២១:៥៩ ១៤.៦.២០២២

ថ្ងៃអង្គារ ទី ១៤ ខែមិថុនា៖

វីអួអេរាយការណ៍ថាសាខាប្រតិបត្តិនៃសហភាពអឺរ៉ុបគ្រោងនឹងសម្រេចនៅពេលឆាប់ៗខាងមុខនេះអំពីថាតើត្រូវស្នើឬក៏អត់ឱ្យប្រទេសអ៊ុយក្រែនទទួលបានឋានៈជាប្រទេសដែលមានបេក្ខភាពផ្លូវការសម្រាប់ការចូលជាសមាជិករបស់សហភាពអឺរ៉ុប។ គណៈកម្មាការអឺរ៉ុប ដែលចាំបាច់ត្រូវតែអនុម័តជាឯកច្ឆន្ទលើការស្នើនេះ ក៏គ្រោងផងដែរនៅក្នុងការជជែកដេញដោលអំពីបញ្ហានេះនៅឯកិច្ចប្រជុំមួយនៅថ្ងៃទី ២៣ និងទី ២៤ ខែមិថុនាខាងមុខ។
លោក Colin Kahl រដ្ឋលេខាធិការក្រសួងការពារជាតិសហរដ្ឋអាមេរិកទទួលបន្ទុកកិច្ចការគោលនយោបាយ បាននិយាយនៅថ្ងៃអង្គារនេះថា ប្រធានាធិបតីរុស្ស៊ីលោក Vladimir Putin ទំនងជានៅចង់ដណ្ដើមកាន់កាប់ឱ្យបានផ្នែកភាគច្រើនប្រសិនបើមិនមែនផ្នែកទាំងអស់នៃប្រទេសអ៊ុយក្រែន ប៉ុន្តែលោកត្រូវតែបង្រួមគោលបំណងកលយុទ្ធរបស់លោកនៅក្នុងសង្គ្រាម។ លោក Kahl បានថ្លែងនៅក្នុងព្រឹត្តិការណ៍មួយដែលរៀបចំឡើងដោយមជ្ឈមណ្ឌលសម្រាប់សន្តិសុខអាមេរិកថ្មី (Center for New American Security) ថា៖ «ខ្ញុំនៅតែគិតថា លោក [Putin] មានផែនការសម្ងាត់លើផ្នែកសំខាន់មួយនៃប្រទេសអ៊ុយក្រែន ប្រសិនបើមិនមែនលើផ្នែកទាំងមូលនៃប្រទេសអ៊ុយក្រែន។ ករណីនេះមានន័យថា ខ្ញុំគិតថាលោកមិនអាចសម្រេចបានតាមគោលបំណងទាំងនោះទេ»។ នេះបើយោងតាមទីភ្នាក់ងារព័ត៌មាន Reuters។
ក្រសួងការពារជាតិរុស្ស៊ីបានបញ្ជាក់នៅថ្ងៃអង្គារនេះថា ខ្លួនបានទុកឱកាសឱ្យយុទ្ធជនអ៊ុយក្រែនដែលជ្រកកោននៅក្នុងរោងចក្រគីមី Azot នៅក្នុងទីក្រុង Sievierodonetsk នៅភាគខាងកើតប្រទេសអ៊ុយក្រែន ដើម្បីឱ្យចុះចាញ់នៅថ្ងៃទី ១៥ ខែមិថុនាខាងមុខ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Interfax របស់រុស្ស៊ី។ ក្រសួងនេះបានលើកឡើងបន្តថា ប្រទេសអ៊ុយក្រែនបានស្នើប្រទេសរុស្ស៊ីឱ្យបង្កើតច្រករបៀងជម្លៀសខ្លួនមួយដើម្បីជួយជនស៊ីវិលឱ្យចាកចេញពីរោងចក្រនោះ ដោយសារតែស្ពានទាំងអស់ដែលភ្ជាប់ទីក្រុង Sievierodonetsk ទៅកាន់ដែនដីដែលអ៊ុយក្រែនកាន់កាប់នៅពេលឥឡូវនេះត្រូវបានបំផ្លាញ។ នេះបើយោងតាមទីភ្នាក់ងារព័ត៌មាន Reuters។
លោកស្រី Ursula von der Leyen ប្រធានគណៈកម្មាការអឺរ៉ុបនៃសហភាពអឺរ៉ុប បាននិយាយនៅថ្ងៃអង្គារថា សហភាពអឺរ៉ុបចង់ពង្រឹងកិច្ចសហប្រតិបត្តិការថាមពលរបស់ខ្លួនជាមួយនឹងប្រទេសអ៊ីស្រាអែល ដោយសារតែរុស្ស៊ីបានប្រើការផ្គត់ផ្គត់ឧស្ម័នដើម្បី «គំរាមរកប្រយោជន៍»ពីបណ្ដាប្រទេសជាសមាជិកសហភាពអឺរ៉ុបទាក់ទិននឹងសង្គ្រាមនៅអ៊ុយក្រែន។ លោកស្រីបានបញ្ជាក់នៅក្នុងសុន្ទរកថាមួយនៅឯសាកលវិទ្យាល័យ Ben Gurion នៅក្នុងទីក្រុង Beersheba នៅភាគខាងត្បូងប្រទេសអ៊ីស្រាអែលថា៖ «រដ្ឋាភិបាលរុស្ស៊ីបានប្រើការពឹងផ្អែករបស់យើងលើឥន្ធនៈផូស៊ីលរបស់រុស្ស៊ីដើម្បីគំរាមរកប្រយោជន៍ពីយើង»។ លោកស្រីបានបន្ថែមថា៖ «តាំងពីសង្គ្រាមបានចាប់ផ្ដើមមក រុស្ស៊ីបានកាត់ផ្ដាច់ដោយចេតនានូវការផ្គត់ផ្គង់ឧស្ម័នរបស់ខ្លួនទៅឱ្យប្រទេសប៉ូ ឡូញ ប៊ុលហ្គារីនិងហ្វាំងឡង់ និងទៅឱ្យក្រុមហ៊ុនរបស់ប្រទេសហូឡង់និងដាណឺម៉ាក ដើម្បីជាការសងសឹកជាមួយនឹងការគាំទ្ររបស់យើងចំពោះប្រទេសអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។

ផ្សែងហុយចេញពីទីក្រុង Sievierodonetsk នៅប៉ែកខាងកើតអ៊ុយក្រែន ក្នុងតំបន់ Donbas ថ្ងៃទី ១៣ ខែមិថុនា ឆ្នាំ២០២២។

