២១:៤០
២១.៦.២០២២
ថ្ងៃអង្គារ ទី២១ ខែមិថុនា៖
- អ៊ុយក្រែនបានឃុំខ្លួនមន្ត្រីរដ្ឋាភិបាលជាន់ខ្ពស់ និងមេដឹកនាំអាជីវកម្មម្នាក់ ដែលសង្ស័យថា ជាផ្នែកមួយនៃបណ្តាញចារកម្មរុស្ស៊ី។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters កាលពីថ្ងៃអង្គារ ដោយដកស្រង់ពីសេវាសន្តិសុខអ៊ុយក្រែន(SBU)។
- សេវាសន្តិសុខ (SBU) នេះមិនបានបញ្ចេញឈ្មោះជនសង្ស័យទាំងពីរនាក់នោះទេ ប៉ុន្តែបានបញ្ជាក់អត្តសញ្ញាណពួកគេថា ជាមន្ត្រីជាន់ខ្ពស់នៅក្នុងលេខាធិការដ្ឋានខុទ្ទការល័យគណៈរដ្ឋមន្ត្រី និងម្នាក់ទៀតជាប្រធាននាយកដ្ឋាននៅសភាពាណិជ្ជកម្ម និងឧស្សាហកម្ម ដែលជាក្រុមបញ្ចុះបញ្ចូលធុរកិច្ច។ សេវាសន្តិសុខនេះបានបញ្ជាក់នៅក្នុងសេចក្តីថ្លែងការណ៍មួយតាម Telegram ថា ខ្លួនបានអនុវត្ត «ប្រតិបត្តិការពិសេសពហុដំណាក់កាល» ដើម្បីបង្ក្រាបបណ្តាញចារកម្មរុស្ស៊ីដែលជាប់សង្ស័យនេះ។
- សម្ព័ន្ធមិត្តកំពូលមួយរូបរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន បានព្រមានប្រទេសលីទុយអានី កាលពីថ្ងៃអង្គារថា រុស្ស៊ីនឹងឆ្លើយតបទៅនឹងការបញ្ឈប់ការដឹកជញ្ជូនទំនិញ ដែលត្រូវបានដាក់ទណ្ឌកម្មពីសហភាពអឺរ៉ុប ទៅកាន់តំបន់ Kaliningrad តាមរបៀបដែលពលរដ្ឋនៃប្រទេសសមាជិកអង្គការអូតង់ និងសមាជិកសហភាពអឺរ៉ុបនឹងមានអារម្មណ៍ឈឺចាប់។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
- លោក Nikolai Patrushev អតីតភ្នាក់ងារចារកម្ម KGB ដែលបច្ចុប្បន្នជាលេខានៃក្រុមប្រឹក្សាសន្តិសុខរុស្ស៊ី បាននិយាយថា សកម្មភាព «អរិភាព» របស់ប្រទេសលីទុយអានី បានបង្ហាញថា រុស្ស៊ីមិនអាចជឿទុកចិត្តលើបស្ចិមប្រទេសបានទេ។
- អ៊ុយក្រែនកំពុងធ្វើការចរចា«ដ៏ស្មុគស្មាញ»ដើម្បីរំដោះកំពង់ផែរបស់ខ្លួនពីការបិទខ្ទប់ដោយកងទ័ពជើងទឹករុស្ស៊ី។ នេះបើតាមការថ្លែងរបស់ប្រធានាធិបតីអ៊ុយក្រែនលោក Volodymyr Zelenskyy បន្ទាប់ពីអ្នកការទូតកំពូលរបស់សហភាពអឺរ៉ុបបានចោទប្រកាន់រុស្ស៊ីថា បានប្រព្រឹត្ត «ឧក្រិដ្ឋកម្មសង្រ្គាមពិតប្រាកដ» ដោយការរារាំងការនាំចេញគ្រាប់ធញ្ញជាតិពីកំពង់ផែនានា។ នេះបើតាមសេចក្តី រាយការណ៍របស់វិទ្យុអឺរ៉ុបសេរី / វិទ្យុសេរីភាព។
- រូបភាពពីផ្កាយរណបបានបញ្ជាក់ការចោទប្រកាន់ថា រុស្ស៊ីកំពុងដឹកជញ្ជូនគ្រាប់ធញ្ញជាតិដ៏ច្រើនលួចពីអ៊ុយក្រែន យកទៅឲ្យរបបរបស់លោក Bashar al-Assad ក្នុងប្រទេសស៊ីរី។ វិទ្យុអឺរ៉ុបសេរី / សេវាវិទ្យុសេរីភាពអ៊ុយក្រែនបានចងក្រងឯកសារនៃការដឹកជញ្ជូនជាបន្តបន្ទាប់តាមរយៈផែធំបំផុតសម្រាប់ដឹកគ្រាប់ធញ្ញជាតិនៅតំបន់គ្រីមៀ ដែលកាន់កាប់ដោយរុស្ស៊ី ហើយបានបោះពុម្ពរបាយការណ៍ស៊ើបអង្កេតនេះ។
- អធិការបតីអាល្លឺម៉ង់លោក Olaf Scholz បាននិយាយថា អាល្លឺម៉ង់នឹងបញ្ជូនសព្វាវុធទៅអ៊ុយក្រែនលុះត្រាលែងត្រូវការ។ លោកបន្ថែមថា ចាប់តាំងពីលោកធ្វើដំណើរទៅកាន់ទីក្រុង Kyiv កាលពីសប្តាហ៍មុន វាបង្ហាញកាន់តែច្បាស់ថា អ៊ុយក្រែនជាផ្នែកមួយរបស់អឺរ៉ុប។ លោក Scholz បានគូសបញ្ជាក់នៅក្នុងព្រឹត្តិការណ៍មួយកាលពីថ្ងៃអង្គារថា អាល្លឺម៉ង់ឈរយ៉ាងម៉ឺងម៉ាត់ជាមួយប្រទេសលីទុយអានី និងសម្ព័ន្ធមិត្តភាគខាងកើតផ្សេងទៀតក្នុងការការពារលទ្ធិប្រជាធិបតេយ្យ និងសេរីភាព សិទ្ធិមនុស្ស និងសង្គមសេរី។
