នៅក្នុងប្រទេសហ្វីលីពីន ស្វាមីជាច្រើនដែលមានភរិយាធ្វើការនៅក្រៅប្រទេស កំពុងតែរៀនធ្វើជាឳពុកមេគ្រួសារទោលតាមរយៈវគ្គបណ្តុះបណ្តាលស្តីអំពីការធ្វើជាឳពុកម្តាយ ដែលបង្កើតឡើងសម្រាប់តែពួកគេ។
នៅបន្ទប់ប្រជុំក្នុងសាលាក្រុងមួយនៅក្នុងទីក្រុងម៉ាបាឡាកាត ខេត្ត Pampanga ភាគខាងជើងនៃប្រទេសហ្វីលីពីន ឳពុកចំនួន៦នាក់ទទួលបានគន្លឹះក្នុងការគ្រប់គ្រងចំណូលចំណាយនិងការធ្វើគម្រោងថវិកា។
លោក Alvin Balenton គឺជាអ្នកចូលរួមកម្មវិធីនេះដោយឆន្ទៈមួយរូប និងតែងតែលើកដៃដើម្បីបញ្ចេញមតិ។ លោកគឺជាផ្នែកមួយនៃកម្មវិធីសាកល្បងដែលគាំពារឳពុកដែលចិញ្ចឹមកូនដោយខ្លួនឯងផ្ទាល់ ខណៈពេលដែលភរិយាទៅធ្វើការនៅក្រៅប្រទេស។
លោកបានលើកឡើងថា លោកពិតជាពេញចិត្តកម្មវិធីសិក្សានេះណាស់ ពីព្រោះមានមនុស្សជាច្រើនជួយផ្តល់យោបល់ឲ្យលោក។ លោក Balenton បានបន្តថា គ្រប់គ្នានៅក្នុងកម្មវិធីនេះដូចជាគ្រួសារមួយអញ្ចឹង។ លោកបន្ថែមទៀតថា ដោយសារភរិយារបស់លោកនៅក្រៅប្រទេស ជួនកាលគាត់នឹករឭកនាង ហើយថា កម្មវិធីនេះជួយឲ្យលោកកាត់បន្ថយភាពតានតឹងមួយចំណែក។
បុរសវ័យ៣៧ឆ្នាំរូបនេះនិយាយថា លោកពិតជាអរគុណចំពោះការគាំទ្រផ្នែកសា្មរតីដែលលោកទទួលបានអំឡុងពេលចូលរួមកម្មវិធីសិក្សាមួយហៅថា AMMA ដែលមានន័យថា «ឳពុកដែលចិញ្ចឹមកូនបានល្អ»។ លោកតស៊ូចិញ្ចឹមកូន៥នាក់ដែលមានអាយុពី៦ឆ្នាំដល់១៧ឆ្នាំជាមួយនឹងការងារក្រៅម៉ោងរបស់គាត់ ខណៈពេលដែលភរិយារបស់លោកធ្វើជាអ្នកបម្រើការក្នុងផ្ទះនៅទីក្រុងម៉ាកាវ (Macau)។
មានជនជាតិហ្វីលីពីនជិតដប់លាននាក់រស់នៅក្រៅប្រទេស និងប្រហែលជាពាក់កណ្តាលនៃពួកគេ គឺជាអ្នកធ្វើការជាប់កិច្ចសន្យាដែលស្វែងរកការងារដែលមានប្រាក់ខែដែលប្រសើរជាងនេះនៅក្រៅប្រទេស។ នារីហ្វីលីពីនមានច្រើនជាងបុរសដែលធ្វើការនៅក្រៅប្រទេស ហើយភាគច្រើននៃពួកគេធ្វើការជាអ្នកបម្រើការក្នុងផ្ទះ។
លោក Emigdio Tanjuatco ជាអ្នកគ្រប់គ្រងព្រលានយន្តហោះ Clark International Airport ដែលផ្តល់មូលនិធិដល់កម្មវិធី AMMA។ លោកនិយាយថា ព្រលានយន្តហោះគឺជាកន្លែងដ៏សំខាន់មួយក្នុងការបញ្ជូនពលករហ្វីលីពីនទៅធ្វើការនៅក្រៅប្រទេស។
«ការពិតដែលថាភាគច្រើននៃអ្នកបម្រើការជាប់កិច្ចសន្យានៅក្រៅប្រទេសជាស្រ្តីបានបន្សល់ចន្លោះដ៏ធំមួយនៅក្នុងស្រទាប់គ្រួសារ។ ដូច្នេះហើយទើបឥឡូវមានតម្រូវការក្នុងការបណ្តុះបណ្តាលបន្ថែមលើបុរសៗដែលជាឳពុក»។