សម្ដេចប៉ាប Francis បានបញ្ជាក់នៅក្នុងសារមួយដែលបានចេញផ្សាយនៅថ្ងៃអង្គារថា ការឈ្លានពានលើប្រទេសអ៊ុយក្រែនគឺជាការរំលោភលើសិទ្ធិស្វ័យសម្រេចរបស់ប្រ ទេសមួយ។ ព្រះអង្គបានថ្លែងអំពីសង្គ្រាមនៅអ៊ុយក្រែននេះនៅក្នុងសារមួយសម្រាប់ទិវាជនក្រីក្រពិភពលោករបស់ព្រះវិហារគ្រិស្តសាសនារ៉ូម៉ាំងកាតូលិក ដែលទិវានេះនឹងប្រារព្ធធ្វើឡើងនៅខែវិច្ឆិកាខាងមុខ។ ព្រះអង្គបានលើកឡើងនៅក្នុងសារនោះថា៖ «សង្គ្រាមនៅអ៊ុយក្រែនឥឡូវនេះត្រូវបានបញ្ចូលទៅក្នុងសង្គ្រាមតំបន់ដែលអស់រយៈ ពេលជាច្រើនឆ្នាំកន្លងមកបានបង្កឱ្យមានការការស្លាប់និងការបំផ្លិចបំផ្លាញយ៉ាងធ្ងន់ ធ្ងរ»។ ព្រះអង្គបានបន្ថែមថា៖ «ប៉ុន្តែស្ថានការណ៍សង្គ្រាមនៅក្នុងប្រទេសអ៊ុយក្រែនគឺមានភាពស្មុគស្មាញជាងដោយសារតែការធ្វើអន្តរាគមន៍ដោយផ្ទាល់របស់ «ប្រទេសមហាអំណាច» មួយក្នុងគោលបំណងធ្វើតាមឆន្ទៈរបស់ខ្លួនដោយរំលោភលើគោល ការណ៍ស្វ័យសម្រេចរបស់ប្រជាពលរដ្ឋ»។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បានប្រាប់អ្នកសារព័ត៌មានដាណឺម៉ាកនៅថ្ងៃអង្គារថា យោធាអ៊ុយក្រែនមានគ្រាប់រំសេវនិងអាវុធគ្រប់គ្រាន់ហើយ ប៉ុន្តែត្រូវការអាវុធដែលបាញ់បានចម្ងាយឆ្ងាយបន្ថែមទៀត។ លោក Zelenskyy បានថ្លែងនៅក្នុងសន្និសីទកាសែតតាមអនឡាញមួយដែលរៀបចំឡើងដោយក្រុមហ៊ុនប្រព័ន្ធផ្សព្វផ្សាយ Berlingske Media របស់ប្រទេសដាណឺម៉ាកថា៖ «យើងមានអាវុធគ្រប់គ្រាន់ហើយ។ អ្វីដែលយើងមិនមានគ្រប់គ្រាន់គឺអាវុធដែលអាចបាញ់បានចម្ងាយដែលយើងត្រូវការដើម្បីកាត់បន្ថយឥទ្ធិពលមានប្រៀបនៃអាវុធរបស់រុស្ស៊ី»។ នេះបើយោងតាមទីភ្នាក់ងារព័ត៌មាន Reuters។
ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីយប់ថ្ងៃចន្ទថា ការប្រយុទ្ធដើម្បីតំបន់ Donbas ក្នុងប្រទេសអ៊ុយក្រែន «នឹងត្រូវបានចារយ៉ាងពិតប្រាកដនៅក្នុងប្រវត្តិសាស្ត្រយោធាថាជាការប្រយុទ្ធដ៏ហិង្សាបំផុតមួយនៅទ្វីបអឺរ៉ុប។ ...សម្រាប់យើង ផលវិបាកនៃការប្រយុទ្ធនេះគឺធំធេងបំផុត។ វាគួរឱ្យខ្លាច»។ លោកបានអំពាវនាវជាថ្មីម្ដងទៀតឱ្យបណ្ដាប្រទេសដៃគូនានាបញ្ជូនកាំភ្លើងធំទំនើបឱ្យអ៊ុយ ក្រែនដើម្បីប្រើប្រឆាំងនឹងកងទ័ពរុស្ស៊ី។
រដ្ឋាភិបាលរុស្ស៊ីបានបញ្ជាក់កាលពីថ្ងៃចន្ទម្សិលមិញថា គោលបំណងចម្បងរបស់ប្រតិ បត្តិការយោធារបស់រុស្ស៊ីនៅក្នុងប្រទេសអ៊ុយក្រែនគឺដើម្បីការពារសាធារណរដ្ឋប្រជា មានិត Donetsk និងសាធារណរដ្ឋប្រជាមានិតLuhansk ដែលជាតំបន់ផ្ដាច់ខ្លួន។ រដ្ឋា ភិបាលរុស្ស៊ីបញ្ជាក់ដូច្នេះ បន្ទាប់ពីមេដឹកនាំនៃតំបន់ផ្ដាច់ខ្លួនមួយក្នុងចំណោមតំបន់ផ្ដាច់ខ្លួនទាំងពីរស្នើសុំកម្លាំងបន្ថែមទៀតពីរដ្ឋាភិបាលរុស្ស៊ី។ នេះបើយោងតាមទីភ្នាក់ងារព័ត៌មាន Reuters។

២០:៤៣ ១៥.៦.២០២២

ថ្ងៃពុធ ទី ១៥ ខែមិថុនា៖

គណៈកម្មការអង្គការសហប្រជាជាតិទទួលបន្ទុកកិច្ចការប្រទេសអ៊ុយក្រែនបានបញ្ជាក់អះអាងនៅថ្ងៃពុធនេះថាខ្លួនបានទទួលពាក្យបណ្ដឹងចោទប្រកាន់ជាច្រើនអំពីការរំលោភបំពានសិទ្ធិដែលប្រព្រឹត្តឡើងដោយកងទ័ពរុស្ស៊ី ប៉ុន្តែបានលើកឡើងថាវាហាក់ដូចជាឆាប់ពេកនៅក្នុងការចាត់ទុកការរំលោភបំពានសិទ្ធិទាំងនោះថាជាឧក្រិដ្ឋកម្មសង្គ្រាមឬក៏យ៉ាងណានោះ។ លោក Erik Mose ដែលជាប្រធានគណៈកម្មការនេះ បានបញ្ជាក់នៅក្នុងសន្និសីទសារព័ត៌មានមួយក្នុងរដ្ឋធានីកៀវ ប្រទេសអ៊ុយក្រែនថា៖ «នៅក្នុងក្រុង Bucha និងក្រុង Irpin [នៃប្រទេសអ៊ុយក្រែន] គណៈកម្មការបានទទួលព័ត៌មានអំពីការសម្លាប់ជនស៊ីវិលតាមទំនើងចិត្ត ការបំផ្លិចបំផ្លាញនិងការលួចប្លន់ទ្រព្យសម្បត្តិ និងការវាយប្រហារលើហេដ្ឋារចនាសម្ព័ន្ធស៊ីវិលដូចជាសាលារៀនជាដើម»។ ប៉ុន្តែលោកបាននិយាយថា អង្គការសហប្រជាជាតិ «នៅក្នុងដំណាក់កាលនេះមិនទាន់ស្ថិតក្នុងជំហរ» ដែលអាចបញ្ជាក់អំពីចរិតលក្ខណៈតាមផ្លូវច្បាប់ពេញលេញអំពីព្រឹត្តិការណ៍ដែលបានកើតឡើងនៅជិតរដ្ឋធានីកៀវកាលពីខែមីនាកន្លងទៅនេះបានទេ។ នេះបើយោងតាមទីភ្នាក់ងារព័ត៌មាន AFP។

ក្រុមមន្ត្រីនៃប្រទេសជាសមាជិកអង្គការអូតង់ជួបពិភាក្សាគ្នាក្នុងកិច្ចប្រជុំក្រុម Ukraine Defence Contact នៅទីស្នាក់ការអង្គការអូតង់ក្នុងទីក្រុងព្រុចសែល ប្រទេសបែលហ្សិក ថ្ងៃទី ១៥ ខែមិថុនា ឆ្នាំ២០២២។ (REUTERS)

