សហជីពនឹងទាមទារឲ្យថៅកែរោងចក្រដំឡើងប្រាក់ឈ្នួលអប្បបរមាពី១៤០ដុល្លារដល់ជិត១៨០ដុល្លារសម្រាប់ឆ្នាំ២០១៧។ ប៉ុន្តែតំណាងនិយោជកនិយាយថា ចំនួននេះច្រើនហួសហេតុ ដែលនឹងត្រូវពិភាក្សាគ្នានាពេលខាងមុខ។
ក្រុមមេដឹកនាំសហជីពបានប្រកាសការស្នើសុំចរចាជាមួយភាគីនិយោជកក្នុងឧស្សាហកម្មកាត់ដេរ សម្រាប់ការដំឡើងប្រាក់ឈ្នួលអប្បរមាឲ្យដល់១៧៩,៦០ដុល្លារសម្រាប់កម្មករ ដោយសារប្រាក់ឈ្នួលដែលកម្មករកំពុងទទួលបានមិនអាចអនុញ្ញាតឲ្យកម្មកររស់នៅបានសមរម្យនោះទេ។ នេះបើតាមលិខិតស្នើសុំចរចារបស់ក្រុមសហជីពដែលបានផ្ញើជូនក្រសួងការងារកាលពីថ្ងៃសុក្រ។
ប្រាក់ឈ្នួលអប្បបរមាដែលកម្មករទទួលបាននាពេលបច្ចុប្បន្ននេះមានចំនួន១៤០ ដុល្លារក្នុងមួយខែ។ កម្មករទទួលបានប្រាក់ឈ្នួលនេះ ក្រោយពីមានបាតុកម្មទាំងអហិង្សា និងហិង្សាអស់រយៈពេលជាច្រើនឆ្នាំកន្លងទៅនេះ ដែលបានបណ្តាលឲ្យកម្មករមួយចំនួនបានបាត់បង់ជីវិត និងជាច្រើននាក់ទៀតរងរបួស ដោយសារការបង្ក្រាបរបស់កងកម្លាំងរដ្ឋាភិបាល។
លិខិតចុះថ្ងៃទី០២ ខែ កញ្ញាឆ្នាំ ២០១៦ផ្ញើជូនលោកអ៊ិត សំហេង រដ្ឋមន្ត្រីក្រសួងការងារ បានសរសេរថា«សហជីពរបស់យើងខ្ញុំ បានឯកភាពយកតួលេខ១៧៩,៦០ដុល្លារសម្រាប់ដាក់ធ្វើការចរចា ដោយផ្អែកលើកត្តាធំៗ២គឺកត្តាសង្គម និងកត្តាសេដ្ឋកិច្ច»។
តំណាងនិយោជកនិយាយថា ចំនួនប្រាក់ឈ្នួលអប្បបរមា ដែលកំណត់ពីភាគីសហជីពនេះគឺកើនដល់ទៅជិត៣០ភាគរយ បើធៀបនឹងប្រាក់ឈ្នួលបច្ចុប្បន្ន។ តំណាងនិយោជកបានព្រមានថា ប្រសិនបើមានការចង់ធ្វើបាតុកម្មនោះ ក្រុមសហជីពត្រូវតែគោរពទៅតាមច្បាប់។
ក៏ប៉ុន្តែលោកអាត់ ធន់ ប្រធានសហភាពការងារកម្ពុជា បានប្រាប់ VOA នៅថ្ងៃច័ន្ទនេះថា ខាងភាគីនិយោជករមែងតែងតែត្អូញត្អែរ និងតវ៉ាប្រឆាំងការស្នើសុំរបស់ក្រុមអ្នកតំណាងកម្មករ។ លោកនិយាយថា ចំនួនប្រាក់ឈ្នួលអប្បបរមា ដែលក្រុមអ្នកតំណាងកម្មករត្រៀមស្នើសុំនេះគឺមិនច្រើន ហើយក៏មិនទាន់គ្រប់សម្រាប់ការរស់នៅសមរម្យនោះដែរ។
