នៅក្នុងដំណើរទស្សនកិច្ចលើកដំបូងរបស់លោកទៅកាន់ប្រទេសអេត្យូពី ក្នុងទ្វីបអាហ្វ្រិក កាលពីថ្ងៃព្រហស្បតិ៍ ទី៣ ខែសីហា រដ្ឋមន្រ្តីការបរទេសជប៉ុនលោក Yoshimasa Hayashi បានបង្ហាញក្តីសង្ឃឹមថា ជប៉ុននិងអេត្យូពីអាចធ្វើការរួមគ្នាលើការសាររើឡើងវិញនូវគម្រោងផ្តួចផ្តើមគ្រាប់ធញ្ញជាតិសមុទ្រខ្មៅ (Black Sea Grain Initiative)។
រដ្ឋមន្រ្តីការបរទេសរូបនេះបានលើកឡើងថា លោកព្រួយបារម្ភពីផលប៉ះពាល់នៃសង្រ្គាមរុស្ស៊ីនៅអ៊ុយក្រែនមកលើសន្តិសុខស្បៀងនៅអាហ្វ្រិក បន្ទាប់ពីកិច្ចប្រជុំផ្ទាល់មុខមួយទល់មួយជាមួយឧបនាយករដ្ឋមន្រ្តីអេត្យូពីលោក Demeke Mekonnen។
រដ្ឋមន្រ្តីការបរទេសជប៉ុនលោក Hayashi ថ្លែងថា៖ «ជប៉ុនមិនពេញចិត្តនឹងការបញ្ចប់គម្រោងផ្តួចផ្តើមគ្រាប់ធញ្ញជាតិតំបន់សមុទ្រខ្មៅដោយរុស្ស៊ី ហើយជប៉ុនសង្ឃឹមថា នឹងសហការជាមួយអេត្យូពីឆ្ពោះទៅកាន់ការសើរើឡើងវិញនូវគម្រោងនេះ»។
ចាប់តាំងពីការចាប់ផ្តើមកិច្ចព្រមព្រៀងគ្រាប់ធញ្ញជាតិសមុទ្រខ្មៅ ដែលបានចូលជាផ្លូវការកាលពីខែកក្កដា ឆ្នាំ២០២២ អង្គការសហប្រជាជាតិបានគ្រប់គ្រងលើការនាំចេញគ្រាប់ស្រូវសាឡីជាង ២៦២ តោនទៅកាន់ប្រទេសអេត្យូពី។
ភាពមិនប្រក្រតីផ្នែកអាកាសធាតុដែលនាំឱ្យមានគ្រោះរាំងស្ងួតធ្ងន់ធ្ងរ និងជម្លោះនៅអេត្យូពីបានធ្វើឱ្យមនុស្សជាង ២០លាននាក់ត្រូវការជំនួយស្បៀងអាហារ។ លោក Hayashi ក៏បានពិភាក្សាអំពីការគាំទ្ររបស់រដ្ឋាភិបាលជប៉ុនចំពោះកិច្ចព្រមព្រៀងសន្តិភាព ដែលបានបញ្ចប់សង្រ្គាមនៅតំបន់ Tigray នៅអេត្យូពីផងដែរ។
លោកថ្លែងថា៖«ខ្ញុំបានលើកឡើងពីការគាំទ្ររបស់ជប៉ុនចំពោះការអនុវត្តកិច្ចព្រមព្រៀងសន្តិភាព ដែលត្រូវបានចុះហត្ថលេខារវាងរដ្ឋាភិបាលអេត្យូពី និងកងរណសិរ្សរំដោះប្រជាជនតំបន់ Tigray (TPLF) និងបានថ្លែងថា ជប៉ុននឹងពិចារណាដិតដល់ពីការសហការបន្តទៅមុខឆ្ពោះទៅកាន់ការអនុវត្តកិច្ចព្រមព្រៀងនេះ»។
លោក Demeke ដែលបម្រើការជារដ្ឋមន្រ្តីការបរទេសអេត្យូពីផងដែរ បាននិយាយថា ភាគីទាំងពីមានកិច្ចពិភាក្សាប្រកបដោយផ្លែផ្កាលើបញ្ហាប្រយោជន៍រួម។
លោក Demeke ថ្លែងថា៖ «នៅក្នុងកិច្ចពិភាក្សារបស់យើង យើងបានប្តេជ្ញាពង្រឹងភាពជាដៃគូនៅក្នុងវិស័យនយោបាយ សេដ្ឋកិច្ច និងសង្គម។ ជាពិសេស យើងបានស្តារឡើងវិញនូវការប្តេជ្ញាពង្រឹងការវិនិយោគ ពាណិជ្ជកម្ម និងកិច្ចសហប្រតិបត្តិការរបស់យើង»។
ដំណើរទស្សនកិច្ចរបស់រដ្ឋមន្រ្តីការបរទេសជប៉ុនទៅកាន់តំបន់អាស៊ីភាគនិរតី និងអាហ្វ្រិក បានបញ្ចប់កាលពីថ្ងៃព្រហស្បតិ៍ នៅអេត្យូពី បន្ទាប់ពីលោកបានធ្វើដំណើរទស្សនកិច្ចទៅកាន់ប្រទេសអាហ្វ្រិកខាងត្បូង និងអ៊ូហ្កង់ដានៅមុននោះ៕
ប្រែសម្រួលដោយលោក ណឹម សុភ័ក្រ្តបញ្ញា
ជប៉ុននិងអេត្យូពីនឹងសើរើគម្រោងផ្តួចផ្តើមគ្រាប់ធញ្ញជាតិសមុទ្រខ្មៅ
រដ្ឋធានីអាឌីសអាបេបា ប្រទេសអេត្យូពី —