ប្រទេសអេហ្ស៊ីប អ៊ីស្រាអែល និងសហភាពអឺរ៉ុបនៅថ្ងៃពុធនេះបានចុះហត្ថលេខាលើកិច្ចព្រមព្រៀងមួយដើម្បីបង្កើនការលក់ឧស្ម័នធម្មជាតិរាវទៅឱ្យបណ្ដាប្រទេសជាសមាជិកសហភាពអឺរ៉ុបណាដែលមានបំណងកាត់បន្ថយការពឹងផ្អែករបស់ខ្លួនលើការផ្គត់ផ្គង់ពីរុស្ស៊ី ស្របពេលដែលសង្គ្រាមនៅក្នុងប្រទេសអ៊ុយក្រែនកំពុងអូសបន្លាយជាបន្ត។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Associated Press។
រដ្ឋាភិបាលរុស្ស៊ីបានបញ្ជាក់នៅថ្ងៃពុធនេះថា ក្រុមបស្ចិមប្រទេសបាន «បាញ់ក្បាលខ្លួនឯង» ដោយការព្យាយាមដាក់កំហិតលើការនាំចូលថាមពលពីវាលប្រេងឥន្ធនៈនិងឧស្ម័ននៅតំបន់ Siberia ប្រទេសរុស្ស៊ីដោយសារតែរឿងសង្គ្រាមនៅអ៊ុយក្រែន ដែលករណីនេះគឺផ្ទុយពីប្រទេសចិនដែលបានបង្កើនការនាំចូលថាមពលពីរុស្ស៊ី។ អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បានប្រាប់អ្នកសារព័ត៌មានថា៖ «ការផ្គត់ផ្គង់ថាមពលបានកើនឡើងយ៉ាងទៀងទាត់ ដោយប្រទេសចិនដឹងថាខ្លួនចង់បានអ្វីនិងមិនបានបាញ់ជើងខ្លួនឯងនោះទេ។ ចំណែកឯបណ្ដាប្រទេសដែលស្ថិតនៅទិសខាងលិចនៃប្រទេសរុស្ស៊ីវិញ ពួកគេបានបាញ់ក្បាលខ្លួនឯង»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីបានបញ្ជាក់នៅថ្ងៃពុធនេះថា ប្រធានាធិបតីរុស្ស៊ីលោក Vladimir Putin បានឯកភាពនៅក្នុងការសន្ទនាតាមទូរស័ព្ទជាមួយនឹងប្រធានាធិបតីចិនលោក Xi Jinping លើការពង្រីកកិច្ចសហប្រតិបត្តិការផ្នែកថាមពល ហិរញ្ញវត្ថុ និងឧស្សាហកម្ម ស្របពេលដែលរដ្ឋាភិបាលរុស្ស៊ីប្រឈមនឹងទណ្ឌកម្មមិនធ្លាប់មានពីមុនមករបស់ក្រុមបស្ចិមប្រទេសទាក់ទិននឹងរឿងអ៊ុយក្រែន។ រដ្ឋាភិបាលរុស្ស៊ីបានលើកឡើងដូច្នេះថា៖ «ដោយផ្ដោតលើស្ថានការណ៍សេដ្ឋកិច្ចសាកលលោកដែលកាន់តែស្មុគស្មាញឡើងដោយសារគោលនយោបាយដាក់ទណ្ឌកម្មខុសច្បាប់របស់ក្រុមបស្ចិមប្រទេស [រុស្ស៊ីនិងចិន] បានឯកភាពគ្នាលើការពង្រីកកិច្ចសហប្រតិបត្តិការផ្នែកថាមពល ហិរញ្ញវត្ថុ ឧស្សាហកម្ម ការដឹកជញ្ជូន និងផ្នែកផ្សេងៗទៀត»។ នេះបើយោងតាមទីភ្នាក់ងារព័ត៌មាន Reuters។
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បានជំរុញសម្ព័ន្ធមិត្តនៅថ្ងៃពុធនេះកុំឱ្យ «ថមថយកម្លាំង» នៅក្នុងការបញ្ជូនសព្វាវុធឱ្យប្រទេសអ៊ុយក្រែន។ លោក Austin ថ្លែងដូច្នេះ ស្របពេលដែលរដ្ឋាភិបាលអ៊ុយក្រែនបានអង្វរករជាខ្លាំងឱ្យមានការផ្ដល់អាវុធឱ្យបានច្រើនដល់អ៊ុយក្រែនដើម្បីទប់ទល់នឹងការឈ្លានពានរបស់រុស្ស៊ី។ លោក Austin បាននិយាយនៅ ក្នុងកិច្ចប្រជុំមួយក្នុងទីក្រុងព្រុចសែល ប្រទេសបែលហ្ស៊ិក ជាមួយនឹងប្រទេសប្រហែល ៥០ ដែលគាំទ្រប្រទេសអ៊ុយក្រែនថា៖ «យើងត្រូវតែបង្កើនការតាំងចិត្តរួមរបស់យើងចំពោះការការពារខ្លួនរបស់អ៊ុយក្រែន ហើយយើងត្រូវតែជំរុញខ្លួនយើងឱ្យកាន់តែខ្លាំងថែមទៀតដើម្បីធានាថាអ៊ុយក្រែនអាចការពារខ្លួនឯង ពលរដ្ឋរបស់ខ្លួន និងទឹកដីរបស់ខ្លួនបាន»។ នេះបើយោងតាមទីភ្នាក់ងារព័ត៌មាន AFP។
អគ្គលេខាធិការអង្គការអូតង់លោក Jens Stoltenberg បាននិយាយនៅថ្ងៃពុធថា បណ្ដាប្រទេសជាសមាជិកអង្គការអូតង់នឹងបន្តផ្គត់ផ្គង់សព្វាវុធធុនធ្ងន់និងប្រព័ន្ធអាវុធដែលបាញ់បានចម្ងាយឆ្ងាយដល់ប្រទេសអ៊ុយក្រែន និងថាលោករំពឹងថាបណ្ដាប្រទេសទាំងនោះនឹងឯកភាពគ្នាលើកញ្ចប់ជំនួយថ្មីសម្រាប់ប្រទេសអ៊ុយក្រែននៅឯកិច្ចប្រជុំរបស់អង្គការអូតង់។ លោក Stoltenberg ថ្លែងដូច្នេះថា៖ «យើងផ្ដោតយ៉ាងខ្លាំងលើការបង្កើនការគាំទ្រ [ចំពោះអ៊ុយក្រែន]»។ នេះបើយោងតាមទីភ្នាក់ងារព័ត៌មាន Reuters។

រូបថតពីលើអាកាសបង្ហាញពីផ្ទះសម្បែងដែលត្រូវបានបំផ្លិចបំផ្លាញក្នុងអំឡុងពេលនៃការវាយប្រហារតាមផ្លូវអាកាសក្នុងក្រុង Pryvillya នៅតំបន់ Donbas ដែលស្ថិតនៅប៉ែកខាងកើតប្រទេសអ៊ុយក្រែន ថ្ងៃទី១៤ ខែមិថុនា ឆ្នាំ២០២២។ (Photo by ARIS MESSINIS / AFP)

