លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃថ្លែងថា ស្ទើរតែទាំងអស់នៃអ្នកបើកបររថយន្តដឹកកម្មករនៅតាមរោងចក្រនានា មិនមានប័ណ្ណបើកបរ ខណៈដែលអ្នកបើកបររថយន្តប្រភេទផ្សេងទៀត ដែលមានដឹកមនុស្សច្រើន មិនគោរពច្បាប់ចរាចរណ៍ ជាហេតុធ្វើឱ្យតួលេខអ្នកស្លាប់និងរងរបួសដោយសារគ្រោះថ្នាក់ចរាចរណ៍ នៅតែមានចំនួនខ្ពស់។
លោក ស ខេង បានថ្លែងដូចនេះនៅក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៦ របស់ក្រសួងសាធារណការនិងដឹកជញ្ជូន ដែលធ្វើឡើងកាលពីរសៀលថ្ងៃព្រហស្បតិ៍ នៅសាលមហោស្រពចតុមុខ ក្នុងរាជធានីភ្នំពេញ។
«ឡានដឹកកម្មករ ពេលយើងចាប់ផ្ដើមអនុវត្តច្បាប់ចរាចរណ៍[ផ្លូវគោកថ្មី]នៅដើមឆ្នាំ២០១៦ យើងត្រួតពិនិត្យទៅ ៩០ភាគរយនៃអ្នកបើកបរហ្នឹង អត់មានប័ណ្ណបើកបរទេ បានន័យថា គាត់អត់បានរៀនបើកបរទេ ហើយទៅបើកបរដឹកមនុស្សមួយឡាន៥០នាក់ ៦០នាក់ក៏មានដែរ។ អ៊ីចឹង ជោគវាសនារបស់មនុស្ស៥០នាក់ហ្នឹង វាពឹងទៅលើអ្នកដែលអត់ចេះបើកបរនោះឯង។ អញ្ចឹងគ្រោះថ្នាក់ម្ដងៗ ធ្ងន់ណាស់»។
គ្រោះថ្នាក់ចរាចរណ៍ បានធ្វើឱ្យប្រទេសកម្ពុជាខាតបង់ថវិកាក្នុងមួយឆ្នាំៗយ៉ាងហោចណាស់ ៣០០លានដុល្លារ ដោយមិនទាន់គិតដល់ផលវិបាកសង្គមផ្សេងទៀត ដូចជាការបន្សល់ទុកនូវស្ត្រីមេម៉ាយ កុមារកំព្រា ជនពិការ និងធ្វើឱ្យគ្រួសារមួយចំនួនធ្លាក់ទៅក្នុងភាពក្រីក្រ។ នេះបើយោងតាម លោកឧបនាយករដ្ឋមន្ត្រី ស ខេង។
លោកបន្តថា យោងតាមរបាយការណ៍នៅទូទាំងប្រទេសកម្ពុជា ជាមធ្យមក្នុងមួយថ្ងៃមានមនុស្សស្លាប់៥នាក់ និងរងរបួសធ្ងន់ជាង១០នាក់ដោយសារគ្រោះថ្នាក់ចរាចរណ៍។
លោកថា បើទោះជាក្នុងថ្ងៃខ្លះមិនមានអ្នកស្លាប់ដោយសារគ្រោះថ្នាក់ចរាចរណ៍ ក៏ប៉ុន្តែ តួលេខនៃចំនួនអ្នកស្លាប់ជាមធ្យមនៅតែខ្ពស់ ដោយសារគ្រោះថ្នាក់ដែលបង្កឡើងដោយរថយន្តដែលមានដឹកមនុស្សច្រើន។
«អញ្ចឹងបានចំនួនអ្នកស្លាប់របស់យើង ជួនអីវា ស បានន័យអត់មានអ្នកស្លាប់ទេឬក៏ស្លាប់១ស្លាប់២អីចឹង។ ក៏ប៉ុន្តែ ស្រាប់តែដល់ថ្ងៃទី៣ទី៤ដាក់មួយឡានទៅ ម្ភៃសាមសិបនាក់តែម្ដង ដោយសារអី? ដោយសារឡានដែលដឹកជញ្ជូនច្រើននេះឯង។ ដឹកជញ្ជូនច្រើន ហើយអ្នកដែលបើកហ្នឹងគឺមិនបានរៀនក្បួនខ្នាត ច្បាប់ទម្លាប់ គ្មានពាក់មី គ្មានសំបុត្របើកបរអីច្បាស់លាស់ទេ។ អ្នកដឹកភ្ញៀវទេសចរណ៍ អាចថាបានរៀនមានពាក់មីភាគច្រើនបំផុត ប៉ុន្តែមិនបានគោរពច្បាប់»។
