២១:៥៣
៥.១០.២០២២
ថ្ងៃពុធ ទី ៥ ខែតុលា៖
- មហាសន្និបាតអង្គការសហប្រជាជាតិត្រូវគេរំពឹងថានឹងបោះឆ្នោតនៅសប្តាហ៍ក្រោយទៅលើសេចក្តីព្រាងសេចក្តីសម្រេចចិត្តមួយដែលថ្កោលទោសរុស្ស៊ីក្នុងការដាក់បញ្ចូលទឹកដីអ៊ុយក្រែនដែលរុស្ស៊ីគ្រប់គ្រង ទៅជាផ្នែកមួយនៃទឹកដីរបស់ខ្លួននោះ។ រុស្ស៊ីបានប្រើប្រាស់សិទ្ធិវេតូប្រឆាំងរបស់ខ្លួន ដើម្បីបញ្ឈប់នូវវិធានការប្រហាក់ប្រហែលគ្នានេះមួយផងដែរ នៅក្រុមប្រឹក្សាសន្តិសុខអង្គការសហប្រជាជាតិ កាលពីសប្តាហ៍មុន។
- រដ្ឋមន្ត្រីការបរទេសអង់គ្លេសលោក James Cleverly និយាយនៅថ្ងៃពុធនេះថា ចក្រភពអង់គ្លេសបានស្តាប់ដោយប្រុងប្រយ័ត្នចំពោះការគំរាមកំហែងប្រើអាវុធនុយក្លេអ៊ែររបស់ប្រធានាធិបតីរុស្ស៊ីលោក Vladimir Putin ប៉ុន្តែលោកថា លោក Putin មានប្រវត្តិធ្លាប់តែគំរាមកំហែងដោយបង្ហាញកម្លាំង។ នៅពេលសួរថា តើគេត្រូវយកចិត្តទុកដាក់ទៅលើការគំរាមកំហែងប្រើអាវុធនុយក្លេអ៊ែររបស់រុស្ស៊ីនោះឬទេ លោក Cleverly បានប្រាប់វិទ្យុ BBC របស់អង់គ្លេសថា «យើងតែងតែស្តាប់ដោយប្រុងប្រយ័ត្នចំពោះអ្វីដែលលោក Vladimir Putin បាននិយាយ។ យើងក៏ទទួលស្គាល់ផងដែរថា លោក Putin ធ្លាប់មានប្រវត្តិគំរាមកំហែងដោយបង្ហាញកម្លាំងផងដែរ»។
- ក្រុមរដ្ឋាភិបាលនៃប្រទេសក្នុងសហភាពអឺរ៉ុបមានគម្រោងនឹងសម្រេចកិច្ចព្រមព្រៀងមួយនៅថ្ងៃពុធនេះ ទៅលើសំណើដាក់ទណ្ឌកម្មជាថ្មីប្រឆាំងនឹងប្រទេសរុស្ស៊ី ចំពោះការឈ្លានពានប្រទេសអ៊ុយក្រែននោះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters ដែលបានស្រង់សម្តីប្រធានគោលនយោបាយការបរទេសសហភាពអឺរ៉ុប លោក Josep Borrell។ ក្រុមរដ្ឋាភិបាលប្រទេសក្នុងសហភាពអឺរ៉ុប ដែលជាក្រុមប្រឹក្សារួមគ្នានោះ បានពិភាក្សាគ្នាចាប់តាំងពីសប្តាហ៍មុនមក ក្នុងការស្វែងរកការដាក់ទណ្ឌកម្មជាលើកទី៨ប្រឆាំងនឹងប្រទេសរុស្ស៊ី។
- កងកម្លាំងអ៊ុយក្រែន បានរុលទៅមុខក្នុងចម្ងាយ២០គីឡូម៉ែត្រទៀត ហួសពីទន្លេរ Oskil ក្នុងតំបន់ Kharkiv ភាគឦសាន្តនៃប្រទេសអ៊ុយក្រែន ចូលទៅក្នុងតំបន់ការពាររបស់រុស្ស៊ី ក្នុងដំណើរឆ្ពោះទៅកាន់ទីប្រជុំជន Svatove ក្នុងតំបន់ Luhansk។ នេះបើតាមការបញ្ជាក់របស់ប្រទេសអង់គ្លេសនៅថ្ងៃពុធនេះ។ ក្រសួងការពារជាតិអង់គ្លេសបាននិយាយនៅក្នុងព្រឹតិ្តប័ត្រស៊ើបការណ៍សម្ងាត់របស់ខ្លួនថា «តាមន័យនយោបាយ មេដឹកនាំរុស្ស៊ីទំនងជាកំពុងបារម្ភថា អង្គភាពកងកម្លាំងអ៊ុយក្រែនដែលកំពុងរុលទៅមុខ ឥឡូវនេះកំពុងខិតទៅជិតព្រំដែននៃតំបន់រដ្ឋបាល Luhansk ដែលរុស្ស៊ីបានអះអាងថា បានដាក់បញ្ចូលទៅក្នុងទឹកដីរបស់ខ្លួនជាផ្លូវការកាលពីថ្ងៃសុក្រសប្តាហ៍មុននោះ។
