លោក Donald Trumpបេក្ខជនប្រធានាធិបតីសហរដ្ឋអាមេរិកមកពីគណបក្សសាធារណរដ្ឋ បានបង្ហាញការមិនពេញចិត្តចំពោះការផ្ដល់នូវការព្យាបាលរបួស និងការផ្ដល់នូវមេធាវីដល់ជនសង្ស័យដែលត្រូវបានចាប់ខ្លួនពាក់ព័ន្ធនឹងការដាក់គ្រាប់ផ្ទុះនៅក្នុងទីក្រុងញូវយ៉កកាលពីថ្ងៃសៅរ៍សប្ដាហ៍មុន។
ជនសង្ស័យឈ្មោះ Ahmad Khan Rahami ត្រូវបានទទួលការព្យាបាលរបួសនៅក្នុងមន្ទីរពេទ្យ បន្ទាប់ពីប៉ូលិសបានបាញ់ឲ្យរងរបួស ខណៈពេលដែលជននេះប្រឹងរត់គេចខ្លួន។
លោក Trump បានប្រាប់អ្នកគាំទ្ររបស់លោកនៅក្នុងរដ្ឋ Florida ថា៖ «ឥឡូវនេះ គ្រូពេទ្យល្បីៗនៅក្នុងពិភពលោកមួយចំនួន ជួយព្យាបាលជននេះ។ ហើយចំណុចសំខាន់ជាងនេះទៀត ជននេះនឹងមានមេធាវីល្បីៗតំណាងឲ្យទៀត។ សំណុំរឿងរបស់ជននេះនឹងត្រូវឆ្លងកាត់ប្រព័ន្ធតុលាការផ្សេងៗក្នុងរយៈពេលជាច្រើនឆ្នាំទៅមុខ ហើយនៅទីបំផុត មនុស្សទូទៅនឹងភ្លេចរឿងនេះ ហើយទណ្ឌកម្មដែលជននេះនឹងទទួលនោះ ប្រាកដជាមិនសមនឹងអ្វីដែលជននេះបានប្រព្រឹត្តនោះទេ»។
រដ្ឋធម្មនុញ្ញសហរដ្ឋអាមេរិកធានាឲ្យជនជាប់ចោទមានសិទ្ធិក្នុងការមានមេធាវីតំណាងឲ្យខ្លួន។
លោក Trump បានបញ្ជាក់សារជាថ្មីអំពីការរិះគន់របស់លោកចំពោះប្រព័ន្ធអន្តោប្រវេសន៍នៅក្នុងសហរដ្ឋអាមេរិក ដែលលោកបាននិយាយថា ប្រព័ន្ធនេះមិនបានធ្វើការឲ្យដិតដល់ក្នុងការតាមដានពិនិត្យមើលមនុស្សម្នាក់ៗឲ្យបានច្បាស់ថាតើពួកគេអាចបង្កគ្រោះថ្នាក់អ្វីខ្លះដល់សន្តិសុខរបស់សហរដ្ឋអាមេរិក។
លោក Trump បានបន្ថែមថា៖ «អ្នកមិនអាចត្រួតពិនិត្យមនុស្សម្នាក់ៗឲ្យបានល្អិតល្អន់នោះទេ ប្រសិនបើអ្នកមិនក្រឡេកមើលលើមនោគមវិជ្ជាផ្សេងៗនោះ។ ហើយលោកស្រី Hillary Clinton បានបដិសេធក្នុងការពិចារណាអំពីទស្សនៈរបស់បុគ្គលម្នាក់ៗ និងភាពដែលទំនងជាអាចត្រូវបានក្រុមភេរវករជ្រើសរើសចូលក្នុងក្រុមរបស់ពួកគេនៅពេលណាមួយ ដែលករណីភាគច្រើន វានឹងអាចកើតឡើងទៅរួច»៕
