អ្នកតស៊ូមតិប្រឆាំងអំពើពុករលួយនិងជាអ្នកឃ្លាំមើលដំណើរការបោះឆ្នោតនៅកម្ពុជា លើកឡើងថា អ្នកនយោបាយខ្មែរ ដែលកំពុងប្រកួតប្រជែងគ្នា ដើម្បីដណ្ដើមអំណាចដឹកនាំប្រទេសនេះ គួរតែមានចិត្តសឿង ក្នុងការប្រកួតគ្នាដោយស្មើភាពនិងយុត្តិធម៌។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា បានថ្លែងបែបនេះ នៅក្នុងកម្មវិធី «Hello VOA» នៅថ្ងៃព្រហស្បតិ៍ ទី១១ ខែសីហានេះ៖
«អ្នកនយោបាយ គួរតែមានចិត្តសឿង ក្នុងការប្រកួតប្រជែងដោយយុត្តិធម៌តែម្តង។ មានន័យថា ឈ្នះដោយកិត្តិយស បើចាញ់ ក៏ចាញ់ដោយកិត្តិយស ដូចទឹកចិត្តកីឡាករ គឺប្រកួតបែបហ្នឹង ឲ្យអ្នកទស្សនាក៏ល្អមើល ហើយឲ្យអ្នកទស្សនាទាំងក្នុងនិងក្រៅប្រទេសពីគ្រប់ភាគី ពេញចិត្តនឹងមើលតែម្តង»។
ការថ្លែងបែបនេះ ធ្វើឡើង ខណៈដែលប្រទេសកម្ពុជា កំពុងរៀបចំការបោះឆ្នោតឃុំសង្កាត់របស់ខ្លួន ដែលគ្រោងធ្វើនៅឆ្នាំក្រោយ និងការបោះឆ្នោតជ្រើសរើសតំណាងរាស្ត្រ នៅឆ្នាំ២០១៨។
នៅកម្ពុជា គេតែងសង្កេតឃើញអ្នកនយោបាយតែងធ្វើដំណើរចុះមូលដ្ឋាន ដើម្បីជួបជាមួយប្រជាជនសាមញ្ញ ដូចជាអ្នកលក់ដូរតាមផ្សារ ឬអ្នករត់ម៉ូតូឌុបជាដើម នៅមុនរដូវកាលបោះឆ្នោតម្តងៗ។
រាល់ការចុះជួបប្រជាជនម្តងៗ បេក្ខជននយោបាយទាំងនោះ ជាពិសេសខាងគណបក្សកាន់អំណាច ដែលមានធនធានក្រាស់ក្រែល តែងនាំទៅជាមួយនូវថវិកានិងសម្ភារៈខ្លះៗ ដើម្បីចែកជូនប្រជាពលរដ្ឋ ដោយមានការថតផ្សាយផ្ទាល់ពីសកម្មភាពទាំងនេះ តាមបណ្ដាញសង្គមនានាទៀតផង។
ទង្វើបែបនេះ ត្រូវបានអ្នកវិភាគខ្លះមើលឃើញថា ជាការទិញទឹកចិត្តឬទាក់ទាញអ្នកបោះឆ្នោត ហើយបង្កើតឲ្យមានការប្រកួតប្រជែងដោយមិនស្មើភាពគ្នារវាងគូបដិបក្ខនយោបាយផ្សេងទៀត។
លោក ព្រាប កុល មានប្រសាសន៍ថា កម្ពុជា គួរតែកំណត់ឲ្យច្បាស់នៅក្នុងច្បាប់ដូចនៅតាមបណ្ដាប្រទេសជឿនលឿនមួយចំនួន អំពីចំនួនថវិកាឬសម្ភារៈដែលគណបក្សនយោបាយប្រកូតប្រជែងគ្នា អាចប្រើប្រាស់បាន ដើម្បីឃោសនារកសំឡេងឆ្នោតគាំទ្ររបស់ពួកគេ រៀងៗខ្លួន។
«សូម្បីតែរូបភាពឬផ្លាកយីហោ ឬក៏ Logo របស់គណបក្សនយោបាយឬក៏ខិត្តប័ណ្ណផ្សព្វផ្សាយហ្នឹង ក៏គេមិនឲ្យមានការបោះពុម្ពទំហំធំឬតូចជាងគ្នាផង។ អានេះ គេយកគោលការណ៍ស្មើភាពគ្នា គឺសំខាន់មែនទែន ក្នុងការប្រកួតប្រជែង»។
សូមចុចតំណភា្ជប់ខាងក្រោម ដើម្បីស្តាប់កម្មវិធី «Hello VOA» ទាំងស្រុង៖
