យុទ្ធនាការឌីជីថល #ShowMeYourTree ដែលចូលរួមដោយអ្នកផលិតមាតិកាទាក់ទងនឹងកិច្ចការពារបរិស្ថាន កំពុងធ្វើឡើងដើម្បីលើកកម្ពស់ការយល់ដឹងពីសារៈសំខាន់នៃធម្មជាតិ និងតួនាទីរបស់អ្នកការពារបរិស្ថាន។
យុទ្ធនាការ #ShowMeYourTree ឬមានន័យថា បង្ហាញដើមឈើរបស់អ្នក ធ្វើឡើងតាមរយៈការបង្កើតមាតិកាក្នុងបណ្តាញសង្គមរបស់អ្នកធ្វើវីដេអូដំណើរកម្សាន្ត និងអ្នកបង្កើតមាតិកាបរិស្ថាន ដើម្បីទាក់ទាញចំណាប់អារម្មណ៍ ពិសេសពីស្រទាប់យុវជន។ នេះបើតាមសេចក្តីប្រកាសព័ត៌មានរបស់យុទ្ធនាការបរិស្ថាន #ShowMeYourTree ចេញនៅថ្ងៃទី២៦ ខែតុលា ឆ្នាំ២០២៣។
អ្នកស្រី ឱក សុចិន្តា អ្នកសម្របសម្រួលយុទ្ធនាការ #ShowMeYourTree នៅកម្ពុជាលើកឡើងថា យុទ្ធនាការនេះគាំទ្រដោយ Pulitzer Center ដែលជាអង្គការគាំទ្រវិស័យសារព័ត៌មាន ក្នុងការអប់រំ និងលើកកម្ពស់ការយល់ដឹងអំពីសម្បត្តិធម្មជាតិ រួមមានជីវចម្រុះព្រៃឈើ និងទេសភាពជាដើម។
អ្នកស្រីបន្ថែមថា Pulitzer Center ជាអ្នកផ្តួចផ្តើម និងគាំទ្រហើយបានរៀបចំយុទ្ធនាការនេះឡើងតាំងពីឆ្នាំ២០២២មក ក្នុងនោះមានការតាំងពិព័រណ៍ពីបណ្ដាប្រទេសកម្ពុជា ថៃ និងមីយ៉ាន់ម៉ា។ សម្រាប់ឆ្នាំនេះ យុទ្ធនាការ #ShowMeYourTree ធ្វើឡើងតាមរយៈអនឡាញនៅកម្ពុជា និងមីយ៉ាន់ម៉ា ចាប់ពីដើមខែតុលា និងបញ្ចប់នៅចុងខែវិច្ឆិកា ឆ្នាំ២០២៣ ដោយមានការប្រកួតថតរូប ឬវីដេអូពីសំណាក់អ្នកដែលចង់ចូលរួមផ្សព្វផ្សាយពីធម្មជាតិ។
អ្នកស្រីថ្លែងថា៖ «គោលបំណងរបស់យើងហ្នឹង គឺយើងចង់ឱ្យមនុស្សចាប់ផ្ដើមនឹកឃើញវិញថា យើងជាមនុស្សមានភាពស្និទ្ធស្នាល ហើយទាក់ទងយ៉ាងខ្លាំងជាមួយនឹងធម្មជាតិ។ យើងត្រូវការធម្មជាតិ ហើយធម្មជាតិមានសារៈសំខាន់យ៉ាងខ្លាំងសម្រាប់យើង»។
យុទ្ធនាការនេះមានការចូលរួមពីអ្នកមានឥទ្ធិពលក្នុងបណ្ដាញសង្គម (Influencers) ចំនួន៦រូប ដែលមានទំព័រហ្វេសប៊ុកឈ្មោះថា Zerow Jomnot Explore ដៃគូ-Explore នារីចល័តចរ ដានជើង និងពនេចរ។ ពួកគេបានប្រើពាក្យ «សាកថ្មជីវិត» ដោយពួកគេជឿថា អាចមានការទាក់ទាញចំណាប់អារម្មណ៍ និងលើកស្ទួយវិស័យទេសចរណ៍នៅតាមតំបន់អេកូទេសចរណ៍នានា។
អ្នកស្រី អ៊ុំ សុភ័ក្រ អ្នកផលិតមាតិកាលើបណ្តាញសង្គមទាក់ទងនឹងតំបន់ទេសចរណ៍នៅកម្ពុជា ដែលមានទំព័រហ្វេសប៊ុកឈ្មោះថា «ដៃគូ-Explore» និយាយថា ព្រៃឈើពិតជាសំខាន់សម្រាប់ការរស់នៅរបស់មនុស្ស ហើយយុទ្ធនាការនេះបានជំរុញឱ្យអ្នកស្រីផ្សារភ្ជាប់ជីវិតទៅនឹងធម្មជាតិ។
អ្នកស្រីថ្លែងថា៖ «ព្រៃឈើ ធម្មជាតិ ហើយជីវៈចម្រុះគឺពិតជាសំខាន់សម្រាប់ការរស់នៅ នៅលើផែនដីយើង ព្រោះវាគឺជាផ្នែកមួយដែលជួយឱ្យយើងអាចរស់នៅលើផែនដីហ្នឹងបាន»។