- ឯកអគ្គរដ្ឋទូតរុស្ស៊ីប្រចាំសហរដ្ឋអាមេរិក លោក Anatoly Antonov បាននិយាយថា ការសម្រេចចិត្តរបស់រដ្ឋាភិបាលក្រុងវ៉ាស៊ីនតោនក្នុងការបញ្ជូនជំនួយយោធាបន្ថែមទៀតទៅឱ្យប្រទេសអ៊ុយក្រែននោះ កំពុងបង្កើតនូវការគំរាមកំហែងប្រឆាំងនឹងផលប្រយោជន៍រុស្ស៊ី និងបង្កើននូវហានិភ័យនៃការប៉ះទង្គិចគ្នាខាងផ្នែកយោធារវាងប្រទេសរុស្ស៊ីនិងប្រទេសលោកខាងលិច។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ លោក Antonov បាននិយាយសារក្នុងតេឡេក្រាមនៅថ្ងៃពុធនេះថា «យើងចាត់ទុកថា រឿងនេះជាការគំរាមកំហែងជាបន្ទាន់មួយទៅលើផលប្រយោជន៍យុទ្ធសាស្ត្រនៃប្រទេសរបស់យើង»។
- ក្រសួងការបរទេសរុស្ស៊ីបាននិយាយនៅថ្ងៃពុធនេះថា រោងចក្រថាមពលនុយក្លេអ៊ែរ Zaporizhzhia នឹងត្រូវដំណើរការនៅក្រោមការគ្រប់គ្រងថ្មីរបស់ទីភ្នាក់ងារមួយចំនួនរបស់រុស្ស៊ី បន្ទាប់ពីប្រធានាធិបតីរុស្ស៊ីលោក Vladimir Putin បានដាក់បញ្ចូលតំបន់ Zaporizhzhia ជាផ្លូវការទៅជាផ្នែកមួយនៃទឹកដីរុស្ស៊ីនៅសប្តាហ៍នេះ។ នេះបើតាមទីភ្នាក់ងារព័ត៌មានរដ្ឋរុស្ស៊ី RIA។ ដោយឡែកទីភ្នាក់ងារព័ត៌មានរដ្ឋរុស្ស៊ីមួយទៀតដែលមានឈ្មោះ TASS ក៏បានរាយការណ៍ឱ្យដឹងផងដែរថា លោកRafael Grossi ដែលជាប្រធានទីភ្នាក់ងារថាមពលបរមាណូអន្តរជាតិ (IAEA) នឹងទៅធ្វើទស្សនកិច្ចក្នុងទីក្រុងមូស្គូក្នុងពេលឆាប់ៗខាងមុខនេះដើម្បីពិភាក្សាអំពីស្ថានភាពនៅរោងចក្រថាមពលនុយក្លេអ៊ែរនេះផងដែរ។
២២:៥៤
៦.១០.២០២២
ថ្ងៃព្រហស្បតិ៍ ទី ៦ ខែតុលា៖
- ទីភ្នាក់ងារព័ត៌មាន Reuters រាយការណ៍ដោយដកស្រង់ការផ្សាយរបស់កាសែត The New York Timesថា ទីភ្នាក់ងារស៊ើបអង្កេតសហរដ្ឋអាមេរិកជឿថា ផ្នែកមួយចំនួននៃរដ្ឋាភិបាលអ៊ុយក្រែនបានយល់ព្រមទៅលើការវាយប្រហារលើ ការបំផ្ទុះគ្រាប់បែកក្នុងរថយន្តនៅជិតទីក្រុងមូស្គូ កាលពីខែសីហាកន្លងទៅដែលបានសម្លាប់លោកស្រី Darya Dugina ដែលជាកូនស្រីរបស់អ្នកជាតិនិយមរុស្ស៊ីដ៏ល្បីមួយរូប។ ទីភ្នាក់ងារព័ត៌មាន Reuters មិនអាចធ្វើការផ្ទៀងផ្ទាត់បានភ្លាមៗនៅឡើយទេជុំវិញសេចក្តីរាយកាណ៍នេះ។ សហរដ្ឋអាមេរិក មិនបានពាក់ព័ន្ធក្នុងការវាយប្រហារនេះឡើយ ហើយក៏មិនបានដឹងមុនពីគម្រោងការនេះជាមុនផងដែរ។ នេះបើយោងទៅលើកាសែត The New York Times ។ ក្រុមមន្ត្រីអាមេរិកបានស្តីបន្ទោសដល់មន្ត្រីអ៊ុយក្រែនជុំវិញការធ្វើឃាតនេះ។ នេះបើតាមសារព័ត៌ដដែលនេះ។
