ក្រុមសហជីពប្រមាណជា១០០នាក់ នៅថ្ងៃអង្គារនេះ បានជួបជុំគ្នាគោរពវិញ្ញាណក្ខន្ធលោក ជា វិជ្ជា អតីតប្រធានសហជីពសេរីកម្មករ ដែលត្រូវបានគេបាញ់សម្លាប់កាលពី១៥ឆ្នាំមុន ដោយពួកគេបានបង្ហាញការខកចិត្តចំពោះភាពយឺតយ៉ាវក្នុងការស៊ើបអង្កេតវែកមុខរកឃាតក។
ថ្ងៃទី២២ខែមករាឆ្នាំ២០១៩នេះគឺជាខួប១៥ឆ្នាំនៃការបាញ់សម្លាប់លោក ជា វិជ្ជា មេសហជីពល្បីល្បាញមួយរូបក្នុងការស្វែងរកសិទ្ធិសេរីភាពឲ្យកម្មករ។ ក្រុមសហជីពនិងសាច់ញាតិរបស់លោក ជា វិជ្ជា ប្រមាណជា១០០នាក់ បានជួបជុំគ្នាមុខរូបសំណាករបស់លោកក្បែរវិមានឯករាជ្យ ដោយបានថ្លែងអំពីវីរភាពរបស់លោកជា វិជ្ជាព្រមទាំងបានទាមទារឲ្យអាជ្ញាធរពន្លឿនការវែកមុខឃាតកពិត ដើម្បីផ្តល់យុត្តិធម៌ឲ្យលោក។
លោក រ៉ុង ឈុន ប្រធានសហភាពសហជីពកម្ពុជាដែលបានចូលរួមក្នុងពិធីរំឭកវិញ្ញាណក្ខន្ធលោកជា វិជ្ជា នៅព្រឹកថ្ងៃអង្គារនេះ ថ្លែងថា លោក ជា វិជ្ជា គឺជាប្រធានសហជីពមួយរូបដែលសកម្មក្នុងការតវ៉ាទាមទារសិទ្ធិ និងលក្ខខណ្ឌការងារសម្រាប់កម្មករ។ លោកបន្ថែមថា ការអូសបន្លាយការវែករកមុខឃាតកពិតក្នុងសំណុំរឿងឃាតកម្មលើលោក ជា វិជ្ជា គឺដោយសារមានជាប់ពាក់ព័ន្ធនឹងអ្នកមានអំណាច ដែលនៅពីក្រោយ។ យ៉ាងណាក្តី លោក រ៉ុង ឈុន នៅតែអំពាវនាវឲ្យសមត្ថកិច្ចស្វែងរកយុត្តិធម៌សម្រាប់លោក ជា វិជ្ជា។
លោកមានប្រសាសន៍ថា៖
«ដើម្បីជម្រះមន្ទិលសង្ស័យ ក៏ដូចជាបង្ហាញភាពស្អាតស្អំរបស់រដ្ឋាភិបាល អ៊ីចឹងរដ្ឋាភិបាលត្រូវតែពន្លឿនសំណុំរឿងនេះ វែកមុខរកឃាតក អ្នកដែលសម្លាប់លោកជា វិជ្ជា និងអ្នកនៅក្រោយខ្នងឃាតក ដើម្បីយកមកផ្តន្ទាទោសទៅតាមច្បាប់»។
ចំណែកអ្នកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា ក៏បានលើកឡើងដែរថា ការដែលរដ្ឋាភិបាលមិនអាចស្វែងរកឃាតកពិតក្នុងសំណុំរឿងឃាតកម្មលើលោកជា វិជ្ជានឹងធ្វើឲ្យសហជីពផ្សេងៗទៀត ធ្វើការដោយរងនូវសម្ពាធ និងការភ័យខ្លាច។ អ្នកស្រីក៏បានអំពាវនាវឲ្យសហជីព និងកម្មករទាំងអស់យកគំរូនៃភាពក្លាហានរបស់លោក ជា វិជ្ជា ក្នុងការទាមទារឲ្យមានការគោរពសិទ្ធិរបស់កម្មករ។
អ្នកស្រីបញ្ជាក់ថា៖
«សូមមានភាពរឹងមាំឡើង តស៊ូឡើង ប្រយុទ្ធឡើង ប្រឆាំងឡើងដើម្បីទាមទារយកសិទ្ធិសេរីភាពរបស់ពួកយើង ទៅតាមកេរដំណែលរបស់លោក ជា វិជ្ជា ដែលគាត់បានបង្ហាត់បង្រៀនយើង ដែលជាស្នាដៃរបស់គាត់»។