រដ្ឋាភិបាលអ៊ុយក្រែនបានបញ្ជាក់នៅថ្ងៃពុធថា អ៊ុយក្រែនមានអាវុធតិចជាងសត្រូវនិងបានអំពាវនាវឱ្យសម្ព័ន្ធមិត្តបស្ចិមប្រទេសផ្ដល់ជំនួយយោធាឱ្យបានច្រើនដើម្បីទប់ទល់នឹងការឈ្លានពានរបស់រុស្ស៊ី។ អ៊ុយក្រែនលើកឡើងដូច្នេះមុនពេលអង្គការអូតង់បើកកិច្ចប្រជុំនៅក្នុងប្រទេសបែលហ្ស៊ិកដើម្បីពិភាក្សាអំពីការផ្គត់ផ្គង់បន្ថែមដល់អ៊ុយក្រែន។ លោក Mykhaylo Podolyak ដែលជាទីប្រឹក្សារបស់ប្រធានាធិបតីអ៊ុយក្រែន បានសរសេរនៅលើបណ្ដាញសង្គមអនឡាញថា ទាហានអ៊ុយក្រែនបានសួរលោក «ជារៀងរាល់ថ្ងៃ» ថានៅពេលណាកាំភ្លើងធំរបស់បស្ចិមប្រទេសត្រូវបានបញ្ជូនទៅសមរភូមិមុខ។ លោក Podolyak បានបន្ថែមថា៖ «សហភាពអឺរ៉ុប! ពួកយើងកំពុងរង់ចាំការសម្រេចចិត្ត [របស់អ្នក]»។ នេះបើយោងតាមទីភ្នាក់ងារព័ត៌មាន AFP។
ប្រធានាធិបតីអ៊ុយក្រែនលោក Volodymyr Zelenskyy បានជំរុញសហភាពអឺរ៉ុបនៅថ្ងៃពុធឱ្យបន្តឹងទណ្ឌកម្មលើប្រទេសរុស្ស៊ី ដោយលោកបានព្រមានថាកងទ័ពរុស្ស៊ីអាចវាយប្រហារប្រទេសផ្សេងទៀតបន្ទាប់ពីបានឈ្លានពានប្រទេសរបស់លោករួចហើយ។ នៅក្នុងសុន្ទរកថាថ្លែងទៅកាន់សភាទាំងពីរថ្នាក់របស់ប្រទេសឆែកតាមរយៈវីដេអូអនឡាញ លោក Zelenskyy បានអំពាវនាវជាថ្មីឱ្យសហភាពអឺរ៉ុបអនុញ្ញាតឱ្យប្រទេសអ៊ុយក្រែនចាប់ផ្ដើមដំណើរការចូលជាសមាជិករបស់សហភាពអឺរ៉ុបតាមរយៈការផ្ដល់ឋានៈជាបេក្ខភាពដល់អ៊ុយក្រែន។ លោកបាននិយាយដូច្នេះថា៖ «ដូចកាលពីអតីតកាលដែរ ការឈ្លានពានរបស់រុស្ស៊ីលើអ៊ុយក្រែនគឺជាជំហានដំបូងដែលថ្នាក់ដឹកនាំរុស្ស៊ីត្រូវការដើម្បីបើកផ្លូវឆ្ពោះទៅរកប្រទេសផ្សេងទៀត ដើម្បីវាយដណ្ដើមគ្រប់គ្រងប្រជាពលរដ្ឋផ្សេងទៀត»។ នេះបើយោងតាមទីភ្នាក់ងារព័ត៌មាន Reuters។
រដ្ឋាភិបាលរុស្ស៊ីបានបញ្ជាក់នៅថ្ងៃពុធថា ការទាក់ទងគ្នាទៅវិញទៅមកនៅតែ «សំខាន់» នៅក្នុងទំនាក់ទំនងរវាងប្រទេសរុស្ស៊ីនិងសហរដ្ឋអាមេរិក។ រដ្ឋាភិបាលរុស្ស៊ីលើកឡើងដូច្នេះ នៅចំពេលដែលមានភាពតានតឹងទាក់ទិននឹងសង្គ្រាមជាបន្តរបស់រុស្ស៊ីនៅអ៊ុយក្រែន។ ប៉ុន្តែ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បានប្រាប់អ្នកសារព័ត៌មានតាមទូរស័ព្ទថា ការទាក់ទងគ្នាដូចនេះអាចធ្វើទៅបានតែក្នុងករណីដែលផ្អែកលើមូលដ្ឋាននៃការគោរពគ្នានិងផ្ដល់ប្រយោជន៍ឱ្យគ្នាទៅវិញទៅមកតែប៉ុណ្ណោះ។ នេះបើយោងតាមទីភ្នាក់ងារព័ត៌មាន Reuters។
អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បាននិយាយនៅថ្ងៃពុធនេះថា ការកាត់ទោសប្រហារជីវិតលើយុទ្ធជនបរទេសនៅក្នុងតំបន់ផ្ដាច់ខ្លួន Donetsk នៃប្រទេសអ៊ុយក្រែន ដែលជាតំបន់អះអាងដោយខ្លួនឯងថាជាសាធារណរដ្ឋប្រជាមានិត Donetsk នឹងបង្ហាញឱ្យឃើញជា «គំរូឱ្យបានច្បាស់សម្រាប់ទាហានស៊ីឈ្នួលផ្សេងទៀតដែលប្រយុទ្ធដើម្បីប្រទេសអ៊ុយក្រែន»។ យុទ្ធជនចក្រភពអង់គ្លេសពីរនាក់និងយុទ្ធជនម៉ារ៉ុកម្នាក់ដែលត្រូវបានរុស្ស៊ីចាប់ខ្លួននៅពេលយុទ្ធជនទាំងនោះរួមប្រយុទ្ធជាមួយនឹងកងទ័ពអ៊ុយក្រែនត្រូវបានអាជ្ញាធរតំបន់ Donetsk ដែលគាំទ្រដោយរុស្ស៊ី កាត់ទោសប្រហារជីវិតក្នុងឋានៈជាទាហានស៊ីឈ្នួលនៅក្នុងតំបន់ Donetsk កាលពីថ្ងៃទី ៩ ខែមិថុនា។ នេះបើយោងតាមទីភ្នាក់ងារព័ត៌មាន Reuters។

