គណៈកម្មាធិការស៊ើបការណ៍សម្ងាត់របស់ព្រឹទ្ធសភាសហរដ្ឋអាមេរិក កំពុងផ្តោតលើប្រទេសរុស្ស៊ីកាលពីថ្ងៃព្រហស្បត៍នៅពេលដែលគណៈកម្មាធិការនោះបើកសវនាការដែលជាផ្នែកមួយនៃការស៊ើបអង្កេតរបស់ខ្លួននៅក្នុងការជ្រៀតជ្រែករបស់រុស្ស៊ីនៅក្នុងការបោះឆ្នោតប្រធានាធិបតីសហរដ្ឋអាមេរិកកាលពីខែវិច្ឆិកាឆ្នាំទៅ ហើយនិងពីលទ្ធភាពនៃការរួមគំនិតពីមជ្ឈដ្ឋានអ្នកគាំទ្ររបស់ប្រធានាធិបតីត្រាំ។
គណៈកម្មាធិការបានពណ៌នាក្នុងសម័យប្រជុំកាលពីថ្ងៃព្រហស្បត៍ម្សិលមិញថាជាសៀវភៅស្តីពីប្រវត្តិសាស្ត្រ និងចរិតលក្ខណៈនៃវិធានការដ៏សកម្ម និងយុទ្ធនាការដ៏មានឥទ្ធិពលរបស់រុស្ស៊ី ហើយនិងសមត្ថភាពខាងសន្តិសុខប្រព័ន្ធកុំព្យូទ័ររបស់ប្រទេសរុស្ស៊ី។
មុនពេលសវនាការសាធារណៈដែលមានការពិនិត្យមើលយ៉ាងដិតដល់ ប្រធានគណៈកម្មាធិការនោះរបស់គណបក្សសាធារណរដ្ឋ និងមេដឹកនាំគណបក្សប្រជាធិបតេយ្យបានសន្យាធ្វើការស៊ើបអង្កេតឲ្យអស់ពីកម្លាំងកាយចិត្ត និងមិនលម្អៀងនៅក្នុងការស៊ើបអង្កេតអំពីការខំប្រឹងប្រែងរបស់រុស្ស៊ីក្នុងអំឡុងនៃយុទ្ធនាការឃោសនាបោះឆ្នោតសហរដ្ឋអាមេរិកកាលពីឆ្នាំទៅ។
លោក Richard Burr សមាជិកព្រឹទ្ធសភាខាងគណបក្សសាធារណរដ្ឋមកពីរដ្ឋ North Carolina និងជាប្រធានគណៈកម្មាធិការស៊ើបអង្កេតរបស់ព្រឹទ្ធសភា បាននិយាយនៅឯសន្និសីទកាសែតកាលពីថ្ងៃពុធថា «ទំហំនៃការស៊ើបអង្កេតនេះនឹងទៅទីកន្លែងណាដែលការស៊ើបអង្កេតនេះនាំទៅដល់»។
សមាជិកព្រឹទ្ធសភា Mark Warner នៃរដ្ឋ Virginia ដែលជាសមាជិករបស់គណៈកម្មាធិ ការនោះបាននិយាយថា «យើងនឹងជីកឬសគល់ទាល់តែរកឃើញការពិត»។
លោកសមាជិកព្រឹទ្ធសភា Burr បាននិយាយថា យើងបានទទួលឯកសារជាច្រើនដែលមិនធ្លាប់មានការពីពេលមុន ហើយគណៈកម្មាធិការកំពុងធ្វើការចរចាយ៉ាងខ្ជាប់ខ្ជួនជាមួយសហគមន៍ស៊ើបការណ៍សម្ងាត់ដើម្បីឲ្យបានចូលពិនិត្យមើលឯកសារបន្ថែម ទៀត។ លោកបាននិយាយបន្ថែមទៀតថា នឹងមានការសម្ភាសន៍យ៉ាងហោចណាស់ក៏២០ដែរ រួមទាំងលោក Jared Kushner ដែលជាទីប្រឹក្សាជាន់ខ្ពស់ និងជាកូនប្រសាររបស់ប្រធានាធិបតីត្រាំដែលបានស្ម័គ្រចិត្តនិយាយជាមួយគណៈកម្មាធិការនោះ។
