- ដោយ ស៊ុន ណារិន
អាជ្ញាធរកម្ពុជារកឃើញអ្នកជាសះស្បើយម្នាក់ កើតជំងឺកូវីដ១៩ ឡើងវិញ
ភ្នំពេញ — ក្រសួងសុខាភិបាលបានប្រកាសថា រកឃើញករណីឆ្លងវីរុសកូរ៉ូណា១នាក់ទៀត ដែលកើតលើជនបរទេស និងអ្នកជំងឺម្នាក់ដែលជាសះស្បើយហើយ តែកើតជំងឺកូវីដ១៩នេះឡើងវិញ។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលដែលចេញផ្សាយនៅព្រឹកថ្ងៃព្រហស្បតិ៍នេះ។
ការឆ្លងថ្មីដែលកើតឡើងលើជនជាតិចិននេះ នាំឲ្យករណីឆ្លងទូទាំងប្រទេសកើនឡើងដល់ទៅ១១៨។ ក្រសួងបញ្ជាក់ថា ជនជាតិចិនដែលឆ្លងនោះ គឺជាស្រ្តីអាយុ៣០ឆ្នាំ ជាភ្ញៀវទេសចរ និងមានបំណងរកស៊ីបើកហាងនៅកម្ពុជា ហើយស្នាក់នៅបណ្តោះអាសន្ននៅភ្នំពេញ។ ស្រ្តីនោះជាអ្នកប៉ះពាល់ផ្ទាល់ជាមួយជនបរទេសដែលត្រូវបានរកឃើញថាផ្ទុកវីរុសកូរ៉ូណា កាលពីកន្លងទៅ។
ក្រសួងបន្ថែមថា បុរសខ្មែរម្នាក់អាយុ៤០ឆ្នាំ រស់នៅភ្នំពេញ ដែលបានជាសះស្បើយហើយ ប៉ុន្តែត្រូវបានធ្វើតេស្តរកឃើញមេរោគឡើងវិញ ក្រោយពីជាសះស្បើយ១៥ថ្ងៃ។
បើតាមសេចក្តីប្រកាសព័ត៌មានរបស់ក្រសួងសុខាភិបាល មនុស្ស៦នាក់ទៀតបានជាសះស្បើយពីជំងឺនះនៅថ្ងៃនេះ។ គិតត្រឹមថ្ងៃព្រហស្បតិ៍នេះ សរុបអ្នកជាសះស្បើយ មានទៅដល់៦៨នាក់។
កន្លងទៅ អ្នកដែលជាសះស្បើយ ត្រូវបានក្រសួងសុខាភិបាលអនុញ្ញាតឲ្យទៅផ្ទះ តែពួកគេត្រូវត្រឡប់មកធ្វើតេស្តឡើងវិញ ក្រោយរយៈពេល២សប្តាហ៍។ ក្រសួងបានណែនាំពួកគេឲ្យនៅឆ្ងាយពីក្រុមគ្រួសារ និងរក្សាអនាម័យជាប្រចាំ។
លោក ម៉ាត់លី អាយុ៤១ឆ្នាំ នៅខេត្តបាត់ដំបង បានថ្លែងប្រាប់ VOA នៅថ្ងៃព្រហស្បតិ៍នេះថា លោកបានជាសះស្បើយពីជំងឺនេះ កាលពីថ្ងៃទី២៤ ខែមីនា ហើយត្រឡប់ទៅផ្ទះវិញ។ លោកនឹងត្រូវធ្វើតេស្តជាថ្មីរកវីរុសនេះនៅល្ងាចថ្ងៃព្រហស្បតិ៍ ទី៩ ខែមេសា។ ប៉ុន្តែលោកថា សុខភាពរបស់លោកមិនប្រែប្រួលនោះទេ។
លោកមានប្រសាសន៍ថា៖ «សុខភាពរបស់ខ្ញុំនេះធម្មតា ក្អកក៏អត់មាន ផ្តាសាយក៏អត់មាន ក្តៅក៏អត់មាន ដូចយើងរស់នៅធម្មតា»។ លោកបន្តថាការរស់នៅក្នុងផ្ទះ លោកស្នាក់នៅជាមួយមនុស្ស៣នាក់ផ្សេងទៀត រួមមានកូន២នាក់ និងបងថ្លៃ តែពួកគេមានបន្ទប់ផ្សេងៗគ្នា។
