លោក Nana Akufo-Addo បានស្បថចូលកាន់តំណែងជាប្រធានាធិបតីកាលពីថ្ងៃសៅរ៍នៅចំពោះមុខសភា និងប្រធានាធិបតីមកពីប្រទេសនានានៅលើទ្វីបអាហ្រ្វិក ឥស្សរជននិងប្រជាពលរដ្ឋហ្គាណារាប់ពាន់នាក់នៅទីលាន Black Star។ ពិធីស្បថកាន់តំណែងនេះមានភាពស្រស់ស្អាត ដោយសារប្រជាពលរដ្ឋហ្គាណាជាច្រើននាក់បានតុបតែងខ្លួន និងស្លៀកពាក់ប្រពៃណីធ្វើពីក្រណាត់ត្បាញដ៏ស្រស់ និងមានប្រជាប្រិយពីភាគខាងត្បូងប្រទេសហ្គាណា និងធ្វើពីក្រណាត់ត្បាញបែបធូរលុង Fugu មកពីភាគខាងជើងនៃប្រទេសនេះ។
ប៉ុន្តែកិច្ចការដ៏ពិបាកនៅរង់ចាំប្រធានាធិបតីថ្មី ដែលត្រូវប្រឈមជាមួយនឹងសេដ្ឋកិច្ចទន់ខ្សោយ ដោយមានប្រាក់បំណុលដែលចេះតែកើនឡើង អតិផរណាខ្ពស់ ការធ្លាក់ចុះនៃតម្លៃទំនិញ និងការធ្លាក់តម្លៃប្រាក់ Cedi ជាលំដាប់។ នៅក្នុងសុន្ទរកថាបើកកម្មវិធី លោកប្រធានាធិបតី Akufo-Addo បានសន្យាថា នឹងមានភាពចម្រុងចម្រើនសម្រាប់ប្រជាពលរដ្ឋហ្គាណាទាំងអស់។
«យើងត្រូវតែបង្កើតទ្រព្យសម្បត្តិ និងស្តារសុភមង្គលឲ្យប្រទេសជាតិរបស់យើងឡើងវិញ។ យើងអាចធ្វើរឿងទាំងនេះបាននៅពេលដែលយើងមានប្រជាជនដែលមានការអប់រំ និងជំនាញដែលមានសមត្ថភាពក្នុងការប្រកួតប្រជែងនៅក្នុងសេដ្ឋកិច្ចសាកល។ យើងត្រូវតែពង្រីកការយល់ដឹងរបស់យើង ហើយចាប់យកវិទ្យាសាស្ត្រ និងបច្ចេកវិទ្យាជាឧបករណ៍សំខាន់សម្រាប់ការអភិវឌ្ឍរបស់យើង។ យើងនឹងផ្តល់ទស្សនៈ និងទិសដៅ ហើយបញ្ចាំងពន្លឺតាមម៌ាគាសហគ្រិន និងកសិកររបស់យើង។ ជាការពិតណាស់ យើងពឹងផ្អែកទៅលើវិស័យឯកជនដ៏រស់រវើកដើម្បីជំរុញឲ្យមានកំណើន និងបង្កើតការងារ»។
ប្រជាពលរដ្ឋហ្គាណាវ័យក្មេងមួយចំនួនគឺជាអ្នកមានការរំពឹងទុកខ្ពស់ចំពោះក្តីសង្ឈឹមពីរដ្ឋាភិបាលលោក Akufo-Addo មួយនេះ។ Salifu Fatau ជាអ្នកលក់ម្នាក់និយាយថាការងារត្រូវតែជាអាទិភាពខ្ពស់ជាងគេ។
«សម្រាប់មនុស្សវ័យក្មេង យើងត្រូវការការងារ និងប្រាក់ខែល្អ។ យើងកំពុងមើលគាត់ដើម្បីមើលលទ្ធផលនោះថាតើគាត់អាចបង្កើតការងារច្រើនសម្រាប់យើងជាយុវជនដែរឬយ៉ាងណា។ ពេលនេះ លោកបានផ្តល់ការសន្យាឲ្យយើង ដូច្នេះយើងរង់ចាំមើលពាក្យសម្តីរបស់គាត់»។
