មានការគាំទ្រយ៉ាងច្រើនសន្ធឹកសន្ធាប់ពីសំណាក់គណបក្សទាំងពីរ សម្រាប់សមាជិកព្រឹទ្ធសភា លោក Jonh McCain និងជាឥស្សរជននយោបាយអាមេរិកមួយរូប បន្ទាប់ពី ការធ្វើរោគវិនិច្ឆ័យរបស់លោក ត្រូវបានគេបង្ហាញថា លោកមានជំងឺមហារីកខួរក្បាលដ៏កាចសាហាវ។
លោក McCain ត្រូវបានគេចាត់ទុកជាទូទៅថជាវីរបុរស ដោយសារលោកបានបម្រើជាតិក្នុងសង្គ្រាមវៀតណាម និងបានជាប់ពន្ធនាគាររយៈពេលប្រាំឆ្នាំ ក្នុងនាមជាឈ្លើយសឹក និងបានបម្រើការជាសមាជិកព្រឹទ្ធសភាអាមេរិកប្រចាំរដ្ឋ Arizona អស់រយៈពេល ៣១ ឆ្នាំ។
លោក John McCain គេចផុតពីការចាប់ផ្ដើមដ៏គ្រោះថ្នាក់។ លោកជាអ្នកបើកយន្តហោះឲ្យកងទ័ពជើងទឹកសហរដ្ឋអាមេរិក ហើយយន្តហោះរបស់លោកត្រូវបានគេបាញ់ទម្លាក់ចូលក្នុងបឹងមួយនៅទីក្រុង Hanoi។ លោកបានចំណាយពេល ៥ ឆ្នាំនៅទីនោះ ជាឈ្លើយសឹក ដោយរងនូវការវាយដុំ និងធ្វើទារុណកម្ម។ ហើយលោកមិនដែលនិយាយច្រើនពីរឿងនោះទេ។
ប៉ុន្តែលោកបាននិយាយថា លោកបានទៅទស្សនកិច្ចនៅប្រទេសវៀតណាម ជាង ២០ ដងចាប់តាំងពីពេលនោះមក និងកិច្ចខំប្រឹងប្រែងរបស់លោកក្នុងការនាំអដ្ឋិធាតុរបស់ទាហានអាមេរិកដែលបានពលីជីវិតនៅក្នុងសង្គ្រាមវៀតណាម។ នេះជាសម្ដីរបស់លោក McCain សមាជិកព្រឹទ្ធសភាប្រចាំរដ្ឋ Arizonaមកកាន់ VOA កាលពីឆ្នាំមុន។
«ជាដំបូង ខ្ញុំបានធ្វើការយ៉ាងស្វិតស្វាញដើម្បីសម្រួលដល់ទំនាក់ទំនងរបស់យើង។ ខ្ញុំចង់ព្យាបាលរបួសនៃសង្គ្រាមនេះ។ ខ្ញុំចង់ឲ្យអតីតយុទ្ធជនរបស់យើងដែលមិនអាចវិលត្រឡប់មកមាតុភូមិវិញ បានមកដល់ប្រទេសយើងវិញទាំងអស់គ្នា។ យ៉ាងណាក៏ដោយ ខ្ញុំអាចប្រាប់អ្នកថា មានអតីតយុទ្ធជនដែលខ្ញុំស្គាល់ជាច្រើនបាននាំគ្រួសារពួកគេត្រឡប់ទៅប្រទេសវៀតណាម ដើម្បីបង្ហាញពីកន្លែងដែលពួកគេធ្លាប់បម្រើការ និងប្រយុទ្ធ។ វាជាការពិត...ហើយទំនាក់ទំនងរវាងជនជាតិវៀតណាម និងពលរដ្ឋអាមេរិកាំងមិនដែលល្អប្រសើរជាងសព្វថ្ងៃឡើយ»។
លោក McCain គឺជាប្រធានគណៈកម្មាធិការសេវាកម្មយោធាប្រចាំព្រឹទ្ធសភាមកពីគណបក្សសាធារណរដ្ឋ និងជាជើងឯកយោធាអាមេរិកមួយរូប។ លោកក៏ត្រូវបានគេស្គាល់តាមរយៈការធ្វើការជាមួយក្រុមប្រជាធិបតេយ្យ លើបញ្ហាបម្រែបម្រួលអាកាសធាតុ កំណែទម្រង់ច្បាប់អន្តោប្រវេសន៍ និងយុទ្ធនាការកំណែទម្រង់ហិរញ្ញវត្ថុ។
លោក McCain ធ្លាប់ឈរឈ្មោះជាប្រធានាធិបតីចំនួនពីរលើក។ នៅក្នុងឆ្នាំ ២០០៨ លោកត្រូវបានជ្រើសរើសជាបេក្ខជនប្រធានាធិបតីតំណាងគណបក្សសាធារណរដ្ឋតទល់នឹងសមាជិកព្រឹទ្ធសភាលោក បរ៉ាក់ អូបាម៉ា។ មុនថ្ងៃបោះឆ្នោតពីរបីសប្ដាហ៍ លោក McCain បានរារាំងអ្នកគាំទ្រមួយរូបរបស់លោក ដែលបានព្យាយាមប្រមាថលោក អូបាម៉ា។
ស្ត្រីចំណាស់ម្នាក់ដែលជាអ្នកគាំទ្របាននិយាយពីលោក Obama ទៅកាន់លោក McCain ថា៖ «គាត់ជាជនជាតិអារ៉ាប់»។
លោក McCain ឆ្លើយថា៖ «ទេ លោកស្រី! គាត់ជាមនុស្សសាមញ្ញ បុរសម្នាក់គិតគូពីគ្រួសារ និងជាពលរដ្ឋអាមេរិកាំងម្នាក់។ ខ្ញុំគ្រាន់តែមានការខ្វែងគំនិតជាមួយគាត់ប៉ុណ្ណោះ»។
ក្នុងចំណោមមនុស្សដំបូងដែលបញ្ចេញប្រតិកម្មចំពោះព័ត៌មានស្ដីពីជំងឺមហារីកខួរក្បាលរបស់លោក McCian គឺលោក អូបាម៉ា។ លោក អូបាម៉ា បានសរសេរក្នុង Twitter ថា៖ «លោក John McCain គឺជាវីរបុរសអាមេរិកាំងមួយរូប និងជាអ្នកប្រយុទ្ធមួយរូបក្នុងចំណោមអ្នកប្រយុទ្ធដ៏អង់អាចបំផុតដែលខ្ញុំធ្លាប់ស្គាល់។ ជំងឺមហារីកមិនដឹងទេ ថាតើខ្លួនកំពុងប្រឈមមុខជាមួយអ្នកណា។ ខំប្រឹងឡើង John»។
មនោសញ្ចេតនាដូចគ្នានេះ ក៏ត្រូវបានលើកឡើងផងដែរដោយ លោកប្រធានាធិបតី ដូណាល់ ត្រាំ និងសហការីរបស់លោក McCainនៅវិមានសភាជាច្រើនរូប ដែលកំពុងទន្ទឹងរង់ចាំស្វាគមន៍លោកត្រឡប់មកធ្វើការវិញក្នុងពេលឆាប់ៗនេះ៕
ប្រែសម្រួលដោយ សឿន វឌ្ឍនា