ក្នុងពិធីប្រារព្ធខួបនៃការសម្លាប់លោក ជា វិជ្ជា សាលារាជធានីបានចេញលិខិតអនុញ្ញាតឲ្យសហជីពប្រារព្ធពិធី តែហាមមិនឲ្យមន្រ្តីគណបក្សប្រឆាំងចំនួន១១៨រូបដែលត្រូវបានតុលាការហាមឃាត់មិនឲ្យធ្វើនយោបាយចូលរួមក្នុងពិធីនោះ។ យ៉ាងណាក្តីនៅព្រឹកនេះគេឃើញលោកជា ប៉ូច អតីតតំណាងរាស្រ្តគណបក្សប្រឆាំងដែលជាបុគ្គលមួយរូបត្រូវបានតុលាការព្យួរសិទ្ធិមិនឲ្យធ្វើនយោបាយ បានចូលរួមអុជធូប និងគោរពវិញ្ញាណក្ខន្ធលោកជា វិជ្ជាផងដែរ តែមិនមានការហាមឃាត់ទេ។
លោក ជា វិជ្ជា អតីតប្រធានសហជីពសេរីកម្មករដ៏ល្បីល្បាញ ត្រូវបានខ្មាន់កាំភ្លើងបាញ់សម្លាប់កាលពីព្រឹកថ្ងៃទី២២ខែមករាឆ្នាំ២០០៤ ខណៈលោកចូលទិញកាសែតនៅក្បែរវត្តលង្ការក្នុងក្រុងភ្នំពេញ។ មួយសប្តាហ៍ក្រោយមក ជនសង្ស័យពីររូបដែលក្រុមសង្គមស៊ីវិលហៅថា ជាឃាតកសិប្បនិមិ្មតគឺលោក ប៊ន សំណាង និងលោក សុខ សំអឿន ត្រូវបានចាប់ខ្លួន។ ក្រោយការឃុំខ្លួនអស់ជាច្រើនឆ្នាំ លោកប៊ន សំណាង និងលោក សុខ សំអឿន ត្រូវបានរកឃើញថាគ្មានទោសកំហុស និងត្រូវបានដោះលែងឲ្យមានសេរីភាព វិញ តាមដីកាសម្រេចរបស់តុលាការកំពូលនៅចុងឆ្នាំ២០១៣។
លោក អំ សំអាត មន្រ្តីជាន់ខ្ពស់ផ្នែកអង្កេតនៃអង្គការការពារសិទ្ធិមនុស្សលីកាដូ ដែលបានចូលរួមឃ្លាំមើលការប្រារព្ធខួប១៥ឆ្នាំនៃការបាញ់សម្លាប់លោកជា វិជ្ជា នៅព្រឹកនេះ លើកឡើងថា ករណីឃាតកម្មលើលោកជា វិជ្ជានឹងរកឃើញយុត្តិធម៌ ប្រសិនបើរដ្ឋាភិបាលមានឆន្ទៈក្នុងការស្វែងរកចាប់ឃាតកពិតមកផ្តន្ទាទោស។
លោកបញ្ជាក់ថា៖
«ករណីលោកជា វិជ្ជានេះ យើងឃើញតាំងពីមុនដែលគាត់ត្រូវបានគេបាញ់សម្លាប់គឺវាមានភស្តុតាងជាបណ្តើរៗហើយទាក់ទងនឹងការផ្ញើរសារគំរាមសម្លាប់ ការអី ហើយរហូតទៅដល់គាត់ប្តឹងទៅដល់សមត្ថកិច្ច ហើយសមត្ថកិច្ចមិនហ៊ានរកជនដែលគំរាមគាត់ហ្នឹងទៅទៀតហ្នឹង។ អាហ្នឹងគឺវាមានសញ្ញាណជាបណ្តើរៗក្នុងការស៊ើបអង្កេតក្នុងការស្រាវជ្រាវហើយ។ អ៊ីចឹងអ្វីដែលពិតប្រាកដគឺឆន្ទៈទេ! តើមានឆន្ទៈពិតប្រាកដក្នុងការស្វែងរកយុត្តិធម៌ជូនលោកជា វិជ្ជាទេ? ឆន្ទៈពិតប្រាកដក្នុងការស្វែងរកជនដៃដល់ និងអ្នកនៅពីក្រោយដែរ ឬក៏អត់ទេ?»