លោកបញ្ជាក់ថា៖ «នៅដាច់ដោយឡែកពីគ្នាដែរ តែវាតែងតែដើរជួបគ្នាខ្លះដែរហើយ»៕
- ដោយ កាន់ វិច្ឆិកា
ភ្នំពេញ — លោកនាយករដ្ឋមន្រ្តីហ៊ុន សែន កាលពីថ្ងៃអង្គារ បានប្រកាសថា កម្មកររោងចក្រកាត់ដេរនិងស្បែកជើងដែលត្រូវព្យួរការងារដោយសាររោងចក្រផ្អាកផលិតកម្មព្រោះមេរោគកូរ៉ូណានោះ នឹងទទួលបានអត្ថប្រយោជន៍ ៧០ដុល្លារក្នុងមួយខែ ប៉ុន្តែអ្នកធ្វើការក្នុងវិស័យកាត់ដេរបារម្ភថា ប្រាក់នេះមិនគ្រប់សម្រាប់ជីវភាពរបស់ពួកគេទេ។
ក្នុងសន្និសីទស្តីពីបច្ចុប្បន្នភាពជំងឺកូវីដ-១៩នៅថ្ងៃអង្គារលោកនាយករដ្ឋមន្រ្តី ហ៊ុន សែន ថ្លែងថា ក្រោយរោងចក្រជាង ១០០ បានស្នើសុំព្យួរព្រោះតែខ្វះវត្ថុធាតុដើម និងមិនមានអ្នកបញ្ជាទិញដោយសារតែមេរោគកូរ៉ូណារាតត្បាត រដ្ឋាភិបាលសម្រេចផ្តល់ឲ្យកម្មករដែលត្រូវបានព្យួរការងារចំនួន ៤០ដុល្លារ និងម្ចាស់រោងចក្រផ្តល់ឲ្យ ៣០ដុល្លារក្នុងមួយខែ។
លោកបន្តថា ចំនួននេះតិចជាងការសម្រេចលើកមុនដែលរដ្ឋផ្តល់ឲ្យ ២០ភាគរយ ហើយម្ចាស់រោងចក្រផ្តល់ឲ្យ ៤០ភាគរយនៃប្រាក់ឈ្នួលអប្បបរមា ១៩០ដុល្លារ សរុបជាគឺ ១១៤ដុល្លារ។ ប៉ុន្តែលោកហ៊ុន សែនថា ប្រាក់អត្ថប្រយោជន៍៧០ដុល្លារនេះជាលទ្ធភាពដែលរដ្ឋាភិបាលនិងម្ចាស់រោងចក្រអាចធ្វើបាន។
«កម្មករម្នាក់នឹងទទួលបានត្រឹមតែ៧០ទេតែមិនតម្រូវឲ្យកម្មករនេះទៅធ្វើការហ្វឹកហាត់ដូចពេលមុនទេ។ពេលមុនថាអ្នកឯងទទួលបាននូវការឧបត្ថម្ភរយៈពេល ៦ខែ តម្រូវឲ្យហ្វឹកហាត់៤ខែ និងត្រៀម ២ខែទៀត។ ប៉ុន្តែឥឡូវអត់ហ្វឹកហាត់បានទេ ដោយសារតែយើងបានបិទអស់ហើយនូវកន្លែងបណ្តុះបណ្តាលវិជ្ជាជីវៈផ្សេង»។
