អ្នកនយោបាយចាស់វស្សាលោកមាជ សុវណ្ណារ៉ា នៅថ្ងៃអង្គារនេះបានក្លាយជាប្រធានគណបក្សនយោបាយដែលទើបតែបង្កើតថ្មីមួយ គឺ «គណបក្សជំនាន់ថ្មី» ដែលបានរៀបចំសមាជបក្សលើកដំបូងរបស់ខ្លួននៅខេត្តសៀមរាប កាលពីព្រឹកថ្ងៃអង្គារ។ លោក បានប្តេជ្ញានាំមកឱ្យប្រទេសកម្ពុជានូវលទ្ធិប្រជាធិបតេយ្យពិតប្រាកដ។
លោក មាជ សុវណ្ណារ៉ា គឺជាអតីតមន្ត្រីជាន់ខ្ពស់របស់គណបក្សសង្គ្រោះជាតិ ទទួលបន្ទុកផ្នែកព័ត៌មាន ហើយក៏ធ្លាប់ជាប់ពន្ធនាគារ ចំពោះការពាក់ព័ន្ធរបស់ក្នុងបាតុកម្មរៀបចំដោយអតីតគណបក្សជំទាស់ក្រោយការបោះឆ្នោតជាតិឆ្នាំ ២០១៣។
ថ្លែងនៅក្នុងពិធីសមាជលើកដំបូងរបស់គណបក្សជំនាន់ថ្មីលោក មាជ សុវណ្ណារ៉ា អតីតប្រធាននាយកដ្ឋានព័ត៌មានរបស់អតីតគណបក្សសង្គ្រោះជាតិប្រាប់អ្នកគាំទ្រគណបក្សថា គណបក្សជំនាន់ថ្មីនឹងធ្វើឱ្យកម្ពុជាមានប្រជាធិបតេយ្យពិតប្រាកដ សេចក្តីថ្លៃថ្នូរនិងភាពរុងរឿងដែលស្មើភាពគ្នា។
លោកថ្លែងថា៖« ជយោគណបក្សជំនាន់ថ្មី ជយោយុវជនមានគំនិតថ្មី ជយោឈាមថ្មី ជយោការគិតថ្មី ធ្វើថ្មីដើម្បីសេរីភាព ដើម្បីយុត្តិធម៌និងសន្តិភាពមួយដែលមានតម្លាភាពនិងគណនេយ្យភាព អ្វីដែលជំនាន់ថ្មីចង់បាន។ ការគិតថ្មី ការធ្វើថ្មីដោយប្រជាពលរដ្ឋខ្មែរ ដើម្បីប្រជាពលរដ្ឋខ្មែរ និងសម្រាប់ប្រជាពលរដ្ឋខ្មែរ មានសេដ្ឋកិច្ចគ្រួសារធូរធា មានភាពខ្ពស់មុខខ្ពស់មាត់ សម្បូរសប្បាយ និងរីករាយជាមួយប្រជាធិបតេយ្យពិតប្រាកដ និងភាពស្អាតស្អំសេវាកម្មសាធារណ ជាទីសក្ការ ជាទីជីវិតថ្លៃបំផុតរបស់ប្អូនរបស់ប្រជាពលរដ្ឋខ្មែរគឺសុខភាព»។
បើតាមលោក មាជ សុវណ្ណារ៉ា គណបក្សជំនាន់ថ្មីមានចក្ខុវិស័យចង់ឃើញប្រជាពលរដ្ឋកម្ពុជាទាំងអស់ ទាំងក្នុងប្រទេស និងក្រៅប្រទេស ជាប្រជាជាតិរុងរឿង ថ្កុំថ្កើង មានការកោតសរសើរពីប្រជាជាតិខ្មែរខ្លួនឯង និងពីប្រជាជាតិផ្សេងៗទៀតនៃពិភពលោក ថាជាប្រជាជាតិខ្មែរមួយនេះ មានការគោរព លើកស្ទួយ និងការពារសិទ្ធិមនុស្ស និងមានប្រជាធិតេយ្យពិតប្រាកដ មានស្ថិរភាព អធិបតេយ្យភាព សុភមង្គល ជាប្រជាជាតិមួយដែលស្អាតស្អំ និងមិនពុករលួយ។
