Izizalwane zeZimbabwe kweleSouth Africa zithi zikhathazeke kakhulu ngendlela uhulumende womanyano aphatha ngayo abantu bokuza ngesikhathi efikisa insuku ezilikhulu ephethe intambo zombuso.
Umgcinisihlalo wenhlanganiso yeZim Imbokodo elwela amalungelo abesifazana ikakhulu abeZimbabwe kweleSouth Africa, uNkosazana Victress Mathuthu, uthi kulusizi kakhulu ukuthi uhulumende womanyano usuke waqakathekisa ukuzingelwa lokubandlululwa kwabantu bokuza, osekwenze impilo yabalamaphepha labangalawo yabanzima kakhulu.
“Sibabonile abantu bakithi bayabotshwa, bayavalelwa, bayagwetshwa mpela izinyanga mpela ezimbili kusiyakweziyisithupha. Emsebenzini lapha sekunzima. Abantu abanengi abasasebenzi. Kuvinjwe ukuthi umuntu angaqatshi umuntu ongelamaphepha. Lalaba abantu abakade besiqatsha singelamaphepha abasaqatshi kangako ngoba sebesesaba ukuthi bazabotshwa. Emnyangweni wezempilo abokufika belatshwa nzima. Ezibhedlela kusafunakala amaphepha, kusafunakala izimali. Emnyangweni wezemfundo kuyafana bakithi nxa abazali bebotshwa becina bengasasebenzi kuthinteka izingane okumele ukuthi ngani ziya esikolweni.”
Owesifazana weZimbabwe ongathandanga ukuvezwa igama lakhe uthi selokhu kwangena uhulumende womanyano sebephenduke omabonwa babulawe kukanti bebekhangele ukuthi uhulumende womanyano uzakwenza kube ngcono ukuthi bathole incwadi zokusebenza kweleSouth Africa.
“Okwenza futhi singabi lawo amaphepha afanele yikuthi amapassport ayadula. Uku aplaya ipassport manje yeZimbabwe yiR5,000. Ma ungenayo awenelisi ukuthi u aplaye ipassport. Okungangokuthi yimali edula kakhulu esingayenelisiyo. Kube kanti futhi ukuthi sibe lamapermit asiselayo imvumo. Abanawo baba nawo ngaleso sikhathi kanti lamanje sekunzima futhi kwabanye ukuthi be aplaye ngendlela adula ngakhona. Imali yakhona asiyenelisi, iphezulu kakhulu, iyasehlula.”
UMnu. Lance Mlilo, umgcinisihlalo wenhlanganiso elwela amalungelo ezizalwane zeZimbabwe eyeProgressive Zimbabwe Foundation, uthi indlela uhulumende womanyano aphatha ngayo abokuza isibatshiye bethithibele.
“Besicabanga ukuthi uhulumende lo owobumbano uzokwakha isizwe abonise ama Africans ukuthi baba united nabantu baseSouth Africa. Pho ngathi sibona sekukhona ukuhlaselwa thize kwabantu bokufika, behlukunyezwa bengenelwa nasemachurch kubotshwa wonke umuntu onephepha longenaphepha osekusibonisa ukuthi lu hulumende njengoba ehlanganisa i 100 days akuyena uhulumende ozoletha ubumbano phakathi kwabantu.”
Omunye njalo owesifazana weZimbabwe laye othande ukuthi igama lakhe ligodlwe uthi bakhala ezimathonsi kuhulumende womanyano ukuthi abasize abaphe lamaphepha asebewabotshelwa emini lebusuku.
“Kubekhona loku ukuthi bayasinakakela, bayasibhekela ekuthini amapermit sicela ukuthi bengawavali. Basize ekuthini njengoba thina ama passport ebiza kangaka, sibe under imithetho yabo yemali ukuthi at least ingadluli i R1,500 kube yikuthi i under R1,500 because sila eSouth Africa ukuze abantu bezokwazi ukuthola amapassport and sifakelwe amapermit khona lalabo abagangayo bezobabamba easy.”
Kodwake uhulumende womanyano yena uthi akabuyeli emuva ngenhlelo zakhe zokuqinisekisa ukuthi wonke umuntu ongena lokusebenza kweleSouth Africa wenza lokhu ngokusemthethweni.
Esethula uluhlu lwalokhu okwenziwe kuhle lugatsha lwakhe ekhasini lohlangothi lwendaba zasekhaya kuX, uMnumnzana Leon Schreiber uthe ukwengezwa kwenhlelo zokuqinisekisa ukuthi imithetho yokungena kwabantu elizweni iyalandelwa ngezinye zezinto lolugatsha oluzincoma ngazo.
Langamazwi agcizelelwe ngumphathintambo wogatsha lwezemisebenzi uNkosazana Nomakhosazana Meth yena othe bazakwengeza iziphathamandla zalolugatsha ezihlola amankampani kugoqela lokuthi abasebenza kuwo balamaphepha, zisuke kunkulungwane ezimbili (2,000 labour inspectors) zibe zinkulungwane ezingamatshumi amabili (20,000 labour inspectors).
“Lumsebenzi esiwenzayo uyingxenye yensika lenhloso zikahulumende womanyano ukubona ukuthi imithetho iyalandelwa elizweni. Njengoba siphakathi kokuphendla indlela yokuvuselela umnotho, lokuwuthuthukisa, kuqakathekile ukuqinisekisa ukuthi imithetho yemisebenzi elethale intuthuko iyalandelwa.”
Izizalwane zeZimbabwe zithi lokhu kutsho ukuthi impilo yazo kweleSouth Africa imnyama emuva lamphambili.
Forum