HARARE- Bekulilanga lokucina lokubhalisela ukuvota kukhetho olukhulu lokudinga amakhansila, amalunga edale lephalamende lomongameli, oluhlelwe ukuqhutshwa mhlaka 23 Ncwabakazi lonyaka.
Abanye abakade beze ukuzobhalisa namhlanje, bebekhala ngokuthi bekuthatha isikhathi eside ukuba bathole usizo lokuthi benelise ukwenza njalo.
Lokhu kuza ngesikhathi uMongameli Emmerson Mnangagwa esebeke ilanga lokhetho okutsho ukuba ngomthetho wakuleli akusela muntu osezabhalisa ukuvota kukhetho lwalonyaka.
Njengoba bekulilanga lokucina lokubhalisela ukuvota bekuphithizela kulendwendwe ndawo zonke zabantu abatsha labadala bezama ukusebenzisa lelo thuba lokucina ukuze benelise ukuvota ngoNcwababakazi mhlaka 23.
Indawo ezifana le Cecil, eMbare lase Budiriro benguyinhlabathi abantu bezama ukuba amabizo abo enelise ukuba khona kugwalo lwabalelungelo lokuvota eleVoters Roll yalonaka.
Omunye obe efuna ukubhalisa ukuvota uMnu Liberty Mzuzu wasemzini oweBudiriro eHarare, uthe uthwale nzima ukuze enelise ukubhalisela ukuvota.
“Sitshone simele emahofisini ukuze senelise ukubhalisa ukuvota. Kodwa ungakhangela ama queues akhona makhulu kakhulu okokuthi sithwele nzima”
Lokhu kusekelwe ngomunye osakhulayo laye ohlala eHarare, kodwa emzini oweHighfields, u Lovermore Dube.
“Namhlanje njengelanga lokucina kusobala ukuba wonke umuntu ufuna ukuba enelise ukuvota. Yikho esizakwenza ukuthi siphumelele ukuvota lonyaka”
Olwela amalungelo oluntu uMnu Charles Nyoni uthi namhlanje ube ekhuthaza abanengi ukuba babhalisele ukuvota ngoba isikhathi sesidliwe ngu mangoye.
“Siyala sikhuthaza labo abafuna ukuvota ukuba isikhathi yiso lesi. Ilanga lanamhlanje silisebenzise ukuthuza labo abafuna ukuvota lobanje kulonzima bokuba abe ZEC bayaphuza ukwenza lokho”
Umsekeli webandla le ZANU PF uMnu Addington Mpofu uthi ibandla lakhe lizimisele ukunqoba kukhetho esithi namhlanje ube engomunye oncedise ummeli we Mpopoma uMnu Admire Masikati ukubhalisa ukuvota.
‘Sikhuthaza abantu ukuthi beyebhalisa ukuvota sesenze umsebenzi omkhulu. Siphathiswa ngabantu abafana le Teachers for ED, Young Women for ED labanye’
I-Studio 7 yehlulekile ukukhuluma lezisebenzi zekomishini ebona ngezokhetho eye Zimbabwe Electoral Commission endaweni obekubhaliselwa khona abantu ukuba benelise ukuvota ngoba bebengela lathuba lokuphefumula kulabantu abanengi abakade bezobhalisa. Isikhulumeli se ZEC uMnu Robert Kiwa laye ube sithi kenelisi ukukhuluma ngoba esemhlanganweni ngesikhathi intathelizindaba zifuna ukuzwa icele le ZEC ngaloludaba.
U-Mongameli Mnangagwa ngo Mvulo uveze kugwalondaba lukahulumende olwegovernment gazzette ukuba ukhetho luzakwenziwa mhlaka 23 Ncwabakazi.
Ubike njalo ukuthi idale lokubhalisa kwalabo abafisa ukuncintisa kukhetho lolu, ele Nomination Court lizahlala emethethwandaba owe High Court mhlaka 21 Nhlangula lisamukela amaphepha alabo abafuna ukuba ngo Mongameli kuthi lizahlala njalo emadale abo Mantshi ukuba lamukele amabizo alabo abafisa ukuba ngamalunga edale lephalamende lamakhansila.
Forum