អ្នកផលិតមាតិការូបនេះបន្ថែមថា ដោយសារអ្នកស្រីចូលចិត្តបង្កើតមាតិកាផ្សព្វផ្សាយ ទើបជំរុញចិត្តឱ្យចូលរួមជាមួយនឹងយុទ្ធនាការបរិស្ថានមួយនេះដើម្បីផ្សព្វផ្សាយអំពីធម្មជាតិ ព្រៃឈើ និងជីវៈចម្រុះ ឱ្យមានភាពទូលំទូលាយជាងមុនទៅកាន់មហាជន។
តាមរបាយការណ៍របស់ Pulitzer Center ដែលចុះផ្សាយកាលពីពាក់កណ្តាលឆ្នាំ២០២២ជាភាសាអង់គ្លេសបង្ហាញថា៖ «ព្រៃទឹកភ្លៀងកម្ពុជាត្រូវបានគេហៅថាជាព្រៃអាម៉ាហ្សូននៃអាស៊ីអាគ្នេយ៍ ព្រោះវាមានសមត្ថភាពក្នុងការស្រូបយកឧស្ម័នកាបូនិក និងគ្រប់គ្រងលំហូរនៃទន្លេមេគង្គ។ ប៉ុន្តែសួតបៃតងនេះកំពុងរលាយបាត់ក្នុងអត្រាមួយគួរឱ្យព្រួយបារម្ភចាប់តាំងពីឆ្នាំ២០១១មក ដែលកម្ពុជាបានបាត់បង់ព្រៃឈើជាងពាក់កណ្តាល ហើយជាកំណត់ត្រាដ៏អាក្រក់បំផុតក្នុងពិភពលោក»។
លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា ហៅកាត់ថា CYN ប្រាប់វីអូអេថា ការផ្សព្វផ្សាយពីបរិស្ថានតាមរយៈយុទ្ធនាការនេះគឺជារឿងល្អប្រសើរ។ ប៉ុន្តែលោកថា ប្រសិនបើមានតែយន្តការអប់រំផ្សព្វផ្សាយ ប៉ុន្តែគោលនយោបាយច្បាប់មិនបានអនុវត្តដោយហ្មត់ចត់ នោះស្ថានភាពព្រៃឈើនៅតាមតំបន់អភិរក្ស និងតំបន់មួយចំនួនទៀត នៅតែបន្តរងការកាប់បំផ្លាញ និងជួញដូរទៅក្រៅប្រទេស។
លោកថ្លែងថា៖ «មិនត្រឹមតែជាការចូលរួមបែបនេះទេ អ្វីដែលខ្ញុំជំរុញដែរ គឺរដ្ឋាភិបាល និងក្រសួងបរិស្ថានត្រូវបង្កើនកិច្ចសហប្រតិបត្តិការជាមួយភាគីពាក់ព័ន្ធផ្សេងទៀត រួមមានអង្គការសង្គមស៊ីវិល សហគមន៍មូលដ្ឋានដែលធ្លាប់តែត្រូវបានរារាំង គំរាមគំហែង ឬក៏ឃាត់មិនឲ្យចូលទៅក្នុងតំបន់ការពារធម្មជាតិ ដើម្បីចូលរួមល្បាតការពារ និងទប់ស្កាត់បទល្មើសហ្នឹង ក៏ត្រូវបង្កលក្ខណៈងាយស្រួលសម្រាប់គាត់ដែរ បាទ!»។
លោកបន្ថែមថា ក្រសួងបរិស្ថាន ក្រសួងកសិកម្ម រុក្ខប្រមាញ់ និងនេសាទ រដ្ឋបាលព្រៃឈើ និងអាជ្ញាធរជំនាញ គួរតែដាក់ចេញនូវវិធានការបង្រ្កាបបទល្មើសកាប់បំផ្លាញធនធានធម្មជាតិនៅកម្ពុជា ដើម្បីពលរដ្ឋមានជំនឿទុកចិត្ត និងកំណើននៃការកាប់បំផ្លាញព្រៃឈើមានការថយចុះ។
វីអូអេមិនអាចសុំការអត្ថាធិប្បាយពីរដ្ឋមន្រ្តីក្រសួងបរិស្ថាន លោក អ៊ាង សុផល្លែត និងអ្នកនាំពាក្យ លោក ផៃ ប៊ុនឈឿន បានទេ ទាំងតាមទូរស័ព្ទ និងបណ្តាញសង្គមតេឡេក្រាម។
យោងតាមរបាយការណ៍របស់អ្នកឃ្លាំមើលព្រៃឈើសកល ឬ Global Forest Watch រកឃើញថា ព្រៃមូសុង និងព្រៃកោងកាងនៅភាគខាងត្បូងកម្ពុជាទំហំ៨សែនហិកតា ជាព្រៃដែលធំជាងគេទីពីរនៅអាស៊ីអាគ្នេយ៍ និងជាជម្រកសត្វផុតពូជយ៉ាងហោចណាស់៦០ប្រភេទ ដូចជាដំរីអាស៊ី និងខ្លាឃ្មុំជាដើម។ របាយការណ៍នោះបន្ថែមថា ព្រៃឈើនៅតែទទួលរងការគំរាមកំហែងដោយការកាប់បំផ្លាញ ខណៈផ្ទៃដីជាង ១សែន៤ម៉ឺន៨ពាន់ហិកតា ឬ៨,៦ភាគរយនៃព្រៃឈើដែលគ្របដណ្តប់ត្រូវបានបាត់បង់នៅចន្លោះឆ្នាំ២០០១ និង២០១៩៕