អ្នកស្រី Fadilatu Ahmed ដែលជាជាងគំនូរម្នាក់និយាយថា គាត់មានការព្រួយបារម្ភអំពីសេដ្ឋកិច្ច។
«ខ្ញុំកំពុងរំពឹងថារដ្ឋាភិបាល ឬប្រធានាធិបតីថ្មីរបស់យើងធ្វើការលើសេដ្ឋកិច្ចរបស់ប្រទេសនេះ ពីព្រោះថានោះគឺជាមូលហេតុចម្បងដែលខ្ញុំបានបោះឆ្នោតឲ្យលោក។ សេដ្ឋកិច្ចរបស់ប្រទេសនេះគឺមិនល្អទាល់តែសោះ ប្រសិនបើអ្នកមើលទៅលើតម្លៃនៃប្រាក់របស់យើងគឺវាមានតម្លៃថោកខ្លាំងណាស់។ វិបត្តិថាមពល ការដាច់ចរន្តអគ្គិសនី គឺគ្រប់គ្រាន់ហើយ។ យើងជួបអស់ហើយ»។
Faustina Dogbevi សង្ឃឹមថាការចំណាយលើការសិក្សានឹងមានតម្លៃទាប។
«ខ្ញុំចង់ឲ្យការចំណាយទៅលើការអប់រំយ៉ាងហោចណាស់ទាបជាងនេះបន្តិច ដូច្នេះព្រជាពលរដ្ឋអាចបញ្ជូនកូនស្រីរបស់ពួកគេទៅសាលារៀន និងអាចបង់ថ្លៃសាលារៀនបាន»។
ការកាន់តំណែងរបស់ប្រធានាធិបតីមុនគឺ លោក John Maham នាំឲ្យមានរឿងអាស្រូវអំពើពុករលួយ និងការការពារជាក់ស្តែងលើមន្រ្តីដែលត្រូវបានចោទប្រកាន់។ ប្រធានាធិបតីថ្មីបានព្រមានប្រឆាំងនឹងអំពើពុករលួយក្រោមរដ្ឋាភិបាលរបស់លោក។
«ខ្ញុំនឹងការពារកញ្ចប់ថវិកាសាធារណៈដោយទាមទារឲ្យមានតម្លៃទឹកប្រាក់នៅក្នុងប្រតិបត្តិការជាសាធារណៈទាំងអស់។ សេវាសាធារណៈគឺគ្រាន់តែជាសេវា ហើយ មិនមែនជាកន្លែងសម្រាប់រកប្រាក់នោះទេ។ ប្រាក់នឹងត្រូវគេរកបាននៅក្នុងវិស័យឯកជនមិនមែននៅក្នុងវិស័យសាធារណៈនោះទេ។ វិធានការនឹងត្រូវដាក់ចេញដើម្បីធានាចំពោះបញ្ហានេះ»។
ទន្ទឹមនឹងនោះដែរ នៅលើប្រព័ន្ធផ្សព្វផ្សាយសង្គម ប្រធានាធិបតីលោក Akufo-Addo ត្រូវបានគេចោទប្រកាន់ពីការប្រើប្រាស់ពាក្យសម្តីខ្លះពីសុន្ទរកថារបស់អតីតប្រធានាធិបតីរបស់អាមេរិកលោក George W.Bush ថាជាសម្តីផ្ទាល់ខ្លួននៅក្នុងសុន្ទរកថាកាន់តំណែងរបស់លោក។ នាយកផ្នែកទំនាក់ទំនងរបស់លោកប្រធានាធិបតីបានចេញសេចក្តីប្រកាសសុំទោស។
ប្រែសម្រួលដោយ ផន បុប្ផា
