នាយករងប្រចាំការនៃរដ្ឋបាលជាតិសន្តិសុខនុយក្លេអ៊ែរសហរដ្ឋអាមេរិក (NNSA) លោក Frank A. Rose បានកំពុងបំពេញទស្សនកិច្ចនៅក្នុងប្រទេសកម្ពុជា ដើម្បីពិភាក្សាជាមួយមន្រ្តីរដ្ឋាភិបាលទីក្រុងភ្នំពេញ និងក្រុងព្រះសីហនុពីភាពជាដៃគូផ្នែកសន្តិសុខនុយក្លេអ៊ែរ។ នេះបើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជា។
បើតាមសេចក្តីប្រកាសរបស់ស្ថានទូតចេញផ្សាយនៅថ្ងៃទី ២១ ខែកុម្ភៈនេះ លោក Frank A. Rose បានជួប និងពិភាក្សាជាមួយលោក អ៊ឹង អៀង រដ្ឋលេខាធិការក្រសួងរ៉ែ និងថាមពល និងជាអនុប្រធានលេខាធិការដ្ឋានគណៈកម្មាធិការជាតិប្រឆាំងភេរវកម្ម ព្រមទាំងលោក លី វណ្ណា រដ្ឋលេខាធិការក្រសួងរ៉ែ និងថាមពល ពីការលើកកម្ពស់សុវត្ថិភាពនុយក្លេអ៊ែរ និងការត្រៀមបង្ការសម្រាប់គ្រាអាសន្នមានវិទ្យុសកម្ម។
លោក Frank A. Rose ត្រូវបានគេស្រង់សម្តីក្នុងសេចក្តីប្រកាសព័ត៌មាននោះថា៖ «រដ្ឋបាលជាតិផ្នែកសន្តិសុខនុយក្លេអ៊ែររបស់សហរដ្ឋអាមេរិកវាយតម្លៃខ្ពស់ ចំពោះកិច្ចសហការជាមួយព្រះរាជាណាចក្រកម្ពុជាលើសុវត្ថិភាពនុយក្លេអ៊ែរ និងការត្រៀមបង្ការ និងការឆ្លើយតបសម្រាប់គ្រាអាសន្នមានវិទ្យុសកម្ម ហើយយើងផ្តល់តម្លៃដល់កិច្ចសហការជាដៃគូរបស់យើង ក្នុងការតាមដានលើការជួញដូរខុសច្បាប់ ទាក់ទងនឹងសារធាតុនុយក្លេអ៊ែរ» ។
បន្ថែមពីនេះ លោកបានជួបជាមួយមន្រ្តីនៃក្រសួងការបរទេស និងសហប្រតិបត្តិការអន្តរជាតិកម្ពុជា ស្តីពីកិច្ចសហប្រតិបត្តិការលើការខិតខំធ្វើមិនឱ្យមានការរីកសាយអាវុធនុយក្លែអ៊ែរ និងការរក្សាសន្តិសុខនុយក្លេអ៊ែរ។ អំឡុងមានវត្តមាននៅកម្ពុជា លោកFrank A. Rose ក៏បានពិភាក្សាជាមួយមន្រ្តីកំពង់ផែ និងគយ ហើយបានប្រាស្រ័យទាក់ទងជាមួយនិស្សិតសាកលវិទ្យាល័យនៅកម្ពុជាអំពីសន្តិសុខតាមអ៊ីនធឺណិតផងដែរ៕
វេទិកាបញ្ចេញមតិ