- ប្រធានាធិបតីអ៊ុយក្រែនលោក Volodymyr Zelenskyy និយាយថា កងទ័ពអ៊ុយក្រែន បានដណ្តើមកាន់កាប់ទីតាំងបន្ថែមទៀតជាច្រើនទៀតក្នុងតំបន់ Kherson ដែលជាតំបន់មួយក្នុងចំណោមតំបន់ភាគខាងត្បូងមួយចំនួនរបស់អ៊ុយក្រែន ដែលត្រូវបានគ្រប់គ្រងមួយផ្នែកដោយកងទ័ពរុស្ស៊ី ហើយដែលត្រូវបានរដ្ឋាភិបាលក្រុងមូស្គូដាក់បញ្ចូលជាទឹកដីរបស់ខ្លួន។ នៅក្នុងសុន្ទរកថាវីដេអូប្រចាំរាត្រី លោក Zelenskyy និយាយថា លោកបានជួបជាមួយមេដឹកនាំយោធាជាន់ខ្ពស់អ៊ុយក្រែនកាលពីថ្ងៃពុធ ដើម្បីពិភាក្សាពីការដណ្តើមយកមកវិញនូវទឹកដីទាំងអស់របស់អ៊ុយក្រែនដែលរុស្ស៊ីកំពុងកាន់កាប់។ នេះបើតាមសេចក្តីរាយការណ៍របស់ទីភ្នាកងារព័ត៌មាន Reuters។
- នៅឯអង្គការសហប្រជាជាតិ ប្រទេសរុស្ស៊ីកំពុងបញ្ចុះបញ្ចូលឱ្យមានការបោះឆ្នោតសម្ងាត់មួយ ដោយជំនួសការបោះឆ្នោតជាសាធារណៈនៅពេលដែលមហាសន្និបាតអង្គការសហប្រជាជាតិដែលមានប្រទេសជាសមាជិកចំនួន១៩៣ប្រទេសកំពុងពិចារណាការបោះឆ្នោតនៅសប្តាហ៍ក្រោយថា តើគួថ្កោលទោសរុស្ស៊ីដែរឬអត់នោះនៅក្នុងការបោះឆ្នោតប្រជាមតិដែលដាក់តំបន់ Donetsk និង Luhansk នៅភាគខាងកើត និងតំបន់ Kherson និងតំបន់ Zaporizhzhia នៅភាគខាងត្បូងរបស់ប្រទេសអ៊ុយក្រែន ទៅជាទឹកដីរបស់ខ្លួននោះ។ នេះបើតាមសេចក្តីរាយកាណ៍របស់ទីភ្នាក់ងារព័ត៌មាន Reuters។
- ប្រធានាធិបតីរុស្ស៊ីលោក Vladimir Putin បាននិយាយកាលពីថ្ងៃពុធថា លោករំពឹងថាស្ថានភាពក្នុងតំបន់អ៊ុយក្រែនដែលរុស្ស៊ីប្រកាសដាក់បញ្ចូលជាផ្នែកមួយនៃទឹកដីរបស់ខ្លួននោះនឹងមានស្ថិរភាព បន្ទាប់ពីកងទ័ពរុស្ស៊ីកំពុងប្រឈមនឹងការបក និងបានបង់ទីប្រជុំជនសំខាន់ៗមួយចំនួនទៅក្នុងកណ្តាប់ដៃរបស់កងទ័ពអ៊ុយក្រែន។ សមាជិកសភាជាន់ខ្ពស់រុស្ស៊ីមួយរូបបានអំពាវនាវឱ្យមន្ត្រីយោធារុស្ស៊ីប្រាប់ពីការពិតនៃស្ថាន ភាពវិវត្តន៍លើសមរភូមិក្នុងប្រទេសអ៊ុយក្រែន បន្ទាប់ពីកងទ័ពរុស្ស៊ីបានបាត់បង់ទីតាំងកាន់កាប់ជាច្រើនរបស់ខ្លួននោះ។ «យើងត្រូវតែឈប់និយាយកុហក»។ នេះបើតាមការលើកឡើងរបស់លោក Andrei Kartapolov ដែលជាប្រធាន គណៈកម្មាធិការការពារជាតិនៃរដ្ឋសភារុស្ស៊ី ដែលបានថ្លែងប្រាប់អ្នកកាសែតមួយរូបនៃបណ្តាញព័ត៌មានរដ្ឋរុស្ស៊ី។ នេះបើតាមការចេញផ្សាយរបស់ទីភ្នាក់ងារព័ត៌មាន AFP។
