សហរដ្ឋអាមេរិកបានរឹបអូសយកស្រោមដៃដែលផលិតដោយក្រុមហ៊ុន Top Glove Corp Bhd របស់ម៉ាឡេស៊ី បន្ទាប់ពីអាជ្ញាធររកឃើញផលិតផលនេះ នៅក្នុងទីក្រុង Kansas City ថ្វីបើមានការហាមឃាត់ការនាំចូលផលិតផលនេះ ដោយសារក្រុមហ៊ុនរងការចោទប្រកាន់ពីការប្រើពលកម្មដោយបង្ខំ។ នេះតាមការបញ្ជាក់របស់ទីភ្នាក់ងារគយសហរដ្ឋអាមេរិក ហើយត្រូវបានរាយការណ៍ដោយទីភ្នាក់ងារព័ត៌មាន Reuters។
ក្នុងសេចក្តីថ្លែងការណ៍កាលពីថ្ងៃពុធ ទីភ្នាក់ងារគយនិងការពារព្រំដែនសហរដ្ឋអាមេរិក បានបញ្ជាក់ថា មន្ត្រីរបស់ខ្លួននៅកំពង់ផែក្រុង Kansas City ភាគកណ្តាលសហរដ្ឋអាមេរិក បានរឹបអូសយកស្រោមដៃចំនួន ៤,៦៨ លាន ដែលផលិតដោយក្រុមហ៊ុន Top Glove។
នៅក្នុងការឆ្លើយតប ក្រុមហ៊ុន Top Glove បានបញ្ជាក់ថា ខ្លួនបានជូនដំណឹងទៅទីភ្នាក់ងារអាមេរិកនេះថា ខ្លួនបានដោះស្រាយបញ្ហាពលកម្មដោយការបង្ខំទាំងអស់នៅក្រុមហ៊ុននោះរួចហើយ។
ក្រុមហ៊ុន Top Glove ជាក្រុមហ៊ុនផលិតស្រោមដៃដ៏ធំបង្អស់របស់ពិភពលោក ហើយមានតម្រូវការកើនឡើងខ្លាំងបណ្តាលមកពីការរាតត្បាតនៃជំងឺកូវីដ១៩។
ទីភ្នាក់ងារគយសហរដ្ឋអាមេរិក បានហាមឃាត់ការនាំចូលរបស់ក្រុមហ៊ុន Top Glove កាលពីឆ្នាំទៅដោយបានបញ្ជាក់ថា ខ្លួនបានរកឃើញភស្តុតាងគួរឲ្យជឿបានអំពីពលកម្មដោយការបង្ខំ។
ការរឹបអូសចុងក្រោយនេះ បង្ហាញថា មានតម្រូវការផលិតផលក្រុមហ៊ុន Top Glove ថ្វីបើសហរដ្ឋអាមេរិកបានប្រកាសហាមឃាត់កាលពីខែកក្កដាឆ្នាំទៅក៏ដោយ។
នេះជាការរឹបអូសយកលើកទី ២ របស់ក្រុមហ៊ុន Top Glove នៅក្នុងរយៈពេលមួយសប្តាហ៍នេះ។ កាលពីថ្ងៃទី ៥ ខែឧសភា ទីភ្នាក់ងារគយសហរដ្ឋអាមេរិក បានរឹបអូសយកស្រោមដៃចំនួន ៣,៩៧ លាន ដែលមានតម្លៃជាប្រាក់ ៥១៨.០០០ ដុល្លារអាមេរិក៕
