- ដោយ ហ៊ុល រស្មី
អាជ្ញាធរចាប់ផ្តើមបិទផ្លូវ ខណៈរដ្ឋាភិបាលចេញបទបញ្ជាកំហិតការធ្វើដំណើរ
ភ្នំពេញ — អាជ្ញាធរមានសមត្ថកិច្ចបានចាប់ផ្តើមបិទផ្លូវតភ្ជាប់ពីទីក្រុងភ្នំពេញទៅតាមបណ្តាខេត្តនានា ដែលជាការអនុវត្តបទបញ្ជាកំហិតការធ្វើដំណើរនៅទូទាំងប្រទេស ក្នុងគោលដៅមួយ ដែលលោកនាយករដ្ឋមន្រ្តី ហ៊ុន សែន ថាដើម្បីទប់ស្កាត់ការត្រឡប់ទៅស្រុកកំណើតរបស់កម្មករ។
ប្រជាពលរដ្ឋមួយចំនួនដែល VOA សាកសួរ បានសាទរការបិទផ្លូវនេះ តែពួកគេចង់ឃើញការបន្ធូរបន្ថយសម្រាប់អ្នកធ្វើដំណើរដោយម៉ូតូ។ ពលរដ្ឋខ្លះបារម្ភពីការធ្លាក់ចុះប្រាក់ចំណូល ដោយសារការរឹតបន្តឹងការធ្វើដំណើរឆ្លងកាត់រាជធានី និងខេត្តនានា។
លោក យស់ ស័ក្តិ វ័យ៤៧ឆ្នាំ ជាកម្មករសំណង់និងជាពលរដ្ឋរស់នៅ ខេត្តតាកែវ បានប្រាប់ VOA នៅត្រង់តំបន់រង្វង់មូលគួរស្រូវ ឆ្ពោះទៅខេត្តតាកែវ ថា លោកខកខានមិនបានទៅជួបប្រពន្ធកូននៅស្រុកកំណើត ដោយសារលោកមិនបានដឹងពីបទបញ្ជារបស់រដ្ឋាភិបាល ដែលហាមការធ្វើដំណើរឆ្លងពីទីក្រុងភ្នំពេញ ទៅតាមបណ្តាខេត្ត។
«ទើបឃើញលើកទីមួយហ្នឹង! រួចហើយអត់ដឹង។ បើដឹងពីថ្ងៃមុន ខ្ញុំទៅបាត់តាំងពីម្សិលអីទៅ។ ម្សិលអត់ទាន់បិទផងហ្នឹង! ហើយអានេះពីព្រឹក គេបិទ តែអ្នកមានបង្វេចមានអីទេណ៎ា។ ម៉ូតូទទេរៗអី ឌុបគ្នាអីទៅបាន។ ឥឡូវបិទទាំងម៉ូតូ ទាំងអស់ម៉ូតូក៏មិនឲ្យទៅ»។
លោកបន្ថែមថា អាជ្ញាធរមានសមត្ថកិច្ចគួរតែមានការបន្ធូរបន្ថយឲ្យអ្នកបើកបរដោយម៉ូតូអាចធ្វើដំណើរត្រឡប់ទៅស្រុកកំណើត ដើម្បីបានជួបសាច់ញាតិក្នុងពេលចូលឆ្នាំខ្មែរ។
«បើម៉ូតូពីរៗនាក់ម្នាក់អី សមតែឲ្យគ្នាទៅ ហើយអានេះមិនដឹងម៉េចបើគេអត់ឲ្យទៅតែម្តងមិនដឹងថាម៉េចអីចឹង!»