- មេដឹកនាំ ChechnyaលោកRamzan Kadyrov ដែលជាសម្ព័ន្ធមិត្តមួយរូបរបស់ប្រធានាធិបតីរុស្ស៊ីលោក Vladimir Putin នោះ បាននិយាយនៅថ្ងៃពុធថា លោកត្រូវបានផ្តល់ឋាន្តរស័កិ្តកំពូលមួយនៅក្នុងកងទ័ពរុស្ស៊ី ខណៈពេលដែលកងកម្លាំងរុស្ស៊ីកំពុងប្រឈមនឹងការបាត់បង់ទីតាំងជាច្រើននៅក្នុងប្រទេសអ៊ុយក្រែននោះ។ លោក Kadyrov ដែលជាអតីតមេទ័ពសង្រ្គាមមួយរូបនេះនិងកំពុងគ្រប់គ្រងសាធារណរដ្ឋ Chechnya ជាមួយនឹងការរំលោភសិទ្ធិមនុស្សជាច្រើននោះ បាននិយាយថាលោកPutin បានប្រាប់លោកដោយផ្ទាល់ពីការតំឡើងឋានន្តរស័ក្តិក្នុងកងកម្លាំងយោធារុស្ស៊ីនេះ។ មេដឹកនាំ Chechnyaរូបនេះ បានបង្ហោះសារលើតេឡេក្រាមថា ប្រធានាធិបតីរុស្ស៊ីបានផ្តល់ឋានន្តរស័ក្តិជានាយឧត្តមសេនីយយោធាដល់រូបលោក ដែលជាឋានានុក្រមកម្រិតទី៣ខ្ពស់បំផុត ក្នុងជួរកងកម្លាំងរុស្ស៊ីទាំងមូល។ ក្រុមអង្គភាពយោធាChechnya ជាច្រើន កំពុងចូលរួមប្រយុទ្ធជាមួយកងទ័ពរុស្ស៊ីនៅក្នុងប្រទេសអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
6/ មន្ត្រីអ៊ុយក្រែនម្នាក់និយាយនៅថ្ងៃព្រហស្បតិ៍នេះថា ការបាញ់ផ្លោងរបស់រុស្ស៊ីបានចំទៅលើអគារលំនៅដ្ឋានមួយចំនួននៅក្នុងតំបន់ Zaporizhzhia ដោយសម្លាប់មនុស្សយ៉ាងតិចណាស់ក៏២នាក់ផងដែរ។ អភិបាលតំបន់ Zaporizhzhia លោក Oleksandr Starukh បានបង្ហោះសារនៅលើតេឡេក្រាមថា មានមនុស្ស៥នាក់ បានជាប់ក្នុងគំនរថ្មបាក់បែកនៃអគារដែលទទួលរងការវាយប្រហារនោះ។ កងកម្លាំងអ៊ុយក្រែនគ្រប់គ្រងក្នុងទីក្រុង ប៉ុន្តែតំបន់ Zaporizhzhia ស្ទើរតែទាំងអស់គ្រប់គ្រងដោយកងកម្លាំងរុស្ស៊ី។
០១:៣៤
៨.១០.២០២២
ថ្ងៃសុក្រ ទី៧ ខែតុលា៖
- ការិយាល័យប្រធានាធិបតីអ៊ុយក្រែនបាននិយាយកាលពីថ្ងៃសុក្រថា ប្រជាពលរដ្ឋអ៊ុយក្រែនដែលស្ថិតនៅក្រោមការវាយប្រហាររបស់រុស្ស៊ីចាប់តាំងពីខែកុម្ភៈមកជា «ស្ថាបត្យករសន្តិភាព» បន្ទាប់ពីអង្គការមិនមែនរដ្ឋាភិបាល NGO មួយរបស់អ៊ុយក្រែនបានក្លាយជាសហអ្នកទទួលរង្វាន់ណូបែលសន្តិភាព។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ នាយកខុទ្ទកាល័យរបស់ប្រធានាធិបតីអ៊ុយក្រែនលោក Andriy Yermak បាននិយាយនៅលើបណ្តាញព័ត៌មានសង្គមថា «ប្រជាពលរដ្ឋអ៊ុយក្រែនជាស្ថាបត្យករសន្តិភាពដ៏សំខាន់មួយដែលយើងអាចស្ថិតនៅបានដោយគ្មានការឈ្លានពាន»។ អ្នកជំនួយការជាន់ខ្ពស់របស់ប្រធានាធិបតីអ៊ុយក្រែនលោក Volodymyr Zelenskyyបានសម្តែងការមិនពេញចិត្តដែលរង្វាន់នេះត្រូវបានចែកជាមួយអង្គការមកពីប្រទេសដែលជាសម្ពន្ធមិត្តប្រឆាំងនឹងអ៊ុយក្រែនដូចជាប្រទេសរុស្ស៊ីនិងបេឡារុស។
