នៅជួរមុខនៃសមរភូមិក្នុងប្រទេសអ៊ុយក្រែន កាសែតក្នុងស្រុកគឺជាមូលដ្ឋានផ្ដល់ព័ត៌មានដ៏សំខាន់នៅក្នុងតំបន់ដែលរុស្ស៊ីបានបំផ្លាញអង់តែនទូរស័ព្ទនិងហេដ្ឋារចនាសម្ព័ន្ធអ៊ីនធឺណិត។
អ្នកកាសែតនៅប្រទេសអ៊ុយក្រែនផ្ដល់ព័ត៌មានអំពីច្រកនានាដែលប្រើសម្រាប់ការជម្លៀស កត់ត្រាឧក្រិដ្ឋកម្មនានាដែលគេចោទថារុស្ស៊ីជាអ្នកប្រព្រឹត្តនិងការចល័តទ័ព ក៏ដូចជាផ្សព្វផ្សាយទប់ទល់នឹងការឃោសនារបស់រុស្ស៊ីផងដែរ។
ការបង្កកបណ្ដោះអាសន្ននៃជំនួយបរទេសរបស់សហរដ្ឋអាមេរិកបានបង្កការលំបាកផ្នែកហិរញ្ញវត្ថុដល់ស្ថាប័នប្រព័ន្ធផ្សព្វផ្សាយតូចៗដែលពឹងផ្អែកលើម្ចាស់ជំនួយដើម្បីបន្តប្រតិបត្តិការរបស់ខ្លួន។
លោក Sergiy Tomilenko ប្រធានសហជីពជាតិអ្នកកាសែតអ៊ុយក្រែន បានប្រាប់ VOA ថា៖ «ប្រព័ន្ធផ្សព្វផ្សាយនៅអ៊ុយក្រែនជាច្រើនប្រឈមនឹងការគំរាមកំហែងបិទឬការកាត់បន្ថយប្រតិបត្តិការរបស់ខ្លួន»។
ប៉ុន្តែ ស្ថានភាពបែបនេះមិនកើតមានតែនៅប្រទេសអ៊ុយក្រែននោះទេ ដោយប្រទេសផ្សេងទៀតក៏រងការប៉ះពាល់ពីការបង្កកជំនួយបរទេសរបស់សហរដ្ឋអាមេរិកផងដែរ។
ប្រធានាធិបតីសហរដ្ឋអាមេរិកលោក Donald Trump បានចុះហត្ថលេខាលើបទបញ្ជាមួយកាលពីថ្ងៃទី ២០ ខែមករា ដោយតម្រូវឲ្យទីភ្នាក់ងាររដ្ឋាភិបាលសហព័ន្ធទាំងអស់ផ្អាកផ្ដល់ជំនួយអភិវឌ្ឍន៍បរទេសរយៈពេល ៩០ ថ្ងៃ។ បទបញ្ជានេះបានចូលជាធរមានកាលពីថ្ងៃទី ២៤ ខែមករា។
រដ្ឋមន្ត្រីការបរទេសអាមេរិកលោក Marco Rubio បានថ្លែងនៅក្នុងសេចក្ដីថ្លែងការណ៍មួយកាលពីថ្ងៃទី ២៦ ខែមករាថា៖ «រាល់ប្រាក់ដុល្លារដែលយើងចំណាយ រាល់កម្មវិធីដែលយើងផ្ដល់មូលនិធិ និងរាល់គោលនយោបាយដែលយើងព្យាយាមអនុវត្ត ត្រូវតែឆ្លើយតបទៅនឹងសំណូរសាមញ្ញ ៣ ដែលនោះគឺ តើការចំណាយនោះធ្វើឲ្យសហរដ្ឋអាមេរិកកាន់តែមានសុវត្ថិភាពឬទេ? តើវាធ្វើឲ្យសហរដ្ឋអាមេរិកកាន់តែខ្លាំងឬទេ? និងតើវាធ្វើឲ្យសហរដ្ឋអាមេរិកកាន់តែមានវិបុលភាពឬទេ?»។
ស្ថាប័នព័ត៌មានឯករាជ្យជាច្រើននៅជុំវិញពិភពលោកពឹងផ្អែកលើការផ្ដល់មូលនិធិពីសហរដ្ឋអាមេរិក ដោយសារតែពួកគេរាយការណ៍នៅក្នុងបរិយាកាសរឹតត្បិត។ នេះបើយោងតាមអង្គការ JX Fund នៅទីក្រុងប៊ែរឡំាំង ប្រទេសអាល្លឺម៉ង់។