- ដោយ កាន់ វិច្ឆិកា
ពន្ធនាគារធ្វើតេស្តអ្នកជាប់ឃុំ ៥នាក់រកវីរុសកូរ៉ូណា ខណៈផ្អាកការសួរសុខទុក្ខ
ភ្នំពេញ — មន្រ្តីពន្ធនាគារឲ្យដឹងថា អ្នកជាប់ឃុំចំនួន ៥នាក់ ត្រូវបានធ្វើតេស្តអវិជ្ជមានមេរោគកូរ៉ូណា ខណៈពន្ធនាគារទូទាំងប្រទេស ដែលមានអ្នកជាប់ឃុំសរុប ៣៨០០០នាក់ ត្រូវបានបង្កើនអនាម័យ និងការការពារដើម្បីទប់ស្កាត់លទ្ធភាពនៃការចម្លងមេរោគកូរ៉ូណា ក្នុងនោះមានការផ្អាកសួរសុខទុក្ខរបស់ក្រុមគ្រួសារជាដើម។
នៅថ្ងៃសុក្រនេះ គណៈកម្មាធិការអន្តរជាតិនៃកាកបាទក្រហម (ICRC) បានប្រគល់សម្ភារៈអនាម័យចំនួន ២០តោន ដល់អគ្គនាយកដ្ឋានពន្ធនាគារ ដើម្បីបង្ការទប់ស្កាត់ការរាតត្បាតជំងឺកូវីដ១៩ នៅតាមមណ្ឌលអប់រំកែប្រែនិងពន្ធនាគារ នៅទូទាំងប្រទេស។
ក្នុងពិធីប្រគល់សម្ភារៈ ដែលធ្វើឡើងនៅពន្ធនាគារព្រៃស ឬមណ្ឌលកែប្រែម១ រាជធានីភ្នំពេញ នាថ្ងៃសុក្រនេះលោក ចាន់ គីមសេង អគ្គនាយកនៃអគ្គនាយកដ្ឋានពន្ធនាគារ នៃក្រសួងមហាផ្ទៃ បានប្រាប់អ្នកសារព័ត៌មានថា ចាប់ពីមានការកើនឡើង អ្នកឆ្លងជំងឺកូវីដ១៩ នៅកម្ពុជា អគ្គនាយកដ្ឋានពន្ធនាគារបានបញ្ជាឲ្យមានការតាមដានសុខភាពអ្នកជាប់ឃុំ ផ្អាកការសួរសុខទុក្ខ ដាក់អ្នកជាប់ឃុំថ្មីនៅដាច់ដោយឡែកចំនួន១៤ថ្ងៃនិងប្រាប់ឲ្យពួកគេរក្សាអនាម័យគ្រប់ពេល។
លោកបន្តថា ដោយសារមានការផ្អាកសួរសុខទុក្ខ ដូច្នេះជនជាប់ឃុំអាចប្រើទូរស័ព្ទដែលផ្តល់ដោយខាងពន្ធនាគារចំនួន ២ដងក្នុងមួយសប្តាហ៍ និងម្តងប្រើបានយ៉ាងយូរបំផុត ៣០នាទី ដោយអ្នកជាប់ឃុំជាអ្នកចេញលុយផ្ទាល់ខ្លួន។
លោកបន្ថែមថា រហូតមកដល់ពេលនេះ មានអ្នកជាប់ឃុំថ្មីចំនួន ៥នាក់ ត្រូវបានធ្វើតេស្តរកមេរោគកូរ៉ូណា បន្ទាប់ពីពួកគេមានអាការៈក្តៅខ្លួននិងក្អក ប៉ុន្តែលោកថា អ្នកទាំង ៥នាក់នោះ សុទ្ធតែមានលទ្ធផលអវិជ្ជមាន។
បើតាមលោក ចាន់ គីមសេង ទោះក្នុងពន្ធនាគារមានស្ថានភាពណែនណាន់តាន់តាប់ក្តី ប៉ុន្តែលទ្ធភាពនៃការកើតមានមេរោគកូរ៉ូណានេះគឺទាបបំផុត ដោយសារការការពារពីអាជ្ញាធរ។
អាជ្ញាធររកឃើញជនបរទេស១នាក់ទៀតឆ្លងវីរុសកូរ៉ូណា ករណីសរុបកើនដល់១១៩
ភ្នំពេញ — ក្រសួងសុខាភិបាលកម្ពុជាបានប្រកាសថា រកឃើញករណីឆ្លងវីរុសកូរ៉ូណា១ទៀត ដែលកើតលើជនបរទេស នាំឲ្យករណីឆ្លងទូទាំងប្រទេសកើនឡើងដល់ទៅ១១៩។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលដែលចេញផ្សាយនៅព្រឹកថ្ងៃសុក្រនេះ។
ក្រសួងបញ្ជាក់ថា មនុស្សដែលឆ្លងនោះ គឺជាស្រ្តីជនជាតិវៀតណាម អាយុ៣៤ឆ្នាំ ជាអ្នកទេសចរស្នាក់នៅខុនដូមួយកន្លែង នៅកោះពេជ្រ រាជធានីភ្នំពេញ។ ស្រ្តីម្នាក់នេះកំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀត។
បើតាមសេចក្តីប្រកាសព័ត៌មាន មនុស្ស៤នាក់ទៀតបានជាសះស្បើយពីជំងឺ។ គិតត្រឹមថ្ងៃសុក្រនេះ សរុបអ្នកជាសះស្បើយ មានទៅដល់៧២នាក់។
កាលពីថ្ងៃព្រហស្បតិ៍ ក្រសួងសុខាភិបាលបានប្រកាសថា អ្នកជំងឺម្នាក់ដែលជាសះស្បើយហើយ តែកើតជំងឺកូវីដ១៩នេះឡើងវិញ ក្រោយធ្វើតេស្តរកវីរុស១៥ថ្ងៃក្រោយ។
គួរបញ្ជាក់ថា រដ្ឋាភិបាលកម្ពុជាបាននិងកំពុងរឹតបន្តឹងការធ្វើដំណើររបស់ប្រជាពលរដ្ឋក្នុងឱកាសចូលឆ្នាំខ្មែរនេះ ក្នុងនោះគោលដៅចម្បង គឺកុំឲ្យកម្មកររោងចក្រធ្វើដំណើរទៅស្រុកកំណើត ដើម្បីបញ្ចៀសលទ្ធភាពនៃការឆ្លងទៅសហគមន៍៕
- ដោយ ស៊ុន ណារិន
ភ្នំពេញ — លោកនាយករដ្ឋមន្រ្តី ហ៊ុន សែន នៅថ្ងៃព្រហស្បតិ៍នេះ បានចេញបទបញ្ជាមួយ ដោយដាក់កំហិតការធ្វើដំណើរក្នុងប្រទេស ដែលជាបទបញ្ជាមួយ ត្រូវបានមើលឃើញថាក្នុងគោលដៅទប់ស្កាត់ការធ្វើដំណើររបស់កម្មករទៅស្រុកកំណើត។
កាលពីថ្ងៃអង្គារ លោក ហ៊ុន សែន បានប្រកាសថារដ្ឋាភិបាលសម្រេចលុបចោលការឈប់សម្រាកថ្ងៃចូលឆ្នាំខ្មែរសម្រាប់អ្នកធ្វើការរដ្ឋនិងឯកជនក្នុងនោះមានកម្មកររោងចក្ររាប់ម៉ឺននាក់ផងដែរដើម្បីបញ្ចៀសការធ្វើដំណើរទៅស្រុកកំណើតនិងការជួបជុំគ្នាដែលអាចនាំមកនូវហានិភ័យនៃការឆ្លងវីរុសកូរ៉ូណា។ ប៉ុន្តែកម្មករហាក់មិនពេញចេញនឹងសេចក្តីសម្រេចនេះ ហើយពួកគេចង់ត្រឡប់ទៅស្រុកកំណើតរបស់គេ។
ក្នុងបទបញ្ជារបស់រដ្ឋាភិបាលដែលចេញផ្សាយនៅថ្ងៃព្រហស្បតិ៍នេះ រដ្ឋាភិបាលបានបញ្ជាថា ហាមឃាត់ការធ្វើដំណើរក្នុងប្រទេស រួមមានការធ្វើដំណើរឆ្លងកាត់ចេញចូលរាជធានីភ្នំពេញ តែមិនប៉ះពាល់ការធ្វើដំណើរផ្ទៃក្នុងក្នុងរាជធានីភ្នំពេញនោះទេ។ រដ្ឋាភិបាលក៏ហាមឃាត់ការធ្វើដំណើរឆ្លងកាត់ពីស្រុកមួយទៅស្រុកមួយនិងការធ្វើដំណើរឆ្លងកាត់ពីខេត្តមួយទៅខេត្តមួយផងដែរ។
បើតាមបទបញ្ជារបស់រដ្ឋាភិបាល ការហាមឃាត់នេះត្រូវលើកលែងចំពោះការដឹកជញ្ជូនទំនិញគ្រប់ប្រភេទ ទាំងផ្លូវគោក ផ្លូវទឹក និងផ្លូវដែករថយន្តធ្វើដំណើររបស់មន្រ្តីរាជការស៊ីវិលគ្រប់ស្ថាប័នរដ្ឋ ទាំងថ្នាក់ជាតិ និងក្រោមជាតិ រថយន្តរបស់កម្លាំងប្រដាប់អាវុធគ្រប់ប្រភេទ រថយន្តសង្រ្គោះបន្ទាន់ រថយន្តពន្លត់អគ្គិភ័យ និងរថយន្តដឹកជញ្ជូនសម្រាម និងកាកសំណល់។
ក្នុងនោះ ក៏មានការលើកលែងចំពោះការដឹកជញ្ជូនកម្មករទៅកាន់ទីកន្លែងការងារនៅតាមរោងចក្រ សហគ្រាស ដែលត្រូវមានប័ណ្ណអនុញ្ញាតចេញដោយក្រសួងការងារ ឬមន្ទីរការងារ និងការធ្វើដំណើររបស់ពលរដ្ឋទៅមន្ទីរពេទ្យ ឬមណ្ឌលសុខភាពដែលនៅជិតបំផុត។
រដ្ឋាភិបាលបញ្ជាក់ថា បទបញ្ជានេះមានប្រសិទ្ធភាពចាប់ពីម៉ោង១២យប់ថ្ងៃទី៩ ខែមេសា ដល់ម៉ោង១២យប់ ថ្ងៃទី១៦ ខែមេសា ឆ្នាំ២០២០។