ប្រធានាធិបតីអាមេរិកលោក Donald Trump ធ្វើជាម្ចាស់ផ្ទះរៀបចំទទួលនាយករដ្ឋមន្ត្រីចក្រភពអង់គ្លេសលោក Keir Starmer នៅឯសេតវិមាននៅថ្ងៃព្រហស្បតិ៍ម៉ោងនៅសហរដ្ឋអាមេរិកដើម្បីដោះស្រាយជម្លោះដែលកំពុងបន្តមានឡើងនៅក្នុងប្រទេសអ៊ុយក្រែននិងចំណងទាក់ទងពាណិជ្ជកម្មទ្វេភាគី ចំពេលដែលកើតមានការគំរាមយកពន្ធគយរបស់មេដឹកនាំសហរដ្ឋអាមេរិកលើអឺរ៉ុបនិងការទាមទារឱ្យទ្វីបអឺរ៉ុបពឹងផ្អែកតិចតួចលើរដ្ឋាភិបាលក្រុងវ៉ាស៊ីនតោនចំពោះសន្តិសុខរបស់ខ្លួន។
មុនជំនួបរបស់អស់លោក លោកប្រធានាធិបតី Trump មិនបានសន្យាលើការផ្តល់ការធានាសន្តិសុខសម្រាប់រដ្ឋាភិបាលក្រុងកៀវ រួមទាំងសំណើឱ្យសហរដ្ឋអាមេរិកគាំទ្រកងថែរក្សាសន្តិភាពអឺរ៉ុបដើម្បីប្រតិបត្តិបទឈប់បាញ់គ្នាមួយដែលអាចកើតឡើងរវាងអ៊ុយក្រែននិងរុស្ស៊ីជាលក្ខខណ្ឌមួយដែលលោក Starmer ទាមទារ។
លោកប្រធានាធិបតី Trump បានប្រាប់ពួកអ្នកយកព័ត៌មាននៅឯសេតវិមានកាលពីថ្ងៃពុធថា«ខ្ញុំសង្ឃឹមថាយើងនឹងមានបញ្ហានេះជាទីកន្លែងដែលយើងអាចព្រួយបារម្ភអំពីការថែរក្សាសន្តិភាព។ ការថែរក្សាសន្តិភាពជាការងាយស្រួលបំផុត។ វាកំពុងធ្វើឱ្យកិច្ចព្រមព្រៀងនេះមានការលំបាកបំផុត»។
ការខ្វែងគំនិតនៅតែមានក្នុងចំណោមសម្ពន្ធមិត្តអឺរ៉ុបលើអនាគតនៃការដាក់ពង្រាយកងទ័ពនៅប្រទេសអ៊ុយក្រែន។ ចក្រភពអង់គ្លេសគាំទ្រសំណើដែលដឹកនាំដោយបារាំងខណៈដែលប្រទេសផ្សេងៗទៀតរួមទាំងប្រទេសប៉ូឡូញបានច្រានចោលសំណើនេះ។
លោកនាយករដ្ឋមន្ត្រី Starmer បាននិយាយថា«ខ្ញុំជឿជាក់ថាយើងត្រូវការសន្តិភាពឋិតឋេរមួយ មិនមែនការឈប់បាញ់គ្នាទេ ហើយដើម្បីឱ្យវាកើតមានឡើង យើងត្រូវការការធានាសន្តិសុខ»។ លោកបានបន្ថែមទៀតថាចក្រភពអង់គ្លេស នឹងធ្វើផ្នែករបស់ខ្លួនដើម្បីគាំទ្រវិធានការដែលជាផ្នែកមួយនៃកិច្ចព្រមព្រៀងសន្តិភាពអ៊ុយក្រែន ក៏ប៉ុន្តែត្រូវតែមានការគាំទ្រពីសហរដ្ឋអាមេរិក។
ប្រធានាធិបតីរុស្ស៊ីលោក Vladimir Putin បានច្រានចោលសំណើនានានៃការដាក់ពង្រាយកងថែរក្សាសន្តិភាពនៅប្រទេសអ៊ុយក្រែន។ លោកបាននិយាយកាលពីថ្ងៃព្រហស្បតិ៍ម្សិលមិញថា«វរជនប្រទេសលោកខាងលិច»កំពុងព្យាយាមបង្អាក់ការសន្ទ នាដែលបង្កើតថ្មីរវាងរដ្ឋាភិបាលក្រុងមូស្គូនិងរដ្ឋាភិបាលក្រុងវ៉ាស៊ីនតោន។
ក្នុងប៉ុន្មានសប្តាហ៍ថ្មីៗនេះ លោក Trump បានចាប់ផ្តើមការចរចាផ្ទាល់ជាមួយរុស្ស៊ីដើម្បីបញ្ចប់សង្គ្រាមនោះភ្លាមៗដោយមិនមានការទាក់ទិនរបស់រដ្ឋាភិបាលក្រុងកៀវឬសម្ពន្ធមិត្តអឺរ៉ុប លោកបានបង្កើនការរិះគន់សម្ពន្ធមិត្តទាំង២។
លោកប្រធានាធិបតី Trump បានប្រែក្រឡាស់ទាំងស្រុងនូវគោលនយោបាយសហរដ្ឋអាមេរិកនៅក្រោមមេដឹកនាំមុនគឺលោកអតីតប្រធានាធិបតីលោក Joe Biden ដែលជំហររបស់រដ្ឋបាលលោកលើសង្គ្រាមគឺ«គាំទ្រអ៊ុយក្រែនទៅតាមដែលអ៊ុយក្រែនត្រូវការ»៕