ប្រធានគណៈកម្មាធិការស៊ើបការណ៍សម្ងាត់បាននិយាយថា «គណៈកម្មាធិការនោះ នឹងធ្វើកិច្ចសម្ភាសន៍ជាមួយលោក Kushner នៅពេលដែលគណៈកម្មាធិការនោះសម្រេចថា វាជាពេលវេលាសម្រាប់យើងកំណត់កាលបរិច្ឆេទ ឬក៏អត់»។ ទាំងលោក Burr ឬលោក Warner មិនបានបញ្ចេញការសន្និដ្ឋានដែលបានធ្វើឡើងរហូតមកទល់ពេលនេះទេ លើកលែងតែនិយាយពីបំណងរបស់រុស្ស៊ី។ សមាជិកព្រឹទ្ធសភា Warner បាននិយាយថា «គោលដៅរបស់ប្រធានាធិបតីរុស្ស៊ី Vladimir Putin ធ្វើឲ្យសហរដ្ឋអាមេរិកកាន់តែចុះខ្សោយឡើង។ ចុះខ្សោយខាងផ្នែកសេដ្ឋកិច្ច ចុះខ្សោយជាសាកល។ ហើយការណ៍នេះនឹងក្លាយជាការកង្វល់ដល់ពលរដ្ឋអាមេរិកាំងទាំងអស់ដោយមិនគិតពីគណបក្ស»។
រហូតមកទល់ពេលនេះ គណៈកម្មាធិការស៊ើបការណ៍សម្ងាត់របស់សភាតំណាងរាស្ត្របានដឹកនាំការស៊ើបអង្កេតពីប្រទេសរុស្ស៊ី។ ក៏ប៉ុន្តែ គណៈកម្មាធិការនេះ បានលុបចោលសវនាការសាធារណៈមួយនៅសប្តាហ៍នេះនៅពេលដែលមានការរិះគន់លោក Devin Nunes សមាជិកសភាតំណាងរាស្ត្រខាងគណបក្សសាធារណរដ្ឋ និងជាប្រធានគណៈកម្មាធិការនោះដែលខ្លួនលោកផ្ទាល់បានប្រាប់ប្រធានាធិបតីត្រាំពីឯកសារសម្ងាត់ដែលលោកមិនទាន់បានចែករំលែកជាមួយគណៈកម្មាធិការនោះឡើយ។
ដោយគណៈកម្មាធិការសភាតំណាងរាស្ត្រហាក់ដូចជាស្ថិតក្នុងភាពច្របូកច្របល់គណៈកម្មាធិការព្រឹទ្ធសភាឥឡូវនេះកំពុងយកចិត្តទុកដាក់អំពីបញ្ហានេះ។ លោក Burr បានមានប្រសាសន៍ថា លោកបានបោះឆ្នោតឲ្យលោកត្រាំកាលពីខែវិច្ឆិកាឆ្នាំទៅ ក៏ប៉ុន្តែ លោកបានបដិសេធថា ភាពស្មោះត្រង់នឹងគណបក្សដោយការបោះឆ្នោតនោះមិនបានជួយការងាររបស់លោកទេ។
ទោះយ៉ាងនោះក៏ដោយ ចំនួនខាងគណបក្សប្រជាធិបតេយ្យដែលកំពុងកើនឡើងនិយាយថា ការពិត ប្រហែលមិនកើតមានឡើងនៅក្នុងគណៈកម្មាធិការនីតិបញ្ញត្តិដែលត្រួតត្រាដោយគណបក្សសាធារណរដ្ឋទេ៕