ដោយសារតែការបង្កកមូលនិធិនេះ ស្ថាប័នព័ត៌មាននៅលើពិភពលោកកំពុងស្វះស្វែងរកប្រភពមូលនិធិផ្សេងដើម្បីបន្តផ្សព្វផ្សាយព័ត៌មានទៅកាន់អ្នកអាននិងអ្នកស្ដាប់របស់ខ្លួន និងបញ្ចៀសការបិទស្ថាប័ន។ នេះបើយោងតាមការលើកឡើងរបស់អ្នកវិភាគជាច្រើនដែលបានថ្លែងប្រាប់ VOA។
អ្នកស្រី Penelope Winterhager នាយកគ្រប់គ្រងអង្គការ JX Fund បាននិយាយថា ស្ថាប័នព័ត៌មានទាំងនេះ «ត្រូវបានគេទម្លាក់ចូលទៅក្នុងស្ថានភាពអាសន្ន»។
វិធានការនេះត្រូវគេប៉ាន់ស្មានថាកំពុងប៉ះពាល់ដល់ស្ថាប័នព័ត៌មានឯករាជ្យរាប់សិបស្ថាប័ននៅក្នុងប្រទេសជាង ៣០។ នេះបើយោងតាមសហព័ន្ធអ្នកកាសែតអឺរ៉ុប (EFJ) ដែលមានមូលដ្ឋាននៅទីក្រុងព្រុចសែល ប្រទេសបែលហ្ស៊ិក។
យោងតាមបទបញ្ជារបស់លោក Trump ក្នុងរយៈពេល ៩០ ថ្ងៃនៃការផ្អាកជំនួយនេះ ក្រសួងនិងទីភ្នាក់ងារពាក់ព័ន្ធនានារបស់សហរដ្ឋអាមេរិកតម្រូវឲ្យពិនិត្យឡើងវិញនូវការផ្ដល់មូលនិធិបរទេសរបស់ខ្លួន និងសម្រេចថាតើជំនួយរបស់ពួកគេគួរតែបន្ត កែសម្រួល ឬត្រូវបញ្ចប់។
ក្រសួងការបរទេសអាមេរិកមិនបានឆ្លើយតបទៅនឹងសំណួររបស់ VOA ទេ ហើយបានប្រាប់ VOA ឲ្យយោងទៅលើសេចក្ដីប្រកាសព័ត៌មានរបស់ខ្លួនចុះថ្ងៃទី ២៩ ខែមករាវិញ។
សេចក្ដីប្រកាសព័ត៌មាននោះថ្លែងថា៖ «ពលរដ្ឋអាមេរិកាំងគឺជាពលរដ្ឋដែលប្រឹងប្រែងធ្វើការនិងមានសន្ដានចិត្តល្អ ដែលបានលះបង់ញើសឈាមនិងទ្រព្យសម្បត្តិដើម្បីជួយដល់មនុស្សនៅទូទាំងពិភពលោក ប៉ុន្តែមិនត្រូវមានប្រទេសជាតិដទៃដែលគួរទទួលបានផលប្រយោជន៍ទាំងនេះទេ ហើយមិនគួរមានកម្មវិធីផ្ដល់ជំនួយបរទេសណាដែលគ្មានការត្រួតពិនិត្យដិតដល់នោះដែរ»។
លោក Tomilenko បានថ្លែងថា ការបង្កកជំនួយនេះកំពុងធ្វើឲ្យស្ថានភាពកាន់តែអាក្រក់សម្រាប់ស្ថាប័នផ្សព្វផ្សាយព័ត៌មាននៅសមរភូមិជួរមុខនៅក្នុងប្រទេសអ៊ុយក្រែន។
លោក Tomilenko បានលើកឡើងដូច្នេះថា៖ «នៅតាមតំបន់ជាច្រើនដែលកៀកទៅនឹងទីលានប្រយុទ្ធ យើងអាចនិយាយបានថាមានតែកាសែតក្នុងស្រុកទេដែលជាប្រភពព័ត៌មានដ៏គួរឲ្យទុកចិត្ត»។