- ប្រទេសលីទុយអានីបានស្នើសុំការគាំទ្រផ្នែកហិរញ្ញវត្ថុបន្ថែមទៀតពីសហភាពអឺរ៉ុបដើម្បីដោះស្រាយបញ្ហាជនភៀសខ្លួនអ៊ុយក្រែន។ ប្រធានាធិបតីប្រទេសលីទុយអានី លោក Gitanas Nauseda បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា សហភាពអឺរ៉ុបត្រូវតែរួមចំណែកទទួលបន្ទុកហិរញ្ញវត្ថុ ដែលនៅពេលនេះ «ត្រូវបានចាយវាយពីថវិកាជាតិដោយមិនមានសមាមាត្រនឹងគ្នា។ សាមគ្គីភាពរបស់សហភាពអឺរ៉ុបមានសារៈសំខាន់ខ្លាំងណាស់ក្នុងការធានានូវការគាំទ្រត្រឹមត្រូវដល់ជនភៀសខ្លួនគេចចេញពីសង្គ្រាមនៅអ៊ុយក្រែន»។
- អ៊ុយក្រែនរាយការណ៍ឲ្យដឹងពីការវាយប្រហារយ៉ាងខ្លាំងកាលពីថ្ងៃអង្គារនៅក្នុងតំបន់ Sievierodonetsk ខណៈកងកម្លាំងរុស្ស៊ីជំរុញដើម្បីគ្រប់គ្រងទីក្រុងភាគខាងកើតនេះទាំងមូល។ អ្នកនាំពាក្យរបស់អគ្គសេនាធិការនៃកងកម្លាំងប្រដាប់អាវុធអ៊ុយក្រែនបាននិយាយនៅក្នុងសន្និសីទសារព័ត៌មានប្រចាំថ្ងៃថា ការប្រយុទ្ធគ្នានៅក្នុងទីក្រុង Sievierodonetsk មានភាពខ្លាំងក្លា ដោយប្រទេសរុស្ស៊ីបានធ្វើការវាយប្រហារតាមអាកាស និងបាញ់ផ្លោងទៅលើទីតាំងនានារបស់អ៊ុយក្រែន។
- អភិបាលក្រុង Luhansk លោក Serhiy Haidai បានរាយការណ៍ឲ្យដឹងពីការប្រយុទ្ធគ្នាយ៉ាងខ្លាំងនៅឯរោងចក្រគីមី Azot ក្នុងទីក្រុង Sievierodonetsk ជាកន្លែងដែលក្រុមយុទ្ធជនអ៊ុយក្រែន និងជនស៊ីវិលប្រហែល ៥០០ នាក់កំពុងជ្រកកោន។
- រដ្ឋមន្ត្រីការបរទេសរបស់ប្រទេសលុចសំបួបាននិយាយកាលពីថ្ងៃអង្គារថា បណ្តាប្រទេសនៅអឺរ៉ុបបានរួបរួមគ្នាក្នុងការគាំទ្រការផ្តល់ឋានៈជាបេក្ខភាពសមាជិកសហភាពអឺរ៉ុបដល់អ៊ុយក្រែន។ នេះបើយោងតាមទីភ្នាក់ងារសារព័ត៌មាន Reuters។
- មុនពេលកិច្ចប្រជុំជាមួយរដ្ឋមន្ត្រីសហភាពអឺរ៉ុបផ្សេងទៀត លោក Jean Asselborn បានប្រាប់អ្នកយកព័ត៌មានថា «យើងកំពុងធ្វើការឆ្ពោះទៅរកចំណុចដែលយើងប្រាប់លោក Putin ថា អ៊ុយក្រែនជាផ្នែកមួយរបស់សហភាពអឺរ៉ុប ហើយថា យើងក៏នឹងការពារតម្លៃដែលអ៊ុយក្រែនការពារផងដែរ»។
- ទិន្នន័យពីនិយតករសារគមនាគមន៍ Roskomnadzor របស់រដ្ឋាភិបាលរុស្ស៊ីបានបង្ហាញកាលពីថ្ងៃអង្គារថា គេហទំព័ររបស់កាសែតអង់គ្លេស The Telegraph ត្រូវបានបិទនៅក្នុងប្រទេសរុស្ស៊ី បន្ទាប់ពីមានការស្នើសុំពីអគ្គរដ្ឋអាជ្ញា។ នេះបើយោងតាមទីភ្នាក់ងារសារព័ត៌មាន Reuters។
- ជនជាតិអាមេរិកាំងពីរនាក់ដែលត្រូវបានចាប់ខ្លួនក្នុងប្រទេសអ៊ុយក្រែនបច្ចុប្បន្នកំពុងស្ថិតនៅក្នុងតំបន់ Donetsk ដែលគាំទ្រដោយរុស្ស៊ី។ នេះបើតាមទីភ្នាក់ងារសារព័ត៌មាន Reuters កាលពីថ្ងៃអង្គារ ដោយដកស្រង់ពីទីភ្នាក់ងារសារព័ត៌មាន Interfax។
- នាយករដ្ឋមន្ត្រីហ្សកហ្ស៊ី លោក Irakli Garibashvili បាននិយាយកាលពីថ្ងៃអង្គារថា ប្រទេសរបស់លោកប្តេជ្ញាចូលរួមជាសមាជិកអង្គការអូតង់ ប៉ុន្តែត្រូវតែដោះស្រាយបញ្ហាទឹកដីជាមួយរុស្ស៊ីជាមុនសិន។ នេះបើយោងតាមទីភ្នាក់ងារសារព័ត៌មាន Reuters។
- កងកម្លាំងអ៊ុយក្រែនកាលពីសប្តាហ៍មុនបានអះអាងពីការប្រើប្រាស់ដោយជោគជ័យជាលើកដំបូងនូវមីស៊ីល Harpoon ប្រឆាំងនាវា ផ្តល់ដោយបស្ចិមប្រទេសដើម្បីប្រយុទ្ធនឹងកងកម្លាំងរុស្ស៊ី។ នេះបើតាមផ្នែកស៊ើបការណ៍សម្ងាត់យោធារបស់់អង់គ្លេស។ ក្រសួងការពារជាតិអង់គ្លេសបានថ្លែងនៅក្នុងការធ្វើបច្ចុប្បន្នភាពតាមប្រព័ន្ធ Twitter ប្រចាំថ្ងៃរបស់ខ្លួនថា «គោលដៅនៃការវាយប្រហារគឺស្ទើរតែប្រាកដណាស់ គឺនាវាចម្បាំងរបស់កងទ័ពជើងទឹករុស្ស៊ី Spasatel Vasily Bekh ដែលកំពុងបញ្ជូនអាវុធ និងទាហានទៅកាន់កោះពស់ (Snake Island) នៅភាគពាយ័ព្យសមុទ្រខ្មៅ»៕
