ប្រទេសឥណ្ឌានិងអ៊ីរ៉ង់បានចុះហត្ថលេខាលើកិច្ចព្រមព្រៀងចំនួន៩ ក្នុងអំឡុងនៃដំណើរទស្សនកិច្ចដោយប្រធានាធិបតីអ៊ីរ៉ង់ ទៅកាន់រដ្ឋធានីញូវដែលី រួមមានកិច្ចព្រមព្រៀងដ៏សំខាន់មួយដែលជួលការត្រួតត្រាកិច្ចប្រតិបត្តិការមួយផ្នែកនៃកំពង់ផែ Chabahar នៃប្រទេសអ៊ីរ៉ង់ទៅឲ្យរដ្ឋាភិបាលក្រុងញូវដែលីរយៈពេល១៨ខែ។
ឥណ្ឌាកំពុងជួយអភិវឌ្ឍកំពង់ផែដើម្បីបង្កើតផ្លូវពាណិជ្ជកម្មយុទ្ធសាស្រ្តសម្រាប់ប្រទេសអាហ្វហ្គានីស្ថានដែលគ្មានសមុទ្រហើយនិងសាធារណរដ្ឋនានានៅតំបន់អាស៊ីកណ្តាល ដោយវៀងប្រទេសប៉ាគីស្ថានដែលជាគូសត្រូវ។
លោក Narendra Modi នាយករដ្ឋមន្រ្តីនៃប្រទេសឥណ្ឌានិងលោក Hassan Rouhani ប្រធានាធិបតីនៃប្រទេសអ៊ីរ៉ង់ក៏បានព្រមព្រៀងគ្នាដើម្បីបង្កើនការខំប្រឹងប្រែងធ្វើឲ្យមានស្ថិរភាពដល់ប្រទេសអាហ្វហ្គានីស្ថានដែលហែកហួរដោយសង្គ្រាមបន្ទាប់ពីធ្វើការចរចានៅរដ្ឋធានីញូវដែលី។
លោកនាយករដ្ឋមន្រ្តីឥណ្ឌា Modi បាននិយាយថា៖ «ប្រទេសយើងទាំង២នឹងធ្វើការងារដើម្បីធ្វើឲ្យសន្តិភាពស្ថិរភាព វិបុលភាពនិងប្រព័ន្ធរបបពហុបក្សក្នុងប្រទេសអាហ្វហ្គានីស្ថាន។ យើងចង់ឃើញតំបន់របស់យើងគ្មានអំពើភេរវកម្ម»។ក្នុងអំឡុងនៃដំណើរទស្សនកិច្ចរយៈពេល៣ថ្ងៃទៅកាន់រដ្ឋធានីញូវដែលី មេដឹកនាំអ៊ីរ៉ង់ដែលប្រឈមការគំរាមកំហែងការដាក់ទណ្ឌកម្មថ្មី បានផ្តោតលើការស្វះស្វែងរកការវិនិយោគទុនពីប្រទេសឥណ្ឌានៅពេលដែលលោកព្យាយាមធ្វើឲ្យសេដ្ឋកិច្ចរបស់ប្រទេសលោករីកចម្រើន។
លោកនាយករដ្ឋមន្រ្តីឥណ្ឌា Modi បានបញ្ជូនសាដោយធ្វើការបញ្ជាក់ឡើងវិញថា ប្រទេសទាំង២ចង់ពង្រីកកិច្ចសហប្រតិបត្តិការខាងសេដ្ឋកិច្ច ហើយនឹងបង្កើនការទាក់ទងខាងពាណិជ្ជកម្ម។
រដ្ឋាភិបាលញូវដែលី ជាអ្នកទិញប្រេងនិងឧស្ម័នដ៏សំខាន់របស់អ៊ីរ៉ង់ ហើយបានរក្សាទំនាក់ទំនងពាណិជ្ជកម្មជាមួយរដ្ឋាភិបាលអ៊ីរ៉ង់នៅពេលដែលខ្លួនប្រឈមការដាក់ទណ្ឌកម្មអន្តរជាតិលើកម្មវិធីនុយក្លេអ៊ែរបស់ខ្លួន៕
