ពួកអ្នកការទូតសហរដ្ឋអាមេរិកនិងរុស្ស៊ីបានជួបគ្នាកាលពីថ្ងៃព្រហស្បតិ៍នៅក្នុងទីក្រុងអ៊ីស្តង់ប៊ុលនៃប្រទេសតួកគីដើម្បីស្វែងរកមធ្យោបាយធ្វើឱ្យរលូននូវទំនាក់ទំនងស្ថានទូតរបស់ខ្លួននៅក្នុងទីក្រុងមូស្គូនិងរដ្ឋធានីវ៉ាស៊ីនតោន បន្ទាប់ពីការបណ្តេញអ្នកការទូតគ្នាទៅវិញទៅមកជារឿយៗនិងរយៈពេល៣ឆ្នាំនៃការប្រឆាំងរបស់សហរដ្ឋអាមេរិកដល់សង្គ្រាមរបស់រុស្ស៊ីលើអ៊ុយក្រែន។
ជំនួបនេះជាការទាក់ទងថ្មីៗជាបន្តបន្ទាប់រវាងប្រទេសទាំង២ រួមមានការហៅទូរសព្ទមួយនៅដើមខែនេះរវាងប្រធានាធិបតីសហរដ្ឋអាមេរិកលោក Donald Trump និងប្រធានាធិបតីរុស្ស៊ីលោក Vladimir Putin។
ការធ្វើការដើម្បីស្តារឡើងវិញនូវទំនាក់ទំនងរវាងសហរដ្ឋអាមេរិកនិងរុស្ស៊ីស្ថិតនៅលើរបៀបវារៈកាលពីសប្តាហ៍មុននៅឯការចរចានៅក្នុងប្រទេសអារ៉ាប់ប៊ីសាអូឌីតរវាងរដ្ឋមន្ត្រីការបរទេសសហរដ្ឋអាមេរិក Marco Rubio និងរដ្ឋមន្ត្រីការបរទេសរុស្ស៊ីលោក Sergey Lavrov ទោះជា គោលដៅសំខាន់គឺផ្តួចផ្តើមការចរចាដើម្បីបញ្ចប់សង្គ្រាមនោះក្តី។
លោក Putin បានសរសើរការផ្តើមរបស់លោក Trump ចំពោះរុស្ស៊ីក្នុងអំឡុងនៃសុន្ទ រកថាមួយនៅឯជំនួបកាលពីថ្ងៃព្រហស្បតិ៍របស់សេវាកម្មសន្តិសុខសហព័ន្ធដោយបានហៅការផ្តើមនោះថាជា«ទស្សនៈប្រាកដនិយមបើប្រៀបធៀបទៅនឹងអ្វីដែលលោកពណ៌នាថាជា«ការវាយតម្លៃជាមុននិងគំនិតមនោគមវិជ្ជា»របស់ប្រធានាធិបតីកាន់តំណែងមុនរបស់សហរដ្ឋអាមេរិក។
លោកពូទីនបាននិយាយថា «ទំនាក់ទំនងដំបូងជាមួយរដ្ឋបាលថ្មីរបស់សហរដ្ឋអាមេរិកលើកទឹកចិត្តឱ្យមានក្តីសង្ឃឹម ហើយមានការត្រៀមខ្លួនទៅវិញទៅមកដើម្បីធ្វើការដើម្បីស្តារទំនាក់ទំនងឡើងវិញ និងដោះស្រាយជាបណ្តើរៗនូវចំនួនដ៏ធំនៃបញ្ហាយុទ្ធសាស្ត្រជាប្រព័ន្ធនៅក្នុងស្ថាបនាពិភពលោក»។
ក៏ប៉ុន្តែ មេដឹកនាំរុស្ស៊ីរូបនោះបាននិយាយទៀតថា«ផ្នែកមួយរបស់ពួកវរជនលោកខាងលិចនៅតែសម្រេចដើម្បីធ្វើឱ្យពិភពលោកមានអស្ថិរភាព ហើយអាចព្យាយាមដើម្បីបង្អាក់ឬសម្របសម្រួលការសន្ទនាដែលបានចាប់ផ្តើម»។លោក Putin បានបន្ថែមទៀតថាពួកអ្នកការទូតនិងទីភ្នាក់ងារសន្តិសុខរុស្ស៊ីគួរតែផ្តោតការប្រឹងប្រែងរបស់ខ្លួនរបស់ខ្លួនលើរឿងបង្អាក់ការប៉ុនប៉ងបែបនេះ។
លោក Trump បាននិយាយកាលពីថ្ងៃពុធថាអឺរ៉ុប មិនមែនសហរដ្ឋអាមេរិកទេ គួរតែមានការទទួលខុសត្រូវចំពោះការអនុវត្តកិច្ចព្រមព្រៀងណាមួយរវាងរុស្ស៊ីនិងអ៊ុយ ក្រែនដើម្បីការពារសន្តិសុខរបស់អ៊ុយក្រែន ទប់ទល់ការឈ្លានពានថ្មីណាមួយរបស់រុស្ស៊ី៕