២០:៣៧ ១៦.៦.២០២២

ថ្ងៃព្រហស្បតិ៍ ទី ១៦ ខែមិថុនា៖

បណ្ដារដ្ឋមន្ត្រីការពារជាតិនៃប្រទេសជាសមាជិកអង្គការអូតង់បានជួបពិភាក្សាគ្នានៅថ្ងៃព្រហស្បតិ៍ដោយផ្តោតលើការពង្រឹងកម្លាំងនិងការពង្រឹងវិធីសាស្ត្រកម្លាំងសត្រូវនៅតាមបណ្ដោយព្រំដែនភាគខាងកើតរបស់អង្គការអូតង់ ដើម្បីបង្អាក់ទឹកចិត្តរបស់រុស្ស៊ីមិនឱ្យធ្វើការឈ្លានពានបន្ថែមទៀត។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មានAssociated Press។ កិច្ចពិភាក្សារបស់បណ្ដារដ្ឋមន្ត្រីការពារជាតិទាំងនេះបានធ្វើឡើង មុនពេលកិច្ចប្រជុំរបស់អង្គការអូតង់ចូលមកដល់នៅក្នុងទីក្រុងម៉ាឌ្រីដ ប្រទេសអេស្ប៉ាញ ពីថ្ងៃទី ២៩ ដល់ថ្ងៃទី៣០ ខែមិថុនាខាងមុខ ដែលកិច្ចប្រជុំនេះមានគោលបំណងកំណត់ទិសដៅឱ្យបានម៉ឺងម៉ាត់ សម្រាប់អង្គការអូតង់នៅក្នុងរយៈពេលប៉ុន្មានឆ្នាំខាងមុខ។
អនុរដ្ឋមន្ត្រីការពារជាតិអ៊ុយក្រែនលោកស្រី Hanna Malyar បាននិយាយនៅថ្ងៃព្រហស្បតិ៍ថា គោលបំណងយុទ្ធសាស្ត្ររបស់រុស្ស៊ីនៅក្នុងសង្គ្រាមនៅអ៊ុយក្រែនគឺការបំផ្លាញទាំងស្រុងនូវឋានៈជាប្រទេសឯករាជ្យរបស់អ៊ុយក្រែននិងប្រជាជាតិអ៊ុយក្រែន។ លោកស្រីបានបញ្ជាក់នៅក្នុងសន្និសីទកាសែតមួយថា ស្ថានការណ៍នៅតែពិបាកសម្រាប់កងទ័ពអ៊ុយក្រែន និងថាការផ្ដោតជាចម្បងរបស់រុស្ស៊ីនៅពេលឥឡូវនេះគឺការដណ្ដើមគ្រប់គ្រងឱ្យបានទាំងស្រុងលើតំបន់ Luhansk និងតំបន់ Donetsk នៅភាគខាងកើតប្រទេសអ៊ុយក្រែន។ លោកស្រីថ្លែងដូច្នេះថា៖ «គោលបំណងចម្បងរបស់រុស្ស៊ីផ្នែកយុទ្ធសាស្ត្រយោធានយោបាយ និងយោធាសេដ្ឋកិច្ចទាក់ទិននឹងប្រទេសរបស់យើងគឺមិនប្រែប្រួលនោះទេ ដែលនោះគឺការបំផ្លាញទាំងស្រុងលើឋានៈជាប្រទេសឯករាជ្យរបស់អ៊ុយក្រែននិងប្រជាជាតិអ៊ុយក្រែន ក៏ដូចជាការបំផ្លាញមូលដ្ឋានគ្រឹះយោធានិងសេដ្ឋកិច្ចរបស់ប្រទេសយើងផងដែរ»។ នេះបើយោងតាមទីភ្នាក់ងារព័ត៌មាន Reuters។
អធិការបតីអាល្លឺម៉ង់លោក Olaf Scholz បាននិយាយនៅថ្ងៃព្រហស្បតិ៍ក្នុងអំឡុងដំណើរទស្សនកិច្ចរបស់លោកទៅកាន់រដ្ឋធានីកៀវ ប្រទេសអ៊ុយក្រែនថា ប្រធានាធិបតីអ៊ុយក្រែនលោក Volodymyr Zelenskyy នឹងចូលរួមនៅក្នុងកិច្ចប្រជុំរបស់ក្រុមប្រទេសG-7នៅក្នុងខែនេះ។ លោក Scholz បានថ្លែងអំណរគុណលោកZelenskyyសម្រាប់ «ការទទួលយកការអញ្ជើញ» របស់លោក «នៅក្នុងការចូលរួមក្នុងកិច្ចប្រជុំរបស់ក្រុមប្រទេស G-7» ដែលនឹងធ្វើឡើងពីថ្ងៃទី ២៦ ដល់ថ្ងៃទី ២៨ ខែមិថុនាខាងមុខ នៅរមណីយដ្ឋាន Schloss Elmau នៅតំបន់ជួរភ្នំ Alpine នៃប្រទេសអាល្លឺម៉ង់។ គេរំពឹងថាលោក Zelenskyy នឹងចូលរួមនៅក្នុងកិច្ចប្រជុំនោះតាមអនឡាញ។ នេះបើយោងតាមទីភ្នាក់ងារព័ត៌មាន AFP។

នាយករដ្ឋមន្ត្រីអ៊ីតាលីលោក Mario Draghi ប្រធានាធិបតីអ៊ុយក្រែនលោក Volodymyr Zelenskyy ប្រធានាធិបតីបារាំងលោក Emmanuel Macron និងអធិការបតីអាល្លឺម៉ង់លោក Olaf Scholz ធ្វើសន្និសីទកាសែតរួមគ្នា នៅរដ្ឋធានីកៀវ ប្រទេសអ៊ុយក្រែន ថ្ងៃទី ១៦ ខែមិថុនា ឆ្នាំ ២០២២។