២២:០០
២០.៦.២០២២
ថ្ងៃចន្ទ ទី២០ ខែមិថុនា៖
- ប្រទេសរុស្ស៊ីនៅថ្ងៃចន្ទនេះបានចោទប្រកាន់សមាជិកមួយចំនួននៃក្រុមប្រទេស G-20 ដែលជាក្រុមប្រទេសសេដ្ឋកិច្ចធំៗនៅលើពិភពលោកថាបានធ្វើឱ្យកិច្ចប្រជុំមួយអំពីបញ្ហាសុខភាពសាកលលោកក្លាយទៅជារឿងនយោបាយ។ សង្គ្រាមនៅអ៊ុយក្រែនគឺចំណុចផ្ដោតនៃកិច្ចប្រជុំរបស់ក្រុមប្រទេស G-20 នៅក្នុងឆ្នាំនេះ។ លោក Oleg Salagay ដែលជាមន្ត្រីផ្នែកសុខាភិបាលរបស់ប្រទេសរុស្ស៊ីបានបញ្ជាក់នៅក្នុងកិច្ចប្រជុំរបស់បណ្ដារដ្ឋមន្ត្រីសុខាភិបាលនៃក្រុមប្រទេស G-20 នៅក្នុងទីក្រុង Yogyakarta ប្រទេសឥណ្ឌូណេស៊ីថា៖ «យើងស្នើសហសេវិករបស់យើងធ្វើយ៉ាងណាកុំឱ្យវេទិកាសុខភាពរបស់ក្រុមប្រទេស G-20 ក្លាយទៅជារឿងនយោបាយ និងធ្វើយ៉ាងណាស្ថិតនៅក្នុងរង្វង់អាណត្តិរបស់យើងនិងពិភាក្សាតែបញ្ហាសុខាភិបាលតែប៉ុណ្ណោះ»។
- អ្នកនាំពាក្យរដ្ឋាភិបាលអាល្លឺម៉ង់បាននិយាយនៅថ្ងៃចន្ទនេះថា ប្រទេសអាល្លឺម៉ង់រួមជាមួយនឹងរដ្ឋមន្ត្រីការបរទេសសហរដ្ឋអាមេរិកលោក Antony Blinken នឹងរៀបចំកិច្ចប្រជុំមួយអំពីវិបត្តិស្បៀងអាហារពិភពលោកដែលកំពុងលេចឡើងបណ្ដើរៗដោយសារសង្គ្រាមនៅក្នុងប្រទេសអ៊ុយក្រែន។ កិច្ចប្រជុំនេះនឹងធ្វើឡើងនៅថ្ងៃសុក្រខាងមុខក្រោមប្រធានបទ «សាមគ្គីភាពដើម្បីសន្តិសុខស្បៀងអាហារសាកលលោក»។ អ្នកនាំពាក្យរូបនោះបានបញ្ជាក់ថា៖ «រដ្ឋាភិបាលអាល្លឺម៉ង់មានការតាំងចិត្តជាពិសេសក្នុងឋានៈជាប្រធានក្រុមប្រទេស G-7 ដើម្បីស្វែងរកចម្លើយរួមចំពោះវិបត្តិភាពអត់ឃ្លាននៅលើពិភពលោកដែលកំពុងលេចឡើងបណ្ដើរៗដោយសារសង្គ្រាមនៃភាពគឃ្លើនរបស់រុស្ស៊ីប្រឆាំងនឹងអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់ប្រាប់សហភាពអាហ្វ្រិកនៅថ្ងៃចន្ទនេះថា ទ្វីបអាហ្វ្រិកត្រូវបានក្លាយជាចំណាប់ខ្មាំងរបស់ការឈ្លានពានរបស់រុស្ស៊ីលើអ៊ុយក្រែន ដោយសារតែការឈ្លានពានរបស់រុស្ស៊ីនេះបានធ្វើឱ្យមានបញ្ហាកង្វះស្បៀងអាហារកើតឡើងនិងការភ័យខ្លាចដែលថាវិបត្តិស្បៀងអាហារអាចកើតឡើងនៅទ្វីបអាហ្វ្រិក។ លោក Zelenskyy បានថ្លែងនៅក្នុងសុន្ទរកថាមួយទៅកាន់សហភាពអាហ្វ្រិកថា៖ «ជាការពិត ទ្វីបអាហ្វ្រិកគឺជាចំណាប់ខ្មាំង។ វាគឺជាចំណាប់ខ្មាំងរបស់ប្រទេសដែលធ្វើសង្គ្រាមប្រឆាំងនឹងប្រទេសអ៊ុយក្រែន»។ នៅក្នុងសុន្ទរកថានោះ លោក Zelenskyy ក៏បានរិះគន់ផងដែរលើប្រទេសរុស្ស៊ីថាជាអ្នករាំងខ្ទប់ការនាំចេញធញ្ញជាតិរបស់អ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសហុងគ្រីលោក Peter Szijjarto បាននិយាយនៅថ្ងៃចន្ទនេះថា ប្រទេសហុងគ្រីនឹងផ្ដល់ទឹកដីរបស់ខ្លួនជាផ្លូវដែលអាចទៅរួចមួយសម្រាប់ការនាំចេញធញ្ញជាតិរបស់ប្រទេសអ៊ុយក្រែន ដោយសារតែការនាំចេញធញ្ញជាតិនេះដែលតែងតែធ្វើឡើងតាមផ្លូវនៅសមុទ្រខ្មៅត្រូវបានបង្អាក់ដោយសារការឈ្លានពានរបស់រុស្ស៊ី។ លោក Szijjarto ដែលបានលើកសំណើនេះឡើងនៅឯកិច្ចប្រជុំមួយរបស់បណ្ដារដ្ឋមន្ត្រីការបរទេសសហភាពអឺរ៉ុប ក៏បានបញ្ជាក់ផងដែរថា