យន្តហោះយោធាសហរដ្ឋអាមេរិកចំនួនបីគ្រឿងដែលដឹកជំនួយមនុស្សធម៌សម្រាប់ប្រទេសវ៉េណេស៊ុយអេឡាបានចុះចតនៅទីក្រុងគូគូតា ប្រទេសកូឡុំប៊ី កាលពីថ្ងៃសៅរ៍។ នេះជាការបន្ថែមដល់ស្បៀងនិងថ្នាំពេទ្យជាច្រើនតោនដែលនៅរង់ចំាឆ្លងព្រំដែន។
ជំនួយដែលសហរដ្ឋអាមេរិកនិងប្រទេសដទៃទៀតបញ្ជូនមិនទាន់ទៅដល់ដៃពលរដ្ឋវ៉េណេស៊ុយអេឡានៅឡើយទេ ប៉ុន្តែបែរជានៅជាប់គាំងក្នុងប្រទេសកូឡំប៊ី ប្រេស៊ីល និងគូរ៉ាកាវ។
ប្រធានាធិបតីដែលកំពុងមានជម្លោះរបស់វេណេហ្ស៊ុយអេឡាគឺលោកនីកូឡាស ម៉ាឌុយរ៉ូ (Nicolas Maduro) បាននិយាយថាជំនួយនេះមិនចាំបាច់ទេហើយវាខុសច្បាប់។
ប្រទេសវ៉េណេស៊ុយអេឡាជួបប្រទះកង្វះខាតស្បៀង ថ្នាំពេទ្យនិងវត្ថុចាំបាច់ប្រចាំថ្ងៃក៏ដូចជាមានអត្រាអតិផរណា ដ៏អាក្រក់ជាងគេបំផុតនៅក្នុងពិភពលោក។ មានពលរដ្ឋចំនួន៣លាននាក់ដែលត្រូវជា១០ភាគរយនៃពលរដ្ឋសរុបបានចាកចេញពីប្រទេស។
លោកម៉ាឌុយរ៉ូ បានប្រាប់ដល់ក្រុមយោធាមិនឱ្យក្បួនរថយន្តដឹកទំនិញណាមួយឆ្លងកាត់ចូលប្រទេសវ៉េណេស៊ុយអេឡាឡើយ។ លោកម៉ាឌុយរ៉ូ មានការគាំទ្រពីប្រទេសចិននិងរុស្ស៊ីហើយក្រុមយោធានៅមានភក្តីភាពនឹងលោកនៅឡើយដែរ។
លោកហ័ន កេដូ ប្រធានរដ្ឋសភាជាតិដែលសហរដ្ឋអាមេរិកនិងប្រទេសដទៃទៀតទទួលស្គាល់ថាជាប្រធានាធិបតីបណ្តោះអាសន្នដោយស្របច្បាប់របស់វ៉េណេស៊ុយអេឡាបាននិយាយថាលោកមានផែនការនាំយកជំនួយមនុស្សធម៌នេះចូលក្នុងប្រទេសនៅថ្ងៃទី២៣ ខែកុម្ភៈ ហើយលោកនឹងបញ្ចេញព័ត៌មានលម្អិតនៅថ្ងៃចន្ទ៕
