Taboka Ncube
Abatsha bathi bazatshengisela emigwaqweni besola indlela okuqhutshwe ngayo ukhetho olukhulu kwele Zimbabwe ngeviki ephelileyo. Kulabanye abakhuthaza ukuba kube lokuthula elizweni.
Lokhu kuza kulandela imibiko ebithunyelwa enkundleni zokuxhumana ekhuthaza abantu ukuthi batshengisele ngemva kokuba ibandla eliphikisayo eleCitizens Coalition for Change lale ukwamukela impumela yokhetho lolu.
Abatsha bathi inkonkeli zelizwe kufanele zilalele imibono yabo njalo bavunyelwe baphatheke ekuthathweni kwezinqumo zelizwe. UPrince Shava, ongukhansela webandla leCCC eHwange kuWard 5, uthi ilizwi labasakhulayo liqakathekile njalo balungiselele ukuphatheka ekutshengiseleni nxa kungaba lendingeko yalokho.
“Silungiselele ukutshengisela, ngoba kufanele basizwe nxa sikhala ngokuthi ukhetho alwenziwanga kuhle,” kutsho uPrince.
UNkosazana Sithabile Gandi Ndlovu, okhokhela inhlanganiso ephathisa abantwana abaqhuba izifundo zika Grade 6 lo 7 ngengwalo lokunye, uthi kuliqiniso ukuthi imibono yabatsha kufanele ilalelwe. Kodwa uthi imibono le kufanele ikhutshwe ngendlela ezilokuthula hatshi ezokutshengisela.
“Thina njengamayouth sithanda ukuthi kube lokuthula, okufana lesikubone emkhankasweni. Kungadanisa kakhulu ukuthi uhambo esiluqalise kuhle luphele ngendlela engayisiyo sekulodlakela,” kutsho uSithabile.
Ingcwethi kwezombusazwe, uMnumzana Effort Dlela Ncube njalo okunhlanganiso yeNational Consumer Rights Association, uthi ukutshengisela lokukhalala imisebenzi ayisikho kwabasakhulayo bodwa njalo kungaphazamisa amabhizimusi okwesikhatshana kodwa kulakho ukuletha impumela engaphathisa ilizwe.
“Into okumele siyikhangele yikuthi yini elungiswayo kanye lokuthi amabhizimusi azaphathiswa njani yilokhu. Nxa kungaba lokulahlekelwa yimali lapha lalaphayana ayifani lenzuzo ekhangelelwe ukuba khona.”
Omelele ukugcotshwa okusemthethweni, uMnu. Emmerson Mnangagwa, uthi bazajezisa abantu abazatshengisela emigwaqweni bekhonona ngempumela yokhetho olusanda kuqhutshwa kwele Zimbabwe.
Forum