លោករំពឹងថាការផ្គត់ផ្គង់ឧស្ម័នរបស់រុស្ស៊ីដល់ហុងគ្រីនឹងមិនមានការបង្អាក់នោះទេ។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសអាល្លឺម៉ង់អ្នកស្រី Annalena Baerbock បាននិយាយនៅថ្ងៃចន្ទនេះថា ប្រទេសអាល្លឺម៉ង់គាំទ្រប្រទេសប៉ូឡូញនិងប្រទេសរូម៉ានីនៅក្នុងការបត់បែនសម្រួលផ្លូវដែករបស់ខ្លួនដើម្បីអនុញ្ញាតឱ្យមានការនាំចេញធញ្ញជាតិរាប់លានតោនដែលជាប់គាំងនៅក្នុងប្រទេសអ៊ុយក្រែនដោយសារតែការរាំងខ្ទប់របស់រុស្ស៊ីនៅសមុទ្រ។ អ្នកស្រីបានបញ្ជាក់នៅពេលអ្នកស្រីធ្វើដំណើរទៅដល់កន្លែងប្រជុំរបស់បណ្ដារដ្ឋមន្ត្រីការបរទេសនៃសហភាពអឺរ៉ុបនៅក្នុងប្រទេសលុចសំបួថា៖ «ផ្លូវដែកចាំបាច់ត្រូវធ្វើទំនើបនីយកម្ម។ យើងត្រូវការទូរថភ្លើងដែលអាចដឹកអីវ៉ាន់បាន។ រដ្ឋាភិបាលអាល្លឺម៉ង់កំពុងធ្វើកិច្ចការនេះជាមួយនឹងភាគីផ្សេងទៀតជាច្រើន»។ នេះបើយោងតាមទីភ្នាក់ងារព័ត៌មាន Reuters។
- លោក Josep Borrell ប្រធានផ្នែកគោលនយោបាយការបរទេសសហភាពអឺរ៉ុប បាននិយាយនៅថ្ងៃចន្ទនេះថា ការរាំងខ្ទប់របស់រុស្ស៊ីលើការនាំចេញធញ្ញជាតិរាប់លានតោនរបស់អ៊ុយក្រែនគឺជាឧក្រិដ្ឋកម្មសង្គ្រាម។ លោកបានប្រាប់អ្នកសារព័ត៌មានថា៖ «យើងអំពាវនាវឱ្យរុស្ស៊ីបញ្ឈប់ការរាំងខ្ទប់កំពង់ផែ [របស់អ៊ុយក្រែន]។ ...វាជារឿងដែលមិនគួរឱ្យជឿ។ គេមិនអាចនឹកស្មានថាស្រូវសាឡីរាប់លានតោននៅតែជាប់គាំងនៅក្នុងប្រទេសអ៊ុយក្រែន នៅពេលដែលប្រជាពលរដ្ឋនៅក្នុងប្រទេសផ្សេងទៀតនៅលើពិភពលោកកំពុងរងគ្រោះដោយសារភាពអត់ឃ្លាន»។ លោកបានបញ្ជាក់នៅពេលធ្វើដំណើរទៅដល់កន្លែងប្រជុំរបស់បណ្ដារដ្ឋមន្ត្រីការបរទេសនៃសហភាពអឺរ៉ុបនៅក្នុងប្រទេសលុចសំបួថា៖ «នេះគឺជាឧក្រិដ្ឋកម្មសង្គ្រាមពិតប្រាកដ»។ នេះបើយោងតាមទីភ្នាក់ងារព័ត៌មាន Reuters។
- លោក Ben Stiller ដែលជាតួសម្ដែងនិងជាឯកអគ្គរដ្ឋទូតសុឆន្ទៈរបស់ឧត្តមស្នងការអង្គការសហប្រជាជាតិទទួលបន្ទុកកិច្ចការជនភៀសខ្លួន (UNHCR) បានស្ថិតនៅក្នុងប្រទេសអ៊ុយក្រែននៅថ្ងៃចន្ទនេះដែលជាទិវាជនភៀសខ្លួន។ លោកបាននិយាយដូច្នេះថា៖ «គ្មាននរណាម្នាក់ជ្រើសរើសយកការភៀសខ្លួនពីផ្ទះសម្បែងនោះទេ។ ការស្វែងរកសុវត្ថិភាពគឺជាសិទ្ធិ។ ហើយសិទ្ធិនេះចាំបាច់ត្រូវតែប្រកាន់ខ្ជាប់សម្រាប់មនុស្សគ្រប់គ្នា»។
- រដ្ឋាភិបាលអ៊ុយក្រែនបានបញ្ជាក់នៅថ្ងៃចន្ទនេះថា កងកម្លាំងរុស្ស៊ីបានបង្កើនការបាញ់ផ្លោងនៅក្នុងតំបន់ Kharkiv និងតំបន់ Donetsk ក្នុងប្រទេសអ៊ុយក្រែន។ រដ្ឋាភិបាលអ៊ុយក្រែនលើកឡើងដូច្នេះ បន្ទាប់ពីប្រធានាធិបតីអ៊ុយក្រែនលោក Volodymyr Zelenskyy បានព្រមានកាលពីយប់ថ្ងៃអាទិត្យថា ប្រទេសរុស្ស៊ីនឹងបង្កើនការវាយប្រហាររបស់ខ្លួននៅសប្ដាហ៍នេះនៅមុនពេលដែលសហភាពអឺរ៉ុបពិភាក្សាជាប្រវត្តិសាស្ត្រនៅថ្ងៃព្រហស្បតិ៍និងថ្ងៃសុក្រខាងមុខ អំពីការផ្ដល់ឋានៈជាបេក្ខភាពប្រទេសដល់អ៊ុយក្រែនសម្រាប់ការចូលជាសមាជិកនៅក្នុងសហភាពអឺរ៉ុប។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បានប្រមើលមើលថា ប្រទេសរុស្ស៊ីនឹងបង្កើនការវាយប្រហាររបស់ខ្លួននៅសប្ដាហ៍នេះ ស្របពេលដែលបណ្ដាមេដឹកនាំសហភាពអឺរ៉ុបពិចារណាអំពីកិច្ចប្រឹងប្រែងរបស់ប្រទេសអ៊ុយក្រែននៅក្នុងការចូលជាសមាជិកសហភាពអឺរ៉ុបនិងស្របពេលដែលរុស្ស៊ីបង្កើនយុទ្ធនាការរបស់ខ្លួនដើម្បីដណ្ដើមកាន់កាប់តំបន់ភាគខាងកើតប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ លោក Zelenskyy បានបញ្ជាក់នៅក្នុងសុន្ទរកថាជាវីដេអូកាលពីយប់ថ្ងៃអាទិត្យថា៖ «ជាការពិត នៅសប្ដាហ៍នេះយើងគួរតែរំពឹងថា រុស្ស៊ីនឹងបង្កើនសកម្មភាពអរិភាពរបស់ខ្លួន»។