ចាប់តាំងពីការឈ្លានពានពេញទំហឹងទៅលើប្រទេសអ៊ុយក្រែនកាលពីឆ្នាំ ២០២២ មក រុស្ស៊ីបានបង្កើនកិច្ចប្រឹងប្រែងផ្សព្វផ្សាយការឃោសនារបស់ខ្លួននៅលើសាកលលោក ស្របពេលដែលប្រព័ន្ធផ្សព្វផ្សាយឯករាជ្យនៅក្នុងប្រទេសរុស្ស៊ីរងការរឹតត្បិតកាន់តែខ្លាំង។
លោក Tomilenko បន្តថា សង្គ្រាមនេះក៏បានដាក់កំហិតទៅលើទីផ្សារផ្សព្វផ្សាយពាណិជ្ជកម្មនៅក្នុងប្រទេសអ៊ុយក្រែន ដែលជាប្រភពហិរញ្ញវត្ថុដ៏ចម្បងសម្រាប់ប្រព័ន្ធផ្សព្វផ្សាយឯករាជ្យនៅក្នុងប្រទេសនេះផងដែរ។
នៅពេលនិយាយអំពីការគាំទ្រស្ថាប័នប្រព័ន្ធផ្សព្វផ្សាយឯករាជ្យ សហរដ្ឋអាមេរិកគឺជាតួអង្គមួយដែលខ្លាំងជាងគេទាំងអស់។ នេះបើតាមការលើកឡើងរបស់អ្នកស្រី Winterhager នៃអង្គការ JX Fund។
អ្នកស្រីបន្តថា ទោះបីជាស្ថាប័នព័ត៌មានទាំងនេះទទួលជំនួយពីបរទេសក៏ដោយ ក៏ «ការធ្វើសេចក្ដីរាយការណ៍ព័ត៌មានរបស់ពួកគេមានភាពឯករាជ្យ»។
ស្ថាប័នប្រព័ន្ធផ្សព្វផ្សាយជាច្រើននៅប្រទេសមីយ៉ាន់ម៉ាដែលពឹងលើការគាំទ្រផ្នែកហិរញ្ញវត្ថុរបស់សហរដ្ឋអាមេរិកក៏មើលឃើញថាខ្លួនកំពុងស្ថិតនៅក្នុងស្ថានភាពមួយមិនច្បាស់ផងដែរ។
បន្ទាប់ពីបានធ្វើរដ្ឋប្រហារនៅឆ្នាំ ២០២១ យោធាមីយ៉ាន់ម៉ាបានចាប់ខ្លួនអ្នកកាសែតនិងហាមឃាត់ស្ថាប័នព័ត៌មានជាច្រើនមិនឲ្យធ្វើប្រតិបត្តិការ។ ការបង្ក្រាបនេះបានបង្ខំឲ្យស្ថាប័នជាច្រើនភៀសខ្លួនទៅបរទេស។
បច្ចុប្បន្ននេះ ស្ថាប័នខ្លះរាយការណ៍ចេញពីព្រំដែនរវាងប្រទេសថៃនិងមីយ៉ាន់ម៉ា ខណៈដែលស្ថាប័នខ្លះទៀតអាចដំណើរការចេញពីតំបន់នានាដែលគ្រប់គ្រងដោយក្រុមឧទ្ទាមក្នុងប្រទេសមីយ៉ាន់ម៉ា។
ប្រសិនបើការបង្កកមូលនិធិនេះបង្ខំឲ្យស្ថាប័នព័ត៌មានជាច្រើនត្រូវបញ្ឈប់ដំណើរការរបស់ខ្លួន លោក Karol Luczka នៃអង្គការ IPI ព្រមានថា ការឃោសនាផ្សព្វផ្សាយរបស់រដ្ឋដូចជានៅប្រទេសរុស្ស៊ីជាដើមអាចនឹងកើនឡើងដើម្បីបំពេញចន្លោះប្រហោងនេះ។
លោកនិយាយថា៖ «នៅពេលប្រព័ន្ធផ្សព្វផ្សាយផុតរលត់ទៅ វាបង្កើតបាននូវភាពចន្លោះប្រហោងមួយ ហើយភាពចន្លោះប្រហោងនោះចាំបាច់ត្រូវបំពេញដោយអ្វីម្យ៉ាង»៕
VOA ផ្នែកភាសាភូមារួមចំណែកនៅក្នុងសេចក្ដីរាយការណ៍នេះ។
ការបង្កកមូលនិធិបរទេសរបស់អាមេរិកធ្វើឲ្យប្រព័ន្ធផ្សព្វផ្សាយអន្តរជាតិប្រឈមអនាគតមិនច្បាស់
វេទិកាបញ្ចេញមតិ