គណបក្សជំនាន់ថ្មី ត្រូវបានចុះឈ្មោះក្នុងបញ្ជីគណបក្សនយោបាយជាផ្លូវការនៅក្រសួងមហាផ្ទៃ កាលពីថ្ងៃទី ១២ ខែមេសា ឆ្នាំ ២០២៤ ហើយទីស្នាក់ការកណ្តាលរបស់គណបក្សថ្មីថ្មោងនេះ គឺស្ថិតនៅភូមិច្រេស ឃុំកណ្តែក ស្រុកប្រាសាទបាគង ខេត្តសៀមរាប។
អនុប្រធានគណបក្សជំនាន់ថ្មី លោក ប៉ាត មុន្នី លើកឡើងថា មូលហេតុនៃការកកើតឡើងគណបក្សជំនាន់ថ្មី គឺភាពអយុត្តិធម៌ ការមិនគោរពសិទ្ធិសេរីភាព និងការគាំពារស្មើមុខស្មើមាត់ពីច្បាប់ចំពោះពលរដ្ឋនៅ ប្រទេសកម្ពុជា។
លោកថ្លែងថា៖« ដែលសព្វថ្ងៃយើងឃើញមានការរើសអើង ហើយមិនទាន់បានទទួលបាននូវការមើលថែទាំដោយច្បាប់ សិទ្ធិសេរីភាពត្រឹមត្រូវនូវឡើយ។អ៊ីចឹងបានយើងរៀបចំគណបក្សជំនាន់ថ្មីដើម្បីរួមគ្នាធ្វើកិច្ចការងារនេះ ហើយយើងបន្តទៅអនាគតជានិរន្តន៍»។
ក្នុងនាមជាវាគ្មិនកិត្តិយសអ្នកវិភាគនយោបាយ លោក មាស នី លើកឡើងថាលោកតែងតែលើកទឹកចិត្តនៅពេលមានគណបក្សថ្មីៗកើតឡើងដើម្បីឱ្យមានការគិតពីប្រជាធិបតេយ្យ និងថាការធ្វើនយោបាយនៅកម្ពុជាមានទាំងការសប្បាយនិងការឈឹចាប់ជាមួយគ្នា។
លោកបន្ថែមថា ប្រជាធិបតេយ្យនៅកម្ពុជាស្ថិតក្នុងស្ថានភាពផុយស្រួយ ដោយសារតែការមានទស្សនផ្សេងគ្នាទៅលើនិយមន័យនៃប្រជាធិបតេយ្យ ការលាបពណ៌គ្នាបែបចងគំនុំ និងបង្កសត្រូវ។
អ្នកវិភាគនយោបាយលោក មាស នី ប្រាប់វីអូអេថា៖ «រឿងសំខាន់ដើម្បីយើងអាចធ្វើដំណើរឆ្ពោះទៅរកនយោបាយមួយដែលឈានទៅរកផ្សះផ្សាជាតិគឺធ្វើម៉េចការពារកុំឱ្យមានភាពជ្រុលនិយមដែលអ្នកនយោបាយកន្លងមកចូលទៅដល់កន្លែងមួយដែលនិយាយគ្នាលែងកើត។ អ៊ីចឹងកាលណាយើងធ្វើនយោបាយមួយដល់និយាយគ្នាលែងបាន បានន័យថាដំណើរការប្រជាធិបតេយ្យដែលយើងកំពុងតែដឹកនាំបរាជ័យហើយ»។
គួរបញ្ជាក់ថាលោក មាជ សុវណ្ណារ៉ា ធ្លាប់ជាប់ពន្ធនាគារចំនួនពីរដង បន្ទាប់ពីមានការប្រេះឆា នយោបាយរវាងគណបក្សធំៗពីរដែលមានអាសនៈក្នុងរដ្ឋសភា គឺគណបក្សប្រជាជនកម្ពុជារបស់ លោក ហ៊ុនសែន និងអតីតគណបក្សសង្គ្រោះជាតិ របស់លោក សម រង្ស៊ី និងលោក កឹម សុខា។ ក្រៅពីលោក មាជ សុវណ្ណារ៉ា មានសកម្មជននិង មន្ត្រីអតីតគណបក្សជំទាស់នោះជាច្រើនរូបទៀតត្រូវបានសាលាដំបូងរាជធានីភ្នំពេញចាប់មកផ្តន្ទាទោសជាបន្តបន្ទាប់។ ការចាប់ខ្លួននេះបានទទួលរងការរិះគន់យ៉ាងខ្លាំងពីសំណាក់មន្ត្រីសិទ្ធិមនុស្សជាតិនិងអន្តរជាតិ៕
វេទិកាបញ្ចេញមតិ