យុទ្ធសាស្ត្រការពារខ្លួនរបស់កូរ៉េខាងជើងបន្តកើតឡើង ក្រោយពីប្រទេសនេះបានដោះលែងពលរដ្ឋអាមេរិកាំងបីនាក់ ហើយប៉ុន្មានថ្ងៃក្រោយមក ទទួលបានការកោតសរសើរពីប្រធានាធិបតីអាមេរិក ដូណាល់ ត្រាំ។
លោក ត្រាំ បានថ្លែងថា៖ «យើងចង់ថ្លែងអំណរគុណដល់លោក គីម ជុងអ៊ុន»។
កូរ៉េខាងជើងបានសន្យាកម្ទេចចោលកន្លែងសាកល្បងអាវុធនុយក្លេអ៊ែររបស់ខ្លួន មុននឹងកិច្ចប្រជុំកំពូលនៅប្រទេសសិង្ហបុរី ដែលនឹងប្រព្រឹត្តឡើងនៅថ្ងៃទី១២ ខែមិថុនាខាងមុខនេះ។ នៅលើបណ្តាញសង្គម Twitter លោក ត្រាំ បានចាត់ទុកចំណាត់ការរបស់កូរ៉េខាងជើងនេះថាជា «កាយវិការដ៏ឆ្លាតវៃ និងសក្តិសម»។
ទីប្រឹក្សាសន្តិសុខជាតិរបស់លោកប្រធានាធិបតី ត្រាំ បានថ្លែងប្រាប់លោកស្រី Greta Van Susteren អ្នករាយការណ៍បន្ថែមឲ្យ VOA ថា វាពិបាកក្នុងការសន្មតឲ្យប្រាកដពីគោលបំណងរបស់រដ្ឋាភិបាលក្រុងព្យុងយ៉ាង។
លោក John Bolton ទីប្រឹក្សាសន្តិសុខជាតិ បានថ្លែងថា៖
«វាអាចទៅរួចថា នេះគឺជាផ្នែកមួយនៃចេតនាល្អ ហើយវាក៏អាចទៅរួចដែរថា ដូចដែលយើងបានឃើញនៅក្នុងប្រទេសអ៊ីរ៉ាក់ ឬកូរ៉េខាងជើងខ្លួនឯង ប្រទេសទាំងនេះបង្កការលំបាកដោយខ្លួនឯង ដូច្នេះពួកគេកំពុងតែចាត់វិធានការទាំងឡាយណាដែលចាំបាច់។ ខ្ញុំសង្ឃឹមថា នេះជាចេតនាល្អទៅចុះ»។
រហូតមកដល់ពេលនេះ ការសន្យាជាសាធារណៈតែមួយគត់របស់សេតវិមាន គឺជំនួយផ្នែកអភិវឌ្ឍសេដ្ឋកិច្ចដល់កូរ៉េខាងជើង ប្រសិនបើកិច្ចព្រមព្រៀងបញ្ឈប់អាវុធនុយក្លេអ៊ែរសម្រេចបាន ហើយរដ្ឋាភិបាលក្រុងព្យុងយ៉ាង គោរពតាមកិច្ចព្រមព្រៀងនោះ។
លោក John Bolton ទីប្រឹក្សាសន្តិសុខជាតិ បានថ្លែងបន្ថែមទៀតថា៖
«ខ្ញុំយល់ថា យើងបានត្រៀមខ្លួនរួចជាស្រេចសម្រាប់ការធ្វើពាណិជ្ជកម្ម និងការបណ្តាក់ទុនជាមួយនឹងកូរ៉េខាងជើងឲ្យបានឆាប់រហ័សតាមតែយើងអាចធ្វើបាន»។
លោកប្រធានាធិបតី ត្រាំ បានសរសើរជំនាញរបស់លោក ក្នុងការចរចា ដែលនឹងត្រូវបានយកទៅសាកល្បងនៅក្នុងជំនួបលក្ខណៈប្រវត្តិសាស្ត្រជាមួយលោក គីម ជុងអ៊ុន នាពេលខាងមុខនេះ។
លោក Bolton បានថ្លែងថា៖
«ខ្ញុំគិតថា ភាគីទាំងពីរនឹងពិនិត្យមើលគ្នាទៅវិញទៅមក ហើយលោកប្រធានាធិបតី ត្រាំ នឹងមានឱកាសមើលមុខលោក គីម ជុងអ៊ុន ដោយផ្ទាល់ ហើយសម្រេចថាតើ លោក គីម ជុងអ៊ុន ពិតជាប្រាកដប្រជាមែនឬទេ»។
លោក Bolton ក៏បានថ្លែងថា លោកប្រធានាធិបតី ត្រាំ នឹងដើរចេញពីកិច្ចពិភាក្សា មុននឹងលោកសម្រេចទទួលយកកិច្ចព្រមព្រៀងដែលមានចន្លោះប្រហោង។ ស្របពេលដែលអ្នកគាំទ្រលោក ត្រាំ បានស្រែកហ៊ោរបន្លឺពាក្យពានរង្វាន់ «ណូប៊ែល» នៅក្នុងអំឡុងពេលលោកថ្លែងសុន្ទរកថានយោបាយ អ្នកតាមដានមួយចំនួន ជឿជាក់ថា លោកប្រធានាធិបតី នឹងត្រូវបានអ្នកគាំទ្ររបស់លោកស្អប់ បើសិនជាលោកត្រឡប់ពីប្រទេសសិង្ហបុរីវិញ ដោយមិនសម្រេចបានកិច្ចការអ្វីទាល់តែសោះ៕
ប្រែសម្រួលដោយ ទែន សុខស្រីនិត
