កាលពីថ្ងៃអាទិត្យម្សិលមិញ ប្រធានាធិបតីសហរដ្ឋអាមេរិកលោក Donald Trump បានព្រមានមេដឹកនាំកូរ៉េខាងជើងលោក Kim Jong Un ប្រឆាំងនឹងទង្វើបង្កហេតុបែបយោធារបស់ប្រទេសកូរ៉េខាងជើង នៅស្របពេលដែលរដ្ឋាភិបាលក្រុងព្យុងយ៉ាងបានប្រកាសថា ខ្លួនបានធ្វើ «ការសាកល្បងដ៏សំខាន់បំផុតមួយ» នៅកន្លែងបាញ់ផ្កាយរណបមួយកន្លែង។
លោក Trump បានបញ្ជាក់នៅលើ Twiiter ថា៖ «លោក Kim Jong Un ឆ្លាតជ្រុល ហើយនឹងបាត់បង់អ្វីៗទាំងអស់ ប្រសិនបើលោកធ្វើទង្វើបែបបង្កហេតុ»។
លោក Trump បានបន្ថែមថា៖ «លោក Kim Jong Un បានចុះហត្ថលេខាលើកិច្ចព្រមព្រៀងលុបបំបាត់នុយក្លេអ៊ែរដ៏សំខាន់មួយជាមួយនឹងខ្ញុំនៅក្នុងប្រទេសសិង្ហបុរី។ លោកមិនចង់បាត់បង់ទំនាក់ទំនងពិសេសរបស់លោកជាមួយនឹងប្រធានាធិបតីសហរដ្ឋអាមេរិក ឬក៏ជ្រៀតជ្រែកនៅក្នុងការបោះឆ្នោតប្រធានាធិបតីសហរដ្ឋអាមេរិកនៅខែវិច្ឆិកាឆ្នាំក្រោយនេះទេ។ ប្រទេសកូរ៉េខាងជើងនៅក្រោមការដឹកនាំរបស់លោក Kim Jong Un មានសក្ដានុពលសេដ្ឋកិច្ចដ៏ធំសម្បើម ប៉ុន្តែកូរ៉េខាងជើងត្រូវតែលុបបំបាត់អាវុធនុយក្លេអ៊ែរដូចការសន្យារបស់ខ្លួន។ អង្គការអូតង់ ប្រទេសចិន រុស្ស៊ី ជប៉ុន និងពិភពលោកទាំងមូលគឺមូលមតិគ្នាចំពោះបញ្ហានេះ»។
ការលើកឡើងរបស់លោក Trump នេះ បានធ្វើឡើង បន្ទាប់ពីប្រព័ន្ធផ្សព្វផ្សាយរដ្ឋរបស់កូរ៉េខាងជើងបានផ្សាយថា ការសាកល្បងរបស់កូរ៉េខាងជើងនេះបានធ្វើឡើងកាលពីថ្ងៃសៅរ៍នៅឯស្ថានីយបង្ហោះផ្កាយរណប Sohae ដែលជាស្ថានីយបាញ់គ្រាប់រ៉ុក្កែតដែលហោះបានចម្ងាយឆ្ងាយនៅក្នុងតំបន់ Tongch'ang-ri ដែលជាផ្នែកមួយនៃខេត្ត North Pyongang ស្ថិតនៅជិតព្រំដែនប្រទេសចិន។
ការប្រកាសរបស់កូរ៉េខាងជើងនេះបានធ្វើឡើងមួយថ្ងៃក្រោយមក បន្ទាប់ពីបណ្ដាញព័ត៌មាន CNN បានរាយការណ៍ថា ក្រុមហ៊ុន Planet Labs ដែលជាក្រុមហ៊ុនរូបភាពផ្កាយរណបអាជីវកម្ម បានរកឃើញសកម្មភាពដែលធ្វើឡើងនៅឯស្ថានីយបង្ហោះផ្កាយរណប Sohae នេះ៕
