Ibhayibhili lithi hlonipha uyihlo lonyoko ukuze insuku zakho zande ezweni.
Lokhu yikho kanye okuxwayiswa ngogogo labokhulu beTsholotsho asebefikise iminyaka yokuzalwa elikhulu, 100 years, ngamunye kusiya phezulu.
Phezu kwenhlonipho, bathi ukudla kwesintu kulomthelela omkhulu empilweni zabo.
"Sakhula silalela silomthetho sihlonipha abantu abadala," kutsho uGogo Ntombizodwa Moyo oleminyaka elikhulu, 100. "Umunto omdala wayebuya lomumbu athi akungigigele ugige, manje lokhu okwanamuhla angikholwa ukuthi umntwana engakwenzela ungaso mzali wakhe."
Ugogo MaMoyo ungomunye wabahlali beTsholotsho abalitshumi lanhlanu, 15, asebeleminyaka yokuzalwa esuka kwelikhulu kusiya kwelikhulu lasithupha, 106 years, ababuthane emcimbini wokubananza esigabeni seTshino, kunsukwana ezedluleyo.
Uthi usephile iminyaka yonke le ngoba wakhula ehlonipha abantu abadala, okuyinto athi isisilela kwabasakhulayo bakulezinsuku, bona athi sebengumhlambi kazelusile, iziqholo ezingakhuzekiyo.
Inhlanganiso yomanyano weUnited Nations ebona ngezempilakahle emhlabeni jikelele, eyeWorld Health Organization, ithi abantu abanengi eZimbabwe baphila iminyaka engamatshumi phose ayisithupha, 58.5 years, i-life expectancy.
Iminyaka le iyingcosana nxa iqathaniswa lelikhulu esiphilwe nguMamoyo, yena othi okunye okufiphaza impilo yentsha yanamuhla yikugijimela ucansi abanye becine bebulawa yimikhuhlane efana lowengculazi.
"Abakhathesi abala mthetho, abasela nhlonipho. Kudala umntwana wayebuya lejaha laphana athi ebona umunt'omdala acatshe," kutsho uGogo MaMoyo. "Manje abakhathesi asazi, sokuyikujika kwesikhathi lokhu."
Omunye obesembuthanweni lo nguGogo Esther Ngwenya, oleminyaka yokuzalwa elikhulu lasithupha 106 years.
"Ungathini ebantwaneni laba, vele abalaleli ungaze uthini abakuzwa. Noma ngibatshela bathi wena ungowakudala thina sibatsha," kutsho uGogo MaNgwenya. "Sebehlutshwa layinjengu bengasutha bayabe sebekhuluma okwabo besithi bayakugamula."
Amazwi la agcizelelwe ngukhulu oleminyaka elikhulu lambili, 102, uMnu Sutha Moyo. Yena uthi ukudla kwesintu ngokunye kwezinto eziqhelise impilo yakhe.
"Sakhula ngenyawuthi ngoba kwakungela mumbu. Lakhathesi lokhe siwadla amabele njalo siyawalima," kutsho uMoyo.
Uxwayise abasakhulayo ukuthi betshiyane lokusebenzisa izidakamizwa lokunatha utshwala obulimaza umzimba omufana lenjengu.
"Liyabona mina ukuthi senginganani angizange ngigange. Kumele lizaphathe lizabona lifika iminyaka yami. Nxa uganga ungaziphathi kunengi okuvelayo," uqhubeke esluleka uMoyo.
"Uzwile lowana ekhuluma esithi injengu injengu namuhla, injengu yiyo ehlupha abantwana. Sebesenza ababona kuyikho oku-right. Kumele uhloniphe ukuze insuku zakho zande."
Umcimbi lo ubuqoqwe yinhlanganiso yeSPA Community Trust, yona enakekela abantu asebeluphele ngokudla, inhlelo zempilakahle lokunye okutshiyeneyo.
Ogogo labokhulu laba babuyele ezindlini bethwele ukudla okugoqela izinkwa, impuphu, amahewu, irayisi lamafutha okuphekisa abakuphiwe yinhlanganiso le.
"Le yi-organisation ekhangele abadala abale-65 years kusiya phezulu abalemkhuhlane enjenge-BP, itshukela, i-stroke, i-dementia leProstate cancer," kutsho isiphathamandla seSPA Community Trust uNkosikazi Samantha Ruzawe.
"Okweminyaka emibili edluleyo, besibabiza koBulawayo bahlangane ndawonye kodwa lonyaka sinanzelele ukuthi abadala bethu abasenelisi ukuhamba. Yikho sithe sibalande, siqale ngabeKezi, sathi koBulawayo, saya ePlumtree, namuhla siseTsholotsho."
Umbuthano lo ungenwe ngabantu abagoqela induna yesigaba uMnu Mandlakazulu Khumalo Mathuphula, yena obehamba labalisa bakhe.
Forum