ខ្យល់ព្យុះសង្ឃរា Irma បានកើនឥទ្ធិពលយ៉ាងខ្លាំង ពេលដែលវាបោកបក់កាត់ផ្ទៃទឹកនៃច្រកសមុទ្រនានានៃរដ្ឋ Florida សហរដ្ឋអាមេរិក ដោយពាំនាំនូវខ្យល់ និងភ្លៀងជះមកលើប្រជុំកោះនានានៃរដ្ឋ Florida។
ខ្យល់ព្យុះសង្ឃរា Irma ដែលឥឡូវនេះត្រូវបានចាត់ចូលជាខ្យល់ព្យុះសង្ឃរាប្រភេទទី ៤ ត្រូវគេរំពឹងថានឹងពាំនាំនូវខ្យល់ដែលមានល្បឿនជិត ២១០ គីឡូម៉ែត្រក្នុងមួយម៉ោង ដែលអាចបណ្ដាលឲ្យមានការបំផ្លិចបំផ្លាញនៅតាមតំបន់នានានៃរដ្ឋ Florida ដែលជារដ្ឋមួយខានជួបប្រទះខ្យល់ព្យុះសង្ឃរាបែបនេះក្នុងរយៈពេលមួយសតវត្សកន្លងមកនេះ។
ខ្យល់ព្យុះសង្ឃរានេះត្រូវគេព្យាករណ៍ថានឹងបង្កជាព្យុះភ្លៀងនៅព្រឹកថ្ងៃអាទិត្យនេះ ដោយដំបូងបោកបក់កាត់ប្រជុំកោះនានានៃរដ្ឋ Florida មុនពេលវាបក់ឆ្ពោះទៅកាន់ឆ្នេរភាគខាងលិចនៃរដ្ឋ Florida នេះ។
កាលពីល្ងាចថ្ងៃសៅរ៍ម្សិលមិញ អភិបាលរដ្ឋ Florida លោក Rick Scott បានប្រកាសប្រាប់ប្រជាពលរដ្ឋនៅក្នុងរដ្ឋ Florida ថា រដ្ឋ Florida ស្ថិតនៅក្នុងស្ថានការណ៍ប្រកាសអាសន្ន ដោយលោកបានជំរុញឲ្យពួកគេចាកចេញពីតំបន់ដែលត្រូវជម្លៀស។
មនុស្សជាង ៧ ម៉ឺន ៥ ពាន់នាក់ បានចាកចេញពីផ្ទះសម្បែងទៅកាន់កន្លែងស្នាក់នៅបន្ទាន់បណ្ដោះអាសន្នចំនួនប្រហែល ៤ រយកន្លែង នៅក្នុងរដ្ឋ Florida។ ផ្ទះសម្បែងចំនួនប្រហែល ៧ ម៉ឺន ៦ ពាន់ខ្នង ត្រូវបានគេរាយការណ៍ថា គ្មានអគ្គិសនីប្រើប្រាស់រួចទៅហើយ។
ប្រធានាធិបតីសហរដ្ឋអាមេរិកលោក Donald Trump និងគណៈរដ្ឋមន្ត្រីរបស់លោកបានជួបប្រជុំគ្នាកាលពីថ្ងៃសៅរ៍ម្សិលមិញនៅឯមូលដ្ឋានយោធា Camp David ក្នុងរដ្ឋ Maryland ដើម្បីពិភាក្សាអំពីខ្យល់ព្យុះសង្ឃរា Irma នេះ៕
