លោក Joe Biden រំពឹង​ថា បេក្ខភាព​ប្រធានាធិបតី​របស់​លោក​នឹង​ក្លាយ​ជា​ផ្លូវការ​​ក្នុង​សប្ដាហ៍​នេះ នៅ​ពេល​ដែល​លោក​ទទួល​យក​ការ​តែងតាំង​ជា​ផ្លូវការ​ពី​គណបក្ស​នៅ​ឯ​សន្និបាត​ជាតិ​គណបក្ស​ប្រជាធិបតេយ្យ។ លោក Biden បាន​បង្កើត​ឲ្យ​មាន​ប្រវត្តិសាស្ត្រ​កាល​ពី​សប្ដាហ៍​មុន នៅ​ពេល​ដែល​លោក​បាន​ជ្រើសរើស​អ្នកស្រី Kamala Harris សមាជិក​ព្រឹទ្ធសភា​នៃ​រដ្ឋ California ឲ្យ​ឈរឈ្មោះ​ជាមួយ​នឹង​លោក​សម្រាប់​តំណែង​ជា​អនុ​ប្រធានាធិបតី។ អ្នកស្រី Harris គឺ​ជា​ស្ត្រី​ស្បែក​ខ្មៅ​ដំបូង​បង្អស់ និង​ក៏​ជា​បេក្ខជន​ដំបូងបង្អស់​ដែល​មាន​ខ្សែស្រឡាយ​ជនជាតិ​ឥណ្ឌា ដែល​មាន​ឱកាស​ជួយ​គណបក្ស​ប្រជាធិបតេយ្យ​ប្រជែង​យក​តំណែង​ប្រធានាធិបតី។ ក្នុង​សប្ដាហ៍​នេះ អ្នកស្រី​ក៏​នឹង​ចូលរួម​បង្កើត​ប្រវត្តិសាស្ត្រ​នៅ​ឯ​សន្និបាត​គណបក្ស​ប្រជាធិបតេយ្យ ដែល​នឹង​ប្រព្រឹត្ត​ទៅ​ភាគច្រើន​តាម​អនឡាញ​ផង​ដែរ។ លោក Arash Arabasadi នៃ VOA រាយការណ៍​លម្អិត​អំពី​រឿង​នេះ។ អ្នកស្រី ហុង ចិន្ដា ជូន​សេចក្ដីប្រែសម្រួល៕