អង្គការសុខភាពពិភពលោកបានរាយការណ៍កាលពីថ្ងៃចន្ទថា ករណីជំងឺកញ្ជ្រិលនៅទូទាំងពិភពលោកបានកើនឡើងជិត៤ដងនៅត្រីមាសដំបូងនៃឆ្នាំនេះ បើធៀបនឹងឆ្នាំមុន។
ដោយដកស្រង់ទិន្នន័យបឋម ភ្នាក់ងារអង្គការសហប្រជាជាតិនេះបាននិយាយថា មានករណីឆ្លងជំងឺកញ្ជ្រិលជាង១១ម៉ឺន២ពាន់ករណីដែលអាចការពារបាន ប៉ុន្តែជំងឺនេះត្រូវបានគេរាយការណ៍មកថា ឆ្លងជាច្រើនទូទាំងពិភពលោកក្នុងកំឡុងខែមករាដល់ខែមីនា។
អង្គការសុខភាពពិភពលោកបានអំពាវនាវឱ្យមានការចាក់ថ្នាំបង្ការប្រសើរឡើងទប់ទល់ជំងឺកញ្ជ្រិលដែលអាចសម្លាប់កុមារ ឬធ្វើឲ្យកុមារពិការអស់មួយជីវិត។
ក្នុងរយៈពេលប៉ុន្មានខែថ្មីៗនេះ អង្គការសុខភាពពិភពលោកបាននិយាយថា ការរីករាលដាលនៃជំងឺនេះបានកើតឡើងសូម្បីនៅក្នុងប្រទេសដែលមានការចាក់ថ្នាំបង្ការបានច្រើនរួមទាំងសហរដ្ឋអាមេរិកនិងប្រទេសអ៊ីស្រាអែល ប្រទេសថៃ និងទុយនីស៊ី ខណៈដែលជំងឺនេះរីករាលដាលយ៉ាងឆាប់រហ័សក្នុងចំណោមក្រុមមនុស្សដែលមិនបានចាក់វ៉ាក់សាំង៕
