Kulabatsha abathakazelela usuku lweRobert Gabriel Mugabe National Youth Day abathi luthuthukisa ubuntu babo kanye lenhlelo zokuziphilisa kube labanye njalo abaluchothoza besithi kaluncedi lutho ngoba akulanto ebambekayo ephuma emkhosini wokunanza usuku lolu, olwalusaziwa ngokuthi yi21st February Movement.
Kulokufuthelana phakathi kwabatsha abasekela ibandla leZanu PF labaphikisayo ngokunanzwa kosuku lweNational Youth Day, olunanzwa minyaka yonke ngoNhlolanja. Lonyaka umkhosi lo uqhutshelwe eZimbabwe International Trade Fair showgrounds koBulawayo phansi kwesihloko esithi: ‘Empower Youth, Secure the Future’.
Obekhokhela umkhosi lo uFreedom Murechu, okuhlangothi lwabatsha kubandla elibusayo, uthi luqakatheke kakhulu usuku lolu.
"Siyajabula kakhulu ngohlelo lokunanza abatsha loba silohlupho lokungatholi imisebenzi lamuhla sizakuba lethuba lokucela umongameli ukuthi baqhatshe abatsha."
Kodwa abaphikisayo bathi usuku lolu luqakathekiswa libandla leZanu PF. UNkosazana Nicole Ngwenya, okubandla leZapu, ngomunye wabangahambanga emkhosini lo koBulawayo njalo ongahambelani losuku lolu.
UMaNgwenya uthi akuqedakali okwenziwa ngosuku lweNational Youth Day.
Lokhu kusekelwa nguBruce Moyo ukhansila wakoBulawayo okubandla leCCC.
Behlukene imbono njalo abatsha ngokufiswa ngamanye amalunga eZanu PF afuna ukuba kuguqulwe isisekelo sombuso welizwe ukuze uMongameli Emmerson Mnangagwa aqhubeke esembusweni kungafika umnyaka ka2028, okugqitshwa khona umbuso wakhe. UMurechu uthi bayakusekela lokhu loba uMnangagwa esithi uzasuka embusweni ngo2028.
Abaphikisayo bathi kulihlazo okuzanywa ngamanye amalunga ebandla leZanu PF afuna ukuba uMnangagwa aqhubeke esembusweni kuze kuyefika umnyaka ka2030. UBenoni Ncube olwela ilungelo loluntu uthi akumelanga uMnangagwa ahlale embusweni kungafika umnyaka ka2028.
Kulabanye abahambe emkhosini wanamuhla akade befisa ukusondela duzane loMnangagwa. Omunye wabo nguSihle Khumalo, osakhulayo ofunda eMpopoma.
"Bekukuhle lapha lamuhla sijabule kakhulu ngibone umongameli okwakuqala njalo lenkulumo yakhe ibisakha sikholise okwamagama."
Esethula umbiko wakhe emkhosini lo, uMnangagwa ukhuthaze abatsha ukuba bengathathi izidakamizwa.
Usuku lwabatsha lwathi lusungulwa lwalungolokunanza ilanga lokuzalwa lowake wakhokhela eleZimbabwe umuyi uRobert Mugabe, owaqengulwa libutho ngomnyaka ka2017.
Forum