លោកស្រី Tessibeth Cordova ដែលជាអ្នកជំនាញផ្នែកចិត្តសាស្ត្រ នៅឯព្រលានយន្តហោះ Clark គឺជាស្ថាបនិកម្នាក់ក្នុងចំណោមស្ថាបនិកនៃកម្មវិធី AMMA។
លោកស្រីបាននិយាយថា ឳពុកសាមញ្ញម្នាក់ងើបពីគេងនៅម៉ោង៥ព្រឹក ចម្អិនអាហារពេលព្រឹកសម្រាប់កូនៗ ជូនពួកគេទៅសាលា ហើយត្រឡប់មកផ្ទះវិញដើម្បីគិតពីម្ហូបសម្រាប់អាហារថ្ងៃត្រង់ បន្ទាប់មកត្រូវធ្វើការងារផ្ទះ និងបន្តធ្វើការរហូតដល់យប់ជ្រៅ។
«ពួកគេមិនបានចាត់ទុករឿងទាំងនោះជាការងារនោះទេ ប៉ុន្តែតាមពិតទៅពួកគេកំពុងតែធ្វើការងារយ៉ាងច្រើន។ ប៉ុន្តែការងារផ្ទះទាំងនោះមិនត្រូវបានគេឲ្យតម្លៃថាជាការងារនោះទេ ហើយគំនិតបែបនេះប៉ះពាល់យ៉ាងខ្លាំងទៅលើរបៀបដែលពួកគេគិតចំពោះខ្លួនគេ និងរបៀបដែលពួកគេទាក់ទងជាមួយកូនៗរបស់ពួកគេ»។
ភរិយារបស់លោក Rodrigo Wage បានចាប់ផ្តើមធ្វើការនៅក្នុងប្រទេសកាណាដាជាអ្នកមើលថែទាំតាំងពី៦ឆ្នាំមុន បន្ទាប់ពីមុខរបរធ្វើស្លាកសញ្ញាដោយដៃរបស់គាត់ត្រូវដណ្តើមទីផ្សារដោយក្រាហ្វិកកុំព្យូទ័រ។ លោកក៏បានចូលរួមកម្មវិធី AMMA ផងដែរ។
លោកបាននិយាយថា នៅពេលដែលលោកមានហាងឆ្លាក់អក្សរនៅផ្ទះ លោកអាចជួយការងារផ្ទះនៅពេលដែលគាត់ងើបពីគេង ហើយវាមិនអីទេ គាត់អាចធ្វើការងារទាំងនោះបាន។ លោក Wage បានបន្តថា លោកយល់ថាលោកត្រូវតែមើលថែកូនស្រីទាំងបីនាក់របស់លោក ប៉ុន្តែវាទាមទារឲ្យមានការផ្លាស់ប្តូរ។ លោកបានបន្ថែមថា ឥឡូវនេះការងាររបស់លោកគឺបោកអ៊ុត។
លោក Wage បានថ្លែងថា លោកដឹងថាឳពុកដទៃទៀតដែលមានភរិយាទៅធ្វើការក្រៅប្រទេសកំពុងតែព្យាយាមលួងលោមខ្លួនឯងពីការធុញថប់ក្នុងអារម្មណ៍។ ប៉ុន្តែលោកបានលើកឡើងថា វិធីដែលល្អបំផុតដើម្បីដោះស្រាយរឿងនេះគឺការបន្លប់អារម្មណ៍ខ្លួនឯង ដូចជាការស្តាប់តន្រ្តីពេលបញ្ចប់ការងារផ្ទះ។
លោកនិយាយថា ប្រសិនបើលោកខឹងកូនៗរបស់លោក លោកបំភ្លេចវាចោល។ លោកចូលទៅក្នុងបន្ទប់ ហើយដេញហ្គីតា។
លោកស្រី Cordova និយាយថា កម្មវិធីសិក្សានេះវាយតម្លៃអារម្មណ៍របស់ឳពុក និងការវាយតម្លៃជាបឋមទៅលើកូនៗនៅពេលចាប់វគ្គបណ្តុះបណ្តាល។ ក្រៅពីការគាំទ្រផ្នែកចិត្តសាស្ត្រ ឳពុកទាំងនោះរៀនគន្លឹះធ្វើជាឳពុករួមមានដូចជាការប្រដៅកូនៗរបស់ពួកគាត់ និងការបង្រៀនអាកប្បកិរិយាសមគួរដល់ពួកគេ។
ស្ថាបនិកកម្មវិធី AMMA នេះកំពុងតែពិចារណាក្នុងការប្រគល់កម្មវិធីនេះឲ្យឳពុកទាំងនោះគ្រប់គ្រង នៅពេលដែលពួកគេយល់ថាឳពុកទាំងនោះមានឯករាជ្យភាព៕
ប្រែសម្រួលដោយ ប៊ុន ប៉េងហ៊ុយ