ប្រធានាធិបតីអ៊ុយក្រែនលោក Volodymyr Zelenskyy បានថ្លែងអំណរគុណមេដឹកនាំនៃប្រទេសបារាំង អាល្លឺម៉ង់ អ៊ីតាលី និងរូម៉ានី សម្រាប់ការបង្ហាញសាមគ្គីភាពជាមួយនឹងប្រទេសរបស់លោកតាមរយៈការធ្វើទស្សនកិច្ចទៅកាន់រដ្ឋធានីកៀវ ប្រទេសអ៊ុយក្រែន នៅថ្ងៃព្រហស្បតិ៍។ លោក Zelenskyy បានសរសេរតាម Telegram ថា៖ «យើងសូមវាយតម្លៃខ្ពស់ចំពោះសាមគ្គីភាពរបស់អ្នកជាមួយនឹងប្រទេសនិងប្រជាពលរដ្ឋរបស់យើង»។ នេះបើយោងតាមទីភ្នាក់ងារព័ត៌មាន Reuters។
លោក Andriy Yermak ប្រធានខុទ្ទកាល័យប្រធានាធិបតីអ៊ុយក្រែនបានបញ្ជាក់ថា រដ្ឋាភិបាលអ៊ុយក្រែនបានប្រគល់សំណើដាក់ទណ្ឌកម្មប្រឆាំងនឹងរុស្ស៊ីនៅឯការប្រជុំមួយរវាងប្រធានាធិបតីអ៊ុយក្រែនលោក Volodymyr Zelesnkyy ជាមួយនឹងមេដឹកនាំនៃប្រទេសបារាំង អាល្លឺម៉ង់ អ៊ីតាលី និងរូម៉ានីនៅក្នុងរដ្ឋធានីកៀវ ប្រទេសអ៊ុយក្រែន នៅថ្ងៃព្រហស្បតិ៍។ លោក Yermak បានសរសេរតាម Telegram ថា៖ «យើងត្រូវតែបង្កើនការដាក់សម្ពាធលើអ្នកគឃ្លើនឈ្លានពាន និងធ្វើការលើកញ្ចប់ទណ្ឌកម្មលើកទី៧ ដោយការហាមឃាត់លើការនាំចូលឧស្ម័ន [ពីរុស្ស៊ី]»។ នេះបើយោងតាមទីភ្នាក់ងារព័ត៌មាន Reuters។
ប្រធានក្រុមអ្នកចរចារបស់ប្រទេសរុស្ស៊ីលោក Vladimir Medinsky បាននិយាយនៅថ្ងៃព្រហស្បតិ៍ថា រដ្ឋាភិបាលរុស្ស៊ីត្រៀមខ្លួនរួចរាល់នៅក្នុងការចាប់ផ្ដើមការចរចាសន្តិភាពជាមួយនឹងប្រទេសអ៊ុយក្រែន ប៉ុន្តែមិនទាន់បានទទួលការឆ្លើយតបណាមួយចំពោះសំណើចុងក្រោយបង្អស់របស់ខ្លួននៅឡើយទេ។ លោក Medinsky ថា រដ្ឋាភិបាលអ៊ុយក្រែនគឺជាអ្នកដែលត្រូវរងការរិះគន់ដោយសារការធ្វើឱ្យយឺតយ៉ាវដល់ដំណើរវិវឌ្ឍនៃការចរចា។ ការចរចារវាងរុស្ស៊ីនិងអ៊ុយក្រែនបានជាប់គាំងតាំងពីខែមីនាមក។ នេះបើយោងតាមទីភ្នាក់ងារព័ត៌មាន Reuters ដែលយោងលើសេចក្ដីរាយការណ៍របស់ទីភ្នាក់ងារព័ត៌មាន Interfax របស់រុស្ស៊ី។
រដ្ឋាភិបាលរុស្ស៊ីបានព្រមាននៅថ្ងៃព្រហស្បតិ៍ប្រឆាំងនឹងការផ្គត់ផ្គង់សព្វាវុធថ្មីរបស់ក្រុមបស្ចិមប្រទេសដល់អ៊ុយក្រែន ស្របពេលដែលប្រធានាធិបតីបារាំងលោក Emmanuel Macron អធិការបតីអាល្លឺម៉ង់លោក Olaf Scholz និងនាយករដ្ឋមន្ត្រីអ៊ីតាលីលោក Mario Draghi ធ្វើដំណើរដល់រដ្ឋធានីកៀវ ប្រទេសអ៊ុយក្រែន។ អ្នកនាំពាក្យរដ្ឋាភិបាលរុស្ស៊ីលោក Dmitry Peskov បាននិយាយថា៖ «ខ្ញុំសង្ឃឹមថាមេដឹកនាំនៃប្រទេសទាំង ៣ នេះ និងប្រធានាធិបតីរូម៉ានី នឹងមិនផ្ដោតតែរឿងការគាំទ្រអ៊ុយក្រែនតាមរយៈការផ្គត់ផ្គង់សព្វាវុធបន្ថែមទៀតដល់អ៊ុយក្រែននោះឡើយ»។ លោកបានបន្ថែមថា៖ «ការធ្វើដូច្នេះគឺគ្មានប្រយោជន៍អ្វីទាល់តែសោះ ហើយនឹងបណ្ដាលឱ្យមានការខូចខាតបន្ថែមទៀតដល់ប្រទេសអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
ប្រភពខាងការទូតបារាំងបានបញ្ជាក់នៅថ្ងៃព្រហស្បតិ៍ថា ប្រទេសបារាំងចង់ឱ្យប្រទេសអ៊ុយក្រែនទទួលជោគជ័យផ្នែកយោធាលើប្រទេសរុស្ស៊ី ដែលអាចបង្កើតឡើងវិញនូវបូរណភាពទឹកដីរបស់អ៊ុយក្រែន ដែលក្នុងនោះរួមមានទាំងតំបន់ Crimea ដែលរុស្ស៊ីបានដណ្ដើមយកកាលពីឆ្នាំ ២០១៤ ផងដែរ។ ប្រភពនេះបានបន្ថែមថា វាអាស្រ័យលើប្រធានាធិបតីអ៊ុយក្រែនលោក Volodymyr Zelenskyy នៅក្នុងការកំណត់ថាតើជ័យជម្នះផ្នែកយោធាបែបណាដែលលោកចង់បាន។ នេះបើយោងតាមទីភ្នាក់ងារព័ត៌មាន Reuters។
នាយករដ្ឋមន្ត្រីអ៊ីតាលីលោក Mario Draghi បាននិយាយនៅថ្ងៃព្រហស្បតិ៍ថា ហេដ្ឋារចនាសម្ព័ន្ធរបស់ប្រទេសអ៊ុយក្រែនដែលរងការខូចខាតនិងបំផ្លាញដោយកងកម្លាំងឈ្លានពានរបស់រុស្ស៊ី នឹងត្រូវកសាងឡើងវិញ។ លោកថ្លែងដូច្នេះនៅពេលដែលលោកបានធ្វើទស្សនកិច្ចទៅកាន់តំបន់ជាយក្រុងមួយនៅក្រៅរដ្ឋធានីកៀវ ប្រទេសអ៊ុយក្រែន ដែលជាផ្នែកមួយនៃដំណើរទស្សនកិច្ចរបស់លោកជាមួយនឹងប្រធានាធិបតីបារាំងនិងអធិការបតីអាល្លឺម៉ង់។ លោក Draghi បានប្រាប់អ្នកសារព័ត៌មានថា៖ «យើងនឹងកសាងអ្វីៗទាំងអស់ឡើងវិញ។ កងទ័ពរុស្ស៊ីបានបំផ្លាញសាលាមត្តេយ្យ។ ពួកគេបានបំផ្លាញទីធ្លាក្មេងលេង។ អ្វីៗទាំងអស់នេះ នឹងត្រូវកសាងឡើងវិញ»។ នេះបើយោងតាមទីភ្នាកងារព័ត៌មាន AFP។
មេដឹកនាំមកពីប្រទេសអ៊ីតាលី បារាំង និងអាល្លឺម៉ង់បានធ្វើដំណើរទៅដល់រដ្ឋធានីកៀវ ប្រទេសអ៊ុយក្រែននៅថ្ងៃព្រហស្បតិ៍ ដើម្បីបង្ហាញការគាំទ្ររបស់ពួកគេចំពោះប្រទេសអ៊ុយក្រែន។ ទីភ្នាក់ងារព័ត៌មាន Associated Press បានរាយការណ៍ថា ប្រធានាធិបតីបារាំងលោក Emmanuel Macron អធិការបតីអាល្លឺម៉ង់លោក Olaf Scholz និងនាយករដ្ឋមន្ត្រីអ៊ីតាលីលោក Mario Draghi បានធ្វើដំណើរទៅកាន់រដ្ឋធានីកៀវទាំងអស់គ្នា ហើយប្រធានាធិបតីរូម៉ានីលោក Klaus lohannis នឹងចូលរួមជាមួយមេដឹកនាំទាំងបីនាក់នេះ នៅក្នុងរដ្ឋធានីកៀវ។ មេដឹកនាំទាំងបួនរូបនេះ គ្រោងនឹងជួបជាមួយនឹងប្រធានាធិបតីអ៊ុយក្រែនលោក Volodymyr Zelenskyy៕

