អគ្គលេខាធិការអង្គការសហប្រជាជាតិលោក Antonio Guterres បាននិយាយកាលពីថ្ងៃពុធម្សិលមិញថា លោកកំពុងចាប់ផ្តើមការពិនិត្យមើលឡើងវិញយ៉ាងលម្អិតចំពោះអង្គការពិភពលោកនេះ ដើម្បីធ្វើឱ្យប្រសើរឡើងនូវប្រសិទ្ធភាពរបស់ខ្លួននិងកាត់បន្ថយសោហ៊ុយនៅពេលដែលខ្លួនប្រឈមវិបត្តិខ្វះថវិកាដ៏អាក្រក់បំផុត។
លោកអគ្គលេខាធិការអង្គការសហប្រជាជាតិបានប្រាប់ពួកអ្នកយកព័ត៌មានថា៖ «ធនធានកំពុងរួញខើចនៅទូទាំងអង្គការសហប្រជាជាតិ ហើយការរួញខើចនេះមានជាយូរយារមកហើយ»។
លោកបាននិយាយទៀតថា កិច្ចផ្តួចផ្តើមមួយដែលហៅថា UN80 ហើយដែលភ្ជាប់ទៅនឹងខួបលើកទី៨០របស់អង្គការសហប្រជាជាតិនៅឆ្នាំនេះ ស្វះស្វែងដើម្បីពង្រីកការធ្វើកំណែទម្រង់ដែលលោកបានដាក់ស្នើចាប់តាំងពីលោកចូលកាន់តំណែងក្នុងឆ្នាំ២០១៧មក ដើម្បីធ្វើឱ្យអង្គការពិភពលោកនេះមានប្រសិទ្ធភាពកាន់តែខ្លាំងឡើងនិងប្រសិទ្ធភាពនៃការកាត់សោហ៊ុយ។
ប្រធានអង្គការសហប្រជាជាតិមិនបានផ្តល់សេចក្តីលម្អិតថា តើប្រាក់ប៉ុន្មានដែលសំណើរបស់លោកអាចសន្សំឬតើការងារប៉ុន្មានដែលដែលត្រូវកាត់នោះទេ ក៏ប៉ុន្តែបាននិយាយថាលោកមានគម្រោងចាត់វិធានការឱ្យបានឆាប់រហ័សនៅក្នុងវិស័យមួយចំនួនដែលលោកមានអំណាចហើយនឹងបញ្ជូនសំណើនោះទៅកាន់រដ្ឋចំនួន១៩៣ ដែលជាសមាជិក ដើម្បីសើរើពិនិត្យលើការសម្រេចដែលអាស្រ័យលើពួកគេ។
កិច្ចប្រឹងប្រែងនេះនឹងត្រូវដឹកនាំដោយគណៈកម្មការផ្ទៃក្នុងមួយដែលមានសមាជិក ១៤នាក់ដែលលោកអគ្គលេខាធិការ Guterres បានបញ្ជាក់យ៉ាងច្បាស់ថានឹងមិនមែនដូចជាកំណែថ្មី DOGE សម្រាប់អង្គការសហប្រជាជាតិ ដែលឈ្មោះ DOGE នេះលោកសំដៅទៅលើអង្គភាពប្រសិទ្ធភាពរដ្ឋាភិបាលអាមេរិកដែលដឹកនាំដោយលោក Elon Musk ដែលបានកាត់បន្ថយការងាររាប់ម៉ឺនរបស់បុគ្គលិកសហព័ន្ធនៅក្នុងសហរដ្ឋអាមេរិក។
លោកអគ្គលេខាធិការបានមានប្រសាសន៍ទៀតថា៖«យើងកំពុងពិភាក្សាដំណើរការខុសគ្នាទាំងស្រុង។ នេះជាការបន្តនិងការពង្រីកការងារដែល យើងបាននិងកំពុងធ្វើ»។
ចាប់តាំងពីចូលកាន់តំណែងកាលពី៧សប្តាហ៍មុនមក រដ្ឋបាលលោកប្រធានាធិបតី Trump បានកាត់បន្ថយការរួមវិភាគទានថវិកាដោយការស្ម័គ្រចិត្តរបស់ខ្លួនទៅអង្គការសហប្រជាជាតិ ទីភ្នាក់ងារនានានិងកម្មវិធីមួយចំនួនតាមរយៈការលុបចោលកម្មវិធីជំនួយបរទេសរបស់ខ្លួន ហើយកិច្ចផ្តួចផ្តើមនៃដំណើរការវែងឆ្ងាយនៃការដកខ្លួនចេញពីអង្គការសុខភាពពិភពលោក កំពុងបង្កើនការព្រួយកង្វល់អំពីហិរញ្ញវត្ថុនៅឯអង្គការសហប្រជាជាតិ។ រដ្ឋាភិបាលក្រុងវ៉ាស៊ីនតោនជាម្ចាស់ជំនួយដ៏ធំបំផុតរបស់អង្គការពិភពលោកនេះ៕
