ប្រធានាធិបតីតៃវ៉ាន់លោក Lai Ching-te បាននិយាយកាលពីថ្ងៃព្រហស្បតិ៍ថា ប្រទេសចិនបានធ្វើយុទ្ធនាការកាន់តែស៊ីជម្រៅដើម្បីបង្កើនឥទ្ធិពលនិងជ្រៀតចូល ប្រឆាំងនឹងកោះដែលប្រកាន់លទ្ធិប្រជាធិបតេយ្យមួយនេះ។ លោកប្តេជ្ញាថានឹងចាត់វិធានការតបតវិញនឹងកិច្ចប្រឹងប្រែងរបស់ក្រុងប៉េកាំងក្នុងការ«ស្រូបយក»កោះតៃវ៉ាន់។ នេះបើតាមការរាយការណ៍របស់ទីភ្នាក់ងារសារព័ត៌មាន Reuters។
កោះតៃវ៉ាន់បានចោទប្រកាន់ប្រទេសចិនថាបានបង្កើនសមយុទ្ធយោធា ការដាក់ទណ្ឌកម្មពាណិជ្ជកម្ម និងយុទ្ធនាការបង្កើនឥទ្ធិពលប្រឆាំងនឹងកោះនេះ ក្នុងប៉ុន្មានឆ្នាំចុងក្រោយនេះ ដើម្បីបង្ខំកោះនេះឱ្យទទួលយកការទាមទារអធិបតេយ្យភាពរបស់ចិនលើតៃវ៉ាន់។
ថ្លែងទៅកាន់អ្នកសារព័ត៌មានក្រោយពីជំនួបជាមួយមន្ត្រីសន្តិសុខជាន់ខ្ពស់ លោក Lai ថា ទីក្រុងប៉េកាំងបានប្រើប្រាស់លទ្ធិប្រជាធិបតេយ្យតៃវ៉ាន់ដើម្បី«ស្រូបយក»សមាជិកសង្គមផ្សេងៗ រួមទាំងក្រុមឧក្រិដ្ឋកម្មមានអង្គការចាត់តាំង អ្នកសារព័ត៌មានល្បីៗ និងមន្ត្រីប៉ូលិសនិងយោធាដែលកំពុងបម្រើការ ឬធ្លាប់បម្រើការ។
លោក Lai បានថ្លែងក្នុងសន្និសីទសារព័ត៌មានមួយដែលត្រូវបានផ្សាយផ្ទាល់ពីការិយាល័យប្រធានាធិបតីថា៖ «ពួកគេ(ចិន) កំពុងធ្វើសកម្មភាពដើម្បីបង្កើតឱ្យមានការបែកបាក់ ការបំផ្លិចបំផ្លាញ និងវិទ្ធង្សនា ពីក្នុងសង្គមយើងតែម្តង»។
ការិយាល័យកិច្ចការតៃវ៉ាន់របស់ប្រទេសចិនមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
ដោយយោងលើទិន្នន័យរបស់រដ្ឋាភិបាល លោក Lai ថា មានមនុស្ស៦៤នាក់ត្រូវបានចោទប្រកាន់ពីបទចារកម្មឱ្យចិនកាលពីឆ្នាំមុន ដែលចំនួននេះច្រើនជាងឆ្នាំ២០២១រហូតដល់៣ដង។ លោកថា ពួកគេភាគច្រើនជាមន្ត្រីយោធាពីមុនឬបច្ចុប្បន្ន៕
