandla sikhathi sonke.
Lokhu kusekelwe ngomunye uDokotela uMnu Garry Shava yena othi ubhubhane lwe Covid-19 ludla ubhedu.
“Inani labantu abale Covid liya lisengeza. Engizakutsho yikuba kwathi kuqala inani liphansi, uhulumende wasethukulula iziqondisso ze lockdown inani lengeza. Khathesi kulabantu abaphakathi eZimbabwe asebesiba lawo lumkhuhlane njalo banengi”
Esinye isakhamuzi seHarare, uNkosikazi Nomceba Phiri uvumelana loMongameli welizwe edabeni lokuhlatshwa ijekiseni yokuzivikela.
“Ijekiseni ye Covid-19 ngizayithatha njalo ngikhuthazana abanye ukuba belithathe. Ngoba yikho lapho okulethemba lethu ukuze siphume phakathi kodubo esikulo”
UMnangagwa utsho konke lokhu ekhokhela umbuthano wonkungcwatshwa kwamaqhawe amabili uLt Gen Edzai Absolom Chimonyo lo Michael ‘Vhuu’ Chakaba.
Elinye iqhawe, uMnu. Abraham Nkiwane yena owalwa impi ekuviyo lebutho ele ZPRA, ungcwatshwe laye namuhla lapho adabuka khona eMguza njengesicelo sakhe kodwa ephiwe inhlonipho yeqhawe lesizwe, iNational Hero Status.
UMongameli Mnangagwa uncome kakhulu amaqhawe lawa ngo msebenzi abawenzayo.
“Kumaqhawe ethu, u Cde Abraham Dumezweni Nkiwane, obekwa e Mguza namhlanje, lo Cde Micheal Chakaba lo Edzai Chimonyo esibancwaba lapha, ngithi hambani kuhle bantwana bomhlabathi, lalani ngokuthula maqhawe ethu”
UChimonyo ubhubhe ngeviki edluleyo ngemva kokukhulelwa ngumkhuhlane wemvukuzane, ube eseleminyaka engamatshumi ayisithupha lasificamunwemunye- 69.
UChakabva yena wayebizwa ngegama lempini elithi Vhuu Masuko waba kuqula le ZANLA High Command engeyinye yenkokheli yesigaba se Gaza laye ubhubhe ngeviki edluleyo esele minyaka ephose ifike ethoba minwemibili-78.
UMnu Nkiwane laye obhubhe ngeviki edluleyo, odume ngokuthi waba ngomunye wabaqala ukuletha izikhali elizweni, lisabizwa ngokuthi yiSouthern Rhodesia ngo mnyaka ka 1962 ephansi kwe Special Affairs eyebandla le ZAPU, kodwa ilizwe lithola uzibuse, ngo mnyaka ka 1980 kazange angene kubutho loba kuhulumende.
Ekhuluma kulo mcwabo uMongameli Mnangagwa uthi uzulu kumele afunde kumaqhawe lawa, esithi uyathokoza ngomsebenzi ngamaqhawe lawa, ethi ukuvikelwa kwelizwe kuyinto okumele iqakathekiswe ngumuntu wonke.
Abazali Bakhala Ngenhlawulo Yokubhala Imihloliso
Inengi labazali lithi lokhe lingakaze libhalise abantwana ukuthi babhale imihloliso yokuphela komnyaka. Lokhu kugcizelelwe zinhlanganiso zababalisi abathi inani lasebebhalisile liphansi kakhulu ukuthi babhale imihloliso kaForm 4 loForm 6 lonyaka.
Kunje inengi labo lithi lisazama ukuthi bahlanganise imali ngoba inengi kakhulu okuzakwenza ukuthi abantwana bacine bengabhalanga izifundo zonke abafisa ukuzibhala.
Unkosikazi Duduzile Mpofu umzali olabantwana ababili ababhala imihloliso yeO leA level uthi lonyaka ubhekane lobunzima obukhulu.