២១:១៧ ១៧.៦.២០២២

ថ្ងៃសុក្រ ទី ១៧ ខែមិថុនា៖

គណៈកម្មការអឺរ៉ុបនៅថ្ងៃសុក្រនេះបានស្នើថា សហភាពអឺរ៉ុបដាក់ប្រទេសអ៊ុយក្រែនជាបេក្ខភាពដើម្បីចូលជាសមាជិករបស់ប្លុកនេះ។ នេះគឺជាសមិទ្ធផលមួយរបស់អ៊ុយក្រែន ដែលធ្លាប់ជាប្រទេសដើរតាមមាគ៌ារបស់សហភាពសូវៀត ឆ្ពោះទៅកាន់ប្រទេសដែលមានសេដ្ឋកិច្ចរីកចម្រើននៅក្នុងប្លុកពាណិជ្ជកម្មដ៏ធំបំផុតមួយក្នុងពិភពលោក។ រុស្ស៊ីដែលបានឈ្លានពានលើអ៊ុយក្រែនចាប់តាំងពីខែកុម្ភៈមក ច្បាស់ជាប្រឆាំងនឹងសំណើរបស់គណៈកម្មការអឺរ៉ុប ដោយចាត់ទុកអាកប្បកិរិយានេះ ថាជាការជ្រៀតជ្រែកលើតំបន់ដែលរុស្ស៊ីកំពុងមានឥទ្ធិពល បើទោះបីជាគេដឹងថាអ៊ុយក្រែនបានទទួលកិច្ចព្រមព្រៀងធ្វើពាណិជ្ជកម្មដោយសេរីជាមួយសហភាពអឺរ៉ុបហើយក្តី។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។ លោកស្រី Ursula von der Leyen ប្រធានគណៈកម្មការអឺរ៉ុប បានថ្លែងនៅក្នុងសិន្នសីទសារព័ត៌មានមួយ នៅក្នុងសម្លៀកបំពាក់ដែលមានពណ៌តំណាងឲ្យទង់ជាតិប្រទេសអ៊ុយក្រែនថា៖ «គណៈកម្មការណែនាំ...ឲ្យប្រទេសអ៊ុយក្រែនទទួលបានបេក្ខភាពជាសមាជិក។ អ៊ុយក្រែនបានបង្ហាញយ៉ាងច្បាស់ពីឆន្ទៈនិងការប្តេជ្ញាចិត្តរបស់ខ្លួន ក្នុងការដើរតាមគុណតម្លៃនិងស្តង់ដាររបស់អឺរ៉ុប»។
ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃសុក្រនេះ បានសរសើសេចក្តីសម្រេចចិត្តរបស់គណៈកម្មការអឺរ៉ុបដែលបានផ្តល់ការគាំទ្ររបស់ខ្លួនដល់អ៊ុយក្រែន ដើម្បីផ្តល់ឋានៈជាបេក្ខភាពដើម្បីចូលជាសមាជិកនៃសហភាពអឺរ៉ុប។ លោក Zelenskyy បានសរសេរនៅលើបណ្តាញសង្គមថា «នេះជាជំហានដំបូងដល់ដំណើរឆ្ពោះទៅការក្លាយជាសមាជិករបស់សហភាពអឺរ៉ុប ដែលនឹងនាំមកនូវជ័យជម្នះដល់យើងក្នុងពេលឆាប់ៗនេះ» ។ លោកបានបន្ថែមទៀតថា លោកពិតជា «ដឹងគុណ» ដល់លោកស្រី Ursula von der Leyen ប្រធានគណៈកម្មការអឺរ៉ុប និង «សមាជិកសហភាពអឺរ៉ុបគ្រប់គ្នាសម្រាប់សេចក្តីសម្រេចចិត្តជាប្រវត្តិសាស្ត្រនេះ»។ នេះបើយោងតាមទីភ្នាក់ងារព័ត៌មាន AFP។
ប្រធានាធិបតីអ៊ុយក្រែនលោក Volodymyr Zelenskyy បានប្រកាសនៅថ្ងៃសុក្រនេះថា រដ្ឋាភិបាលអ៊ុយក្រែនគ្រោងបង្កើតកម្មវិធីផ្តល់ទិដ្ឋការដល់ជនជាតិរុស្ស៊ី ចាប់ពីថ្ងៃទី ១ ខែកក្កដាតទៅ។ សេចក្តីប្រកាសនេះធ្វើឡើង ខណៈការឈ្លានពានរបស់រុស្ស៊ីទៅលើប្រទេសអ៊ុយក្រែនកំពុងឈានចូលដល់រយៈពេល ៤ខែហើយ។ លោក Zelenskyy បានសរសេរនៅលើគណនីយ Telegram របស់លោកថា «អ៊ុយក្រែននឹងបង្កើតគម្រោងទិដ្ឋាការដល់ប្រជាជននៃសហព័ន្ធរុស្ស៊ី»។ លោកបានថ្លែងថា លក្ខខណ្ឌសម្រាប់ទិដ្ឋាការនេះនឹងចូលជាធរមាននៅថ្ងៃទី «១ ខែកក្កដា ឆ្នាំ២០២២» ខាងមុខនេះ។ នេះបើយោងតាមសេចក្តីសម្រេចរបស់រដ្ឋាភិបាលអ៊ុយក្រែន ដែលលោករំពឹងនឹងចេញផ្សាយនៅ«ថ្ងៃនេះ»។ នេះបើយោងតាមទីភ្នាក់ងារព័ត៌មាន AFP។
កងកម្លាំងយោធាអ៊ុយក្រែនបានឲ្យដឹងនៅថ្ងៃសុក្រថា ពួកគេបានបាញ់មីស៊ីល Harpoonពីរគ្រាប់ ត្រូវចំនាវាសណ្តោង Vasiliy Bekh របស់កងទ័ពជើងទឹករុស្ស៊ី នៅតំបន់សមុទ្រខ្មៅនៅថ្ងៃសុក្រនេះ។ នេះជាលើកដំបូងដែលអ៊ុយក្រែនបានអះអាងថា ខ្លួនបានវាយប្រហារលើនាវារុស្ស៊ី ដោយប្រើប្រាស់រុកក្កែតសម្រាប់បាញ់នាវាដែលអ៊ុយក្រែនទទួលបានពីការផ្គត់ផ្គង់សព្វាវុធរបស់បស្ចិមប្រទេសនោះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។ ក្រុមប្រឹក្សាបណ្តាញផ្សព្វផ្សាយយុទ្ធសាស្ត្រប្រចាំកងយោធពលអ៊ុយក្រែន បានផ្សព្វផ្សាយព័ត៌មាននេះនៅតាមបណ្តាញ Telegram ជាមួយនឹងវីដេអូមួយដែលបង្ហាញពីសកម្មភាពវាយប្រហារតាមអាកាសនោះ។ ទីភ្នាក់ងារព័ត៌មាន Reuters មិនអាចបញ្ជាក់ផ្ទៀងផ្ទាត់ពីភាពច្បាស់លាស់នៃវីដេអូនោះបាននៅឡើយទេ។

ផ្សែងនិងធូលីដីបានហ៊ុយឡើងនៅកណ្តាលទីក្រុង Severodonetsk នៅក្នុងតំបន់ Donbas ភាគខាងកើតប្រទេសអ៊ុយក្រែន ខណៈការឈ្លានពានរបស់រុស្ស៊ីលើអ៊ុយក្រែនឈានចូលដល់រយៈពេលបួនខែ នៅថ្ងៃទី ១៧ ខែមិថុនា ឆ្នាំ ២០២២។

