បទសម្ភាសន៍ VOA៖ និស្សិតថាខ្មែរនៅក្បែរតំបន់ហ្កាហ្សាខ្លះបន្តនៅអ៊ីស្រាអែលដោយសារហេតុផលហិរញ្ញវត្ថុ
កញ្ញា បេ ស្រីនីត អាយុ ២០ឆ្នាំ មកពីខេត្តពោធិ៍សាត់ បានទៅដល់ទីក្រុង Ramot ប្រទេសអ៊ីស្រាអែល មួយខែមុនការវាយប្រហារ ៧ តុលា របស់ក្រុមហាម៉ាស់លើអ៊ីស្រាអែលដែលសម្លាប់មនុស្សជាង ១៤០០នាក់។ ស្រីនីតជានិស្សិតថ្នាក់បរិញ្ញាបត្រនៅសាកលវិទ្យាល័យភូមិន្ទកសិកម្ម ហើយបច្ចុប្បន្នកំពុងចុះកម្មសិក្សារយៈពេល ១១ខែនៅប្រទេសអ៊ីស្រាអែល។ នៅក្នុងបទសម្ភាសន៍ជាមួយ លោក ចាប ចិត្រា នៃ VOA ស្រីនីត បាននិយាយថា នាងមានគម្រោងបញ្ចប់កម្មសិក្សា មុននឹងត្រឡប់ទៅកម្ពុជាវិញ ប្រសិនបើស្ថានការណ៍នៅបន្តស្ងប់ស្ងាត់ក្នុងទីក្រុងដែលនាងកំពុងរស់នៅ។ នាងបាននិយាយថា និស្សិតខ្មែរខ្លះសម្រេចមិនចាកចេញពីអ៊ីស្រាអែល ដោយសារពួកគេមិនមានលទ្ធភាពទិញសំបុត្រយន្តហោះត្រឡប់ទៅកម្ពុជាវិញ ហើយត្រូវធ្វើការរកចំណូលដើម្បីសងការចំណាយ និងប្រាក់កម្ចីដែលពួកគេខ្លះបានយកមកប្រើដើម្បីមកចូលរូមកម្មសិក្សានៅអ៊ីស្រាអែលនេះ។ សូមលោកអ្នកនាងស្តាប់បទសម្ភាសន៍នេះទាំងស្រុងដូចតទៅ៖