២២:៣៥
១៩.៦.២០២២
ថ្ងៃអាទិត្យ ទី១៩ ខែមិថុនា៖
- វិទ្យុ RFE/RL រាយការណ៍ថា ទីប្រឹក្សារបស់រដ្ឋមន្ត្រីមហាផ្ទៃអ៊ុយក្រែន លោក Vadym Denysenko កាលពីថ្ងៃអាទិត្យ បានលើកឡើងពីហានិភ័យខ្ពស់នៅភាគខាងជើងនៃទីក្រុងធំទី២ របស់អ៊ុយក្រែនគឺ ទីក្រុង Kharkiv ខណៈដែលកងទ័ពរុស្ស៊ីព្យាយាមធ្វើឱ្យវាក្លាយជា «ទីក្រុងប្រយុទ្ធជួរមុខ» ម្តងទៀត។ លោក Vadym Denysenko បានប្រាប់ទូរទស្សន៍ជាតិអ៊ុយក្រែនថា កងកម្លាំងសត្រូវកំពុងព្យាយាមខិតជិតទីក្រុង Kharkiv នៅភាគឦសាននៃប្រទេសអ៊ុយក្រែន ដើម្បីបាញ់ផ្លោងទីក្រុងនោះ។ ប៉ុន្មានម៉ោងក្រោយការព្រមានរបស់លោក Vadym Denysenko ក្រសួងការពារជាតិរុស្ស៊ីបានអះអាងថា ខ្លួនបានវាយប្រហាររោងចក្រជួសជុលរថក្រោះនៅទីក្រុង Kharkiv ដោយប្រើមីស៊ីល Iskander ។ ការអះអាងនេះ មិនទាន់អាចត្រូវផ្ទៀងផ្ទាត់បានភ្លាមៗនៅឡើយទេ។
- រដ្ឋមន្ត្រីសេដ្ឋកិច្ចរបស់ប្រទេសអាល្លឺម៉ង់បាននិយាយថា ប្រទេសលោកនឹងកម្រិតការប្រើប្រាស់ឧស្ម័នសម្រាប់ផលិតកម្មអគ្គិសនី ចំពេលមានការព្រួយបារម្ភអំពីកង្វះខាតដែលអាចកើតមានដោយសារការកាត់បន្ថយការផ្គត់ផ្គង់ពីប្រទេសរុស្ស៊ី។ ប្រទេសអាល្លឺម៉ង់បាននឹងកំពុងព្យាយាមបំពេញកន្លែងផ្ទុកឧស្ម័នរបស់ខ្លួនៅមុនរដូវរងា នៅពេលដែលឧស្ម័នត្រូវការជាបន្ទាន់ដើម្បីធ្វើជាឥន្ធនៈសម្រាប់ម៉ាស៊ីនកម្តៅ។ រដ្ឋមន្ត្រីក្រសួងសេដ្ឋកិច្ចអាល្លឺម៉ង់ លោក Robert Habeck បាននិយាយថា ប្រទេសអាល្លឺម៉ង់នឹងព្យាយាមរំដោះស្ថានការណ៍នេះ ដោយបង្កើនការដុតធ្យូងថ្ម ដែលជាឥន្ធនៈហ្វូស៊ីលមានជាតិបំពុលខ្លាំងជាងឧស្ម័ន។ លោកបានពណ៌នាការផ្លាស់ប្តូរនេះថា «ជូរចត់ ប៉ុន្តែចាំបាច់ក្នុងស្ថានភាពនេះ»។
- រុស្ស៊ីបាននិយាយកាលពីថ្ងៃអាទិត្យថា ការវាយលុករបស់ខ្លួនលើទីក្រុង Sievierodonetsk នៅភាគខាងកើតអ៊ុយក្រែនកំពុងដំណើរការដោយជោគជ័យ បន្ទាប់ពីខ្លួនបានគ្រប់គ្រងសង្កាត់មួយនៅជាយក្រុងនោះ នេះបើតាមសម្តីអ្នកនាំពាក្យក្រសួងការពារជាតិរុស្ស៊ី លោក Igor Konashenkov ដែលបាននិយាយនៅក្នុងសេចក្តីថ្លែងការណ៍វីដេអូមួយ។
- លោកស្រី Hanna Zamazieva ប្រធានក្រុមប្រឹក្សាតំបន់ Mykolaiv និយាយថា ទីក្រុង Mykolaiv ត្រូវបានវាយប្រហារពីរដងកាលពីថ្ងៃសៅរ៍ទី១៨ ខែមិថុនា ហើយមនុស្ស ១៦ នាក់បានរងរបួស នេះបើតាមរបាយការណ៍របស់កាសែត Kyiv Independent។ កាសែតនេះក៏បានរាយការណ៍ផងដែរថា តំបន់ Bereznehuvatska តំបន់ Kutsurubska តំបន់ Halitsynivska និងបណ្តាតំបន់ Pervomaiska នៃភូមិភាគ (Oblast) នេះ ក៏បានរងការឆាបឆេះផងដែរ។ សរុបមក ជនស៊ីវិល ២៩៧ នាក់ដែលរងរបួសក្នុងការវាយប្រហាររបស់រុស្ស៊ីបច្ចុប្បន្នកំពុងត្រូវបានព្យាបាលនៅតាមបណ្តាមន្ទីរពេទ្យក្នុងទីក្រុង Mykolaiv។
- ទូរទស្សន៍ Al Jazeera រាយការណ៍ថា ប្រធានាធិបតីអ៊ុយក្រែន លោក Volodymyr Zelenskyy បានសន្យាថា នឹងយកមកវិញនូវផ្នែកខ្លះនៃអ៊ុយក្រែន ដែលបច្ចុប្បន្នគ្រប់គ្រងដោយទាហានរុស្ស៊ី។ លោកបាននិយាយថា អ៊ុយក្រែននឹងយក«អ្វីគ្រប់យ៉ាងដែលជាកម្មសិទ្ធិរបស់យើង»។