«និយោជក គាត់តែងតែមានការតវ៉ាអញ្ចឹងឯង។ លើកណាក៏គាត់មិនដែលនិយាយថា ចង់ឲ្យកម្មករដែរ បើទោះបីជាកម្មកររស់ដោយវេទនា ដោយមិនមានអារម្មណ៍ ឬក៏ទឹកចិត្តនៅក្នុងការផលិត នៅក្នុងវិស័យហ្នឹងយ៉ាងណាក៏ដោយ ហើយគាត់ព្យាយាមចំណាកស្រុក ឬគាត់ធ្វើការទាំងបង្ខំចិត្តយ៉ាងណាក៏ដោយ ក៏និយោជកនៅតែមិនផ្តល់ឲ្យគាត់ច្រើនដែរ។ នេះគឺជាទម្លាប់ដែលយើងធ្លាប់ជួបចរចារយៈពេលបួនប្រាំឆ្នាំ»។
លោកអាត់ ធន់បានអះអាងថា ចំនួនទាមទារនេះគឺគ្រាន់តែសម្រាប់តែកម្មករម្នាក់ ដែលកំពុងរស់នៅដោយលំបាកតែប៉ុណ្ណោះ។ លោកថា ប្រសិនបើកម្មករមានបន្ទុកក្នុងគ្រួសារម្នាក់ទៀតនោះ កម្មករនោះគួរតែទទួលបានប្រាក់ឈ្នួលអប្បបរមាចំនួនប្រមាណ២៥៦ដុល្លារក្នុងមួយខែ។
លោកខេន លូ អគ្គលេខាធិការសមាគមរោងចក្រកាត់ដេរនៅកម្ពុជា បានប្រាប់ VOA នៅថ្ងៃច័ន្ទនេះថា ប្រាក់ឈ្នួលអប្បបរមា ដែលភាគីសហជីពទាមទារនេះ គឺជាចំនួនច្រើន មានន័យថា វាមានកំណើនជិត៣០ភាគរយ បើធៀបនឹងការដំឡើងពីប្រាក់ឈ្នួលបច្ចុប្បន្ន១៤០ដុល្លារទៅប្រាក់ឈ្នួលដែលទាមទារចំនួន១៧៩,៦០ដុល្លារ។
«ការណ៍ពិត ប្រាក់ខែកម្មករវាលើសពីអាហ្នឹងច្រើនហើយ។ វាមិនគ្រាន់តែប្រាក់ឈ្នួលអប្បបរមាហ្នឹងទេ។ អញ្ចឹងខាងសហជីពគេស្នើសុំឡើងម្តង ប្រាក់ឈ្នួលអប្បបរមាឡើងម្តង៣០ភាគរយអត់មានប្រទេសណាធ្វើបានទេ»។
VOA មិនទាន់អាចទាក់ទងលោកហេង សួ អ្នកនាំពាក្យក្រសួងការងារបានទេ នាថ្ងៃច័ន្ទនេះ។
ប្រជាពលរដ្ឋខ្មែរជាស្ត្រីប្រមាណជា៧០០.០០០នាក់កំពុងធ្វើការនៅក្នុងវិស័យកាត់ដេរនៅក្នុងប្រទេសកម្ពុជា។ កម្ពុជានាំចេញផលិតផលសម្លៀកបំពាក់ប្រមាណ៤៦ភាគរយទៅកាន់សហភាពអឺរ៉ុប ៣០ភាគរយទៅកាន់សហរដ្ឋអាមេរិក និង២៤ភាគរយផ្សេងទៀតទៅកាន់ប្រទេសកាណាដា និងជប៉ុន។
ចំណូលដែលបានមកពីការនាំចេញនេះគឺមានជាង៦.០០០លានដុល្លារអាមេរិកនៅឆ្នាំ២០១៥។ នេះបើយោងទៅតាមទិន្នន័យដែលផ្តល់ដោយសមាគមមណ្ឌលព័ត៌មានកម្មករ។
លោកអាត់ ធន់ ប្រធានសហភាពការងារកម្ពុជា បានបញ្ជាក់ថា ការចរចាប្រាក់ឈ្នួលអប្បបរមានេះនឹងធ្វើឡើងនៅថ្ងៃទី៩ ខែកញ្ញាខាងមុខនេះ។ លោកបន្តថា ការចរចានឹងត្រូវធ្វើជាបន្តបន្ទាប់ទៀត គិតពីថ្ងៃទី២៥ ខែកញ្ញា ប្រសិនបើមិនមានការព្រមព្រៀងគ្នារវាងភាគីសហជីព និងនិយោជកនោះ៕
