កាលពីថ្ងៃច័ន្ទ លោកប្រធានាធិបតីស.រ.អា. បារ៉ាក់ អូបាម៉ា បានមានប្រសាសន៍ប្រឆាំងនឹងបុរេនិច្ឆ័យខាងសាសនានៅក្នុងពិធីជប់លៀងអាហារពេលល្ងាចមួយនៅក្នុងសេតវិមានដើម្បីប្រារព្ធការចាប់ផ្តើមខែ Ramadan នៃសាសនាអ៊ីស្លាម។
សមាជិកមួយចំនួននៃសហគមន៍អ្នកការទូត សមាជិកសភា និងជនជាតិអាមេរិកាំងកាន់សាសនាអ៊ីស្លាមបានចូលរួមក្នុងការបរិភោគអាហារពេលល្ងាចតាមប្រពៃណី Iftar ដែលបន្ទាប់មកមានការមិនបរិភោគអាហារ និងទឹកជារៀងរាល់ថ្ងៃចាប់តាំងពីពេលថ្ងៃរះរហូតដល់ពេលថ្ងៃលិច។
លោកអូបាម៉ាបានមានប្រសាសន៍ថាការបរិភោគអាហារពេលយប់ Iftar ជាការរំឮកអំពី «សេរីភាពដែលចងភ្ជាប់យើងជាមួយគ្នាជាប្រជារាស្ត្រអាមេរិកាំង» ដោយរួមមាន «សិទ្ធិដែលមិនអាចរំលោភបាន ដើម្បីគោរពជំនឿសាសនារបស់យើងដោយសេរី»។ លោកបានទទួលស្គាល់ក្រុមសកម្មជនអាមេរិកាំងកាន់សាសនាអ៊ីស្លាមវ័យក្មេងមួយចំនួននៅក្នុងក្រុមមនុស្សដែលស្តាប់លោកនិយាយ ដោយរួមមាន នាង Samantha Elauf ដែលបានឈ្នះក្តីមួយនៅក្នុងតុលាការកំពូលស.រ.អា.ដើម្បីការពារសិទ្ធិរបស់នាងក្នុងការពាក់កន្សែងរុំក្បាលនៅក្រោយនាងត្រូវបានបដិសេធមិនព្រមទទួលឱ្យធ្វើការជាអ្នកលក់ដូរនៅក្នុងហាងលក់សម្លៀកបំពាក់មួយកន្លែង។
លោកអូបាម៉ាក៏បានថ្កោលទោសឧប្បត្តិហេតុដ៏ប្រល័យមួយចំនួន ដែលមានទាក់ទិននឹងសាសនាកាលពីពេលថ្មីៗនេះដោយរួមមាន ការបាញ់សម្លាប់មនុស្សច្រើននាក់ កាលពីសប្តាហ៍មុននៅក្នុងព្រះវិហារគ្រឹស្តសាសនា African American Church នៅក្នុងក្រុង Charleston រដ្ឋ South Carolina៕