“lnto esikhangelane layo khathesi inzima ngoba njengami abantwana ababili ngiyabasa ngaphi,lokhu sokusenza ngibe lesingqumo esinzima ngokuswelakala kwemali lamalanga asesondele okuthi kuvalwe. Abantwana abazabhala ama subject angakwananga ngokuswela imali okokuthi nxa kuvuma ngabe amalanga ayengezwa ukuthi sizame ukuyidinga sikwanisele, impilo zabantwabethu zizabanzima kakhulu.”
Unkosikazi Sandisiwe Ncube omunye njalo umzali olabantwana ababhalayo ufakaza ngenhlupho ababhekane lazo.
“lmali le eyokuregister iyasikhama kakhulu ngoba khathesi nxa uyathi usiya register esikolo bayakutshela ukuthi at least ngangcono ube ungakweledi umnyaka lowu odlulileyo,so kumele ubusubhadele ischool fees ungabi lesikwelede.Nxa ukhangele ama720 umtwana ebhala ama subject angu9 vele yinkalakatha yemali eyokuthi ukuyihlanganisa kwakhona kunzima songathi bangakhipha I deadline kaJuly basiphe isikhathi esingathi sithexhaxha ukwenzela ukuthi lathi njengabazali Sithole isikhathi sokuhlanganisa imali.”
Unkosikazi Sanele Sibanda ngomunye umzali olokhe engakahlawuleli indleko zokubhala imihloliso.
“Ngisahlanganisa okuncane ukuthi umtanami ayeregister since ideadline isisondele angazi ukuthi kusiyafika kuzabe sekubhadalwe okungaki ngoba ngisahlanganisa eyesubject eyodwa ayikakwani.Ngiyashikashika akuhlangani ngoba imali yakhona inengi angiyenelisi ukuthi ngiyithole and ideadline isifikile asazi kumbe abantwana bazabhala bonke kumbe kuzahamba njani.”
Isikhulumeli seAmalgameted Rural Teachers Union of Zimbabwe umnumzana Thembakuye Moyo uthi sebenanzelele ukuthi balutshwana abazali asebenelise ukuhlawulela indleko yemihloliso.
"Ma sikhangela i registration ye O level le A level sikhangela le deadline ekhona ngoJuly sibona inani labantu asebebuyile bazobhalisa abantwababo ukuthi bebhale lincane kakhulu. Imbangela kuzimali ezifunakalayo, singakhangela konke lokhu kubuyisela imfundo yethu phansi. Uhulumende aluba uyake abuyele kusisekelo sombuso esithi basic education is free ngoba okwakhathesi abantu abala mali.
Indleko zokubhadalela imihloliso yezinga le A level level ikunkulungwane ezimbili lamakhulu amane amadola eZimbabwe(ZW$2,400). Kuthi indleko yokubhadalela izinga le ‘O’ Level ingaphezu kwenkulungwane lengxenye(ZW$ $1,648.00). Laloba kunjalo uhulumende wathembisa ukuthi uzabhadalela isilinganiso sokwedlula ingxenye ekhulwini -55% kuthi abazali babhadale amatshumi amane lanhlanu ekhulwini-45%.
Ukuvalwa kokubhadala imali zokubhala imihlolise yeZimbabwe School Examination Council (Zimsec) kumhlaka 9 Ntulikazi 2021. Isikhulumeli senhlanganiso yokubhala imihloliso uNkosikazi Nicholette Dhlamini wenqabe ukuthatshwa ilizwi kodwa uchaze ukuba okwakhathesi abala lwazi lwesilinganiso sabafundi asebenelise ukubhalisa ngoba okwakhathesi kwenziwa ezikolo. Uchaze ukuba bazakwazi leli nani ngemva kokuba sekuvaliwe ukubhadala, yikho lapho abangathatha isinqumo sokwengezelela amalanga okobhadala uma inani liphansi.
