ក្រសួងយុត្តិធម៌សហរដ្ឋអាមេរិកមានគម្រោងកាលពីថ្ងៃពុធម្សិលមិញដើម្បីដាក់ស្នើក្នុងតុលាការសហព័ន្ធក្នុងរដ្ឋ Virginia នូវមេក្លោងនៃការបំផ្ទុះគ្រាប់បែកខែសីហា ឆ្នាំ ២០២១ដែលបានសម្លាប់កងទ័ពសហរដ្ឋអាមេរិក១៣នាក់នៅក្នុងប្រទេសអាហ្វហ្គានីស្ថាន។
ក្រសួងយុត្តិធម៌បានប្រាប់ឱ្យដឹងថាភ្នាក់ងាររដ្ឋអ៊ិស្លាម Khorasanលោក Mohammad Sharifullah ដែលគេស្គាល់ថា«Jafar»បានរងការចោទប្រកាន់កាលពីថ្ងៃទី២ ខែមីនាពី«ការផ្តល់និងរួមគំនិតដើម្បីផ្តល់ការជួយឧបត្ថម្ភសម្ភារ:និងប្រភពធនធានដល់អង្គការមួយដែលត្រូវបានចាត់ទុកជាអង្គការភេរវជនបរទេសដែលបណ្តាលឱ្យមនុស្សស្លាប់»។
លោក Sharifullah ត្រូវគេរំពឹងនឹងបង្ហាញខ្លួននៅក្នុងប្រព័ន្ធតុលាការស្រុកភាគខាងកើតរដ្ឋ Virginia។ នេះបើតាមក្រសួងយុត្តិធម៌ដែលបានបញ្ជាក់នៅក្នុងសេចក្តីថ្លែង ការណ៍នៅលើ Website របស់ខ្លួន។
លោកប្រធានាធិបតី Trump បាននិយាយថា«នៅយប់នេះ ខ្ញុំមានក្តីសោមនស្សដើម្បីប្រកាសថាយើងទើបតែចាប់បានភេរវជនកំពូលម្នាក់ដែលទទួលខុសត្រូវចំពោះអំពើព្រៃផ្សៃ។ ហើយ ជននោះឥឡូវនេះកំពុងធ្វើដំណើរមកកាន់សហរដ្ឋអាមេរិកដើម្បីប្រឈមមុខនឹងប្រព័ន្ធយុត្តិធម៌របស់អាមេរិក»។
ការបំផ្ទុះគ្រាប់បែកនៅច្រកទ្វារ Abbeyនៅឯចំណតយន្តហោះអន្តរជាតិHamid Karzai ក្នុងរដ្ឋធានីកាប៊ុលកាលពីថ្ងៃទី២៦ ខែសីហា ឆ្នាំ២០២១ក៏បានសម្លាប់ជនជាតិអាហ្វហ្គានីស្ថានប្រហែល ១៧០នាក់ដែរ។
ក្រុមរដ្ឋអ៊ិស្លាម Khorasan ឬ ISIS-K ដែលសហរដ្ឋអាមេរិកចាត់ទុកជាអង្គការភេរវកម្មដែលមានចំណងទាក់ទងជាមួយក្រុមភេរវកម្មរដ្ឋអ៊ិស្លាមបានអះអាងទទួលខុសត្រូវ។
ការវាយប្រហារអត្តឃាតបានកើតមានឡើងនៅពេលដែលការដកកងទ័ពស្ថិតក្នុងភាពច្របូកច្របល់នៅពេលបញ្ចប់សង្គ្រាមដែលដឹកនាំដោយសហរដ្ឋអាមេរិកក្នុងរយៈ ពេល២០ឆ្នាំនៅក្នុងប្រទេសអាហ្វហ្គានីស្ថាន។
ក្នុងសុន្ទរកថានេះ លោកប្រធានាធិបតី Trumpបានសរសើរប៉ាគីស្ថានចំពោះការជួយបេសកកម្មដើម្បីចាប់លោក Sharifullahនេះ។
លោកប្រធានាធិបតីសហរដ្ឋអាមេរិកបានមានប្រសាសន៍ថា«ខ្ញុំចង់ថ្លែងអំណរគុណ ជាពិសេស រដ្ឋាភិបាលប៉ាគីស្ថានចំពោះការជួយចាប់ខ្លួនមេបិសាចនេះ»៕