- ប្រធានាធិបតីបារាំងលោក Emmanuel Macron កាលពីថ្ងៃព្រហស្បតិ៍បានជំរុញឱ្យប្រធានាធិបតីតួកគីលោកRecep Tayyip Erdogan ធ្វើការវាយបកប្រឆាំងនឹងប្រទេសរុស្ស៊ីដោយការដាក់ទណ្ឌកម្មលើរុស្ស៊ីអំពីសង្គ្រាមរបស់រុស្ស៊ីលើអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ លោក Macron បានសង្កត់ពីសារៈសំខាន់នៃការដាក់ទណ្ឌកម្មរបស់សហភាពអឺរ៉ុបនៅក្នុងការបញ្ឈប់ការពង្រីកសង្គ្រាមរបស់រុស្ស៊ី ហើយបានអំពាវនាវឱ្យប្រយុទ្ធដើម្បីបង្អាក់យុទ្ធសាស្ត្រទាំងនេះ»។ នេះតាមបើតាមការបញ្ជាក់របស់ការិយាល័យប្រធានាធិបតីបារាំងបន្ទាប់ពីការចរចានៅខាងក្រៅសន្និសីទកំពូលនៅក្នុងរដ្ឋធានីប្រាក។ មានការព្រួយកង្វល់នៅក្នុងតំបន់អឺរ៉ុបនិងសហរដ្ឋអាមេរិក ថា តួកគីដែលមិនបានដាក់ទណ្ឌកម្មប្រឆាំងនឹងរដ្ឋាភិបាលក្រុងមូស្គូត្រូវបានគេប្រើប្រាស់ជាទីកន្លែងជ្រកពួនសម្រាប់អ្នកដែលស្វះស្វែងបញ្ចៀសការដាក់ទណ្ឌកម្មពីប្រទេសលោកខាងលិច។ ពាណិជ្ជកម្មរបស់តួកគីជាមួយរុស្ស៊ីបានរីកធំឡើងក្នុងអំឡុងសង្គ្រាមក្នុងប្រទេសអ៊ុយ ក្រែនដែលកំពុងធ្វើឱ្យមានរកាំចិត្តពីរដ្ឋាភិបាលក្រុងវ៉ាស៊ីនតោនដែលព្រួយបារម្ភថា ពួកអភិជននិងក្រុមហ៊ុនធំៗរបស់រុស្ស៊ីកំពុងប្រើប្រាស់អង្គភាពរបស់តួកគីដើម្បីបញ្ចៀសការដាក់ទណ្ឌកម្ម។
- តម្លៃម្ហូបអាហារលើពិភពលោកបានធ្លាក់ចុះនៅក្នុងខែទី៦នៅក្នុងខែកញ្ញា។ នេះបើតាមទិន្នន័យរបស់អង្គការសហប្រជាជាតិដែលបានបង្ហាញកាលពីថ្ងៃសុក្រម្សិលមិញនៅពេលដែលតម្លៃម្ហូបអាហារបានបន្តធ្លាក់ចុះចាប់តាំងពីបានឡើងថ្លៃខ្លាំងបំផុតបន្ទាប់ពីការឈ្លានពានរបស់រុស្ស៊ីលើប្រទេសអ៊ុយក្រែន។ នេះបើតាមសេចក្តីរាយ ការណ៍របស់ទីភ្នាក់ងារព័ត៌មាន AFP។ អង្គការចំណីអាហារនិងកសិកម្មបានបញ្ជាក់ថា សន្ទស្សន៍តម្លៃរបស់ខ្លួនដែលតាមដានការប្រែប្រួលប្រចាំខែនៅក្នុងតម្លៃអន្តរជាតិនៅក្នុងផលិតផលម្ហូបអាហារបានធ្លាក់ចុះ ១,១ភាគរយចាប់តាំងពីខែសីហាមក។ ទោះជាយ៉ាងណាក៏ដោយ សន្ទស្សន៍នោះមាន៥,៥ភាគរយខ្ពស់ជាងកាលពីខែកញ្ញា ឆ្នាំ២០២១។
- ទីភ្នាក់ងារព័ត៌មាន Reuters បានរាយការណ៍ថា ការគំរាមរបស់ប្រធានាធិបតីរុស្ស៊ី Vladimir Putin ប្រើអាវុធនុយក្លេអ៊ែរជាការគំរាមកំហែងដ៏ធំបំផុតចាប់តាំងពីវិបត្តិមីស៊ីលគុយបានៅពេលដែលមេដឹកនាំយោធារុស្ស៊ីបានប្រឈមការរិះគន់ជាសាធារណៈដ៏កម្រមួយនៅក្នុងប្រទេសអំពីសង្គ្រាមនៅក្នុងប្រទេសអ៊ុយក្រែន។ រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយកាលពីថ្ងៃសុក្រថា កំណត់សម្គាល់ដោយប្រធានាធិបតីអ៊ុយក្រែនលោកVolodymyr Zelenskiy ថា អង្គការអូតង់គួរធ្វើការវាយប្រហារបង្ការលើប្រទេសរុស្ស៊ី«បញ្ជាក់ឱ្យឃើញសេចក្តីត្រូវការ»អ្វីដែលរុស្ស៊ីហៅថា «កិច្ចប្រតិបត្តិការពិសេស»ក្នុងប្រទេសអ៊ុយក្រែននោះ។ បើតាមសេចក្តីរាយ ការណ៍របស់ទីភ្នាក់ងារព័ត៌មាន Reuters។ នៅក្នុងការពិភាក្សាជាមួយវិទ្យាស្ថាន Lowy ដែលជាអង្គការស្រាវជ្រាវមួយរបស់ប្រទេសអូស្ត្រាលី លោកប្រធានាធិបតី Zelenskiy បាននិយាយថា លោកជឿជាក់ថា ការវាយប្រហារនោះជាការចាំបាច់ដើម្បីរារាំងជាមុនការប្រើអាវុធនុយក្លេអ៊ែរណាមួយ។ លោកមិនបាននិយាយលម្អិតអំពីប្រភេទនៃការវាយប្រហារដែលលោកចង់និយាយនោះទេហើយលោកមិនបាននិយាយសំដៅដល់ភាពចាំបាច់នៃការវាយប្រហារដោយប្រើអាវុធនុយក្លេអ៊ែទេ៕
០១:៤២
១២.១០.២០២២
ថ្ងៃ អង្គារ ទី ១១ ខែតុលា៖
- ប្រទេសរុស្ស៊ីបានឱ្យដឹងនៅថ្ងៃអង្គារថា ខ្លួនបានចាប់ផ្តើមធ្វើការវាយប្រហារទ្រង់ទ្រាយធំទៅលើប្រទេសអ៊ុយក្រែន ក្នុងរយៈពេលប៉ុន្មានម៉ោងនៅមុនជំនួបរបស់ប្រទេសដែលមានឧស្សាហកម្មជឿនលឿនទាំង៧ឬ G-7 ដែលត្រូវគេរំពឹងថា កិច្ចប្រជុំនេះនឹងថ្កោលទោសការវាយប្រហារដោយកាំជ្រួចមីស៊ីលកាលពីពេលព្រឹក។ ក្រុមសម្ពន្ធមិត្តរបស់រដ្ឋាភិបាលក្រុងកៀវបាននិយាយថា នេះជាការបង្ហាញនូវការអស់សង្ឃឹមរបស់រដ្ឋាភិបាលរុស្ស៊ី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ ពួកមន្ត្រីនៅក្នុងតំបន់ Lviv ភាគខាងលិចប្រទេសអ៊ុយក្រែនបាននិយាយថា កាំជ្រួចមីស៊ីលរបស់រុស្ស៊ីយ៉ាងតិចណាស់ក៏៣គ្រាប់ដែរបានបាញ់ទៅលើហេដ្ឋារចនាសម្ព័ន្ធថាមពល ហើយអភិបាលក្រុង Lviv ដែលជាក្រុងដ៏សំខាន់មួយនៅក្នុងតំបន់នេះ បាននិយាយថា ទីក្រុងនេះប្រហែល១ភាគ៣មិនមានអគ្គិសនីប្រើប្រាស់។ ក្រសួងការពារជាតិរុស្ស៊ីបានបញ្ជាក់ពីការវាយប្រហារនេះដោយនិយាយថា ខ្លួនបានធ្វើការវាយប្រហារទ្រង់ទ្រាយធំដោយប្រើអាវុធវង់ប្រតិបត្តិការបាញ់បានឆ្ងាយនិងចំទីដៅហើយទីដៅនៃការវាយប្រហារទាំងអស់ត្រូវបានវាយចំគោលដៅ។
- ប្រធានាធិបតីតួកគីលោក Recep Tayyip Erdoganទំនងជាជួបជាមួយនឹងប្រធានាធិបតីរុស្ស៊ីលោក Vladimir Puitn នៅខាងក្រៅសន្និសីទកំពូលក្នុងតំបន់នៅរដ្ឋធានី Astana នៃប្រទេសកាហ្សាក់ស្ថាននៅសប្តាហ៍នេះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ មន្ត្រីម្នាក់បាននិយាយកាលពីដំបូងថា ជំនួបនោះនឹងធ្វើឡើងនៅថ្ងៃពុធ ក៏ប៉ុន្តែក្រោយមកបាននិយាយថា លោក Erdogan ទំនងជាជួបលោក Putin នៅថ្ងៃព្រហស្បតិ៍។ នេះបើតាមកាលវិភាគនៅពេលថ្មីៗបំផុតនេះ។ មន្ត្រីតួកគីម្នាក់បាននិយាយថា លោក Erdogan មានគម្រោងជិះយន្តហោះទៅកាន់រដ្ឋធានី Astana នៅថ្ងៃពុធដើម្បីពិភាក្សាជាមួយប្រធានាធិបតីកាហ្សាក់ស្ថានលោក Kassym-Jomart Tokayev។ តួកគីដែលបានស្ថិតនៅអព្យាក្រឹត្យក្នុងជម្លោះអ៊ុយក្រែននិងរុស្ស៊ី មានទំនាក់ទំនងល្អជាមួយប្រទេសរុស្ស៊ីនិងអ៊ុយក្រែនដែលស្ថិតនៅតំបន់សមុទ្រខ្មៅ។ លោក Erdogan មិនទាន់ធ្វើអត្ថាធិប្បាយនោះទេអំពីការវាយប្រហារដ៏ធំរបស់រុស្ស៊ីនៅទូទាំងប្រទេសអ៊ុយក្រែនកាលពីថ្ងៃចន្ទ ដែលទីភ្នាក់ងារគ្រាអាសន្នរបស់អ៊ុយក្រែនបាននិយាយថាបានសម្លាប់មនុស្សយ៉ាងតិចណាស់អស់ចំនួន ១៩នាក់និងធ្វើឱ្យមនុស្សជាង១០០នាក់ទៀតរងរបួស។
- មេដឹកនាំប្រទេសបេឡារុសលោក Alexander Lukashenko ដែលជាសម្ពន្ធមិត្តរបស់ប្រធានាធិបតីរុស្ស៊ីលោក Vladimir Putinបាននិយាយកាលពីថ្ងៃចន្ទថា ប្រទេសលីទុយអានី ប៉ូឡូញនិងអ៊ុយក្រែនបានហ្វឹកហ្វឺន«ពួកជ្រុលនិយម»បេឡារុសដើម្បីធ្វើការវាយប្រហារភេរវកម្ម បន្ទាប់ពីប្រកាសផែនការដើម្បីដាក់ពង្រាយកងទ័ពរួមគ្នាជាមួយរដ្ឋាភិបាលរុស្ស៊ី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ លោកLukashenko បាននិយាយនៅឯជំនួបជាមួយពួកមន្ត្រីយោធាថា«ការហ្វឹកហ្វឺននៅក្នុងប្រទេសប៉ូឡូញ លីទុយអានី និងអ៊ុយក្រែនដល់ពួកកងជីវពលជ្រុលនិយមបេឡារុសដើម្បីឱ្យពួកគេធ្វើវិទ្ធង្សនា ធ្វើភេរវកម្ម និងដើម្បីរៀបចំការបះបោរយោធានៅក្នុងប្រទេសដែលកំពុងក្លាយជាការគំរាមកំហែងដោយផ្ទាល់»។ ប្រទេសទាំង៣នោះដែលក្នុងនោះមានប្រទេសលីទុយអានីនិងប៉ូឡូញជាសមាជិករបស់សហភាពអឺរ៉ុបនិងអង្គការអូតង់មានព្រំដែនជាប់ជាមួយប្រទេសបេឡារុស។ លោក Lukashenko ក៏បានចោទប្រកាន់សហរដ្ឋអាមេរិក និងប្រទេសប៊ែលហ្សិកថាបានផ្តល់ទីជម្រកដល់«ពួកពិរុទ្ធជន»មកពីប្រទេសបេឡារុសដើម្បីប្រែក្លាយពួកគេឱ្យទៅជា«កម្លាំងនយោបាយ»ផងដែរ។
- ប្រធានទទួលបន្ទុកជនភៀសខ្លួនរបស់អង្គការសហប្រជាជាតិបានព្រមានកាលពីថ្ងៃចន្ទថា មនុស្សកាន់តែច្រើនឡើងនឹងត្រូវបង្ខំចិត្តចាកចេញពីផ្ទះសម្បែងរបស់ពួកគេនៅក្នុងប្រទេសអ៊ុយក្រែនបន្ទាប់ពីកាំជ្រួចមីស៊ីលរបស់រុស្ស៊ីបានត្រូវបាញ់ដូចគ្រាប់ទឹកភ្លៀងទៅលើរដ្ឋធានីកៀវនិងទីក្រុងផ្សេងទៀតរបស់អ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ រដ្ឋាភិបាលរុស្ស៊ីបានប្រាប់ឱ្យដឹងកាលពីថ្ងៃចន្ទថា នឹងមានការវាយប្រហារដ៏ធំបំផុតជាបន្តបន្ទាប់នៅទូទាំងប្រទេសអ៊ុយក្រែនក្នុងរយៈពេលប៉ុន្មានខែនេះដើម្បីជាការសងសឹកទៅនឹងការបំផ្ទុះកាលពីចុងសប្តាហ៍មុន ដែលបានធ្វើឱ្យខូចខាតស្ពានដ៏សំខាន់មួយដែលភ្ជាប់ពីប្រទេសរុស្ស៊ីទៅឧបទ្វីប Crimea។ ស្ពាននេះជានិមិត្តរូបរបស់រដ្ឋាភិបាលវិមានក្រឹមឡាំងដែលបានយកតំបន់ Crimea ជាឧបសម្ពន្ធរបស់ខ្លួនកាលពីឆ្នាំ២០១៤។ អគ្គស្នងការទទួលបន្ទុកជនភៀសខ្លួនអង្គការសហប្រជាជាតិលោក Filippo Grandi បានប្រាប់ពួកអ្នកកាសែតថា៖ «ភាពតក់ស្លុតចំពោះអ្វីដែលបានកើតមានឡើងនៅក្នុងប្រទេសអ៊ុយក្រែននៅថ្ងៃនេះគឺជាការមិនអាចដោះសារបាន»។ លោកបានមានប្រសាសន៍ទៀតថា៖ «ការបាញ់ផ្តក់លើជនស៊ីវិល ផ្ទះនិងហេដ្ឋារចនាសម្ព័ន្ធមិនមែនយោធាក្នុងលក្ខណ:មិនរើសមុខក្នុងទីក្រុងជាច្រើននៅទូទាំងប្រទេសអ៊ុយក្រែនមានន័យថា សង្គ្រាមនេះកំពុងក្លាយជាទុក្ខលំបាកកាន់តែខ្លាំងឡើងសម្រាប់ជនស៊ីវិល»។
- ការវាយប្រហារតាមអាកាសដ៏ប្រល័យរបស់រុស្ស៊ីលើទីក្រុងនានារបស់អ៊ុយក្រែននៅសប្តាហ៍នេះបានបណ្តាលឱ្យមានការអំពាវនាវផ្តល់ជំនួយយោធាកាន់តែច្រើនឡើងថែមទៀត ប៉ុន្តែពួកអ្នកវិភាគបានព្រមានថា មិនមានប្រព័ន្ធការពារដែនអាកាសណាអាចការពារទឹកដីអ៊ុយក្រែនបានទាំងស្រុងនោះទេ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ រដ្ឋាភិបាលក្រុងកៀវនិយាយថា ការវាយប្រហារគ្រប់ទិសទីរបស់រុស្ស៊ីនៅទូទាំងប្រទេសកាលពីថ្ងៃចន្ទបានសម្លាប់មនុស្សយ៉ាងតិចណាស់ចំនួន ១៩ នាក់ ធ្វើឱ្យមនុស្សរងរបួសជាង ១០០នាក់ និងធ្វើឱ្យខូចខាតហេដ្ឋារចនាសម្ព័ន្ធមួយចំនួន។ កាំជ្រួចមីស៊ីលទាំងនោះរួមមានកាំជ្រួចមីស៊ីល Cruise ដែលបានបាញ់ស្រោចដូចទឹកភ្លៀងទៅលើទីក្រុងនានាក្នុងប្រទេសអ៊ុយក្រែន រួមទាំងការវាយប្រហារដ៏កម្រទៅលើរដ្ឋធានីកៀវដែលស្ថិតនៅឆ្ងាយពីសមរភូមិនៅតំបន់ភាគខាងកើតនិងខាងត្បូងផងដែរ។ អ៊ុយក្រែនក៏បានចោទប្រកាន់រុស្ស៊ីថាបានប្រើប្រាស់យន្តហោះគ្មានមនុស្សបើកឬដ្រូនដែលត្រូវបានផលិតនៅក្នុងប្រទេសអ៊ីរ៉ង់ ដែលបានបង្ហោះពីប្រទេសបេឡារុសនិងតំបន់ Crimea ដែលត្រួតត្រាដោយរុស្ស៊ីផងដែរ។ ខណ:ដែលរដ្ឋាភិបាលក្រុងកៀវនិយាយថា កងទ័ពរបស់ខ្លួនបានបាញ់ទម្លាក់យន្តហោះគ្មានមនុស្សបើក ឬដ្រូនទាំងនោះជាងពាក់កណ្តាល លោកនាយករដ្ឋមន្ត្រី Deny Schmygal បានអំពាវនាវសុំអាវុធទំនើបៗកាន់តែច្រើនឡើងថែមទៀតដើម្បីការពារផ្ទៃអាកាសនិងពលរដ្ឋស៊ីវិល។