- កាសែត Washington Post រាយការណ៍ថា លោក Mykhailo Podolyak ទីប្រឹក្សាកំពូលម្នាក់របស់ប្រធានាធិបតីអ៊ុយក្រែន បានរិះគន់ប្រធានាធិបតីរុស្ស៊ី លោក Vladimir Putin យ៉ាងខ្លាំង បន្ទាប់ពីលោក Putin ថ្លែងសុន្ទរកថាកាលពីថ្ងៃសុក្រ។ លោក Putin បានហៅការដាក់ទណ្ឌកម្មរបស់លោកខាងលិចថា «ការធ្វេសប្រហែស និងឆ្កួត» ហើយបានការពារអ្វីដែលលោកបាននិយាយថាជា «ការសម្រេចចិត្តរបស់ប្រទេសអធិបតេយ្យមួយដោយផ្អែកលើសិទ្ធិការពារសន្តិសុខរបស់ខ្លួន»។ ជាការឆ្លើយតប លោក Mykhailo Podolyak បានហៅជម្លោះនេះថាជា «សង្រ្គាមស៊ីសាច់ហុតឈាម» ហើយថា រុស្ស៊ីបានប្រែត្រឡប់ «ចូលទៅក្នុងយុគមជ្ឈិមសម័យ» វិញ។
- ទីភ្នាក់ងារព័ត៌មាន Reuters បានរាយការណ៍ថា នាយកចារកម្មការពារជាតិរបស់ប្រទេសអ៊ុយក្រែន បាននិយាយថា ជនស៊ីវិលអ៊ុយក្រែន ៥ នាក់ត្រូវបានបញ្ជូនត្រឡប់មកវិញ នៅក្នុងការដោះដូរអ្នកទោសប្រាំនាក់ទៅវិញទៅមកជាមួយរុស្ស៊ី។ មិនមានការលើកឡើងថា តើ ជនជាតិរុស្ស៊ីដែលបានដោះដូរនោះជាអ្នកប្រយុទ្ធឬអត់ទេ។ ជនស៊ីវិលអ៊ុយក្រែន ៤នាក់ ក្នុងចំណោម ៥នាក់នោះ ត្រូវបានចាប់ជាឈ្លើយសឹក អំឡុងពេលដែលរុស្ស៊ី កាន់កាប់ផ្នែកខ្លះនៃទីក្រុងកៀវ ជាកន្លែងដែលកងកម្លាំងរុស្ស៊ីបានដកខ្លួនថយចេញ នៅចុងខែមីនា។
- វិទ្យាស្ថានសម្រាប់ការសិក្សាសង្គ្រាម ដែលជាស្ថាប័នស្រាវជ្រាវមួយរបស់សហរដ្ឋអាមេរិក បាននិយាយនៅក្នុងការវាយតម្លៃចុងក្រោយរបស់ខ្លួនថា រុស្ស៊ីបានវាយដណ្តើមយកបានតំបន់បន្តិចបន្តួចខ្លះទៀតនៅជិតទីក្រុង Severodonetsk ហើយទំនងអាចចូលទៅដល់តំបន់ Metolkine។ ការវាយតម្លៃនេះនិយាយថា រុស្ស៊ីកំពុងព្យាយាមបង្ខំទាហានអ៊ុយក្រែនចេញពីជួររង្វង់កាំភ្លើងធំដែលអាចបាញ់ដល់ខ្សែផ្លូវដែកជុំវិញទីក្រុង Kharkiv ។ រុស្ស៊ីកំពុងប្រើប្រាស់ខ្សែផ្លូវដែកទាំងនោះ ដើម្បីផ្គត់ផ្គង់កងទ័ពរបស់ខ្លួន។
- ទីភ្នាក់ងារព័ត៌មាន Reuters បានរាយការណ៍ថា អគ្គលេខាធិការអង្គការអូតង់ (NATO) លោក Jens Stoltenberg បាននិយាយកាលពីថ្ងៃអាទិត្យថា សង្រ្គាមនៅអ៊ុយក្រែនអាចអូសបន្លាយច្រើនឆ្នាំ ហើយកងកម្លាំងអ៊ុយក្រែនប្រឈមមុខនឹងការវាយលុករបស់រុស្ស៊ីកាន់តែខ្លាំង បន្ទាប់ពីនាយកប្រតិបត្តិសហភាពអឺរ៉ុប បានផ្តល់អនុសាសន៍ថាប្រទេសអ៊ុយក្រែន គួរតែត្រូវបានផ្តល់ឋានៈជាបេក្ខភាពដើម្បីចូលរួមក្នុងប្លុកនេះ។ លោក Stoltenberg ត្រូវបានកាសែត Bild am Sonntag របស់អាល្លឺម៉ង់ដកស្រង់សម្តីថា ការផ្គត់ផ្គង់សព្វាវុធទំនើបដល់កងទ័ពអ៊ុយក្រែននឹងបង្កើនឱកាសរំដោះតំបន់ Donbas ភាគខាងកើតអ៊ុយក្រែន ពីការគ្រប់គ្រងរបស់រុស្ស៊ី។
២១:១៧
១៧.៦.២០២២
ថ្ងៃសុក្រ ទី ១៧ ខែមិថុនា៖
- គណៈកម្មការអឺរ៉ុបនៅថ្ងៃសុក្រនេះបានស្នើថា សហភាពអឺរ៉ុបដាក់ប្រទេសអ៊ុយក្រែនជាបេក្ខភាពដើម្បីចូលជាសមាជិករបស់ប្លុកនេះ។ នេះគឺជាសមិទ្ធផលមួយរបស់អ៊ុយក្រែន ដែលធ្លាប់ជាប្រទេសដើរតាមមាគ៌ារបស់សហភាពសូវៀត ឆ្ពោះទៅកាន់ប្រទេសដែលមានសេដ្ឋកិច្ចរីកចម្រើននៅក្នុងប្លុកពាណិជ្ជកម្មដ៏ធំបំផុតមួយក្នុងពិភពលោក។ រុស្ស៊ីដែលបានឈ្លានពានលើអ៊ុយក្រែនចាប់តាំងពីខែកុម្ភៈមក ច្បាស់ជាប្រឆាំងនឹងសំណើរបស់គណៈកម្មការអឺរ៉ុប ដោយចាត់ទុកអាកប្បកិរិយានេះ ថាជាការជ្រៀតជ្រែកលើតំបន់ដែលរុស្ស៊ីកំពុងមានឥទ្ធិពល បើទោះបីជាគេដឹងថាអ៊ុយក្រែនបានទទួលកិច្ចព្រមព្រៀងធ្វើពាណិជ្ជកម្មដោយសេរីជាមួយសហភាពអឺរ៉ុបហើយក្តី។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។ លោកស្រី Ursula von der Leyen ប្រធានគណៈកម្មការអឺរ៉ុប បានថ្លែងនៅក្នុងសិន្នសីទសារព័ត៌មានមួយ នៅក្នុងសម្លៀកបំពាក់ដែលមានពណ៌តំណាងឲ្យទង់ជាតិប្រទេសអ៊ុយក្រែនថា៖ «គណៈកម្មការណែនាំ...