បើតាមលោកឧបនាយករដ្ឋមន្ត្រី ៤០ភាគរយនៃគ្រោះថ្នាក់ចរាចរណ៍ក្នុងឆ្នាំ២០១៦ បង្កឡើងដោយការបើកបរលើសល្បឿនកំណត់។
លោក ស ខេង អះអាងដែរថា នៅក្នុងឆ្នាំ២០១៧ខាងមុខ អាជ្ញាធរនឹងយកចិត្តទុកដាក់បន្ថែមទៀតលើបញ្ហាប័ណ្ណបើកបររថយន្តដឹកមនុស្សច្រើននេះ និងបទល្មើសច្បាប់ចរាចរណ៍ផ្សេងទៀតដូចជាការបើកបរក្រោមឥទ្ធិពលជាតិស្រវឹងនិងគ្រឿងញៀន ព្រមទាំងការបើកបរលើសល្បឿនកំណត់។
គ្រោះថ្នាក់ចរាចរណ៍ដែលមានពាក់ព័ន្ធនឹងរថយន្តដឹកកម្មករនិងរថយន្តដឹកភ្ញៀវធ្វើដំណើរ កើតមានជាញឹកញាប់នៅតាមដងផ្លូវ ដោយបណ្ដាលឱ្យមានកម្មករនិងអ្នកធ្វើដំណើរជាច្រើននាក់ បានបាត់បង់ជីវិតនិងរងរបួស។
កាលពីខែមេសា ឆ្នាំ២០១៦ គ្រោះថ្នាក់ចរាចរណ៍មួយរវាងរថយន្តដឹកអ្នកដំណើរជាមួយរថយន្តស្ទូច នៅក្នុងស្រុកមោងឬស្សីនៃខេត្តបាត់ដំបង បានសម្លាប់មនុស្សអស់៨នាក់ និងបង្កឱ្យមនុស្សជាង៣០នាក់ទៀតរងរបួស។
ចំណែកកាលពីខែឧសភា ឆ្នាំ២០១៥ គ្រោះថ្នាក់ចរាចរណ៍ដែលរថយន្តដឹកអ្នកដំណើរបុករថយន្តដឹកកម្មករនៅក្នុងខេត្តស្វាយរៀង ក៏បានបណ្ដាលឲ្យកម្មករស្លាប់១៧នាក់ និងរងរបួសជាង២០នាក់។
លោក អៀ ចរិយា នាយកវិទ្យាស្ថានសុវត្ថិភាពចរាចរណ៍ផ្លូវគោកប្រាប់ VOA កាលពីល្ងាចថ្ងៃព្រហស្បតិ៍ថា ការត្រួតពិនិត្យដើម្បីឱ្យប្រាកដថា អ្នកបើកបររថយន្តដែលមានដឹកមនុស្សច្រើនដូចជារថយន្តដឹកកម្មករនិងរថយន្តដឹកអ្នកដំណើរ ត្រូវមានប័ណ្ណបើកបរជាការចាំបាច់មួយ។
ទោះយ៉ាងណា លោកថា បញ្ហាសំខាន់ពីរផ្សេងទៀតដែលក្រសួងគួរយកចិត្តទុកដាក់គឺការបើកបរហួសល្បឿនកំណត់និងការបើកបរក្រោមឥទ្ធិពលជាតិស្រវឹង។
«បញ្ហាទាំងពីរហ្នឹង ការអនុវត្ត ការរឹតបន្តឹងច្បាប់គឺនៅមានភាពធូររលុង មិនទាន់បានផ្ដោតជាសំខាន់នៅឡើយ។ ហើយកាលណាយើងអត់ទាន់បានយកចិត្តទុកដាក់រឹតបន្តឹងទៅលើបញ្ហាទាំងពីរហ្នឹងទេ វាអត់បានទប់ស្កាត់មូលហេតុធំៗ។ វាមិនអាចឈានទៅដល់ការកាត់បន្ថយចំនួនអ្នកស្លាប់និងអ្នករបួសដោយគ្រោះថ្នាក់ចរាចរណ៍ហ្នឹងបានដោយជោគជ័យឬក៏មានប្រសិទ្ធភាពខ្ពស់[នោះទេ]»។
លោក អៀ ចរិយា បន្តទៀតថា រដ្ឋាភិបាល ក៏គួរធ្វើការផ្សព្វផ្សាយច្បាប់ចរាចរណ៍ឱ្យកាន់តែទូលំទូលាយ រឹតបន្តឹងការប្រឡងយកប័ណ្ណបើកបរ ត្រួតពិនិត្យយានយន្តឱ្យបានត្រឹមត្រូវតាមស្តង់ដារបច្ចេកទេស និងដាក់ផ្លាកសញ្ញាបន្ថែមនៅតាមដងផ្លូវជាដើម៕
