នាយករដ្ឋមន្ត្រីកម្ពុជាបានជួបជាមួយលោក ប្រធានាធិបតីតួកគី Recep Tayyip Erdogan នៅទីក្រុងអ៊ីស្តង់ប៊ុលដើម្បីបង្កើនទំនាក់ទំនងរវាងប្រទេសទាំងពីររួមមានខាងផ្នែកការទូតនិងកិច្ចសហប្រតិបត្តិការលើវិស័យជាច្រើន។
លោកនាយករដ្ឋមន្ត្រី ហ៊ុន សែន នៃព្រះរាជាណាចក្រកម្ពុជាបានធ្វើដំណើរទស្សនកិច្ចរយៈពេល ២ ថ្ងៃនៅទីក្រុងអ៊ីស្តង់ប៊ុល ហើយបានជួបជាមួយមន្ត្រីជាច្រើនរូប រួមទាំងលោកប្រធានាធិបតី Recep Tayyip Erdogan កាលពីថ្ងៃ ទី ២១ ខែតុលា។ ភាគីទាំងពីរបាននិយាយអំពីកិច្ចសហប្រតិបត្តិការទ្វេភាគីនិងបានចូលរួមពិធីចុះហត្ថលេខាលើកិច្ចព្រមព្រៀងចំនួន ៨ រួមមានពាណិជ្ជកម្មនិងការពារវិនិយោគិន វិស័យទេសចរណ៍និងកសិកម្ម ទឹកនិងបញ្ហាកំចាត់គ្រាប់មីន។ នេះបើតាមការបញ្ជាក់របស់លោកនាយករដ្ឋមន្ត្រីហ៊ុន សែន លើទំព័រហ្វេសប៊ុករបស់លោក។
តួកគីនិងកម្ពុជាបានយល់ព្រមបង្កើនពាណិជ្ជកម្មទ្វេភាគីរហូតដល់ ១ ពាន់លានដុល្លារ។
«ជាមួយនឹងទិសដៅនៃការជំរុញទំហំពាណិជ្ជកម្មឲ្យមានការកើនឡើងរហូតដល់១ពាន់លាន ដុល្លារ នៅពេលខាងមុខ ឯកឧត្តមប្រធានាធិបតី និងសម្តេចតេជោនាយករដ្ឋមន្រ្តី បានឯកភាពគ្នាក្នុងការជំរុញផ្នែកធុរកិច្ច នៃប្រទេសទាំងពីរ ធ្វើកិច្ចសហប្រតិបត្តិការគ្នា ក្នុងការបណ្តាក់ទុនវិនិយោគ លើវិស័យអាទិភាពចំពោះមុខរបស់កម្ពុជា ពិសេសគម្រោងហេដ្ឋារចនាសម្ព័ន្ធធំៗនៅកម្ពុជា»។
ក្នុងជំនួបកំពូលទ្វេភាគីនោះដែរ មេដឹកនាំទាំងពីរប្រទេសបានបង្ហាញពីការគាំទ្រទៅវិញទៅមកលើបញ្ហាសកលផងដែរ។
«មេដឹកនាំនៃប្រទេសទាំងពីរកម្ពុជា-តួកគី បានពិភាក្សាគ្នាយ៉ាងយកចិត្តទុកដាក់ទៅលើបញ្ហាទំនាក់ទំនងទ្វេភាគី ពហុភាគី បញ្ហាតំបន់ និងអន្តរជាតិ ការគាំទ្រពីគ្នាទៅវិញទៅមកក្នុងក្របខណ្ឌអន្តរជាតិ ពិសេសធ្វើការប្តេជ្ញាចិត្តរួមគ្នា ក្នុងការប្រយុទ្ធប្រឆាំងឧក្រិដ្ឋកម្ម និងប្រយុទ្ធប្រឆាំងទៅនឹងបណ្តាញអង្គការភេរវកម្មអន្តរជាតិ»។
