នៅថ្ងៃដែលពួកឧទ្ទាមស៊ីរី ដែលគាំទ្រដោយតួកគី ដណ្ដើមទីក្រុងនៅភាគខាងជើងប្រទេសស៊ីរីបានពីពួកជ្រុលនិយមរដ្ឋឥស្លាម ដែលជាក្រុមជានិមិត្តរូបសំខាន់នៃពួកជីហាដឥស្លាមនោះ លោក John Kerry ដែលជាអ្នកការទូតជាន់ខ្ពស់សហរដ្ឋអាមេរិកមួយរូប ក៏បានជួបប្រជុំជាមួយនឹងសម្ព័ន្ធមិត្តអឺរ៉ុបរបស់ខ្លួននៅក្នុងទីក្រុងឡុងដ៍ ប្រទេសអង់គ្លេស នាថ្ងៃអាទិត្យនេះ ដើម្បីពិភាក្សារកវិធីបញ្ឈប់ជាបន្ទាន់នូវជម្លោះក្នុងប្រទេសស៊ីរី ដែលបានអូសបន្លាយអស់រយៈពេល ៦ ឆ្នាំមកហើយ។
លោក John Kerry បាននិយាយថា កិច្ចប្រជុំនៅក្នុងប្រទេសស្វីសជាមួយនឹងលោក Sergei Lavrov ដែលជាសមភាគីរុស្ស៊ីរបស់លោក និងជាមួយនឹងបណ្ដាប្រទេសអឺរ៉ុបខាងកើតជាច្រើនទៀតកាលពីថ្ងៃម្សិលមិញ បានបង្កើតនូវគំនិតថ្មីៗជាច្រើន ដែលចាំបាច់ត្រូវតែបន្តធ្វើ។ ប៉ុន្តែលោក Kerry មិនបានបញ្ជាក់លម្អិតអំពីគំនិតថ្មីៗទាំងនោះទេ។
កិច្ចពិភាក្សានៅក្នុងទីក្រុង Lausanne ប្រទេសស្វីស បានធ្វើឡើងនៅក្នុងរយៈពេលមិនដល់ពីរសប្តាហ៍ផង បន្ទាប់ពីរដ្ឋាភិបាលក្រុងវ៉ាស៊ីនតោនបានផ្អាកកិច្ចពិភាក្សាទ្វេភាគីជាមួយរដ្ឋាភិបាលក្រុងមូស្គូ បន្ទាប់ពីការទទួលរងបរាជ័យនៃកិច្ចព្រមព្រៀងឈប់បទបាញ់គ្នានៅក្នុងទីក្រុង Aleppo ប្រទេសស៊ីរី ដែលមានលក្ខណៈផុយស្រួយរួចទៅហើយនោះ។ លោក Kerry បានប្រាប់អ្នកសារព័ត៌មានថា អ្នកចរចាបានប្រឹងប្រែងធ្វើការយ៉ាងខ្លាំង ដើម្បីឈានទៅដល់ការសម្រេចបាននូវកិច្ចព្រមព្រៀងនេះ។
សហរដ្ឋអាមេរិក និងដៃគូសម្ព័ន្ធមិត្តរបស់ខ្លួន ចោទប្រកាន់រដ្ឋាភិបាលលោកប្រធានាធិបតី Bashar al-Assad នៃប្រទេសស៊ីរី និងសម្ព័ន្ធមិត្តរុស្ស៊ីរបស់ខ្លួន ពាក់ព័ន្ធនឹងយុទ្ធនាការទម្លាក់គ្រាប់បែកដ៏ប្រល័យ និងគ្មានការពិចារណាត្រឹមត្រូវនៅភាគខាងកើតទីក្រុង Aleppo ដែលកាន់កាប់ដោយពួកឧទ្ទាម។
អ្នកសង្កេតស្ថានការណ៍នៅក្នុងប្រទេសស៊ីរីថា ការវាយប្រហារតាមអាកាស និងការវាយប្រហារដោយកាំភ្លើងធំរបស់រុស្ស៊ី និងស៊ីរី បានសម្លាប់ជនស៊ីវិលរាប់រយនាក់នៅក្នុងទីក្រុង Aleppo និងបានធ្វើឲ្យមនុស្សច្រើនជាង ២៥០.០០០នាក់ផ្សេងទៀត មិនមានលទ្ធភាពទទួលបានតម្រូវការផ្គត់ផ្គង់ចាំបាច់ប្រចាំថ្ងៃចាប់តាំងពីខែកញ្ញាមក៕