អ្នកស្រីរស់ ធាវី កម្មការិនីកាត់ដេរនៅរោងចក្រ Crystal Land Martin ក្នុងស្រុកខ្សាច់កណ្តាលខេត្តកណ្តាល និយាយថា អ្នកស្រីត្រូវបានព្យួរការងាររយៈពេលពីរខែ ដោយចាប់ផ្តើមពីថ្ងៃទី១ ខែមេសា។ អ្នកស្រីបន្តថា អ្នកស្រីត្រូវបានរោងចក្របើកឲ្យ ៤០ភាគរយនៃប្រាក់ខែគោលដែលស្មើនឹង ៧៥ដុល្លារក្នុងមួយខែ ប៉ុន្តែមិនទាន់ទទួលបានការផ្តល់ពីរដ្ឋាភិបាលចំនួន ២០ភាគរយនោះទេ។
- ដោយ ស៊ុន ណារិន
អាជ្ញាធររកឃើញពលរដ្ឋកម្ពុជា២នាក់ទៀតឆ្លងវីរុសកូរ៉ូណា ករណីសរុបកើនដល់១១៧
ភ្នំពេញ — ក្រសួងសុខាភិបាលបានប្រកាសថា រកឃើញករណីឆ្លងវីរុសកូរ៉ូណា២នាក់ទៀត ដែលកើតលើពលរដ្ឋកម្ពុជា នាំឲ្យករណីឆ្លងទូទាំងប្រទេសកើនឡើងដល់ទៅ១១៧។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលដែលចេញផ្សាយនៅព្រឹកថ្ងៃពុធនេះ។
ក្រសួងបញ្ជាក់ថា មនុស្សដែលឆ្លងនោះ មានស្រ្តីម្នាក់ អាយុ៤៥ឆ្នាំ ជាភរិយារបស់បុរស ដែលមានវីរុសកូរ៉ូណា កាលពីកន្លងទៅ។ ស្រ្តីនោះត្រូវដាក់ឲ្យសម្រាកនៅមណ្ឌលសុខភាពចាក់អង្រែក្រោម រាជធានីភ្នំពេញ។ អ្នកឆ្លងម្នាក់ទៀត គឺជាបុរស អាយុ៤៧ឆ្នាំ ត្រូវជាស្វាមីរបស់ស្រ្តីម្នាក់រស់នៅសង្កាត់ជ្រោយចង្វារ ខណ្ឌជ្រោយចង្វារ ដែលមានផ្ទុកវីរុសកូរ៉ូណានេះដែរ។ បើតាមក្រសួងសុខាភិបាល បុរសនេះជាមិត្តភក្តិរបស់បុរសជនជាតិចិនចូលមកកម្ពុជា នៅថ្ងៃទី២០ ខែមីនា ឆ្នាំ២០២០ ហើយបានចាកចេញពីកម្ពុជា នៅថ្ងៃទី៣ ខែមេសា និងត្រូវបានរកឃើញថាផ្ទុកវីរុសកូរ៉ូណា ដោយអាជ្ញាធរសុខាភិបាលនៅប្រទេសចិន។
ក្រសួងបញ្ជាក់ថាជនជាតិចិនរូបនេះ ឧស្សាហ៍ចេញចូលប្រទេសកម្ពុជា និងជាមិត្តប្រុសរបស់ស្រ្តីជនជាតិវៀតណាម ដែលត្រូវបានរកឃើញផ្ទុកវីរុសកូរ៉ូណា និងត្រូវបានផ្សព្វផ្សាយដោយក្រសួងសុខាភិបាលកម្ពុជា កាលពីថ្ងៃអង្គារ។
រដ្ឋាភិបាលកម្ពុជាមិនបានបិទការធ្វើដំណើរពីប្រទេសចិន និងបណ្តាប្រទេសផ្សេងៗ មកកម្ពុជានោះទេ។ លោក ហ៊ុន សែន បានថ្លែងកាលពីថ្ងៃអង្គារថា ដោយសារប្រទេសទាំងនោះបានបិទជើងយន្តហោះ និងការធ្វើដំណើរអស់ហើយ ដូច្នេះកម្ពុជាមិនបាច់បិទនោះទេ។
បើតាមសេចក្តីប្រកាសព័ត៌មានរបស់ក្រសួងសុខាភិបាល មនុស្ស៥នាក់ទៀតបានជាសះស្បើយពីជំងឺ។ គិតត្រឹមថ្ងៃពុធនេះ សរុបអ្នកជាសះស្បើយ មានទៅដល់៦៣នាក់៕