នាយករដ្ឋមន្ត្រីកម្ពុជាបាននិយាយថា លោកគ្រោងនឹងបង្កើនកម្រិតការទូតនៅឆ្នាំ២០១៩ ពីស្ថានទូតអគ្គកុងស៊ុលទៅស្ថានទូតឬឯកអគ្គរាជទូតជាមួយប្រទេសតួកគីហើយលោកក៏បានស្នើសុំឱ្យប្រទេសតួកគីបន្ថែមទៀត ដើម្បីពង្រីកអាហារូបករណ៍ឱ្យនិស្សិតកម្ពុជា។
និស្សិតមួយចំនួនដែលបានជួបជាមួយលោកនាយករដ្ឋមន្រ្តីនៅទីក្រុងអ៊ីស្តង់ប៊ុលស្វាគមន៍ការសម្រេចរបស់មេដឹកនាំកម្ពុជាលើទំនាក់ទំនងរវាងប្រទេសទាំងពីរ។
លោក តាំ សាគីរីន និស្សិតផ្នែកវិស្វកម្មកុំព្យូទ័រនៅសាកលវិទ្យាល័យអង់ការ៉ាបាននិយាយថា គាត់សប្បាយរីករាយណាស់ដែលបានឃើញការចងភ្ជាប់គ្នានេះបាននិយាយថា វាគឺជាដំណឹងល្អដើម្បីរៀនអំពីវាហើយវាងាយស្រួលសម្រាប់សិស្សនិងក្រុមគ្រួសារ។
កញ្ញា តួត ស៊ីនីន សារី ដែលជានិស្សិតឱសថស្ថាននៅសាកលវិទ្យាល័យអង់ការ៉ា (ឆ្នាំទីពីរ) បានប្រាប់VOA ថា កញ្ញាមានអារម្មណ៍កក់ក្តៅនៅពេលរដ្ឋាភិបាលយកចិត្តទុកដាក់ដល់សិស្សនៅខាងក្រៅប្រទេស។
កញ្ញាបាននិយាយថា៖
«សម្រាប់ខ្ញុំ ខ្ញុំសប្បាយរីករាយណាស់ ព្រោះយើងមកទីនេះហើយយើងហាក់ដូចជាភាពកក់ក្តៅ ដែលយើងទទួលបានពីអ្នកដឹកនាំនូវការគាំទ្រពីកំពូល»។
កញ្ញាបន្តថា៖
«ដូច្នេះបើយើងមានស្ថានទូតនៅទីនេះ វានឹងជួយសម្របសម្រួលយ៉ាងខ្លាំងនូវអ្វីដែលសិស្សត្រូវការ»។
កញ្ញាបានជួបជាមួយលោកនាយករដ្ឋមន្ត្រី ហ៊ុន សែន កាលពីម្សិលមិញជាមួយក្រុមនិស្សិតដទៃ។ លោកបាននិយាយថា ចំណងទាក់ទងនៃប្រទេសទាំងពីរ នឹងនាំមកនូវអត្ថន័យជាច្រើនសម្រាប់ប្រទេសទាំងពីរដោយសារ កម្ពុជាជាប្រទេសធ្លាប់ជា ចក្រភពរាជាណាចក្រអង្គរនិងតួកគីគឺជាចក្រភពអូតូម៉ង់។
និស្សិតទាំងពីរនាក់បាននិយាយថា និស្សិតត្រូវរៀនភាសាចេះស្ទាត់ជំនាញនិងពូកែនៅថ្នាក់វិទ្យាល័យ ព្យាយាមរៀនសូត្រនិងតស៊ូសម្រាប់រយៈពេលពីរ បីឆ្នាំដំបូង។
ក្រុមនិស្សិតបាននិយាយបន្តថា មាននិស្សិតប្រហែល ៨១ នាក់ដែលបានមករៀននៅទីនេះហើយខ្លះទៀតបានចាកចេញ៕
