Abakunhlanganiso yabavangeli bebandla lamaRoma eyeZimbabwe Catholic Bishops’ Conference bathi uhulumende kaMongameli Emmerson Mnangagwa kumele alungise inswelo zikazulu kulokuthi kukhulunywe nsukuzonke ngokuqhubeka kombuso kamongameli kungafika umnyaka ka2028, okugqitshwa khona amahlandla amabili ombuso wakhe.
Bethule umbiko lo ngoMvulo kusihlwa besithi kusobala ukuba umnotho kawuphathangwa ngemfanelo eZimbabwe okugcwele inkohlakalo. Bathi konke lokhu kumele kulungiswe nguhulumende hatshi ukuba ababusayo begxhile embusweni kaMnangagwa.
Abaphathintambo bakahulumende bathi abavangeli bebandla lamaRoma kumele bekhulume ngokuphathelane lokholo lwabo hatshi ezombusazwe. Kulamalunga ebandla leZanu PF afisa ukuba uMnangagwa aqhubeke esembusweni kuze kuyefika umnyaka ka2030 kube labanye njalo abakuphikisayo lokhu.
Ukuhlaziya loludaba, sixoxe loMnu. Thembalani Dube, olandela ezombusazwe ezimele, othi kumele ibandla leZanu PF lizame ngamandla ukusebenzela uzulu ngoba sokusabalaliswa imibiko eminengi emayelana lombuso kaMnangagwa hatshi ukuvuselela umnotho welizwe.
Kusenjalo, abanye abakubandla leZanu PF endaweni ezitshiyeneyo sebesethuselana ngombuso kaMnangagwa besithi labo abangafuni ukuba aqhubeke esembusweni badlelana lezitha zelizwe.
Kodwa abaphikisa ukuba uMnangagwa ahlale embusweni kuze kuyefika umnyaka ka2030 bathi akulandelwe ngemfanelo isisekelo sombuso welizwe kudaba lolu.
UMnu. Nhlanhla Moses Ncube, unobhala jikelele wenhlanganiso yeFreedom Alliance, uthi ukuxokozela okukubandla leZanu PF kulakho ukuba kuphehle inguquyo yezombuso eZimbabwe.
Kodwa uMnu. Partson Sibanda, Ilunga lebandla eliobusayo, uyakuphika lokhu esithi abantu babambene kubandla leZanu PF loba besehlukana imbono ngodaba luka Mnangagwa.
Forum