Izizalwane zeZimbabwe ezihlala kwele South Africa zithi sezilahlekelwe lithemba lonke ekuthini amabandla ezombusazwe aphikisayo eZimbabwe kulenguquko angayiletha ezalungisa ezombusazwe, ezomnotho lezenhlalo kazulu.
AbeZimbabwe laba bathi ubugovu, ubuthengisi, ukuthanda imali, ukubanga izikhundla, ubugwala lobumenemene sekuwabulele kwawaqeda du amabandla ezombusazwe aphikisayo kwangasali ngitsho lodokozana lwethemba lokuthi angabuye avuke.
Inengi lithi ingxabangxoza esebandleni leCitizens Coalition for Change ikhombisa sobala ukuthi kumabandla aphikisayo sekugcwele amaganyana angela ngitsho lenhlansi yonembeza.
Abanye bathi lamanye ngeke kuvele kusakhulunywa ngawo njengoba esehluleka ukuthola ngitsho lokuyisihlalo okukodwanje ephalamende.
Isizalwane seZimbabwe uMnumnzana Greatman Mkhwebu uthi ukubuya kwenguquko eZimbabwe sekusezandleni zikaMvelingqangi njengoba emabandleni aphikisayo sekuselenje ukhakhayi olungethusi ngitsho lenyoni.
“Alisekho ithemba elokuthi ungathemba amaqembu aphikisayo eZimbabwe ukuthi engaletha utshintsho .Bayenza lapha bengabantu mpela engathi sisephejini eli1 sizalwela utshintsho only to find out that ekugcineni emuva back door yibo abantu abangathi bangamadeployees eZANU baza nje kithi bazofuna amavoti just to confuse amavotes bathathe bawabisele kuqembu elibusayo, So, as long bona besidla hayi abala nkinga lakho.”
Kodwa-ke amabandla aphikisayo lawo abuyisela lezi ingqobe kuzizalwane zeZimbabwe lezi. Obona ngokuqoqwa kwenhlelo zebandla leThe Patriotic Front uMnumnzana Mxolisi Ncube uthi abasola abanye laba kufuze bazibuze ukuthi bona benzani ukuletha linkululeko abayifunayo.
“Ngizakhuma ngento eyenzakale eKenya. Abantu baseKenya bathe enough is enough sesifuna ukuthi izinto zenzekale ngendlela ethile basukuma benza lokho akade bekufuna. Ezinye izinto sizibonile zihlehliswa nguhulumende kungakho abantu beZimbabwe into yokuqala abamele bayazi yikuthi amandla akibo besebefaka umuntu besebesithi sikhokhele kulokhu.”
Unobhala jikelele webandla leZAPU uMnumnzana Mthulisi Hanana uthi abakhononayo laba nxa bengasukuma baphatheke kwezombusazwe izinto zizaguquka.
“Abantu kababhalise ukuvota balungiselele ukuyakhona eZimbabwe lapho okuvotwa khona. Okwesibili abantu abangaphandle kwelizwe besicelisa kakhulu ukuthi bathumele imadlanyana ethize abalayo amaR10,ama$1, 1pound bathumele emabandleni aphikisayo ngoba ukuze senelise ukubumba umbutho sithathele IZANU umbuso kudingakala imali.”
Obengumgcinisihlalo webandla leCitizens Coalition for Change kweleSouth Africa uMnumnzana Trust Ndlovu uthi uhlupho olukhulu ababhekane lalo yikuthi balwisana lohulumende osephenduke waba liginyambila elisemnyango wobhalu olugcwele imbila.
“Uma ulwa nombuso ofana nalo esilwisana nawo kubanzima ngoba abantu bakhona basebenzisa amasotsha ,basebenzisa amapolisa nemitshini kahulumende. Abanamandla lababantu. Ubaba uChamisa uyabuya uza nenhlelo ezinzima kakhulu uzokhipha iZANU.”
Kodwake ophile ngesikhathi senkululeko uMnumnzana Dan Maphalala Mabunda uthi sezilahlekile injongo zomzabalazo kunkokheli zamabandla aphikisayo.
“The leaders omunye nomunye usebenzela isisu sakhe. Nama opposition usebenzela isisu sakhe. Imoto ehamba ngomuntu osebenzela iruling party okucabinet naye ufuna the same. Akasahlali nabantu usesukile manje usehlala emasurbubhini. ONkomo bebephila nabantu ,OMugabe bebephila nabantu emakhaya naboSithole bebephila nabantu.”
Abanye bathi okuzalungisa isimo elizweni yikuthi lalabo ababalekele kwamanye amazwe labo baphenduke ekhaya kuyencediswana ukuletha inguquko abayikhalelayo.
Forum