VOA មិនអាចទាក់ទងសុំការអត្ថាធិប្បាយពីលោកខៀវ សុភ័គ អ្នកនាំពាក្យក្រសួងមហាផ្ទៃបានទេរហូតដល់ល្ងាចថ្ងៃអង្គារនេះ។
យ៉ាងណាក្តី កាលពីសប្តាហ៍មុន លោកខៀវ សុភ័គប្រាប់ VOA ថា សមត្ថកិច្ចកំពុងបន្តការស៊ើបអង្កេតករណីឃាតកម្មលើលោកជា វិជ្ជា ប៉ុន្តែលោកថា ករណីឃាតកម្មនេះពិបាករកតម្រុយដោយសារមិនមានការសហការពីសាក្សី។
ក្រៅពីឃាតកម្មលើលោកជា វិជ្ជា ដែលជាប្រធានសហជីពដ៏សកម្ម និងល្បីក្នុងការទាមទារសិទ្ធិឲ្យកម្មករនោះ ក៏នៅមានករណីនៃការបាញ់សម្លាប់ធំៗមួយចំនួនទៀត ដែលកើតមានជាបន្តបន្ទាប់។
កាលពីថ្ងៃទី១០ខែកក្កដាឆ្នាំ២០១៦ លោកបណ្ឌិតកែម ឡី អ្នកវិភាគឯករាជ្យ ត្រូវបានខ្មាន់កាំភ្លើងបាញ់ចំនួនពីរគ្រាប់ បណ្ដាលឲ្យស្លាប់ភា្លមៗនៅហាងលក់ទំនិញមួយកន្លែង ក្នុងស្ថានីយ៍ប្រេងឥន្ធនៈមួយក្នុងខណ្ឌចំការមន រាជធានីភ្នំពេញ។
ចំណែកលោក ឈុត វុទ្ធី អតីតសកម្មជនការពារបរិស្ថានដ៏សកម្មមួយរូប ត្រូវបានខ្មាន់កាំភ្លើងបាញ់សម្លាប់ក្នុងខេត្តកោះកុង កាលពីខែមេសាឆ្នាំ២០១២។
ក្នុងរយៈពេលជិត២០ឆ្នាំកន្លងមកនេះ មានសកម្មជនគណបក្សនយោបាយ សកម្មជនបរិស្ថាន អ្នកវិភាគ ព្រះសង្ឃ សហជីព និងអ្នកកាសែតជាច្រើនរូបត្រូវបានឃាតកបាញ់សម្លាប់។ ក្រុមអ្នករិះគន់បាននិយាយថា មិនមានឃាតកពិតប្រាកដណាម្នាក់ត្រូវបានអាជ្ញាធរចាប់ខ្លួនយកមកកាត់ទោសតាមច្បាប់នៅឡើយ៕