មនុស្សយ៉ាងតិច ២ នាក់ត្រូវបានសម្លាប់ ហើយ ២០ នាក់ផ្សេងទៀតបានទទួលរងរបួស នៅក្នុងការវាយប្រហាររបស់រុស្ស៊ី លើតំបន់លំនៅដ្ឋានមួយកន្លែងនៅទីក្រុង Mykolaive ភាគខាងត្បូងប្រទេសអ៊ុយក្រែន។ នេះបើយោងតាមការអះអាងរបស់អភិបាលក្រុងនៅថ្ងៃសុក្រនេះ។ លោក Vitaliy Kim បានសរសេរនៅលើបណ្តាញសង្គមថា៖ «ការបាញ់រុកក្កែតមួយលើតំបន់ទីប្រជុំជនបានសម្លាប់មនុស្ស ២ នាក់ ហើយ ២០ នាក់ទៀត រងរបួស»។ លោកក៏បានលើកឡើងផងដែរថា ក្នុងចំណោមអ្នករងរបួស ក៏មានកុមារម្នាក់ផងដែរ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
រដ្ឋាភិបាលរុស្ស៊ីបានឲ្យដឹងនៅថ្ងៃសុក្រនេះថា គោលបំណងនៃ«ប្រតិបត្តិការយោធាពិសេស» របស់ខ្លួននៅក្នុងប្រទេសអ៊ុយក្រែន នៅតែផ្តោតលើការការពារប្រជាជននៅក្នុងតំបន់ Donbas ភាគខាងកើតអ៊ុយក្រែនដដែល។ នៅក្នុងការសន្ទនាតាមទូរស័ព្ទជាមួយក្រុមអ្នកសារព័ត៌មាន លោក Dmitry Peskov អ្នកនាំពាក្យរដ្ឋាភិបាលក្រុងមូស្គូ បានថ្លែងថា គោលបំណងចម្បងរបស់រុស្ស៊ីនៅក្នុងប្រទេសអ៊ុយក្រែន គឺនៅតែផ្តោតលើការ «ជួយសង្គ្រោះនិងរក្សាការពារ» តំបន់ Donbas ពីសកម្មភាពដែលលោកបានហៅថា ជា «ការវាយប្រហារយ៉ាងឃោរឃៅ» ពីកងកម្លាំងយោធារបស់រដ្ឋាភិបាលអ៊ុយក្រែននោះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
រុស្ស៊ីនៅថ្ងៃសុក្រនេះបានឲ្យដឹងថា ទាហានបរទេសស៊ីឈ្នួលជិត ២.០០០ នាក់ ត្រូវបានសម្លាប់នៅក្នុងប្រទេសអ៊ុយក្រែន ចាប់តាំងពីការធ្វើប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន ដែលគាំទ្រដោយបស្ចិមប្រទេសនោះ។ ក្រសួងការពារជាតិរុស្ស៊ីបានថ្លែងនៅក្នុងសេចក្តីថ្លែងការណ៍មួយថា «ទាហានបរទេសស៊ីឈ្នួលនិងអ្នកជំនាញខាងអាវុធ» ចំនួន ៦.៩៥៦ នាក់មកពីប្រទេសចំនួន ៦៤ បានទៅដល់ប្រទេសអ៊ុយក្រែន ចាប់តាំងពីរុស្ស៊ីបានបង្កជម្លោះនៅទីនោះ ហើយថា «ពួកគេចំនួន ១.៩៥៦ នាក់ ត្រូវបានសម្លាប់» ហើយ ១.៧៧៩ នាក់ទៀត បានចាកចេញពីប្រទេសអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
អភិបាលតំបន់ Luhansk នៃប្រទេសអ៊ុយក្រែន បានថ្លែងឲ្យដឹងនៅថ្ងៃសុក្រនេះថា ការជម្លៀសជនស៊ីវិលចំនួន ៥៦៨ នាក់ដែលកំពុងលាក់ខ្លួនដើម្បីសុវត្ថិភាពនៅក្នុងរោងចក្រ Azot ដែលស្ថិតនៅក្នុងទីក្រុង Sievierodonetsk ដែលកំពុងមានប្រយុទ្ធគ្នានោះ គឺមិនអាចធ្វើទៅរួចទេនាពេលបច្ចុប្បន្ននេះ ដោយសារតែការវាយប្រយុទ្ធគ្នានិងការបាញ់ផ្លោងយ៉ាងខ្លាំងនៅតំបន់នេះ។ នៅក្នុងសារតាម Telegram អភិបាលតំបន់រូបនេះ បានឲ្យដឹងថា កុមារចំនួន ៣៨ នាក់ កំពុងលាក់ខ្លួនដើម្បីសុវត្ថិភាពនៅរោងចក្រនេះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
អង្គការសហប្រជាជាតិបានឲ្យដឹងនៅថ្ងៃសុក្រនេះថា ស្ថានភាពមនុស្សធម៌នៅភាគខាងកើតប្រទេសអ៊ុយក្រែន មានលក្ខណៈ«គួរឲ្យភ័យរន្ធត់យ៉ាងខ្លាំង» និងបន្តយ៉ាប់យ៉ឺន ខណៈការឈ្លានពានរបស់រុស្ស៊ីលើអ៊ុយក្រែន បានឈានចូលដល់រយៈពេល ៤ ខែហើយនោះ។ ទីភ្នាក់ងារ OCHA ទទួលបន្ទុកផ្នែកមនុស្សធម៌ប្រចាំអង្គការសហប្រជាជាតិ បានថ្លែងនៅក្នុងសេចក្តីថ្លែងការណ៍មួយថា៖ «ជិតរយៈពេលបួនខែចាប់តាំងពីសង្គ្រាមនេះកើតឡើង ស្ថានភាពមនុស្សធម៌នៅទូទាំងប្រទេសអ៊ុយក្រែន ជាពិសេសនៅតំបន់ Donbas ភាគខាងកើតអ៊ុយក្រែន គួរឲ្យភ័យរន្ធត់យ៉ាងខ្លាំង ហើយបន្តយ៉ាប់យ៉ឺនទៅយ៉ាងឆាប់រហ័ស»។ សេចក្តីថ្លែងការណ៍នេះក៏បានឲ្យដឹងថា ស្ថានភាពនេះ«គួរឲ្យព្រួយបារម្ភនៅក្នុងទីក្រុង Severodonetsk និងតំបន់ក្បែរៗនោះ» ។ ទីក្រុងនេះស្ថិតនៅភាគខាងកើតប្រទេសអ៊ុយក្រែន ដោយមានការប្រយុទ្ធបង្ហូរឈាមគ្នាបន្តកើតឡើងជាច្រើនសប្តាហ៍មកហើយ។ នេះបើយោងតាមទីភ្នាក់ងារព័ត៌មាន AFP៕

ភ្ជាប់​ទៅ​គេហទំព័រ​ទាក់ទង

បណ្តាញ​សង្គម

LIVE BLOG: ព្រឹត្តិការណ៍ថ្មីៗអំពីការ​ឈ្លានពាន​របស់​រុស្ស៊ី​លើ​អ៊ុយក្រែន ៣ វិច្ឆិកា ២០២២

ថ្ងៃអង្គារ ទី ១៤ ខែមិថុនា៖

ថ្ងៃពុធ ទី ១៥ ខែមិថុនា៖

ថ្ងៃព្រហស្បតិ៍ ទី ១៦ ខែមិថុនា៖

ថ្ងៃសុក្រ ទី ១៧ ខែមិថុនា៖

ភ្ជាប់ទៅគេហទំព័រទាក់ទង

បណ្តាញសង្គម

LIVE BLOG: ព្រឹត្តិការណ៍ថ្មីៗអំពីការឈ្លានពានរបស់រុស្ស៊ីលើអ៊ុយក្រែន ៣ វិច្ឆិកា ២០២២