- ដោយ កាន់ វិច្ឆិកា
លោក ហ៊ុន សែន ការពារច្បាប់ដាក់ប្រទេសក្នុងភាពអាសន្នថា មិនមែនជាលេសដើម្បីបំបិទសិទ្ធិ
ភ្នំពេញ — លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះ បានថ្លែងការពារថា ការបង្កើតច្បាប់ដាក់ប្រទេសក្នុងភាពអាសន្ន គឺដើម្បីអនុវត្តពេលស្ថានភាពទាំងឡាយណា «ដែលមិនអាចគ្រប់គ្រងបាន» នាពេលខាងមុខ ហើយថា មិនមែនជាលេស ដើម្បីបំបិទសិទ្ធិបញ្ចេញមតិនោះទេ។
ក្នុងសន្និសីទស្តីពីបច្ចុប្បន្នភាពជំងឺកូវីដ-១៩ នៅវិមានសន្តិភាព លោក ហ៊ុន សែន ថ្លែងថា សេចក្តីព្រាងច្បាប់ស្តីអំពីការដាក់ប្រទេសក្នុងភាពអាសន្នដែលកំពុងពិនិត្យដោយរដ្ឋសភានោះ បង្កើតឡើងដើម្បីជាឧបករណ៍ច្បាប់សម្រាប់អនុវត្តពេលស្ថានការណ៍ណាមួយដែល «មិនអាចគ្រប់គ្រងបាន» នាពេលអនាគត។ លោកបន្តថា បើទោះបីជាច្បាប់នេះកំពុងបង្កើតឡើង ប៉ុន្តែលទ្ធភាពនៃការប្រកាសដាក់ប្រទេសក្នុងភាពអាសន្ន អាចនឹងមានត្រឹមតែ «០,១ភាគរយ» ប៉ុណ្ណោះ។
ក្នុងសន្និសីទសារព័ត៌មានដែលលោក ហ៊ុន សែន បើកឲ្យអ្នកសារព័ត៌មានសួរសំណួរ អ្នកយកព័ត៌មាន VOA បានសួរថា តើស្ថានភាពមិនអាចគ្រប់គ្រងណាខ្លះក្រៅពីការរាតត្បាតមេរោគកូរ៉ូណា ដែលនឹងត្រូវប្រកាសដាក់ប្រទេសក្នុងភាពអាសន្ន?
លោក ហ៊ុន សែន មានប្រសាសន៍ថា៖ «ក្រៅពីអាសន្នខាងសុខភាពសាធារណៈ វាមានអាសន្នខាងផ្នែកស្អីទៅទៀត សង្គ្រាម ឬក៏ស្អីៗថែមទៀត។ វាមានបញ្ហាអស់ទាំងនោះដែលទាមទារត្រូវមានការដាក់ លើការជាក់ស្តែង។ អង្កាល់ពីអាមេរិកមកជួយ លន់ នល់ គ្រាន់តែភ្នំពេញប៉ុណ្ណឹង ត្រួតត្រាភ្នំពេញមួយ ដាក់បំរាមគោចរណ៍ប៉ុន្មានទៅ? ប្រើច្បាប់អាជ្ញាសឹកប៉ុន្មានដង? អានេះនិយាយឲ្យពិត។ ហេតុអីបានជាកម្ពុជាមិនអាចធ្វើបាន ហើយមកបន្ទោសថា ឆ្លៀតយកអាកូវីដដើម្បីធ្វើច្បាប់ដាក់ប្រទេសក្នុងគ្រាអាសន្នដើម្បីបំបិទមាត់ បិទសិទ្ធិអ្នកបញ្ចេញមតិនៅពេលក្រោយ»។