ឲ្យប្រទេសអ៊ុយក្រែនទទួលបានបេក្ខភាពជាសមាជិក។ អ៊ុយក្រែនបានបង្ហាញយ៉ាងច្បាស់ពីឆន្ទៈនិងការប្តេជ្ញាចិត្តរបស់ខ្លួន ក្នុងការដើរតាមគុណតម្លៃនិងស្តង់ដាររបស់អឺរ៉ុប»។
- ប្រធានាធិបតីអ៊ុយក្រែនលោក Volodymyr Zelenskyy នៅថ្ងៃសុក្រនេះ បានសរសើសេចក្តីសម្រេចចិត្តរបស់គណៈកម្មការអឺរ៉ុបដែលបានផ្តល់ការគាំទ្ររបស់ខ្លួនដល់អ៊ុយក្រែន ដើម្បីផ្តល់ឋានៈជាបេក្ខភាពដើម្បីចូលជាសមាជិកនៃសហភាពអឺរ៉ុប។ លោក Zelenskyy បានសរសេរនៅលើបណ្តាញសង្គមថា «នេះជាជំហានដំបូងដល់ដំណើរឆ្ពោះទៅការក្លាយជាសមាជិករបស់សហភាពអឺរ៉ុប ដែលនឹងនាំមកនូវជ័យជម្នះដល់យើងក្នុងពេលឆាប់ៗនេះ» ។ លោកបានបន្ថែមទៀតថា លោកពិតជា «ដឹងគុណ» ដល់លោកស្រី Ursula von der Leyen ប្រធានគណៈកម្មការអឺរ៉ុប និង «សមាជិកសហភាពអឺរ៉ុបគ្រប់គ្នាសម្រាប់សេចក្តីសម្រេចចិត្តជាប្រវត្តិសាស្ត្រនេះ»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បានប្រកាសនៅថ្ងៃសុក្រនេះថា រដ្ឋាភិបាលអ៊ុយក្រែនគ្រោងបង្កើតកម្មវិធីផ្តល់ទិដ្ឋការដល់ជនជាតិរុស្ស៊ី ចាប់ពីថ្ងៃទី ១ ខែកក្កដាតទៅ។ សេចក្តីប្រកាសនេះធ្វើឡើង ខណៈការឈ្លានពានរបស់រុស្ស៊ីទៅលើប្រទេសអ៊ុយក្រែនកំពុងឈានចូលដល់រយៈពេល ៤ខែហើយ។ លោក Zelenskyy បានសរសេរនៅលើគណនីយ Telegram របស់លោកថា «អ៊ុយក្រែននឹងបង្កើតគម្រោងទិដ្ឋាការដល់ប្រជាជននៃសហព័ន្ធរុស្ស៊ី»។ លោកបានថ្លែងថា លក្ខខណ្ឌសម្រាប់ទិដ្ឋាការនេះនឹងចូលជាធរមាននៅថ្ងៃទី «១ ខែកក្កដា ឆ្នាំ២០២២» ខាងមុខនេះ។ នេះបើយោងតាមសេចក្តីសម្រេចរបស់រដ្ឋាភិបាលអ៊ុយក្រែន ដែលលោករំពឹងនឹងចេញផ្សាយនៅ«ថ្ងៃនេះ»។ នេះបើយោងតាមទីភ្នាក់ងារព័ត៌មាន AFP។
- កងកម្លាំងយោធាអ៊ុយក្រែនបានឲ្យដឹងនៅថ្ងៃសុក្រថា ពួកគេបានបាញ់មីស៊ីល Harpoonពីរគ្រាប់ ត្រូវចំនាវាសណ្តោង Vasiliy Bekh របស់កងទ័ពជើងទឹករុស្ស៊ី នៅតំបន់សមុទ្រខ្មៅនៅថ្ងៃសុក្រនេះ។ នេះជាលើកដំបូងដែលអ៊ុយក្រែនបានអះអាងថា ខ្លួនបានវាយប្រហារលើនាវារុស្ស៊ី ដោយប្រើប្រាស់រុកក្កែតសម្រាប់បាញ់នាវាដែលអ៊ុយក្រែនទទួលបានពីការផ្គត់ផ្គង់សព្វាវុធរបស់បស្ចិមប្រទេសនោះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។ ក្រុមប្រឹក្សាបណ្តាញផ្សព្វផ្សាយយុទ្ធសាស្ត្រប្រចាំកងយោធពលអ៊ុយក្រែន បានផ្សព្វផ្សាយព័ត៌មាននេះនៅតាមបណ្តាញ Telegram ជាមួយនឹងវីដេអូមួយដែលបង្ហាញពីសកម្មភាពវាយប្រហារតាមអាកាសនោះ។ ទីភ្នាក់ងារព័ត៌មាន Reuters មិនអាចបញ្ជាក់ផ្ទៀងផ្ទាត់ពីភាពច្បាស់លាស់នៃវីដេអូនោះបាននៅឡើយទេ។
- មនុស្សយ៉ាងតិច ២ នាក់ត្រូវបានសម្លាប់ ហើយ ២០ នាក់ផ្សេងទៀតបានទទួលរងរបួស នៅក្នុងការវាយប្រហាររបស់រុស្ស៊ី លើតំបន់លំនៅដ្ឋានមួយកន្លែងនៅទីក្រុង Mykolaive ភាគខាងត្បូងប្រទេសអ៊ុយក្រែន។ នេះបើយោងតាមការអះអាងរបស់អភិបាលក្រុងនៅថ្ងៃសុក្រនេះ។ លោក Vitaliy Kim បានសរសេរនៅលើបណ្តាញសង្គមថា៖ «ការបាញ់រុកក្កែតមួយលើតំបន់ទីប្រជុំជនបានសម្លាប់មនុស្ស ២ នាក់ ហើយ ២០ នាក់ទៀត រងរបួស»។ លោកក៏បានលើកឡើងផងដែរថា ក្នុងចំណោមអ្នករងរបួស ក៏មានកុមារម្នាក់ផងដែរ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
