Amapholisa koBulawayo asemanyane labazali, ugatsha lwezemfundo, abathengisayo, labathwala abantu ngezimota emizameni yokulwisana lokuthathwa kwezidakamizwa ezehlukeneyo enzikini yedolobho esilindweni samabhasi esazakala ngokuthi Egodini, lapho abafundi okubikwa sebevame ukuhlangana khona bengaphuma esikolo bengakagadi izimota zokubuyela emakhaya.
lnani labafundi asebephatheka ekuthatheni izidakamizwa ezehlukeneyo libikwa liqansa edolobheni lakoBulawayo osekudale ukuba amapholisa asungule uhlelo lokulwisana laloluhlupho ngoba inengi selikhathazekile ngekusasa yabatsha laba.
Isikhulumi samapholisa koBulawayo ulnspector Nomalanga Msebele uthi sebesungule uhlelo lokulwisana lokuthathwa kwezidakamizwa ngabafundi kuhlanganisa lalabo ababathengiselayo enzikini yedolobho lakoBulawayo.
"Sekulabafundi abakhohlakeleyo abatshayisa esikolo bahlangane Egodini Rank laphandle kwayo bathathe izidakamizwa ezehlukeneyo kuhlanganisa lotshwala. Sikhuthaza uzulu ukuba akhuze abafundi baye emakhaya hatshi ukwenza isilindo samabhasi indawo yokuhlangana besona."
Obona ngokuthwalwa kwabantu esilindweni sezimota Egodini Rank, uMnu Danisa Tshuma uchasisa indlela abafundi abaziphatha.
"Lapha Egodini Rank silodubo lwabafundi abafika bahlangane lapha beme bengagadi bangahlangana benza bonke ububi ongabucabanga bayalwa bathatha izidakamizwa njalo bengangena ezimoteni bathanda ukuhlala emuva lapho abenza khona ucansi njalo abakhuzeki."
Othengisa Egodini Rank uMnu Mncedisi Sibanda uthi kunzima ukuqondisa abafundi abagadela kulesisilindo.
"Abantwana laba abakhuzeki njalo kunzima ukuthi sibaqondise ungananzelela sekulomzali ovela ejele obethi uyaqondisa kodwa umthetho wabopha lumama ngakho sizabakhuzanjani lababfundi njengoba libabona besenzenje emphakathini."
Umzali, uNkosikazi Jean Sibanda, ukhala ngabantwana asebethatha izidakamizwa enzikini yedolobho.
"Abantwana sithi abatshaywe abakhuzeki sekeleni sikhuze abantwana njengabazali njalo izidakamizwa babuyasebevele belazo lapha abakhuzeki okukhona yikuthi kabatshaywe."
UDokotela wengqondo uJacquline Nkomo uchaza imihlobo ehlukeneyo yezidakamizwa ezithathwa ngabafundi.
"Abadala labatsha bayathatha izidakwamizwa banatha umuthi wokukhwehlela,amapampers kulezinsuku kuleziwiji kuneni abakunathayo labakubhemayo okubaphambanisa ingqo do."
UMqondisi wesibhedlela seIngutsheni uDokotela Nemache Mawere ekhuluma leStudio 7 ecingweni uchaze ukuba inani labantwana abathatha izidakamizwa liya liqansa koBulawayo ethi okwamanje kulabatsha abedlula amatshumi ayisificaminwe mibili ekhulwini 80 percent abayingxenye yezigulane abalazo esibhedlela sona esilabantu abedlula amakhulu ayisithupha lengxenye 650 abalaliswe eIngutsheni.
Forum