ការបាញ់នៅកន្លែងឃោសនាបោះឆ្នោតសម្រាប់លោកអតីតប្រធានាធិបតី Donald Trump នៅទីក្រុង Butler រដ្ឋ Pennsylvania កាលពីថ្ងៃសៅរ៍ បានក្លាយជាប្រធានបទដ៏ធំមួយនៅលើបណ្តាញសង្គមនៃប្រទេសចិន កាលពីថ្ងៃអាទិត្យ។
ក្រសួងការបរទេសចិនបានចេញសេចក្តីថ្លែងការណ៍មួយ នៅលើគេហទំព័ររបស់ខ្លួន កាលពីថ្ងៃអាទិត្យ ដោយបង្ហាញថា ប្រទេសចិនកំពុងតែតាមដានយ៉ាងដិតដល់ក្រោយពីមានឧបទ្ទវហេតុដែលពាក់ព័ន្ធជាមួយលោក Trump។
ក្រសួងការបរទេសចិនបាននិយាយនៅក្នុងសេចក្តីថ្លែងការណ៍របស់ខ្លួនថា៖ «លោកប្រធានាធិបតី Xi Jinping បានសម្តែងសមានចិត្ត ចំពោះលោកអតីតប្រធានាធិបតី Trump »។
ទីភ្នាក់ងារស៊ើបអង្កេតសហព័ន្ធបាននិយាយថា បុរសអាយុ ២០ ឆ្នាំ ឈ្មោះ Thomas Matthew Crooks ដែលជាអ្នកស្រុក Bethel Park រដ្ឋ Pennsylvania ជាជនសង្ស័យនៅក្នុងការព្យាយាមធ្វើឃាតលោក Trump។
កាលពីពេលថ្ងៃត្រង់ នៃថ្ងៃអាទិត្យក្នុងទីក្រុងប៉េកាំង ការសរសេរនៅក្នុងបណ្តាញ Weibo ថា៖ «លោក Trump ត្រូវគេបាញ់»បាននាំឱ្យមានអ្នកចូលមើលជាង៣០០លានដែលនាំឱ្យរឿងនេះក្លាយជាប្រធានបទដែលមានការចាប់អារម្មណ៍ច្រើន នៅលើបណ្តាញសង្គមចិន ដែលស្រដៀងនឹងបណ្តាញ X ដែលចិនហាមមិនឱ្យប្រើក្នុងប្រទេសចិននោះ៕
វេទិកាបញ្ចេញមតិ