- រដ្ឋាភិបាលរុស្ស៊ីបានឲ្យដឹងនៅថ្ងៃសុក្រនេះថា គោលបំណងនៃ«ប្រតិបត្តិការយោធាពិសេស» របស់ខ្លួននៅក្នុងប្រទេសអ៊ុយក្រែន នៅតែផ្តោតលើការការពារប្រជាជននៅក្នុងតំបន់ Donbas ភាគខាងកើតអ៊ុយក្រែនដដែល។ នៅក្នុងការសន្ទនាតាមទូរស័ព្ទជាមួយក្រុមអ្នកសារព័ត៌មាន លោក Dmitry Peskov អ្នកនាំពាក្យរដ្ឋាភិបាលក្រុងមូស្គូ បានថ្លែងថា គោលបំណងចម្បងរបស់រុស្ស៊ីនៅក្នុងប្រទេសអ៊ុយក្រែន គឺនៅតែផ្តោតលើការ «ជួយសង្គ្រោះនិងរក្សាការពារ» តំបន់ Donbas ពីសកម្មភាពដែលលោកបានហៅថា ជា «ការវាយប្រហារយ៉ាងឃោរឃៅ» ពីកងកម្លាំងយោធារបស់រដ្ឋាភិបាលអ៊ុយក្រែននោះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
- រុស្ស៊ីនៅថ្ងៃសុក្រនេះបានឲ្យដឹងថា ទាហានបរទេសស៊ីឈ្នួលជិត ២.០០០ នាក់ ត្រូវបានសម្លាប់នៅក្នុងប្រទេសអ៊ុយក្រែន ចាប់តាំងពីការធ្វើប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន ដែលគាំទ្រដោយបស្ចិមប្រទេសនោះ។ ក្រសួងការពារជាតិរុស្ស៊ីបានថ្លែងនៅក្នុងសេចក្តីថ្លែងការណ៍មួយថា «ទាហានបរទេសស៊ីឈ្នួលនិងអ្នកជំនាញខាងអាវុធ» ចំនួន ៦.៩៥៦ នាក់មកពីប្រទេសចំនួន ៦៤ បានទៅដល់ប្រទេសអ៊ុយក្រែន ចាប់តាំងពីរុស្ស៊ីបានបង្កជម្លោះនៅទីនោះ ហើយថា «ពួកគេចំនួន ១.៩៥៦ នាក់ ត្រូវបានសម្លាប់» ហើយ ១.៧៧៩ នាក់ទៀត បានចាកចេញពីប្រទេសអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
- អភិបាលតំបន់ Luhansk នៃប្រទេសអ៊ុយក្រែន បានថ្លែងឲ្យដឹងនៅថ្ងៃសុក្រនេះថា ការជម្លៀសជនស៊ីវិលចំនួន ៥៦៨ នាក់ដែលកំពុងលាក់ខ្លួនដើម្បីសុវត្ថិភាពនៅក្នុងរោងចក្រ Azot ដែលស្ថិតនៅក្នុងទីក្រុង Sievierodonetsk ដែលកំពុងមានប្រយុទ្ធគ្នានោះ គឺមិនអាចធ្វើទៅរួចទេនាពេលបច្ចុប្បន្ននេះ ដោយសារតែការវាយប្រយុទ្ធគ្នានិងការបាញ់ផ្លោងយ៉ាងខ្លាំងនៅតំបន់នេះ។ នៅក្នុងសារតាម Telegram អភិបាលតំបន់រូបនេះ បានឲ្យដឹងថា កុមារចំនួន ៣៨ នាក់ កំពុងលាក់ខ្លួនដើម្បីសុវត្ថិភាពនៅរោងចក្រនេះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
- អង្គការសហប្រជាជាតិបានឲ្យដឹងនៅថ្ងៃសុក្រនេះថា ស្ថានភាពមនុស្សធម៌នៅភាគខាងកើតប្រទេសអ៊ុយក្រែន មានលក្ខណៈ«គួរឲ្យភ័យរន្ធត់យ៉ាងខ្លាំង» និងបន្តយ៉ាប់យ៉ឺន ខណៈការឈ្លានពានរបស់រុស្ស៊ីលើអ៊ុយក្រែន បានឈានចូលដល់រយៈពេល ៤ ខែហើយនោះ។ ទីភ្នាក់ងារ OCHA ទទួលបន្ទុកផ្នែកមនុស្សធម៌ប្រចាំអង្គការសហប្រជាជាតិ បានថ្លែងនៅក្នុងសេចក្តីថ្លែងការណ៍មួយថា៖ «ជិតរយៈពេលបួនខែចាប់តាំងពីសង្គ្រាមនេះកើតឡើង ស្ថានភាពមនុស្សធម៌នៅទូទាំងប្រទេសអ៊ុយក្រែន ជាពិសេសនៅតំបន់ Donbas ភាគខាងកើតអ៊ុយក្រែន គួរឲ្យភ័យរន្ធត់យ៉ាងខ្លាំង ហើយបន្តយ៉ាប់យ៉ឺនទៅយ៉ាងឆាប់រហ័ស»។ សេចក្តីថ្លែងការណ៍នេះក៏បានឲ្យដឹងថា ស្ថានភាពនេះ«គួរឲ្យព្រួយបារម្ភនៅក្នុងទីក្រុង Severodonetsk និងតំបន់ក្បែរៗនោះ» ។ ទីក្រុងនេះស្ថិតនៅភាគខាងកើតប្រទេសអ៊ុយក្រែន ដោយមានការប្រយុទ្ធបង្ហូរឈាមគ្នាបន្តកើតឡើងជាច្រើនសប្តាហ៍មកហើយ។ នេះបើយោងតាមទីភ្នាក់ងារព័ត៌មាន AFP៕