- ដោយ Reuters
លោក Joe Biden ប្រធានាធិបតីសហរដ្ឋអាមេរិក បានថ្លែងអរគុណនាយករដ្ឋមន្ត្រីកម្ពុជា លោក ហ៊ុន សែន ដែលជាប្រធានអាស៊ានប្តូរវេន ចំពោះសេចក្តីថ្លែងការណ៍សំខាន់ៗរបស់លោក អំពីសង្គ្រាមឈ្លានពានរបស់រុស្ស៊ីនៅអ៊ុយក្រែន។ ជាមួយគ្នានោះ លោក Biden ក៏សង្ឃឹមថានឹងឃើញលទ្ធិប្រជាធិបតេយ្យត្រូវបានស្តាឡើងវិញនៅប្រទេសមីយ៉ាន់ម៉ា ដែលកំពុងស្ថិតក្រោមការគ្រប់គ្រងរបស់របបយោធា។ លោក Joe Biden បានថ្លែងដូច្នេះ មុនជំនួបទ្វេភាគីជាមួយលោក ហ៊ុន សែន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters៕
លោក Dmytro Kuleba រដ្ឋមន្ត្រីការបរទេសអ៊ុយក្រែន បានសង្កត់ធ្ងន់ទៅកាន់ប្រទេសជាសមាជិកអាស៊ាន ឲ្យគាំទ្រដល់អ៊ុយក្រែនទាំងខាងនយោបាយនិងសម្ភារៈ ដើម្បីជួយដល់ការប្រយុទ្ធតស៊ូរបស់អ៊ុយក្រែនប្រឆាំងនឹងរុស្ស៊ី។ ជាមួយគ្នានោះ លោកក៏បានចោទរដ្ឋាភិបាលរុស្ស៊ីថាកំពុងលែង «ល្បែងទុរភិក្ស» ជាមួយនឹងពិភពលោក ដោយរារាំងការដឹកជញ្ជូនគ្រាប់ធញ្ញជាតិនិងផលិតផលកសិកម្មផ្សេងៗទៀតរបស់អ៊ុយក្រែន។ លោក Kuleba បានថ្លែងដូច្នេះទៅកាន់ក្រុមអ្នកសារព័ត៌មាន នៅក្នុងសន្និសីទសារព័ត៌មានមួយ ក្រោយកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនានា នៅថ្ងៃសៅរ៍នេះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន The Associated Press៕
មេដឹកនាំអាស៊ានមកពី ៩ ប្រទេសលើកលែងមីយ៉ាន់ម៉ា បានជួបពិភាក្សាគ្នាជាមួយនាយករដ្ឋមន្ត្រីជប៉ុនលោក Fumio Kishida ប្រធានាធិបតីកូរ៉េខាងត្បូងលោក Yoon Suk-yeol និងលោក Li Keqiang នាយករដ្ឋមន្ត្រីចិន នៅក្នុងកិច្ចប្រជុំកំពូលអាស៊ានបូកបីលើកទី ២៥ នៅរាជធានីភ្នំពេញ ប្រទេសកម្ពុជា នាព្រឹកថ្ងៃសៅរ៍នេះ។ កិច្ចពិភាក្សារវាងមេដឹកនាំទាំងនេះ ផ្តោតសំខាន់លើសន្តិសុខ និងកិច្ចសហប្រតិបត្តិការក្នុងតំបន់ឥណ្ឌូប៉ាស៊ីហ្វិក និងតំបន់អាស៊ី ខណៈភាពតានតឹងនៅឧបទ្វីបកូរ៉េ កោះតៃវ៉ាន់ និងសមុទ្រចិនខាងត្បូងនៅតែជាបញ្ហាប្រឈម៕
ទស្សនាទិដ្ឋភាពនៃការធ្វើដំណើរមកដល់រាជធានីភ្នំពេញរបស់ប្រធានាធិបតីសហរដ្ឋអាមេរិកលោក Joe Biden និងគណៈប្រតិភូអាមេរិក ដើម្បីចូលរួមកិច្ចប្រជុំកំពូលអាស៊ាន អាមេរិក និងកិច្ចប្រជុំកំពូលពាក់ព័ន្ធនានា។